HEBREOS 2:9 - Chatino Tataltepec

⁹ Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.

HEBREOS 2:9 ပူးပေါင်းရင်းမြစ်များ

SAN MATEO 16:28

Cha' liñi nchcui' na' lo'o ma̱ juani, cha' ntsu'u ngu' nu tya ndu̱ lo'o na chalyuu re juani, nu lo'o tya lyiji cajaa ngu' ca cuayá' ti' ngu' cha' cua nguxana cha' laca na' loo ne' cresiya ji'i̱ ñati̱, na' nu cua nda Ni 'na lijya̱a̱ cha' caca na' ñati̱.

SAN MATEO 6:28

’Lo'o jua'a̱ cha' ji'i̱ ste' ma̱, ¿ni cha' nclyacua tsa ti' ma̱ ji'i̱ cha' bi'? Culacua xi ti' ma̱ lo'o ña'a̱ ma̱ queé nu ntsu'u lo quixi̱' cua. Tso'o ti nclyuu bi', masi ná ndu'ni bi' cña, masi ná nchca ji'i̱ cuiñá late' cacu'.

SAN MARCOS 9:1

Tya nchcui' la Jesús lo'o ngu' li': ―Chañi cha' nu nchcui' na' lo'o ma̱ ―nacui̱ yu―, cha' ntsu'u ngu' nu tya ndu̱ lo'o na chalyuu re juani, nu ca cuayá' ti' cha' cua nguxana cha' laca ycui' Ndyosi loo ne' cresiya ji'i̱ ñati̱ chalyuu, nu lo'o tya lyiji cajaa ngu'. Tlyu tsa chacuayá' ntsu'u ji'i̱ Ni lo'o caca Ni loo li'.

SAN LUCAS 9:27

Chañi cha' nu nchcui' na' lo'o ma̱, cha' ntsu'u ngu' nu ndu̱ lo'o na chalyuu re juani, nu tya lyiji cajaa ngu' lo'o ca cuayá' ti' ngu' cha' cua nguxana cha' laca ycui' Ndyosi loo nde chalyuu.

SAN JUAN 1:29

Ca chaca tsa̱ na'a̱ Juan cha' cua lijya̱ ti Jesús slo. Lo'o li' nacui̱ Juan ji'i̱ ñati̱ nu ndu̱ slo: ―Ña'a̱ tso'o ma̱ ji'i̱ nu cusu' cua ―nacui̱―. Cua ngusubi ycui' Ndyosi ji'i̱ nu cua cha' caca yu sca msta̱ lu'ú, cha' cuityi̱ lcaa qui'ya nu ntsu'u ji'i̱ ñati̱ chalyuu ―nacui̱―.

SAN JUAN 10:17

’Tye chalyuu 'na, cajaa na' cha' tyu'ú na' chaca quiya' ca tiya' la, bi' cha' ntsu'u tsa tyiquee Sti na' ña'a̱ 'na.

SAN JUAN 12:32

Lo'o sicua̱ ngu' cuxi jna' ca su ndi'i̱ na' lo yuu, cujui'i̱ ca'a̱ ngu' jna' lo crusi, li' cuane na' ji'i̱ lcaa ñati̱ cha' xñi ngu' cha' 'na.

SAN JUAN 3:16

’Ntsu'u tsa tyiquee ycui' Ndyosi ña'a̱ Ni ji'i̱ ñati̱ chalyuu, bi' cha' cua nda ycui' Ni jna' nu laca̱ Sñi' ycui' ca Ni lijya̱ na' chalyuu. Ná tsaa ñati̱ ca bilyaa si xñi ngu' cha' jna', nu laca̱ sca ti Sñi' ycui' Ndyosi; caja chalyuu tso'o ji'i̱ ngu' bi', chalyuu nu ná nga'a̱ cha' tye ―nacui̱ Jesús―.

SAN JUAN 8:51

Lo'o chañi tsa cha' nu ta na' lo'o cu'ma̱ ndi'ya̱: Lo'o taquiya' ngu' ji'i̱ cha' nu nclyu'u na' ji'i̱ ngu', ná tye chalyuu tso'o nu ta na' ji'i̱ ngu' bi', masi cajaa ngu'.

SAN JUAN 8:52

Li' xa' nchcui' ngu' judío bi' lo'o Jesús chaca quiya': ―Juani jlo ti' ya cha' ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu'―. Sa'ni ngujuii jyo'o Abraham, sa'ni ngujuii nu xa' la jyo'o cusu' nu nda cha' ji'i̱ ycui' Ndyosi lo'o ñati̱. ¿Ñi'ya̱ nti' nu'u̱ lo'o nacui̱ ca ti nu'u̱: “Ná nga'a̱ cha' tye chalyuu ji'i̱ ñati̱ nu taquiya' ji'i̱ cha' nu nclyu'u na' ji'i̱”? ―nacui̱ ngu'―.

LOS HECHOS 2:33

Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús.

