GÁLATAS 5:22 - Chatino Tataltepec

²² Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱;

GÁLATAS 5:22 ပူးပေါင်းရင်းမြစ်များ

SAN MATEO 12:33

’Sca yaca ni, si tso'o yaca, ta si'yu tso'o li'; lo'o jua'a̱ si ná tso'o yaca, ná ta si'yu nu cacu na li'. Jlo ti' na si tso'o yaca lo'o ña'a̱ na si'yu nu nda yaca bi'.

SAN LUCAS 13:9

Ná tyiquee' si tyaja'a̱ si'yu, tyu'u jua'a̱ li'; pana si ná tyu'u tsiya' ti, si'yu nu'u̱ ji'i̱ li'.”

SAN JUAN 15:16

Si'i cu'ma̱ nu ngusubi ma̱ 'na cha' tya'a̱ ma̱ lo'o na' ―nacui̱ Jesús―, na' laca̱ nu cua nchcui' na' lo'o ma̱ clyo. Tya li' ngulo na' cña ji'i̱ ma̱ cha' xcui' cha' tso'o tyu'u ne' cresiya ji'i̱ ma̱, cha' jua'a̱ talo cña tso'o nu ndu'ni ma̱; li' cua'ni Sti na' lcaa cha' nu jña ma̱ ji'i̱ Ni chacuayá' 'na.

SAN JUAN 15:2

Tso'o tsa ña'a̱si̱i̱ Sti na' ji'i̱ lcaa sta̱' yaca bi', lo'o na' laca̱ yaca bi'. Ca quiya' sta̱' yaca nsi'yu Ni ji'i̱, nu lo'o ná nda si'yu lo tsiya' ti. Nsubii Ni xi lo yaca nu nda si'yu tso'o, cha' tya quiña'a̱ la si'yu tyu'u lo bi';

SAN JUAN 15:5

’Ñi'ya̱ laca su̱u̱ yaca nu nda si'yu tyixi ji'i̱, jua'a̱ laca na' cuentya ji'i̱ ma̱, cha' na' laca̱ su̱u̱ cha' tso'o nu ntsu'u ji'i̱ ma̱ ―nacui̱ Jesús ji'i̱ ngu'―. Ñi'ya̱ laca sta̱' yaca bi', jua'a̱ laca cu'ma̱, si ngusñi ma̱ cha' 'na. Stu'ba ti caca tyiquee ma̱ lo'o na', li' caja quiña'a̱ la cha' tso'o nu tyu'u ne' cresiya ji'i̱ ma̱ su ndi'i̱ ma̱ chalyuu, si laca na' su̱u̱ cha' tso'o ji'i̱ ma̱. Ni sca cha' ná caca ji'i̱ ma̱ si ná stu'ba caca tyiquee ma̱ lo'o na' ―nacui̱ Jesús―.

ROMANOS 14:17

Nu lo'o laca ycui' Ndyosi loo ji'na ni, ná ndulo tsa cha' ji'na cuentya ji'i̱ sca na nu ndacu na, sca na nu co'o na; nu ndulo tsa ji'na laca cha' tya̱a̱ Xtyi'i ycui' Ndyosi tyanu ne' cresiya ji'na, cha' ca tso'o cresiya ji'na xqui'ya Jesús. Bi' cha' ti̱ ti taca tyi'i̱ tyiquee na chalyuu, taca ca chaa ti' na xqui'ya ycui' Ndyosi; lcaa cha' bi' caca nu lo'o laca Ni loo ji'na.

ROMANOS 15:14

Cu'ma̱ tya'a ntsu'u cha' ji'na lo'o Cristo, nslo tsa na' ji'i̱ ma̱ cha' tso'o tsa tyiquee ma̱; tso'o tsa nchca cuayá' ti' ma̱ cha' ji'i̱ Cristo, lo'o jua'a̱ nchca tsa ji'i̱ ma̱ ta ma̱ cui̱i̱ lo'o ngu' tya'a ma̱.

