HEBREOS 2:6 - Chatino Tataltepec

⁶ Ntsu'u sca cha' nu nscua lo quityi cusu'; ndi'ya̱ nchcui' cha' bi': Ndyosi Xu'na ya, ná sca na tsiya' ti laca ñati̱ chalyuu, ná nga'a̱ cha' cube ti' nu'u̱ ji'i̱ ngu'; ná nga'a̱ cha' cua'ni tya'na ti' nu'u̱ ji'i̱ ngu', cha' laca ngu' ñati̱ ti, nacui̱ jyo'o cusu'.

HEBREOS 2:6 ပူးပေါင်းရင်းမြစ်များ

SAN LUCAS 1:68

Ntsu'u cha' cua'ni tlyu na ji'i̱ ycui' Ndyosi nu Xu'na na, nu laca ycui' Ndyosi ji'na ngu' Israel, nacui̱ nu cusu' bi' li'. Cua chaca quiya' nguxana nchcui' Ni lo'o ngu' tya'a na nu laca na ñati̱ ji'i̱ ycui' Ni, juani ndyu'ni Ni cña cha' clyaá na ji'i̱ nu cuxi.

SAN LUCAS 1:78

Ntsu'u tsa tyiquee ycui' Ndyosi ña'a̱ Ni ji'na; tya'na tsa ti' Ni ji'na, bi' cha' cua ta ti ycui' Ni ji'i̱ Cristo cha' ca̱a̱ nde su ndi'i̱ na. Bi' laca sca xee tlyu nu tyu'ú ne' cresiya ji'na, ñi'ya̱ nti' xee ndubi nu ntyiji'i̱ su ndi'i̱ na lo'o lijya̱ ca ti cuichaa.

SAN LUCAS 7:16

Ndube tsa ti' lcaa ñati̱ ca bi' lo'o na'a̱ ngu' ji'i̱ yu nu ngujuii bi'. Li' nguxana ngu' ndyu'ni tlyu ngu' ji'i̱ ycui' Ndyosi. ―Tlyu tsa ñati̱ ndyalaa slo na juani ―nacui̱ ngu'―, bi' laca nu chcui' lcaa cha' ji'i̱ ycui' Ndyosi lo'o na. Jua'a̱ nacui̱ ngu' li'. Lo'o chaca cha' nacui̱ ngu': ―Cua ndyalaa ycui' Ndyosi juani cha' xtyucua Ni ji'i̱ ñati̱ ji'i̱ ycui' Ni ―nacui̱ ngu'.

1 TESALONICENSES 4:6

Nga'aa xlyaá ma̱ ji'i̱ nu cuna'a̱ ji'i̱ ngu' tya'a ma̱, masi ji'i̱ clyo'o ngu', masi ji'i̱ sñi' ngu'. Cua nchcui' tsa ya lo'o ma̱ cha' lcaa cha' ña'a̱ ycui' nu Xu'na na; jlo ti' ycui' Ndyosi, lo'o jua'a̱ ntsu'u cha' xcube' Ni ji'i̱ lcaa ñati̱ nu ná taquiya' ji'i̱ cha' bi',

HEBREOS 4:4

Cua nscua sca cha' lo quityi cusu' nu nchcui' cha' ji'i̱ tsa̱ nchca cati, tsa̱ ndi'i̱ cña' ti na. Ndi'ya̱ nacui̱ quityi: Nguti'i̱ cña' ycui' Ni tsa̱ nu nchca cati li', cha' ná ngua'ni Ni cña tsa̱ bi' li'.

HEBREOS 5:6

Lo'o li' cua nchcui' ycui' Ni chaca cha' ndi'ya̱: Lcaa ca tyempo caca nu'u̱ sti jo'ó; la cui' ñi'ya̱ nu ngua'ni jyo'o Melquisedec nu ngua cua sa'ni la, jua'a̱ cua'ni nu'u̱ cuentya ji'i̱ ñati̱ juani.

1 PEDRO 1:11

Xtyi'i ycui' Cristo ngulu'u lcaa cha' ji'i̱ ngu' bi', ñi'ya̱ nu caca ji'i̱ ycui' Cristo nde loo la, ñi'ya̱ nu chcube' yu nde loyuu chalyuu, ñi'ya̱ nu tlyu tsa cha' tso'o nu caca ji'i̱ yu lo'o tyaa yu ca slo ycui' Ndyosi chaca quiya'. Lo'o li' ngulana tsa nu ngu' jyo'o bi', cha' quije cha' ji'i̱ ngu' tilaca caca nu Cristo bi', ni tsa̱ tyu'u tucua yu nde chalyuu.