HEBREOS 2:2 - Chatino Tataltepec

² Tyempo sa'ni la nchcui' xca̱ bi' lo'o ñati̱ cuentya ji'i̱ ycui' Ndyosi. Liñi tsa nchcui' xca̱ bi' lo'o ngu', cha' tyempo bi' lye tsa nguxcube' Ni ji'i̱ lcaa ñati̱ nu ngua'ni cha' cuxi; la cui' jua'a̱ nguxcube' Ni ji'i̱ ñati̱ nu nga'aa ndaquiya' ji'i̱ cha' nu nchcui' Ni.

HEBREOS 2:2 ပူးပေါင်းရင်းမြစ်များ

LOS HECHOS 7:53

Xca̱ ji'i̱ ycui' Ndyosi laca nu nda cha' ji'i̱ ycui' Ndyosi lo'o ma̱ sa'ni la, cña nu ngulo ycui' Ni ji'i̱ ma̱ laca cha' bi'. Tya ntsu'u quityi bi' ji'i̱ ma̱ juani, pana ná ntaja'a̱ ma̱ taquiya' ma̱ ji'i̱ cha' nu nchcui' ycui' Ndyosi lo'o ma̱ lo quityi bi'.

GÁLATAS 3:19

¿Ni cha' laca ngulo ycui' Ndyosi cña ji'i̱ nu jyo'o Moisés bi', cha' nguscua yu cña bi' lo quityi cuentya ji'i̱ Ni lacua? Tiya' la ngua cha' nda Ni cha' bi' lo'o Moisés, cha' caca cuayá' ti' na ñi'ya̱ nu nacui̱ ycui' Ndyosi cha' laca scaa cha' cuxi. Pana xti ti tyempo ndalo cha' bi' ña'a̱ cuayá' nu ndyalaa Cristo, la cui' tya'a ñati̱ ji'i̱ jyo'o Abraham; na cua nchcui' ycui' Ndyosi cha' ji'i̱ nu Cristo bi' nu lo'o cua ngüiñi cha' ji'i̱ ycui' Ni lo'o jyo'o cusu' Abraham bi' tya clyo. Nu lo'o nda Ni cha' bi' lo'o nu jyo'o Moisés bi' ni, lo'o xca̱ ji'i̱ ycui' Ni ndu̱ lo xlya ca'ya bi' cuentya ji'i̱ ycui' Ndyosi, cha' chcui' lo'o nu cusu' Moisés bi'. Cla'be la bi' ngutu̱ jyo'o Moisés bi' cha' chcui' yu lo'o ñati̱, cha' tu'ba ji'i̱ ycui' Ndyosi ngua nu cusu' bi'.

HEBREOS 1:1

Nu ngua tya sa'ni la, tyu̱u̱ tsa quiya' cua nchcui' ycui' Ndyosi lo'o jyo'o cusu' ji'na, quiña'a̱ xi cha' nda Ni lo'o jyo'o bi'; cua nda ycui' Ndyosi cha' lo'o jyo'o bi', cha' chcui' ngu' lo'o lcaa tya'a quichi̱ tyi ngu'.

HEBREOS 10:28

Nu ngua sa'ni ni, lo'o ntsu'u ñati̱ nu ná ndaquiya' tsiya' ti ji'i̱ cña nu ngulo ycui' Ndyosi, ndyujuii ngu' ji'i̱ ñati̱ bi' li'. Ngua'ni cuayá' ngu' ji'i̱ ñati̱ bi' clyo cuentya ji'i̱ jyo'o Moisés lo'o tucua sna tya'a xa' ñati̱ nu ndacha' liñi ñi'ya̱ ngua cha' bi'; li' ngusta ngu' yabe' hichu̱' ñati̱ bi', ndyujuii ngu' ji'i̱ li', cha' nga'aa ngujui ñi'ya̱ jña ngu' cha' clyu ti' ji'i̱ ycui' Ndyosi cuentya ji'i̱ nu cuxi bi' li'. Jua'a̱ ngua tya sa'ni la.

