SAN JUAN 4:44 - Chatino Tataltepec

⁴⁴ Cua nacui̱ yu cha' nga'aa ndu'ni chi̱ ngu' loo ñati̱ tya'a quichi̱ tyi ngu', si ta ñati̱ bi' cha' ji'i̱ ycui' Ndyosi lo'o ngu'; bi' cha' ndyaa yu nde Galilea chaca quiya'.

SAN JUAN 4:44 ပူးပေါင်းရင်းမြစ်များ

SAN MATEO 13:57

Jua'a̱ ngua cha' chi̱i̱ nti' ngu' ña'a̱ ngu' ji'i̱ Jesús, bi' cha' ndi'ya̱ nchcui' Jesús lo'o ngu' li': ―Lcaa se'i̱ ndu'ni tlyu ngu' ji'i̱ sca ñati̱ nu laca tu'ba ji'i̱ ycui' Ndyosi ―nacui̱ Jesús ji'i̱ ngu'―. Sca ti quichi̱ tyi yu, ná nduna ngu' bi' cha' nu nchcui' yu tsiya' ti; ni tya'a yu, ná ndaquiya' ngu' ji'i̱ yu.

SAN MARCOS 6:4

pana ndi'ya̱ laca cha' nu nda Jesús lo'o ngu' li': ―Lcaa ngu' xa' quichi̱ ni, ndu'ni tlyu ngu' ji'i̱ sca ñati̱ nu laca tu'ba ji'i̱ ycui' Ndyosi nchcui' Ni lo'o ngu' ―nacui̱ Jesús ji'i̱ ngu'―, pana ngu' tya'a quichi̱ tyi yu ni, ná ntaja'a̱ ngu' cuna ngu' cha' nu nchcui' yu tsiya' ti ―nacui̱ Jesús―. Lcaa tya'a yu, jua'a̱ ngu' tya'a ndi'i̱ yu, ná nduna ngu' cha' nu nchcui' yu ―nacui̱ Jesús ji'i̱ ngu'.

SAN LUCAS 4:24

Ta na' sca cha' liñi lo'o ma̱ lacua ―nacui̱ Jesús―. Macala su chcui' sca ñati̱ cha' ji'i̱ ycui' Ndyosi lo'o ngu' tya'a quichi̱ tyi yu, ná taquiya' ngu' ji'i̱ cha' nu nchcui' yu, cha' la cui' tya'a quichi̱ tyi ngu' laca yu.