SAN JUAN 18:11 - Chatino Tataltepec

¹¹ Hora ti nchcui' Jesús lo'o Pedro: ―Xco'o clya xlyu cua hi̱ ne' quiji̱. Na cua nda ycui' Ndyosi Sti na' chacuayá' ji'i̱ ngu' cha' xcube' ngu' 'na. ¿Ha ná tso'o cha' jua'a̱ caca 'na nti' nu'u̱?

SAN JUAN 18:11 ပူးပေါင်းရင်းမြစ်များ

SAN MATEO 20:22

Li' nchcui' Jesús lo'o tyucuaa nu qui'yu bi': ―Ná nchca cuayá' ti' ma̱ ñi'ya̱ laca cha' nu ndijña ma̱ 'na juani ―nacui̱ Jesús ji'i̱ ngu'―. ¿Ha taca ji'i̱ ma̱ chcube' ma̱ ñi'ya̱ nu chcube' na', ñi'ya̱ ca si ta ngu' sca taná nu clyaa' tsa cha' co'o na? ¿Ha talo ma̱ si xcube' ngu' ji'i̱ ma̱ ñi'ya̱ nu nga'a̱ cha' xcube' ngu' jna', nu lo'o cujuii ngu' 'na? ―Taca ji'i̱ cua ―nacui̱ ngu' bi' li'.

SAN MATEO 26:39

Li' tya ndyaa la xi yu ca nde bi' la. Nde loo ti yu ndyaa stii yu lo yuu cha' xñi'i̱ tsa ti' yu. Li' nchcui' yu lo'o ycui' Ndyosi, ndi'ya̱ nu nacui̱ yu: ―Sti na', ¿ha ná ntsu'u xi xa' la ña'a̱ nu cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cua'ni na' cña nu nti' nu'u̱ cha' cua'ni na'.

SAN MATEO 26:42

Li' xa' ndyaa Jesús, nchcui' lo'o ycui' Ndyosi chaca quiya': ―Sti na' ―nacui̱ yu ji'i̱ Ni―, si ná ntsu'u xa' ña'a̱ nu cua'ni na' cña jinu'u̱, tso'o la si chcube' na' lacua, cha' nti' na' cua'ni na' lcaa cña nu nti' nu'u̱ cha' cua'ni na'.

SAN LUCAS 12:30

cha' xcui' jua'a̱ nclacua ti' lcaa ñati̱ chalyuu nu ndi'i̱ jua'a̱ ti. Pana cu'ma̱ ni, ná cube ti' ma̱, jlo ti' ycui' Sti ma̱ ñi'ya̱ caca caja lcaa na nu lyiji cha' tyiji̱ yu'u ji'i̱ ma̱ chalyuu.

SAN LUCAS 22:42

―Sti na' ―nacui̱ yu―, ¿ha ná ntsu'u xi xa' la ña'a̱ nu caca cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cha' cua'ni na' cua ña'a̱ ca cña nu nti' nu'u̱ cha' cua'ni na'.

SAN JUAN 15:10

Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.

SAN JUAN 17:24

’Sti na' ―nacui̱ Jesús ji'i̱ ycui' Ndyosi Sti yu―, cua nti' na' cha' tyi'i̱ ñati̱ nu nda nu'u̱ 'na ca su tyucua na'. Li' ña'a̱ ngu' bi' 'na nde su tlyu la su nda nu'u̱ 'na, cha' tyaca'a tsa na' jinu'u̱ tya lo'o tya lyiji xana chalyuu.

SAN JUAN 18:36

―Si laca na' sca rey jua'a̱ ―nacui̱ Jesús―, li' cua nxu̱u̱ tya'a ngu' tya'a ndya'a̱ na' lo'o ngu' judío jua cha' ná xñi ngu' 'na ―nacui̱―. Pana si'i ñati̱ chalyuu laca nu cua ngusta 'na cha' caca na' loo ji'i̱ ngu'.

SAN JUAN 20:17

Li' nchcui' Jesús lo'o María: ―Ná cala' nu'u̱ jna' cha' tya lyiji tya'a na' nde cua̱ ca su ntucua Sti na' ―nacui̱―. Nu juani, yaa clya nu'u̱ su ndi'i̱ nu xa' la ñati̱ nu cua ngusñi cha' 'na, yaa cacha' nu'u̱ ji'i̱ ngu' bi', cha' cua tyacuí̱ ti na' tya'a na' ca su ntucua ycui' Ndyosi Sti na', nu laca Sti ma̱. Tya'a na' ca su ntucua ycui' Ndyosi nu Xu'na na', nu bi' nu laca ycui' Ndyosi nu Xu'na ma̱.

2 CORINTIOS 10:4

si'i na nxu̱u̱ tya'a na lo'o ngu' cuxi ñi'ya̱ nu nxu̱u̱ tya'a sca ñati̱ chalyuu. Ycui' Ndyosi ni, nchca tsa ji'i̱ Ni, bi' laca nu stu'ba ti ndu'ni cña lo'o na cha' taca tyiji̱loo na ji'i̱ lcaa cha' cuxi nu nxu̱u̱ lo'o na.

2 CORINTIOS 6:7

liñi tsa cha' ji'i̱ ycui' Ndyosi nu nchcui' ya lo'o ñati̱, lo'o jua'a̱ tyucui chacuayá' ji'i̱ ycui' Ndyosi nda Ni nu ndya'a̱ lo'o ya. Bi' cha' nu lo'o ña'a̱ ngu' lcaa cha' nu ndyaca ji'i̱ ya, li' taca ca cuayá' ti' ngu' cha' cña ji'i̱ ycui' Ndyosi laca nu ndya'a̱ ya lo'o. Na cua ngua tso'o cresiya ji'i̱ ya juani cuentya ji'i̱ ycui' Ni, bi' cha' cua ngujui juersa ji'i̱ ya cha' taca xu̱u̱ tya'a ya lo'o nu xña'a̱; jua'a̱ taca cua'a ya ji'i̱ nu bi', cha' ná cua'ni ñu'u̱ nu bi' ji'i̱ ya.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.