HEBREOS 1:3 - Chatino Tataltepec

³ Lcaa xee lubii nu ntsu'u ca slo ycui' Ndyosi, cua ndyanu xee bi' lo Jesús Sñi' Ni lo'o ñaa Jesús nguti'i̱ yu chalyuu. Ñi'ya̱ nu laca ycui' Ndyosi, la cui' jua'a̱ laca nu Jesús bi'; liñi tsa nclyo Jesús cña ji'i̱ lcaa na nu ntsu'u chalyuu tsiya' ti, bi' cha' laca ndi'i̱ tso'o ti lcaa na bi'. Nu lo'o ndye ngua'ni Jesús cña nu ntsu'u ji'i̱ yu nde chalyuu, cha' ngüityi̱ yu yabe' nu ntsu'u ji'i̱ ñati̱, li' nguxtyu̱u̱ yu ndyaa yu ca slo ycui' Ndyosi Sti yu, ndyaa tucua yu nde la'a tsu' cui̱ su tlyu ca su ntucua ycui' Ni.

HEBREOS 1:3 ပူးပေါင်းရင်းမြစ်များ

SAN MATEO 22:24

―Mstru ―nacui̱ ngu' bi' ji'i̱―, sa'ni la nda jyo'o Moisés sca cha' lo'o na cuentya ji'i̱ tya'a ngula ngu'. Nu lo'o cua ngujuii tsaca yu ni, si cua ngujui clyo'o yu pana bilya caja sñi' yu, li' ntsu'u cña ji'i̱ tya'a ngula yu nu ntucua ycui' ti cha' caja clyo'o lo'o nu cuna'a̱ nu ngua clyo'o jyo'o tya'a yu. Li' chcui' ngu' ji'i̱ sñi' clyo ngu' cha' sñi' nu qui'yu nu cua ngujuii bi' laca bi', cha' ná chcuna' xtañi yu nu cua ngujuii bi'. Jua'a̱ nchcui' Moisés sa'ni la.

SAN MARCOS 16:19

Lo'o ndye nchcui' Jesús nu Xu'na na, li' ngua'ni ycui' Ndyosi cha' ndu'u yu ndyaa yu nde cua̱; ndyaa tucua Jesús la'a tsu' cui̱ ji'i̱ ycui' Ndyosi ca bi'.

SAN JUAN 1:14

Ngua yu bi' ñati̱, la cui' yu nu laca cha' ji'i̱ ycui' Ndyosi. Stu'ba ti nguti'i̱ yu lo'o na nde chalyuu. Cua na'a̱ ya ji'i̱ yu cha' tlyu tsa cha' ntsu'u ji'i̱ yu, cha' laca yu nu sca ti Sñi' ycui' Ndyosi. Xcui' tso'o tsa ndu'ni yu lo'o na, xcui' cha' liñi nchcui' yu.

SAN JUAN 1:29

Ca chaca tsa̱ na'a̱ Juan cha' cua lijya̱ ti Jesús slo. Lo'o li' nacui̱ Juan ji'i̱ ñati̱ nu ndu̱ slo: ―Ña'a̱ tso'o ma̱ ji'i̱ nu cusu' cua ―nacui̱―. Cua ngusubi ycui' Ndyosi ji'i̱ nu cua cha' caca yu sca msta̱ lu'ú, cha' cuityi̱ lcaa qui'ya nu ntsu'u ji'i̱ ñati̱ chalyuu ―nacui̱―.

SAN JUAN 1:4

Ca slo ycui' Ndyosi ndu'u yu bi' ya̱a̱ cha' caca tso'o cresiya ji'i̱ ñati̱ chalyuu na. Ngua'ni yu cha' caca cuayá' ti' na lcaa cha' liñi, xqui'ya xee nu ta Ni cha' tyanu ne' cresiya ji'na.

LOS HECHOS 2:33

Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús.

LOS HECHOS 7:56

―Ña'a̱ ma̱ yi'a̱ ―nacui̱ Esteban ji'i̱ ngu' li'―, cua ngusaala ycui' Ndyosi nde cua̱ ―nacui̱―. Cua na'a̱ na' ji'i̱ ycui' nu nda Ni ji'i̱ lijya̱ cha' laca yu ñati̱, ndu̱ yu la'a tsu' cui̱ ca su ntucua ycui' Ndyosi.

