GÁLATAS 4:26 - Chatino Tataltepec

²⁶ Pana cua ngujui chaca cha' ji'na, xqui'ya chaca nu cuna'a̱ bi' nu ngua clyo'o Abraham, nu cuna'a̱ nu ndi'i̱ tso'o ti bi'. Chaca lo Jerusalén cucui laca loo ji'na, bi' laca ñi'ya̱ si laca quichi̱ tyi lcaa na nu jlya ti' na ji'i̱ Jesucristo; taca tyi'i̱ tso'o ti na ca bi'.

GÁLATAS 4:26 ပူးပေါင်းရင်းမြစ်များ

SAN JUAN 8:36

Na' nu laca̱ nu sca ti Sñi' ycui' Ndyosi ni, lo'o cua'ni lyaá na' ji'i̱ ma̱, chañi cha' nga'aa caca tatsaa ngu' ji'i̱ ma̱ cha' cua'ni ma cña cuxi chaca quiya' ca su ndi'i̱ ma̱ ―nacui̱―.

ROMANOS 6:14

Nga'aa si'i nu cuxi nu ntsu'u chalyuu nu caca loo ji'i̱ ma̱ juani. Si'i xcui' cha' ntsi̱i̱ ti ti' ma̱ tyi'i̱ ma̱ chalyuu, ñi'ya̱ si lo'o nchcube' tsa cha' cusu' bi' ji'i̱ ma̱; taca tyi'i̱ tso'o ti ma̱ chalyuu juani, cha' xcui' tlyu tsa cha' tso'o nu ndyu'ni Ni lo'o ma̱.

GÁLATAS 4:22

Nacui̱ quityi cha' ngula tucua tya'a sñi' jyo'o Abraham bi': nu clyo ngua sñi' nu cuna'a̱ cua', sca nu cuna'a̱ nu cua ngüi'ya yu cha' cua'ni cña ji'i̱ yu; nu chaca bi' ngua sñi' ycui' clyo'o yu, sca nu cuna'a̱ nu ndi'i̱ tso'o ti.

GÁLATAS 4:25

Stu'ba ña'a̱ naa Agar bi' lo'o ca'ya Sinaí bi', cha' jua'a̱ ndyu'u cha' bi' cha'cña ji'i̱ ngu' Arabia; la cui' ca'ya bi' laca su nda ycui' Ndyosi cha' lo'o ngu' judío tya clyo. Hasta juani tlyu tsa cña nga'a̱ cha' cua'ni lcaa ngu' judío cuentya ji'i̱ cha' cusu' bi', tsa lo cña ñi'ya̱ nu ngua'ni jyo'o Agar cuentya ji'i̱ jyo'o Abraham nu ngua sa'ni la. Lo'o nu ngu' judío nu ndi'i̱ quichi̱ Jerusalén ni, cua nti' ngu' bi' tatsaa ngu' ji'na juani cha' taquiya' na ji'i̱ lcaa cña bi'.

GÁLATAS 5:1

Cua ngua'ni lyaá Cristo ji'na, cha' taca tyi'i̱ tso'o ti na chalyuu. Bi' cha' ña'a̱ ti tya tyi'i̱ tso'o ti ma̱ chalyuu lacua; nga'aa ta ma̱ tyempo cha' caca loo xa' ñati̱ ji'i̱ ma̱, ñi'ya̱ si cua ngüi'ya ngu' ji'i̱ ma̱ cha' cua'ni ma̱ cña ji'i̱ ngu'.

FILIPENSES 3:20

Pana nu na ni, ca su ntucua ycui' Ndyosi tsiya' ti, ca ndacua ntsu'u quichi̱ tyi na nu chañi ca. Lo'o juani chaa tsa ti' na ntajatya na ji'i̱ Jesucristo nu Xu'na na, ni jacua' tyu'u Ni nde cua̱ su ntsu'u quichi̱ nu ca tyi na, cha' ca̱qui'ya Ni ji'na nde chalyuu, cha' cua'ni lyaá lyiji Ni ji'na.

