GÁLATAS 4:19 - Chatino Tataltepec

¹⁹ Chaca quiya' ti'í tsa ntsu'u tyiquee na' ña'a̱ na' ji'i̱ ma̱, cha' ñi'ya̱ laca sñi' na', jua'a̱ laca ma̱; ña'a̱ na' ji'i̱ ma̱ ñi'ya̱ si laca na' sca nu cuna'a̱ nu ti'í tsa nchcube' ji'i̱ cha' cua cala ti sñi'. Talo cha' ti'í bi' 'na ña'a̱ cuayá' nu tyu'u xcui' cha' ji'i̱ Cristo tyiquee ma̱.

GÁLATAS 4:19 ပူးပေါင်းရင်းမြစ်များ

SAN LUCAS 22:44

Nu lo'o lye tsa nchcube' Jesús, li' lye la nchcui' yu lo'o ycui' Ndyosi. Lo'o li' ntyucua jatá Jesús, ndyalú nchcua' lo yuu; ñi'ya̱ si nchcua' tañi ycui', jua'a̱ ña'a̱.

ROMANOS 13:14

Ta ma̱ chacuayá' cha' caca loo ycui' Jesucristo nu Xu'na na ji'i̱ tyucui ña'a̱ ma̱; nga'aa taquiya' na ji'i̱ lcaa lo cha' cuxi, cha' nu tiji̱' tsa ti' na ji'i̱ xqui'ya cha' laca na ñati̱ ti.

ROMANOS 8:29

Masi tya lo'o nguxana chalyuu, tya li' jlo ti' ycui' Ni tilaca laca nu tyaja'a̱ xñi cha' ji'i̱ Ni nde loo la. Ngua ti' Ni cha' caca na ñi'ya̱ laca Jesús, Sñi' ycui' ca Ni, ngua ti' Ni cha' caca Jesús tya'a na; quiña'a̱ tsa tya'a sñi' ycui' Ni caca na li', pana loo la laca Jesús.

2 CORINTIOS 12:14

Cua tya̱a̱ ti na' ca su ndi'i̱ ma̱ chaca quiya'. Cua tya'a ti sna quiya' cha' ca̱a̱ na' slo ma̱ juani, lo'o ña'a̱ ti ná lijya̱ na' cha' culo na' sca cña tlyu ji'i̱ cu'ma̱. Sca ti nti' na' cha' caca ma̱ ñati̱ ji'i̱ ycui' Ndyosi, ná nti' na' cha' jña na' cñi ji'i̱ ma̱. Ñi'ya̱ nti' na ni, si ntsu'u sñi' na, ycui' ti na ta na caya' lo na laca nu lyiji ji'i̱ sñi' na; si'i sñi' na nu ta caya' lo ycui' na.

EFESIOS 4:13

Lo'o jua'a̱ lcaa na lo'o tya'a na, sca ti cuayá' taca xñi na cha' ji'i̱ Cristo, sca ti cuayá' taca tyuloo na ji'i̱ Jesús nu sca ti Sñi' ycui' Ndyosi. Li' caca na ñati̱ tyucui tyiquee, taca caca na ñi'ya̱ nu nti' Cristo cha' caca na.

EFESIOS 4:24

nga'a̱ cha' xñi tso'o ma̱ cha' ji'i̱ ycui' Ndyosi cha' xa' ña'a̱ cua'ni ma̱ su ndi'i̱ ma̱ chalyuu, cha' taca cua'ni ma̱ ñi'ya̱ nu nti' ycui' Ndyosi cha' cua'ni ma̱. Bi' cha' xcui' cha' tso'o cua'ni ma̱ chalyuu, xcui' cha' lubii cua'ni ma̱, si chañi cha' laca ma̱ ñati̱ ji'i̱ ycui' Ndyosi.

FILIPENSES 1:8

Cua jlo ti' ycui' Ndyosi cha' ñi'ya̱ ntsu'u tyiquee ycui' Jesucristo ña'a̱ Ni ji'i̱ lcaa cu'ma̱, la cui' jua'a̱ ntsu'u tsa tyiquee na' ña'a̱ na' ji'i̱ cu'ma̱.

