SAN JUAN 8:46 - Chatino Tataltepec

⁴⁶ Ná caca ñacui̱ ma̱ cha' ntsu'u xqui'ya na'; pana lo'o ta na' sca cha' liñi lo'o ma̱, ¿ni cha' laca ná jlya ti' ma̱ 'na li'?

SAN JUAN 8:46 ပူးပေါင်းရင်းမြစ်များ

SAN MATEO 21:25

Tso'o lacua, nu lo'o tya ntyucuatya Juan ji'i̱ ngu', ¿ha chacuayá' ji'i̱ ycui' Ndyosi ngua bi'? ¿Ha chacuayá' ji'i̱ ñati̱ ti ngua bi'? Li' cuaana ti nchcui' ngu' nu laca loo bi' lo'o tya'a ngu': ―¿Ñi'ya̱ xacui̱ na cha' ji'i̱ yu? Si ñacui̱ na: “Chacuayá' ji'i̱ ycui' Ndyosi ntyucuatya Juan bi' ji'i̱ ngu'”, ná tso'o tyu'u cha' jua'a̱; hora ti ñacui̱ yu ji'na li': “¿Ni cha' ná ngusñi ma̱ cha' nu nchcui' yu lacua?”

SAN MARCOS 11:31

Li' cuaana ti nchcui' nu ngu' tlyu bi' lo'o tya'a ngu': ―Si ñacui̱ na cha' ycui' Ndyosi ngulo cña ji'i̱ jyo'o Juan bi', li' xacui̱ yu cha' ji'i̱ cua: “¿Ni cha' laca ná ndaquiya' ma̱ ji'i̱ cha' nu nchcui' yu lacua?”

SAN JUAN 14:30

’Nga'aa quiña'a̱ tsa cha' chcui' na' lo'o ma̱ juani ―nacui̱ Jesús li'―. Cua lijya̱ nu xña'a̱ nu laca loo nde chalyuu, cua lijya̱ nu bi' ca su ndi'i̱ na re. Ná ntsu'u chacuayá' ji'i̱ nu bi' cha' caca loo jna'.

SAN JUAN 15:10

Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.

SAN JUAN 16:8

Nu lo'o ca̱a̱ Xtyi'i ycui' Ndyosi lo yuu chalyuu ―nacui̱ Jesús―, cua'ni Ni cha' cube ti' lcua ti tya'a ñati̱ chalyuu cha' ntsu'u qui'ya nu ngusta ycui' Ndyosi ji'i̱ ngu'; jua'a̱ cua'ni Ni cha' tyi'u ti' ñati̱ jna', cha' liñi tsa laca ycui' na'; jua'a̱ cua'ni Ni cha' ca cuayá' ti' ñati̱ cha' ntsu'u cha' cua'ni cuayá' ycui' Ndyosi ji'i̱ lcaa ñati̱ chalyuu ―nacui̱―.

SAN JUAN 18:37

―¿Ha laca nu'u̱ rey lacua? ―nacui̱ Pilato. Li' nguxtyacui Jesús cha' lo'o nu cusu' bi' chaca quiya': ―Nu'u̱ nacui̱ cha' laca na' rey. Cña nu ntsu'u 'na laca cha' chcui' liñi na' ji'i̱ lcaa cha' nu ntsu'u slo ycui' Ndyosi lo'o ngu'; bi' cha' ngula na' chalyuu, bi' cha' lijya̱ na' lo yuu cha' chcui' liñi na' lcaa cha' ji'i̱ ycui' Ndyosi lo'o ñati̱. Cuna ngu' lcaa cha' nu nchcui' na' si ná ndyacu̱' hique ngu' ji'i̱ cha' liñi bi'.

SAN JUAN 8:47

Lcaa ñati̱ nu nacui̱ cha' ycui' Ndyosi laca Sti ngu', tyaja'a̱ ngu' bi' cuna ngu' lcaa cha' nu nchcui' Ni lo'o ngu' ―nacui̱ Jesús ji'i̱ ngu' judío bi'―. Pana si'i sñi' ycui' Ndyosi laca cu'ma̱, bi' cha' ná nti' ma̱ cuna ma̱ cha' nu nchcui' na' lo'o ma̱ tsiya' ti.

SAN JUAN 8:7

Lo'o jua'a̱ nchcuane ngu' ji'i̱ Jesús chaca quiya'. Li' ndaca'a̱ liñi Jesús, nchcui' yu lo'o ngu' nu ya̱a̱ lo'o ji'i̱ nu cuna'a̱ bi': ―Lo'o ntsu'u tsaca cu'ma̱ nu ná ntsu'u qui'ya ji'i̱ ma̱ ―nacui̱ yu―, bi' caca nu cujui'i̱ quee ji'i̱ nu cuna'a̱ cua clyo.

2 CORINTIOS 5:21

Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

HEBREOS 4:15

Laca Jesús sti jo'ó nu laca loo la cuentya ji'na, lo'o jua'a̱ tya'na tsa ti' Jesús ña'a̱ yu ji'na. Cua jlo ti' yu cha' ntsu'u tsa quiya' lo'o cua cua'ni ti nu cuxi ngana ji'na, cha' nu lo'o tya ndi'i̱ Jesús lo yuu chalyuu, la cui' jua'a̱ lye tsa ngua'ni cuayá' nu xña'a̱ ji'i̱ yu, si cua'ni yu cha' cuxi. Pana nu Jesús bi' ni, ni sca cha' cuxi ná ngua'ni yu, bi' cha' taca caca yu sti jo'ó nu laca loo la cuentya ji'na, cha' jlo ti' Jesús ñi'ya̱ nñilo'o tsa nu xña'a̱ ji'na.

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

1 PEDRO 2:22

Ná ntsu'u ni sca qui'ya ji'i̱ nu Cristo bi', ni sca cha' cuiñi ná nchcui' yu;