SAN JUAN 19:38 - Chatino Tataltepec

³⁸ Nde ngusi̱i̱ la ndyaa tsaca yu nu naa José Arimatea slo nu Pilato bi'. La cui' ñati̱ nu ngua tsa'a̱ ji'i̱ Jesús laca bi', masi cuaana ti ndyaca tsa'a̱ nu José bi'. Ntsi̱i̱ yu si ca cuayá' ti' ngu' judío tya'a quichi̱ tyi yu cha' ndyaca tsa'a̱ yu ji'i̱ Jesús. Ndyaa yu ngüijña yu chacuayá' ji'i̱ Pilato cha' tsaa lo'o yu ji'i̱ jyo'o Jesús cha' tyatsi', lo'o li' nda Pilato chacuayá' tyaa lo'o yu ji'i̱. Li' ndyaa José ca su ndu̱ crusi, ndyaa ndyiqui'ya ji'i̱ jyo'o Jesús, cha' tsaa lo'o yu ji'i̱ ca to' cuaá.

SAN JUAN 19:38 ပူးပေါင်းရင်းမြစ်များ

SAN JUAN 12:42

Lo'o jua'a̱ ngua, ndi'i̱ xi ngu' nu laca cña nu jlya ti' ji'i̱ Jesús; pana ntsi̱i̱ ngu' bi' ji'i̱ ngu' fariseo, bi' cha' ná ntaja'a̱ ngu' chcui' ngu' cha' ji'i̱ Jesús ca slo ñati̱. Ntsi̱i̱ ngu' si cua'a ngu' fariseo ji'i̱ ngu' cha' nga'aa ca tsaa ngu' ne' laa ji'i̱ tya'a ngu' judío.

SAN JUAN 7:13

Pana ntsi̱i̱ ngu' si cuna ngu' judío cha' nu nchcui' ngu', bi' cha' cuaana ti nchcui' ngu' lo'o tya'a ngu'.

SAN JUAN 9:22

Jua'a̱ nacui̱ sti xtya'a̱ nu qui'yu bi' ji'i̱ ngu', cha' ntsi̱i̱ tsa ngu' ji'i̱ ngu' judío bi'; na cua ngua'ni stu'ba ngu' laca cña cha' ji'i̱ ngu' lo'o tya'a ngu' cha' culo'o ngu' ji'i̱ ñati̱ ne' laa, cua ña'a̱ ca ñati̱ nu ñacui̱ cha' Jesús laca Cristo, nu ñati̱ tlyu nu nda ycui' Ndyosi ji'i̱ lijya̱ chalyuu. Nga'aa ta ngu' judío bi' chacuayá' tsaa ngu' ne' laa li'.

LOS HECHOS 13:29

Nu lo'o cua ndye ngua'ni ngu' lcaa cha' ñi'ya̱ nchcui' lo quityi bi' cha' caca ji'i̱ Jesús, li' nda'ya ngu' ji'i̱ jyo'o bi' su nga'a̱ lo crusi, nguxatsi' ngu' ji'i̱ jyo'o bi' li'.

FILIPENSES 1:14

Lo'o jua'a̱ cua ña'a̱ ca ngu' tya'a ngusñi na cha' ji'i̱ Jesús, tsa ndu̱ cua tso'o la jlya ti' ngu' cha' ji'i̱ nu Xu'na na juani, cua tlyu la xi tyiquee ngu' juani; nga'aa ntsi̱i̱ ngu' chcui' ngu' cha' ji'i̱ ycui' Ndyosi lo'o xa' ñati̱, xqui'ya cha' ná ntsi̱i̱ na' lo'o ntsu'u na' ne' chcua̱ re.