FILIPENSES 2:17

Jlo ti' na' cha' si'i cha' xca ti laca nu ngua'ni ma̱ lo'o ngusñi ma̱ cha' ji'i̱ ycui' Ndyosi; quiña'a̱ tsa na nguxtyanu ma̱, tyu̱u̱ quiya' cua nda ma̱ tyucui ña'a̱ ma̱ cha' caca ma̱ cña ji'i̱ Cristo, xqui'ya cha' cua ngusñi ma̱ cha' ji'i̱ Ni. Lo'o juani lo'o na' ni, cujuii ngu' 'na, nti' na'; chcuna' chalyuu 'na jua'a̱ ti cuentya ji'i̱ cu'ma̱. Pana ná ntsi̱i̱ na'; masi jua'a̱ caca 'na, chaa tsa ti' na' ndi'i̱i̱. Lo'o jua'a̱ nti' na' cha' ca chaa ti' cu'ma̱, cha' stu'ba ti ca chaa ti' na' lo'o cu'ma̱.

FILIPENSES 2:5

Tso'o si culacua ti' ma̱ ñi'ya̱ nclyacua ti' ycui' Jesucristo. Ndi'ya̱ ngua cha' ji'i̱ yu:

COLOSENSES 1:27

Sca cha' tlyu nu tso'o tsa laca cha' bi', sca cha' nu caja ji'i̱ lcaa lo ñati̱ chalyuu laca cha' ji'i̱ ycui' Ndyosi bi'; pana ná ngujui chacuayá' cha' caca cuayá' ti' ñati̱ ji'i̱ ycui' Ndyosi cha' bi' nu ngua cua sa'ni la. Ndi'ya̱ ndyu'u cha' bi', cha' nu bilya cuna ngu': Taca tyi'i̱ Cristo lo'o na nde chalyuu, masi juani ti; lo'o jua'a̱ tiya' la li' taca tyu'u cha' ji'na lo'o ycui' Ndyosi ca su tlyu su xee tsa ca su ntucua ycui' Ni.

COLOSENSES 2:1

Ta na' sca cha' lo'o ma̱, cha' caca cuayá' ti' ma̱ cha' lye tsa ngua'ni na' cña cuentya ji'i̱ ma̱, lo'o jua'a̱ cuentya ji'i̱ ngu' quichi̱ Laodicea, lo'o jua'a̱ cuentya ji'i̱ tyu̱u̱ tya'a ngu', masi tya lyiji tyuloo ngu' 'na.

COLOSENSES 3:10

cha' juani cua ngujui chaca chalyuu cucui ji'i̱ ma̱. Chaca lo ñati̱ cua laca ma̱ juani; cua nguxcutsa'a̱ ycui' Ndyosi lcaa cha' nu ntsu'u ne' cresiya ji'i̱ ma̱ juani, cha' jua'a̱ caca ma̱ ñi'ya̱ nu laca ycui' Ni, nu lo'o ndyaca tsa'a̱ lyiji ma̱ lcaa cha' nu ntsu'u ji'i̱ ycui' Ni.

COLOSENSES 4:12

Lo'o yu Epafras tya'a quichi̱ tyi ma̱, nda yu xlyo ni'i̱ ji'i̱ ma̱; stu'ba ti ndya'a̱ yu lo cña ji'i̱ Jesucristo lo'o ya. Lcaa tsa̱ ndijña tsa yu cha' clyu ti' ji'i̱ ycui' Ndyosi cuentya ji'i̱ cu'ma̱, ndijña yu chacuayá' ji'i̱ ycui' Ni cha' ná tya'a̱chu̱' ma̱ tsiya' ti cha' ji'i̱ Ni. Ndi'ya̱ nti' yu, cha' tyucui tyiquee ma̱ tsiya' ti cua'ni ma̱ na laca nu nti' Ni cha' cua'ni ma̱ nde lo yuu chalyuu.

1 TESALONICENSES 2:7

Pana ñi'ya̱ nu ña'a̱si̱i̱ sca nu cuna'a̱ ji'i̱ sñi', jua'a̱ nguna'a̱si̱i̱ ya ji'i̱ ma̱, nu lo'o nguti'i̱ ya ca slo ma̱ nu ngua li'.