ROMANOS 1:16

Ná ntyuju'u ti' na' tsiya' ti cha' culu'u na' cha' tso'o nu ntsu'u ji'i̱ Jesús ji'i̱ ñati̱. Lijya̱ cha' bi' lo'o lcaa chacuayá' ji'i̱ ycui' Ndyosi, cha' cua'ni lyaá Ni ji'i̱ lcaa ñati̱ nu xñi cha' ji'i̱ ycui' Ni. Tya clyo nda Ni cha' tso'o bi' lo'o ngu' judío ti, li' lo'o nda Ni cha' tso'o bi' lo'o ngu' xa' tsu'.

ROMANOS 8:34

Ná ntsu'u nu caca xcube' ji'na li', cha' xqui'ya na cua ngujuii Jesús, xqui'ya na cua ndyu'ú yu chaca quiya'. Lo'o juani ntucua Cristo la'a tsu' cui̱ ca su ntucua ycui' Ndyosi, ndijña yu cha' clyu ti' ji'i̱ ycui' Ndyosi Sti yu cuentya ji'na.

2 CORINTIOS 4:4

Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.

COLOSENSES 3:1

Pana cu'ma̱ ni, cua ngujui chaca chalyuu cucui ji'i̱ ma̱ xqui'ya cha' cua ngua stu'ba cha' ji'i̱ ma̱ lo'o Cristo; bi' cha' lacua, xcui' na tyu'u tyiquee ma̱ ji'i̱ cua ña'a̱ ca cha' tso'o nu ndyu'u ji'i̱ Cristo lijya̱, cha' ntucua Cristo nde la'a tsu' cui̱ su tlyu su ntucua ycui' Ndyosi.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

HEBREOS 1:13

Nde ntsu'u chaca cha' nu nscua lo quityi cusu' cuentya ji'i̱ Jesús: Cua̱a̱ clya nu'u̱ ca nde, tyucua nu'u̱ ca su ntucua na' re; ña'a̱ cuayá' tyiji̱loo na' ji'i̱ lcaa tya'a cusu̱u̱ nu'u̱ tyucua nu'u̱, cha' caca nu'u̱ loo ji'i̱ ngu' bi' tsiya' ti. Ni sca quiya' bilya chcui' ycui' Ndyosi jua'a̱ cuentya ji'i̱ xca̱ ji'i̱ Ni nde cua̱, sca ti lo'o Jesús cua nchcui' Ni jua'a̱.

HEBREOS 10:12

Pana nu Jesucristo bi' ni, sca ti quiya' ngujuii yu lo crusi cha' cati̱ qui'ya nu ntsu'u ji'i̱ ñati̱, lo'o ña'a̱ ti tya ndyu'u scua cña nu ngua'ni yu masi chalyuu juani. Li' ngutu'u Jesús ndyaa Ni, ndyaa tucua Ni nde la'a tsu' cui̱ su tlyu ca su ntucua ycui' Ndyosi.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

HEBREOS 4:14

Lo'o cua ngusñi na cha' ji'i̱ Jesús, li' nga'a̱ cha' cua'ni na cha' tso'o ti tyanu cha' bi' ne' cresiya ji'na. Cua laca ntsu'u sca sti jo'ó nu laca loo la nu ndu̱ cuentya ji'na; Jesús laca bi', nu sca ti Sñi' ycui' Ndyosi laca yu. Cua ndyaa Jesús ca su ndi'i̱ ycui' Ndyosi Sti yu; juani ndu̱ Jesús slo Ni, nchcui' cha' ji'na lo'o Ni.

HEBREOS 7:27

Ndulo la tsiya' ti cha' nu ntsu'u ji'i̱ Jesús que cha' nu ntsu'u ji'i̱ xa' la sti jo'ó nu ndi'i̱ chalyuu. Lcaa tsa̱ nsta ngu' bi' msta̱ lo mesa tacati, cha' jua'a̱ cati̱ la qui'ya nu ntsu'u ji'i̱ ngu' lo'o ycui' Ndyosi; clyo ndu'ni ngu' cha' cati̱ qui'ya ji'i̱ ycui' ca ngu', lo'o li' ndu'ni ngu' cha' cati̱ qui'ya nu ntsu'u ji'i̱ lcaa ngu' quichi̱ bi'. Pana nu Jesús bi' ni, sca ti quiya' ngusta yu msta̱ lo'o nguti'i̱ yu chalyuu cha' cati̱ qui'ya nu ntsu'u ji'i̱ ñati̱; tyucui ña'a̱ ycui' yu ngua msta̱ bi', nu lo'o ngujui'i̱ ca'a̱ ngu' ji'i̱ yu lo crusi.