LOS HECHOS 3:13

Ycui' Ndyosi Sti na ni, la cui' Ni laca nu ngua'ni tlyu jyo'o cusu' ji'na ji'i̱ tya sa'ni la, masi jyo'o Abraham, masi jyo'o Isaac, masi jyo'o Jacob; lcaa jyo'o cusu' ji'na ngua'ni tlyu ngu' ji'i̱ ycui' Ndyosi bi'. Ycui' Ndyosi laca nu cua nda chacuayá' ji'i̱ Jesús Sñi' ycui' Ni cha' caca tlyu yu. Ntejeya' ma̱ ji'i̱ nu Jesús bi' tsubi' ti, ndyaa lo'o ma̱ ji'i̱ yu, ndyaa ma̱ ngusta ma̱ qui'ya ji'i̱ yu slo ngu' nu laca loo; nu lo'o ngua ti' gobernador Pilato cha' tyu'u Jesús laja ti, ná ntaja'a̱ ma̱ li'.

ROMANOS 5:18

Ndi'ya̱ ngua li': lo'o ngua'ni jyo'o Adán cha' cuxi bi', la cui' jua'a̱ ndyanu yabe' hichu̱' na, lo'o hichu̱' lcaa tya'a ñati̱ na. Pana ndi'ya̱ ndyu'u cha' lo'o ngua'ni Jesucristo sca cha' tso'o: li' laja ti ngua'ni Ni cha' cuityi̱ Ni yabe' nu ntsu'u hichu̱' na, cha' caja chalyuu nu ná nga'a̱ cha' tye ji'na.

ROMANOS 5:8

Pana jua'a̱ ngua'ni ycui' Ndyosi lo'o na, cha' culu'u Ni ji'na cha' ntsu'u tsa tyiquee Ni ña'a̱ Ni ji'na; nda Ni ji'i̱ Cristo cha' cajaa cuentya ji'na, masi tya ntsu'u tsa qui'ya ji'na.

ROMANOS 8:3

Cua ngua'ni Ni sca cha' tlyu nu ná ngua cua'ni nu cha' cusu' nu nda jyo'o Moisés lo'o ñati̱ nu ngua sa'ni. Ná ngua cña cha' bi', xqui'ya cha' cuxi tsa tyiquee ñati̱ chalyuu na; pana ngua ji'i̱ ycui' Ndyosi cua'ni cha' tlyu bi', nu lo'o nda Ni ji'i̱ Sñi' ycui' ca Ni ya̱a̱ chalyuu re cha' ngua ñati̱. Nda Ni ji'i̱ nu Jesús bi' ya̱a̱, cha' caca yu sca msta̱ lu'ú; bi' laca msta̱ nu ngua ji'i̱ cuityi̱ qui'ya nu ntsu'u ji'na. Ngua Jesús ñati̱; stu'ba ti ngua yu ñi'ya̱ laca cua ña'a̱ ca ñati̱ chalyuu, cha' jua'a̱ ngua ji'i̱ yu cua'ni tye yu ji'i̱ qui'ya nu ntsu'u ji'i̱ ñati̱ cuxi na. Bi' cha' ngua Ni ñati̱.

ROMANOS 8:32

Ná nda ycui' Ndyosi chacuayá' ji'i̱ Jesús cha' tya'a̱chu̱' yu ji'i̱ cña ji'i̱ Ni jua'a̱ ti, masi nu sca ti Sñi' ycui' Ni laca yu; nda Ni ji'i̱ yu cha' cajaa lo crusi cuentya ji'i̱ lcaa na lo'o tya'a na. Cua nda Ni lcaa cha' tso'o nu ji'i̱ ycui' ca Ni ji'i̱ Jesús, la cui' nu laca nu sca ti Sñi' ycui' Ni. Lo'o jua'a̱ sca ti cuayá' nu ta Ni cha' bi' ji'na, ñi'ya̱ lo'o nda Ni cha' bi' ji'i̱ Sñi' ycui' Ni.

2 CORINTIOS 5:15

Xqui'ya lcaa ñati̱, bi' cha' ntaja'a̱ Cristo ngujuii yu lo crusi. Cua nti' yu cha' nga'aa tyi'i̱ ñati̱ chalyuu cha' ji'i̱ ycui' ti ngu'; tyi'i̱ ngu' ni, pana xcui' cuentya ji'i̱ Cristo, cha' bi' laca nu cua ngujuii cuentya ji'i̱ ngu', bi' laca nu cua ndyu'ú chaca quiya' cuentya ji'i̱ ngu'.

2 CORINTIOS 5:21

Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

GÁLATAS 4:4

Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.

1 TIMOTEO 2:6

Nda Jesucristo chacuayá' cha' ndyujuii ngu' ji'i̱ yu cua tsubi' la; jua'a̱ nda yu caya' lo qui'ya nu ntsu'u ji'i̱ ñati̱ chalyuu, nu lo'o ngujuii yu lo crusi. Ngua'ni ycui' Ndyosi cña bi' la cui' hora lo'o ngua ti' Ni cha' cua'ni Ni ji'i̱.

