Cua ndyuna ya cha' cua ndyaa xi ngu' tya'a ya ca slo cu'ma̱, lo'o jua'a̱ cua ngulu'u ngu' ji'i̱ ma̱ cha' ntsu'u cha' xi'yu ma̱ quiji̱ ngu' qui'yu tya'a ma̱; nacui̱ ngu' bi' cha' ntsu'u cha' cua'ni ma̱ lcaa cña nu nguscua jyo'o Moisés lo quityi nu ngua sa'ni. Pana ná ngulo ya cña ji'i̱ ngu' bi', cha' tsaa ngu' slo cu'ma̱; jlo ti' ya cha' xñi'i̱ xi ti' ma̱ ndi'i̱ ma̱ nu lo'o ná nchca cuayá' ti' ma̱ si cha' liñi laca cha' bi'.
GÁLATAS 5:10 - Chatino Tataltepec10 Cuentya jna', ndyi'u tsa ti' na' ji'i̱ ma̱ xqui'ya ycui' nu Xu'na na, cha' jlya ti' na' cha' stu'ba ti ntsu'u tyiquee ma̱ lo'o cha' nu cua nchcui' ca na'. Ná ndu'ni cha' tilaca laca nu ndya'a̱ nchcui' cha' cuiñi lo'o ma̱ cha' xcutsi̱i̱ ji'i̱ ma̱, xcube' tsa ycui' Ndyosi ji'i̱ ñati̱ bi'. အခန်းကိုကြည့်ပါ။ |
GÁLATAS 5:10
28 ပူးပေါင်းရင်းမြစ်များ
Lo'o jua'a̱ nscua na' quityi re, masi tyijyu' tsa ndi'i̱ na' cuentya ji'i̱ cu'ma̱, cha' ná caca tyaala na' lo'o cu'ma̱ nu lo'o cua ndyalaa na' ca quichi̱ tyi ma̱. Chañi cha' cua nda ycui' nu Xu'na na chacuayá' 'na, pana ndi'ya̱ ndyu'u cha' bi': cua'ni na' cha' caja ñi'ya̱ tyanu tachaa la cha' bi' ne' cresiya ji'i̱ ma̱; ná ntsu'u chacuayá' 'na cha' cua'ni ñu'u̱ lyiji na' ji'i̱ cu'ma̱.
cha' jua'a̱ ngua cha' nu nguscua na' lo quityi bi' tya tsubi' la. Ná nti' na' tsa'a na' slo cu'ma̱ nquicha'; ná tyiquee' cua'ni ma̱ cha' ca xñi'i̱ ti' na', ngua ti' na'. Pana tso'o la si tso'o ti caca tyiquee na', cha' jua'a̱ si tso'o ntsu'u tyiquee na', lo'o cu'ma̱ tso'o ti caca tyiquee ma̱ li', ngua ti' na'.
Bi' cha' juani nga'aa chcui' tyucuaa ti' na lo'o xa' ñati̱ si ná ndiya ti' na ñi'ya̱ ndu'ni ngu' bi' nde chalyuu. Nu ngua tya sa'ni la, la cui' ti cha' ná ndiya ti' ya cña nu ngua'ni ycui' Cristo; si'i ñati̱ nguula, si'i ñati̱ tlyu laca yu ngua ti' ya tya li'. Pana juani nga'aa si'i jua'a̱ nclyacua ti' ya ña'a̱ ya ji'i̱ Cristo.
Lo'o jua'a̱ tya nda ya chaca yu tya'a ntsu'u cha' ji'na lo'o Cristo cha' stu'ba ti ca̱a̱ yu lo'o nu xa' ñati̱ ngu' tya'a na bi'. Quiña'a̱ tsa cña cua ngua'ni yu cuentya ji'i̱ nu Xu'na na, bi' cha' jlo ti ya cha' ndiya ti' yu cua'ni yu cña lo'o na. Masi juani tyaca̱' tyijyu' cha' ndyi'u tsa ti' yu ji'i̱ ma̱.
Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.
Na tonto tsa ma̱, cu'ma̱ ngu' gálatas, cha' nduna ma̱ cha' nu nda nu ngu' cuiñi bi'; laca ma̱ ñi'ya̱ si ntsu'u nu ngua'ni cucha'a̱ ji'i̱ ma̱. Bi' cha' juani nga'aa nti' ma̱ xñi la ma̱ cha' liñi nu cua nda Cristo lo'o na. Pana lo'o nda ya cha' ji'i̱ Cristo lo'o ma̱ tya clyo, li' ngulu'u tsa ya ji'i̱ ma̱ ñi'ya̱ ngua lo'o ngujuii Jesucristo lo crusi xqui'ya na; jua'a̱ ngulu'u ya ji'i̱ ma̱ ña'a̱ cuayá' nu ngua cuayá' tso'o ti' ma̱ cha' bi'.
ကြော်ငြာတွေ