HEBREOS 8:1

Ndi'ya̱ ndyu'u cha' nu nti' na' chcui̱' lo'o ma̱ juani: Ca cua̱ ntucua Jesús, nde la'a tsu' cui̱ ca su ntucua ycui' Ndyosi, cha' nclyo Ni cña tyucui ña'a̱ chalyuu; ca bi' ntucua Jesús cha' laca Ni sti jo'ó nu laca loo la cuentya ji'na.

HEBREOS 9:16

Sca quityi nu nclyo ñati̱ cha' tyanu xi cha' tso'o ji'i̱ tya'a ngu' lo'o cua ngujuii ngu' ni, ndi'ya̱ ndyaca cha' ji'i̱ quityi bi': ná caja cha' tso'o bi' ji'i̱ tya'a ngu', si bilya cajaa nu ca ji'i̱ cha' tso'o bi';

HEBREOS 9:26

Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.

1 PEDRO 1:21

Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.

1 PEDRO 3:22

Na cua ndyaa Jesucristo nde cua̱, lo'o juani ndi'i̱ yu la'a tsu' cui̱ ca su ntucua ycui' Ndyosi. Nu Jesucristo bi' ni, laca yu loo ji'i̱ lcaa xca̱ ji'i̱ ycui' Ndyosi, ji'i̱ lcaa ngu' nu laca cña, ji'i̱ lcaa cui'i̱ tso'o nu nchca xi ji'i̱; laca yu loo tsiya' ti.

2 PEDRO 1:16

Si'i cña cua̱ nu ngua'ya hique ti ya ngua cha' nu nchcui' ya lo'o ma̱, nu lo'o ndacha' ya ji'i̱ ma̱ cha' tlyu tsa cha' caca ji'i̱ ycui' Jesucristo nu Xu'na na nu lo'o ca̱a̱ yu chaca quiya'. Ycui' cuare cua na'a̱ ya ji'i̱ Jesús lo'o tlyu tsa cha' ntsu'u ji'i̱ yu;

2 PEDRO 1:17

ngua'ni tlyu ycui' Ndyosi Sti Jesús ji'i̱ yu, ndubi tsa ña'a̱ ngua tyucui ña'a̱ loo Jesús lo'o xee ji'i̱ ycui' Ni li'. Masi ná na'a̱ ya ji'i̱ ycui' Ndyosi nu laca loo ji'i̱ lcaa xu'na chalyuu, pana jlo ti' ya cha' nguti'i̱ Ni cacua ti tsa̱ bi', cha' li' ndyuna ya lo'o nchcui' Ni lo'o ngu'. Ndi'ya̱ nacui̱ Ni: “Nu nde laca Sñi' na' nu tyaca'a tsa 'na. Tso'o tsa ntsu'u tyiquee na' ña'a̱ na' ji'i̱ yu”, nacui̱ Ni.

1 JUAN 1:7

Pana si lubii cresiya ji'na ñi'ya̱ lo'o lubii cresiya ji'i̱ ycui' Ni, ndu'ni na cha' tso'o li'; stu'ba ti caca tyiquee na lo'o tya'a ngusñi na cha' ji'i̱ Jesús li'. Lo'o jua'a̱ cuityi̱ Ni qui'ya nu ntsu'u ji'na, xqui'ya cha' cua ndyalú tañi Jesús Sñi' ycui' Ni lo'o ngujuii yu lo crusi.

1 JUAN 3:5

Cua jlo ti' ma̱ cha' cua ya̱a̱ Jesucristo chalyuu cha' cuityi̱ Ni qui'ya nu ntsu'u ji'i̱ ñati̱; pana ycui' Cristo ni, ná ntsu'u qui'ya ji'i̱ yu tsiya' ti.

APOCALIPSIS 3:21

Cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu, ta na' su tyucua ñati̱ bi' ca su ntucua na' cha' laca na loo; cha' jua'a̱ na', cua ntiji̱loo na' ji'i̱ nu xña'a̱ bi', lo'o juani nga'a̱ na' slo ycui' Sti na' su laca Ni loo.

APOCALIPSIS 4:11

Ndyosi Xu'na ya, nga'a̱ cha' cua'ni tlyu ya jinu'u̱, cha' cua'ni chi̱ ya loo nu'u̱, nacui̱ ngu'. Nchca jinu'u̱ cua'ni nu'u̱ lcaa lo cña tsiya' ti nu nti' nu'u̱ cua'ni nde chalyuu. Na cua ngüiñá nu'u̱ lcaa lo na nu ntsu'u nde chalyuu; chacuayá' jinu'u̱ lu'ú lcaa na, cha' nda nu'u̱ chacuayá' cha' ndya'a̱ lcaa na lu'ú. Jua'a̱ nacui̱ ngu' lo'o ndyula tu'ba ngu' li'.