SAN JUAN 19:24 - Chatino Tataltepec

²⁴ Bi' cha' nacui̱ ngu' ji'i̱ tya'a ngu': ―Ná cusaa' na late' re. Quijya na lo'o tya'a na cha' quije cha' ji'na tilaca nu ca ji'i̱ late' re. Lo'o jua'a̱ ngua cuayá' ti' na cha' chañi cha' nu nscua lo quityi cusu cua' sa'ni, nu nchcui' ndi'ya̱: “Cua ngusa'be ngu' ste' na' lo'o tya'a ngu', cua ngüijya ngu' lo'o tya'a ngu' cha' quije cha' ji'i̱ ngu' tilaca nu ca ji'i̱ late' bi'”. Jua'a̱ nacui̱ lo quityi bi', lo'o la cui' jua'a̱ ngua'ni ngu' sendaru bi' li'.

SAN JUAN 19:24 ပူးပေါင်းရင်းမြစ်များ

SAN MATEO 27:35

Lo'o ngujui'i̱ ca'a̱ ngu' ji'i̱ yu lo crusi lo'o clavo, li' ngüijya sendaru bi' lo'o tya'a ngu' cha' cua'ni ngana ngu' ji'i̱ tya'a ngu', cha' tacha ste' Jesús ji'i̱ ngu'. La cui' cha' bi' nguscua jyo'o cusu' nu ngua tu'ba ji'i̱ ycui' Ndyosi nu ngua sa'ni; ndi'ya̱ nacui̱ quityi bi': “Ndacha ngu' ste' na' ji'i̱ tya'a ngu' lo'o ngüijya ti ngu'”.

SAN MARCOS 15:24

Li' ngujui'i̱ ca'a̱ ngu' ji'i̱ yu lo crusi. Lo'o li' ngüijya ngu' sendaru lo'o tya'a ngu', cha' clyana ngu' cha' lo'o tya'a ngu' tilaca nu caja ste' Jesús ji'i̱. Jua'a̱ ngua cha' ndye ndacha ngu' ste' Jesús ji'i̱ tya'a ngu'.

SAN LUCAS 23:34

Lo'o tya ndi'i̱ ngu' nu ngujui'i̱ ca'a̱ ji'i̱ ngu' lo crusi, li' nchcui' Jesús lo'o ycui' Ndyosi Sti yu: ―Sti na' ―nacui̱ yu―, cui'ya nu'u̱ cha' clyu ti' ji'i̱ ngu' re, cha' ná jlo ti' ngu' ni cha' laca ndyu'ni ngu' jua'a̱. Li' ndacha ngu' sendaru bi' ste' Jesús ji'i̱ tya'a ngu' laja lo'o ndijya ti ngu' lo'o tya'a ngu'.

SAN JUAN 10:35

Jlo ti' na cha' ná caca ji'na tacu̱' na ni sca cha' nu nda ycui' Ndyosi lo'o na. Sca cha' nu nchcui' quityi bi' ni, nacui̱ cha' ñi'ya̱ laca ycui' Ndyosi, jua'a̱ laca ñati̱ nu ndaquiya' cha' nu nda Ni lo'o.

SAN JUAN 13:18

’Ná nchcui' na' ji'i̱ lcaa cu'ma̱. Jlo ti' na' ti ji'i̱ ngusubi na' cha' caca tsa'a̱ ngu' jna' ―nacui̱ Jesús―. Tya sa'ni nguscua ngu' sca cha' ji'i̱ ycui' Ndyosi lo quityi ndi'ya̱: “La cui' ñati̱ nu stu'ba ndyacu tyaja lo'o na', bi' laca nu xu̱u̱ tya'a lo'o na' juani”; jlo ti' na' cha' nga'a̱ cha' caca cha' bi' ―nacui̱ Jesús―.

SAN JUAN 19:28

Jua'a̱ ngua lo'o cua ngua tii Jesús cha' cua ngua lcaa cha' nu ntsu'u cha' caca ji'i̱ ycui' yu, li' nacui̱ yu ñi'ya̱ nu nacui̱ sca cha' nu nscua lo quityi cusu': ―Nguityi tsa na' hitya ―nacui̱ yu.

LOS HECHOS 13:27

Ná ngua cuayá' ti' ngu' quichi̱ Jerusalén tilaca laca Jesús, lo'o jua'a̱ ná ngua cuayá' ti' ngu' nu laca loo ji'i̱ quichi̱ bi' tilaca laca yu. Ná nda ngu' cuentya ñi'ya̱ ndyu'u cha' nu nguscua jyo'o cusu' nu ngua tu'ba ji'i̱ ycui' Ndyosi sa'ni; masi ndyuna ngu' lo'o ndya'a̱ nchcui' ngu' lo quityi bi' ne' laa lcaa tsa̱ nu ndi'i̱ cña' ngu', ná nda ngu' cuentya si cha' ji'i̱ ycui' Jesús nchcui' quityi bi'. Bi' cha' cuxi tsa cña ngua'ni ngu' lo'o Jesús nu lo'o ngusta ngu' qui'ya ji'i̱ yu. La cui' tya'a cña nu nguscua jyo'o cusu' lo quityi cha' cua'ni ngu' lo'o yu, cua ngua'ni ngu' li'.