HEBREOS 1:9

Ndiya tsa ti' nu'u̱ lcaa cha' liñi nu ndu'ni ñati̱; ñasi̱' tsa nu'u̱ lo'o ndyu'ni ñati̱ cha' cuxi lo'o ycui' Ndyosi Sti nu'u̱. Bi' cha' ngusubi na' jinu'u̱ cha' tya'a̱ nu'u̱ lo cña jna', nacui̱ ycui' Ndyosi. Jua'a̱ tso'o tsa nti' nu'u̱ juani, cha' tlyu la chacuayá' cua nda na' jinu'u̱ que ji'i̱ xa' la ñati̱, nacui̱ ycui' Ndyosi.

HEBREOS 10:5

Nu lo'o tya lyiji ca̱a̱ Cristo lo yuu chalyuu, li' nchcui' Ni lo'o ycui' Ndyosi Sti Ni. Ndi'ya̱ nacui̱ Ni: Nga'aa nti' nu'u̱ cha' ca̱lo'o ngu' ji'i̱ na'ni nu tyaqui̱ cha' caca msta̱, nacui̱ Cristo ji'i̱ ycui' Ndyosi. Ná tso'o nti' nu'u̱ ña'a̱ nu'u̱ ji'i̱ ngu' su ndaqui̱ ngu' na'ni lo mesa quii', cha' caca bi' msta̱; masi xa' ña'a̱ msta̱ sta ngu' cha' cuityi̱ qui'ya nu ntsu'u ji'i̱ ngu', nga'aa ndiya ti' nu'u̱ cha' bi'. Pana cua ta ti nu'u̱ cuaña' 'na, cha' caja ñi'ya̱ ca̱a̱ na' nde lo yuu chalyuu, nacui̱ Cristo.

HEBREOS 11:5

Jlya ti' jyo'o Enoc ji'i̱ ycui' Ndyosi, bi' cha' ná ngujuii yu. Jua'a̱ ti ndyalo'o ycui' Ndyosi ji'i̱ yu ca slo ycui' Ni; ná nquije yu ji'i̱ ñati̱ li', xqui'ya cha' cua ya̱a̱ Ni ya̱qui'ya Ni ji'i̱ yu. Pana nchcui' quityi cha' cua ndiya ti' Ni ñi'ya̱ nu ngua'ni nu Enoc bi' laja lo'o nguti'i̱ yu chalyuu.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

HEBREOS 2:7

Masi sube tsa ñati̱ laca ngu' cuentya jinu'u̱, pana cua nda nu'u̱ sca ñati̱ nu lijya̱ chalyuu; jua'a̱ cua laca ti tyempo nda nu'u̱ chacuayá' cha' caca xca̱ jinu'u̱ loo ji'i̱ yu bi'. Ca tiya' la, li' ta nu'u̱ sca su tso'o tsa su tyucua yu lo'o nu'u̱, ñi'ya̱ laca su ntucua tlyu sca xu'na ñati̱, sca se'i̱ su caca chi̱ loo.

HEBREOS 7:25

Lcaa ca tyempo, masi juani, masi nde loo la, taca ji'i̱ Ni cua'ni lyaá Ni ji'i̱ cua ña'a̱ ca ñati̱ nu xñi cha' ji'i̱ ycui' Ndyosi xqui'ya Jesús. Tyucui tyempo ndi'i̱ Jesús ca slo ycui' Ndyosi, cha' chcui' Ni lo'o ycui' Sti Ni cuentya ji'na.

HEBREOS 8:3

Lcaa xu'na sti jo'ó nde chalyuu ni, ntsu'u cha' sta ngu' msta̱ ca slo ycui' Ndyosi, ntsu'u cha' taqui̱ ngu' xa' la msta̱ lo mesa quii', cha' bi' laca cña ji'i̱ ngu'; lo'o jua'a̱ Jesús ni, ntsu'u msta̱ nu nda Ni ca slo ycui' Ndyosi cuentya ji'na,

1 PEDRO 1:21

Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.

1 JUAN 2:2

Ngua cuxi tyiquee na cuentya ji'i̱ ycui' Ndyosi Sti na, xqui'ya cha' ngua'ni na cha' cuxi; bi' cha' nchcube' Jesucristo cña loo na, cha' qui'ya ycui' yu yabe' nu ntsu'u ji'na xqui'ya cha' cuxi nu ngua'ni na. La cui' jua'a̱ qui'ya Jesucristo yabe' nu ntsu'u ji'i̱ lcaa ñati̱ chalyuu nu tso'o ntsu'u tyiquee ña'a̱ ji'i̱ ycui' Ni.

APOCALIPSIS 19:12

Nu xee cloo Ni ni, tso'o tsa ngulane xee ñi'ya̱ laca lo'o cua̱ tsa ndyatu̱ quii'. Lo'o jua'a̱ tyu̱u̱ tya'a sne' oro ntucua lo xlya hique Ni. Cua nscua sca xtañi Ni hichu̱' Ni nu ndacha' ñi'ya̱ laca cña nu ndu'ni Ni. Ná taca ji'i̱ xa' ñati̱ ñacui̱ ngu' ñi'ya̱ ndyu'u cha' ji'i̱ xtañi bi', cha' sca ti ycui' Ni nslo Ni ñi'ya̱ ndyu'u xtañi bi'.

APOCALIPSIS 5:9

Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.