ROMANOS 15:3

ñi'ya̱ nu ngua'ni ycui' Cristo, ni sca cña ná ngua'ni yu cha' ji'i̱ ti yu. Cua ntsu'u sca cha' nu nscua lo quityi cusu', sca cha' nu nda yu lo'o ycui' Ndyosi Sti yu ndi'ya̱: “Lcaa cha' cuxi nu nchcui' ngu' jinu'u̱, cua ndyanu cha' bi' hichu̱' na'; yabe' nu ngusta ngu' jinu'u̱ laca bi'”.

ROMANOS 15:30

Cu'ma̱ tya'a ngusñi na cha' ji'i̱ ycui' Ndyosi, tyu'u cha' clyu ti' ji'i̱ ma̱ lo'o na' xqui'ya Jesucristo nu Xu'na na, cha' jua'a̱ ntsu'u tsa tyiquee ma̱ ña'a̱ ma̱ ji'i̱ tya'a ñati̱ ma̱, xqui'ya cña nu ndyu'ni Xtyi'i ycui' Ni ne' cresiya ji'i̱ ma̱. Cua'ni ma̱ cha' caca stu'ba tyiquee ma̱ lo'o na', cha' lu'ba tsa chcui' ma̱ lo'o ycui' Ndyosi cuentya jna'.

ROMANOS 6:22

Pana juani ni, nga'aa caca ji'i̱ nu cuxi bi' culo cña ji'i̱ ma̱, cha' cua ndyatí̱ ma̱ lo cña ji'i̱ ycui' Ndyosi. Chaa ti' ma̱ ndyu'ni ma̱ cña ji'i̱ Ni juani, cha' xcui' na ndi'i̱ ma̱ chalyuu cuentya ji'i̱ ycui' Ni; li' ná nga'a̱ cha' tye chalyuu nu ta Ni ji'i̱ ma̱ lo'o cua ndye lcaa cha'.

ROMANOS 7:4

Ndi'ya̱ laca na juani cuentya ji'i̱ cha' cusu' nu ndaquiya' tsa na ji'i̱ tya sa'ni la: ñi'ya̱ laca sca nu cuna'a̱ nu nga'aa ntsu'u clyo'o, jua'a̱ laca lcaa tya'a na nu ntsu'u cha' ji'na lo'o Cristo. Na cua ngujuii Cristo lo crusi, bi' cha' juani nga'aa ntsu'u cha' ji'na lo'o nu cha' cusu' bi'. Cua ngua stu'ba cha' ji'na lo'o Cristo nu lo'o ndyu'ú yu chaca quiya' lo'o cua ngujuii yu, bi' cha' taca ji'na cua'ni na cña ji'i̱ ycui' Ndyosi laja lo'o tya ndi'i̱ ti na nde chalyuu.

ROMANOS 8:5

Nu lo'o cua'ni na ñi'ya̱ nu ndu'ni ñati̱ chalyuu ti, la cui' cha' cuxi nu ntsu'u ji'i̱ ñati̱ bi', bi' laca loo ne' cresiya ji'na li'; pana si Xtyi'i ycui' Ndyosi laca loo ji'na lo'o ndi'i̱ na chalyuu, li' taca taquiya' na ji'i̱ lcaa cha' nu nchcui' ycui' Ndyosi.

1 CORINTIOS 13:13

Bi' cha' lacua, lcaa tyempo ndu'ni cha' tyi'u ti' na ji'i̱ ycui' Ndyosi, lcaa tyempo ndu'ni cha' tu̱ ti' na cha' caca tso'o la ji'na ca nde loo la, lo'o jua'a̱ tyucui tyempo ndu'ni cha' tyu'u tyiquee na ña'a̱ na ji'i̱ tya'a ñati̱ na. Bi' laca cña nu ndulo la cha' cua'ni na, cha' tyu'u tyiquee na ña'a̱ na ji'i̱ tya'a ñati̱ na.

GÁLATAS 5:13

Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na.

