HEBREOS 3:3 - Chatino Tataltepec

³ Pana juani lye la ndu'ni tlyu na ji'i̱ Jesús, cha' ná stu'ba jyo'o Moisés lo'o yu bi'. Ñi'ya̱ laca lo'o ndye ndya' sca ni'i̱ ni, tso'o tsa nchcui' ngu' cha' ji'i̱ cuityi nu ngüiñá ji'i̱ ni'i̱ bi', masi ná nchcui' lye ngu' cha' ji'i̱ ycui' ni'i̱; la cui' jua'a̱ laca lo'o Jesús ni, lye la ndyi'u ti' ngu' ji'i̱ ycui' Jesús, masi nga'aa lye ndyi'u ti' ngu' ji'i̱ nu Moisés bi'.

HEBREOS 3:3 ပူးပေါင်းရင်းမြစ်များ

SAN MATEO 16:18

Pedro naa nu'u̱, lo'o jua'a̱ caca nu'u̱ ñi'ya̱ laca sca quee quiya' ni'i̱. Nu lo'o nchcui' nu'u̱ tsa̱, cha' liñi laca nu nchcui' nu'u̱; bi' laca su̱u̱ cha' ji'i̱ ñati̱ 'na, cha' tso'o tsa ndyanu tachaa cha' nu nchcui' nu'u̱ jua'a̱. Ná taca ji'i̱ cuiñaja, ni cui'i̱ cuxi, ni jyo'o, ni tsaca ñati̱, ná taca ji'i̱ ngu' tsiya' ti tyiji̱loo ngu' ji'i̱ ñati̱ 'na, masi cajaa ñati̱ 'na xqui'ya cha' cuxi.

1 CORINTIOS 3:9

Tya'a ndyu'ni ya cña ji'i̱ ycui' Ndyosi laca cuare; lo'o cu'ma̱ ni, ndu'ni Ni cña ne' cresiya ji'i̱ ma̱, cña ji'i̱ ycui' Ndyosi laca bi'. Lo'o jua'a̱ taca ta na' chaca cui̱i̱ lo'o ma̱ juani: ñi'ya̱ si laca ma̱ sca ni'i̱ tonu, jua'a̱ laca ma̱ cuentya ji'i̱ ycui' Ndyosi;

2 CORINTIOS 3:7

Cña nu ngulo Moisés ji'i̱ ngu' bi' cuentya ji'i̱ ycui' Ndyosi ni, chu̱' quee cuaja' nscua cha' bi'; nguscua Ni letra hichu̱' quee cuaja' bi', cha' chcui' ngu' lo. Ndubi tsa ña'a̱ xee ji'i̱ ycui' Ndyosi ngua, nu lo'o nda ca ti Ni cha' cusu' bi'; hasta tyucui ña'a̱ loo nu cusu' Moisés ndubi tsa ña'a̱ ngua, ni nga'aa ngua ña'a̱ tya'a ngu' Israel ji'i̱ loo nu cusu' bi'. Pana yala ti nteje tacui cha' bi', xtyi'i ti nguliji xee bi' loo yu li'. Lo'o xee ndubi ndyalaa cha' cusu' bi' lacua, masi xcui' jua'a̱ ndyijii ñati̱ lo'o yabe' nu ntsu'u ji'i̱ ngu' xqui'ya cña nu nclyo cha' cusu' bi';

COLOSENSES 1:18

Ycui' yu laca yu loo ji'i̱ lcaa taju ñati̱ nu ndyu'ni tlyu ji'i̱ ycui' Ndyosi tsa tlyu ti, ycui' laca nu nda chalyuu ji'i̱ ngu' bi'. Tya clyo la cua ndyu'ú ycui' yu chaca quiya' lo'o cua ngujuii yu, cha' li' taca ji'i̱ yu tyucua yu ca su laca yu loo ji'i̱ lcaa lo cha'.

HEBREOS 2:9

Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.

HEBREOS 3:4

Cua ña'a̱ ca ni'i̱ nu ndiñá ñati̱ ni, cua ntsu'u xu'na ni'i̱ bi'; pana ycui' Ndyosi ngüiñá lcaa ca na, lo'o lcaa ca chalyuu, lo'o lcaa ñati̱ nu ndi'i̱ chalyuu.

HEBREOS 3:6

Pana nu Cristo bi' ni, tso'o la cña ndu'ni yu, xqui'ya cha' laca yu Sñi' ycui' Ndyosi, lo'o jua'a̱ laca yu loo ji'i̱ lcaa ñati̱ nu ntsu'u cuentya ji'i̱ Ni. La cui' ñati̱ ji'i̱ ycui' Ni laca na, si ña'a̱ ti ná ntsi̱i̱ na ña'a̱ cuayá' tye chalyuu ji'na, si ña'a̱ ti tya tso'o ntsu'u tyiquee na laja lo'o ndu̱ ti' na ji'i̱ Cristo cha' cua'ni lyaá lyiji yu ji'na.