SAN JUAN 20:31 - Chatino Tataltepec31 Cha' nu nscua lo quityi re ni, nscua bi' cha' taca jlya ti' ma̱ cha' Jesús laca Cristo nu cua nda ycui' Ndyosi ji'i̱ lijya̱ chalyuu, cha' taca xñi ma̱ cha' ji'i̱ Jesús, cha' laca yu nu sca ti Sñi' ycui' Ndyosi. Li' caja chalyuu tso'o nu ná nga'a̱ cha' tye ji'i̱ ma̱ chacuayá' ji'i̱ ycui' Jesús. အခန်းကိုကြည့်ပါ။ |
SAN JUAN 20:31
36 ပူးပေါင်းရင်းမြစ်များ
Lo'o nu sendaru nu nga'a̱ cua̱ ji'i̱ Jesús bi', lo'o nu capitán ji'i̱ sendaru bi', ngulacua tsa ti' ngu' bi' li'; tlyu tsa cha' ndyutsi̱i̱ ti' ngujui ji'i̱ ngu' bi' lo'o na'a̱ ngu' ñi'ya̱ ngua cha' bi', ñi'ya̱ ngua lo'o ngulacui̱ chalyuu. ―Chañi tsa cha' Sñi' ycui' Ndyosi laca jyo'o re ―nacui̱ nu ngu' sendaru bi'.
Li' nda xca̱ sca cha' lo'o: ―Ta ycui' Ndyosi Xtyi'i Ni cha' tya̱a̱ su ndi'i̱ nu'u̱, cha' tyu'ú tyucui ña'a̱ nu'u̱; sca cha' tlyu nu cua'ni ycui' Ndyosi nu laca loo caca cha' bi'. Nu lo'o cala sñi' nu'u̱, sca ñati̱ nu lubii tsa cuentya ji'i̱ ycui' Ndyosi caca cubi' nu cala bi', la cui' bi' laca nu caca naa Sñi' ycui' Ndyosi.
Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'.
’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.
Na cua nguscua jyo'o cusu' xi cha' lo quityi ji'i̱ ycui' Ndyosi nu ngua sa'ni; lcaa quityi bi' nchcui' cha' ntsu'u cha' ca̱a̱ sca ñati̱ tlyu lo yuu chalyuu tyempo nde loo la; bi' laca nu cuityi̱ yabe' nu ntsu'u ji'i̱ lcaa ñati̱, si xñi ngu' cha' ji'i̱ yu, nacui̱ cha' nu nscua lo quityi bi'. Na cua ndyalaa yu bi' lo yuu re juani, Jesús naa yu.
’Cua nslo ma̱ ji'i̱ nu qui'yu re nu ngua quicha yu nquicha' ―nacui̱ Pedro ji'i̱ ngu'―. Lo'o juani cua ngua'ni Jesús cha' ndyaca tso'o yu re, xqui'ya cha' jlya ti' ya ji'i̱ Jesús. Nchca tsa ji'i̱ nu Jesús bi' cua'ni cha' tyaca tso'o ñati̱; taca ña'a̱ ma̱ cha' chañi cha' bi', cha' ngua tso'o yu re juani.
Lcaa ñati̱ nu jlya ti' ji'i̱ Jesús, cha' laca yu Cristo nu cua nda ycui' Ndyosi ji'i̱ ya̱a̱ chalyuu, chañi cha' laca ngu' bi' sñi' ycui' Ndyosi. Ycui' Ndyosi laca Sti na, lo'o jua'a̱ ntsu'u tsa tyiquee na ña'a̱ na ji'i̱ Ni, bi' cha' ntsu'u tyiquee na ña'a̱ na ji'i̱ xa' la sñi' ycui' Ni, tya'a ngusñi na cha' ji'i̱ Jesús.
Cua jlo ti' na cha' cua ya̱a̱ nu sca ti Sñi' ycui' Ndyosi nde lo yuu chalyuu, lo'o jua'a̱ cua nda bi' chacuayá' cha' caca tyu'u cha' ji'na lo'o ycui' Ndyosi. Chañi cha' stu'ba ntsu'u tyiquee na lo'o ycui' Ndyosi juani, xqui'ya cha' stu'ba ntsu'u tyiquee na lo'o Jesucristo nu laca Sñi' ycui' ca Ni. Chañi cha' ycui' Ndyosi tsiya' ti laca nu Jesús bi', lo'o jua'a̱ chañi cha' ná nga'a̱ cha' tye chalyuu cucui nu ta Ni ji'na.
Lcaa ñati̱ nu tyatí̱ yu'u lo'o xa' la cha', ná ntsu'u cha' ji'i̱ ngu' bi' lo'o ycui' Ndyosi tsiya' ti, cha' ná cuayá' cha' ji'na lo'o jlya ti' na ji'i̱ Cristo, nti' ngu' bi'; pana lo'o cua ngusñi na cha' ji'i̱ Cristo ca ne' cresiya ji'na, li' stu'ba ntsu'u cha' ji'na lo'o ycui' Ndyosi, jua'a̱ lo'o ycui' nu sca ti Sñi' ycui' Ni.
’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Tiatira, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui̱' lo'o ma̱, na' nu laca̱ nu sca ti Sñi' ycui' Ndyosi, na' nu ngulane tsa xee cloo na' ñi'ya̱ laca lo'o lye tsa ndyatu̱ quii' su talya ña'a̱, na' nu ndubi tsa ña'a̱ quiya' na' ñi'ya̱ laca sca chcua̱ ngatsi nu scui chu̱'.
ကြော်ငြာတွေ