HEBREOS 12:22

Pana nga'aa si'i jua'a̱ ndyaca ji'i̱ ma̱ juani, cha' chaca chalyuu tsaa ma̱ juani; la cui' ca su ntucua tyi ycui' Ndyosi ca nde cua̱, ndacua tsaa ma̱ juani. Ca bi' ndi'i̱ ycui' Ndyosi lo'o tyu̱u̱ tsa mil tya'a xca̱ ji'i̱ Ni. Tso'o tsa ña'a̱ ca bi'; ñi'ya̱ si cua nscua chaca ca'ya Sión nde cua̱, ñi'ya̱ si ca bi' ntucua chaca quichi̱ Jerusalén nu tso'o la ña'a̱, jua'a̱ laca bi'.

1 PEDRO 2:16

Ñati̱ nu ndi'i̱ tso'o ti laca ma̱ juani, pana ná tso'o si ná taquiya' ma̱ ji'i̱ ngu' nu laca loo lo yuu chalyuu; msu ji'i̱ ycui' Ndyosi laca ma̱ juani, bi' cha' tso'o la si cua'ni ma̱ cña nu cuentya ji'i̱ ycui' Ni lacua, cha' ña'a̱ xa' ñati̱ cha' ntsu'u cha' ji'i̱ ma̱ lo'o Ni.

APOCALIPSIS 12:1

Li' nde cua̱ ndyu'u tucua sca cuayá' nu nda ycui' Ndyosi cha' culu'u Ni ji'na, sca cha' nu ndyaca chalyuu laca bi'; bi' laca sca nu cuna'a̱ nu ntsu'u ste' ndubi ña'a̱. Ñi'ya̱ ndubi ña'a̱ xee cuichaa, jua'a̱ ña'a̱ late' lacu' nu cuna'a̱ bi'. Li' ngusta quiya' nu cuna'a̱ chu̱' co'. Tii tyucuaa tya'a cuii nscua lo xlya hique nu cuna'a̱ bi'; ñi'ya̱ nscua sca sne' ti, jua'a̱ nscua bi'.

APOCALIPSIS 17:5

Nde tyaca̱a̱ nscua sca xtañi nu cuna'a̱ bi', pana ná ca cuayá' ti' na ji'i̱ si ná nslo na xtañi bi': “Babilonia tonu laca re, cha' nde laca quichi̱ tyi lcaa ñati̱ nu ndyu'ni cha' suba' tyucui ña'a̱ chalyuu”. Jua'a̱ nscua nde tyaca̱a̱ nu cuna'a̱ bi'.

APOCALIPSIS 21:2

La cui' Juan laca na', lo'o li' na'a̱ na' cha' cua nscua chaca quichi̱ Jerusalén cucui. Lubii tsa ña'a̱ quichi̱ bi' juani; nde su ntucua ycui' Ndyosi ngutu'u quichi̱ bi', ngua'ya nde lo yuu cucui. Tyucui ña'a̱ quichi̱ cua ngalya' tso'o; tso'o tsa ña'a̱ bi', ndubi tsa ña'a̱ bi'. Ñi'ya̱ ña'a̱ sca cuxi̱i̱ ji'i̱ ñati̱, nu tso'o tsa ña'a̱ ste', jua'a̱ tso'o tsa ña'a̱ quichi̱ cucui bi'.

APOCALIPSIS 3:12

Cua ña'a̱ ca ñati̱ nu tyiji̱loo ji'i̱ nu xña'a̱ ni, tlyu tsa caca ñati̱ bi' laja ñati̱ 'na lo'o cua ndyee chalyuu; tso'o tsa tyi'i̱ ngu' bi' ca su ndi'i̱ na'. Scua na' xtañi ycui' Ndyosi Sti na' loo ngu' bi', lo'o jua'a̱ scua na' ni naa quichi̱ tlyu nu ca ji'i̱ ycui' Ni; Jerusalén cucui naa quichi̱ bi'. Tyu'u bi' nde su ntucua ycui' Ndyosi, ca̱a̱ ca'ya bi' lo yuu. Jua'a̱ scua na' xtañi ycui' na' loo ngu' bi', cha' laca ngu' ñati̱ 'na.