HEBREOS 10:35

Ná tya'a̱chu̱' ma̱ ji'i̱ cha' ji'i̱ Jesús lacua. Ña'a̱ ti tya cua'ni tlyu tyiquee ma̱, cha' tso'o tsa cha' nu tyacua ji'i̱ ma̱ ca tiya' la cuentya ji'i̱ ycui' Ndyosi, si ña'a̱ ti xñi tso'o ma̱ cha' bi'.

HEBREOS 11:26

tso'o la stu'ba ti tyi'i̱ yu lo'o ngu' tya'a yu, masi chi̱i̱ nti' xa' ñati̱ ña'a̱ ji'i̱ yu, ngua ti' yu. Ñi'ya̱ nchcube' ycui' Cristo nde loo la, jua'a̱ nchcube' Moisés nu ngua li'; pana ná ndube ti' yu cha' culiya' ngu', nguxtyanu yu lcaa cha' tso'o nu ntsu'u ji'i̱ ngu' Egipto, cha' jlya ti' yu cha' tso'o la caca ji'i̱ ñati̱ ji'i̱ yu nde loo la xqui'ya ycui' Ndyosi.

HEBREOS 11:6

Ni sca na, ná taca cua'ni na cha' caca tyaala' ti' tyiquee ycui' Ndyosi, si ná chañi cha' jlya ti' na ji'i̱ Ni. Si nti' na cha' jyacua na ji'i̱ Ni cha' chcui' na lo'o Ni, li' nga'a̱ cha' jlya ti' na cha' lu'ú ycui' Ndyosi; nga'a̱ cha' jlya ti' na cha' taca xtyucua Ni ji'na lo'o jña na sca cha' ji'i̱ Ni.

HEBREOS 12:25

Cui'ya ma̱ cuentya lacua, cha' cua'a̱ jyaca̱ ma̱ ji'i̱ lcaa cha' nu cua nda Cristo lo'o ma̱. Nguxcube' tsa ycui' Ndyosi ji'i̱ jyo'o cusu' ji'na, nu lo'o ná ntaja'a̱ ngu' cua'a̱ jyaca̱ ngu' ji'i̱ cha' nu nchcui' jyo'o Moisés lo'o ngu' nde chalyuu chacuayá' ji'i̱ ycui' Ndyosi; ná ngua xna ngu' bi' ji'i̱ ycui' Ndyosi. La cui' jua'a̱ tlyu la cha' caca ji'na juani, si ná taquiya' na ji'i̱ Cristo nu ngutu'u ca slo ycui' Ndyosi ya̱a̱ nde lo yuu chalyuu, lo'o jua'a̱ cua xa' ndyaa tucua Ni ca slo ycui' Ndyosi chaca quiya' juani.

2 PEDRO 1:19

Jua'a̱ ngua cha' taca ca cuayá' ti' na cha' liñi tsa laca lcaa cha' nu cua nchcui' jyo'o cusu' nu ngua tu'ba ji'i̱ ycui' Ndyosi cua sa'ni la. Tso'o si taquiya' na ji'i̱ cha' bi', cha' ñi'ya̱ laca sca xee ndubi nu tso'o tsa ntyiji'i̱ xee su talya ña'a̱, jua'a̱ laca cha' ji'i̱ Jesús bi'. Culu'u bi' tyucui̱i̱ tso'o su nga'a̱ cha' tsaa na ña'a̱ cuayá' nu quixee tsa̱ bi'. Li' tyu'u tucua sca cuii tlyu nu ntyucua nde nguxee; bi' laca ñi'ya̱ laca Cristo, cha' nda yu xee nu tyu'ú ne' cresiya ji'na.

JUDAS 1:5

Cua jlo ti' ma̱ lcaa cha' nu nscua lo quityi ji'i̱ ycui' Ndyosi nu ngua sa'ni la, pana xa' cacha' na' xi cha' bi' ji'i̱ ma̱ juani: Ngua'ni lyaá ycui' nu Xu'na na ji'i̱ jyo'o cusu' ji'i̱ ngu' Israel, nu lo'o nguti'i̱ ngu' preso ca loyuu su cuentya Egipto; pana ca tiya' la ndyujuii ycui' Ni ji'i̱ lcaa jyo'o cusu' nu ná ndaquiya' ji'i̱ cha' nu cua nchcui' Ni lo'o ngu' bi'.