EFESIOS 4:23

Juani nga'a̱ cha' cua'ni cucui ma̱ ji'i̱ lcaa cha' nu ntsu'u ne' cresiya ji'i̱ ma̱, jua'a̱ lcaa cha' nu ca'ya hique ma̱;

EFESIOS 5:9

Na cua ntsu'u nu xee lubii ji'i̱ ycui' Ndyosi ne' cresiya ji'i̱ ma̱, bi' laca nu ndu'ni lo'o ma̱ cha' cua'ni ma̱ cha' tso'o; ndu'ni bi' cha' tso'o ti tyu'u tyiquee ma̱ ña'a̱ ma̱ ji'i̱ xa' ñati̱, cha' xcui' cha' liñi chcui' ma̱.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

COLOSENSES 1:10

Lo'o li' lcaa tsa̱ lo'o ndya'a̱ ma̱ chalyuu taca cua'ni ma̱ cña, cua ña'a̱ ca cña nu nti' ycui' Ndyosi cha' cua'ni ma̱; taca cua'ni ma̱ lcaa lo cña tso'o cuentya ji'i̱ ycui' Ndyosi li', lo'o jua'a̱ taca ca cuayá' la ti' ma̱ ñi'ya̱ ndyu'u lcaa cha' ji'i̱ Ni.

2 TESALONICENSES 3:2

Chcui' ma̱ lo'o ycui' Ndyosi cha' cua'a Ni ji'i̱ ya cha' ná tyiji̱loo ngu' cuxi ji'i̱ ya, masi ngu' nu cuxi tsa tyiquee ngu'; ntsu'u tsa ñati̱ chalyuu nu ná jlya tso'o ti' ji'i̱ ycui' Ndyosi.

1 TIMOTEO 3:11

Lo'o nu ngu' cuna'a̱ ni, ntsu'u cha' cua'ni ngu' xcui' cha' tso'o nu lo'o caca ngu' cña cha' xtyucua ngu' ji'i̱ ña'a̱ taju ngu' nu ngusñi cha' ji'i̱ Jesús; ná tso'o cha' chcui' nu cuna'a̱ bi' cuentyu ji'i̱ tya'a ngu' lo'o xa' ñati̱. Nga'a̱ cha' culacua tso'o ti' nu cuna'a̱ bi', cha' talo ji'i̱ cña nu nda ngu' ji'i̱.

1 TIMOTEO 4:12

Ná ta nu'u̱ chacuayá' xtyí lo'o ngu' jinu'u̱ cha' tya cuañi' nu'u̱, nti' ngu'. Cua'ni nu'u̱ xcui' cña tso'o cha' ña'a̱ lcaa tya'a ñati̱ ji'i̱ Jesucristo; xcui' cha' tso'o chcui' nu'u̱, xcui' cha' tso'o cua'ni nu'u̱, lo'o jua'a̱ tso'o tsa tyu'u tyiquee nu'u̱ ña'a̱ nu'u̱ ji'i̱ xa' la ñati̱. Li' ca cuayá' ti' ngu' cha' tso'o tsa ngusñi nu'u̱ cha' ji'i̱ Jesucristo, xqui'ya cha' xcui' lubii ti cresiya jinu'u̱ ndyu'ni nu'u̱ cña.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

1 PEDRO 1:8

Ntsu'u tsa tyiquee ma̱ ña'a̱ ma̱ ji'i̱ Jesús, masi bilya ña'a̱ ma̱ ji'i̱ Ni; hasta juani tya lyiji ña'a̱ ma̱ ji'i̱, pana jlya ti' ma̱ cha' lu'ú Ni. Chañi cha' tso'o tsa ntsu'u tyiquee ma̱ juani xqui'ya Jesús, ni ná tye chca cha' chcui' ma̱ lcaa cha' tso'o nu ntsu'u tyiquee ma̱ cuentya ji'i̱ ycui' Jesús lo'o xa' ñati̱.

1 PEDRO 5:12

Jlo ti' na' cha' tso'o tsa ngusñi Silvano tya'a na cha' ji'i̱ ycui' nu Xu'na na; yu bi' laca nu nguxtyucua tsa 'na lo'o nguscua ya quityi sube re cha' ca̱a̱ slo cu'ma̱. Nti' na' cha' caca nguula ti' tyiquee ma̱, cha' chañi cha' tlyu tsa cha' tso'o ndu'ni ycui' Ni lo'o na. Jlo ti' na' cha' bi', lo'o jua'a̱ tso'o tsa si lo'o cu'ma̱ tyi'u ti' ma̱ cha' bi', ñi'ya̱ laca lo'o nxtyucua tsa ycui' Ni ji'na lcaa tsa̱.