1 TIMOTEO 1:2

Nscua na' quityi re cha' ca̱a̱ slo nu'u̱, Timoteo, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' ngusñi nu'u̱ cha' ji'i̱ Jesucristo tya lo'o ngulu'u na' cha' bi' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.

TITO 1:4

Nscua na' quityi re cha' ca̱a̱ slo nu'u̱, Tito, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' stu'ba ti ngusñi na cha' ji'i̱ ycui' Ndyosi. Ndi'ya̱ nti' na' cha' ña'a̱ ti cua'ni ycui' Ndyosi Sti na cha' tso'o lo'o nu'u̱, jua'a̱ Jesucristo nu ngua'ni lyaá ji'na; cua'ni Ni cha' ti̱ ti tyi'i̱ tyiquee nu'u̱ li'.

FILEMÓN 1:10

Pana chcui' na' sca cha' lo'o nu'u̱ cuentya ji'i̱ yu Onésimo, cha' ñi'ya̱ nti' na' ña'a̱ na' ji'i̱ sca sñi' na', jua'a̱ nti' na' ña'a̱ na' ji'i̱ yu bi' juani, cha' ne' chcua̱ re ngusñi yu cha' ji'i̱ ycui' Ndyosi xqui'ya na'.

FILEMÓN 1:19

tya na' cñi bi' jinu'u̱, bi' cha' nscua na' xtañi na' ca nde ndi'ya̱: Pablo. Ná chcui' na ji'i̱ cha' nu ndacui nu'u̱ jna', masi sca tane' tlyu laca bi', cha' ngujui chalyuu nu ná nga'a̱ cha' tye jinu'u̱ xqui'ya na'.

HEBREOS 5:7

Nu lo'o tya ndi'i̱ Jesús lo yuu chalyuu, tyu̱u̱ tsa quiya' ngusi'ya tsa yu lo'o nchcui' yu lo'o ycui' Ndyosi Sti yu; lye tsa ngua ti' cresiya ji'i̱ yu lo'o ngüijña yu cha' ji'i̱ Ni, cha' nchca tsa ji'i̱ ycui' Ndyosi. Ngua ji'i̱ Ni cua'a ji'i̱ ñati̱ cha' ná cujuii ngu' ji'i̱ Jesús nquicha'; pana ndyuna Ni cha' nu nchcui' Jesús lo'o Ni, cha' ntaja'a̱ yu cua'ni yu lcaa cña nu nti' ycui' Ndyosi Sti yu.

SANTIAGO 1:18

Lcaa cha' nu liñi ca cuentya ji'i̱ ycui' Ndyosi, cua ngulu'u Ni cha' bi' ji'na cha' caca na ñati̱ ji'i̱ ycui' Ni, cha' jua'a̱ nti' Ni cha' caca; cua nti' Ni cha' caca na loo ji'i̱ lcaa ca lo na nu cua ngüiñá ycui' Ni, jua'a̱ nti' Ni.

1 JUAN 2:1

Ñi'ya̱ nti' na' ña'a̱a̱ ji'i̱ sñi' na', jua'a̱ nti' na' ña'a̱a̱ ji'i̱ cu'ma̱, cha' tyaca'a tsa ma̱ 'na; bi' cha' nscua na' quityi re cha' ca̱a̱ ca slo cu'ma̱, cha' ná nti' na' cha' sta ycui' Ndyosi qui'ya ji'i̱ ma̱. Pana si ntsu'u cha' sta Ni qui'ya ji'na lo'o cua ngusñi na cha' ji'i̱ Jesucristo, la cui' Jesucristo laca nu cua nchcube' yu cña loo na. Sca ñati̱ nu lubii tsa laca nu Jesucristo bi'.

1 JUAN 2:12

Cu'ma̱ sñi' na', nscua na' quityi re cha' ca̱a̱ slo ma̱, xqui'ya cha' ngua'ni clyu ti' ycui' Ndyosi ji'i̱ ma̱; xqui'ya Jesucristo cua ngüityi̱ Ni qui'ya nu ntsu'u ji'i̱ ma̱.

1 JUAN 5:21

Cu'ma̱ sñi' na', tii ti ti' ma̱ tyi'i̱ ma̱ chalyuu, cha' ná tyatí̱ yu'u ma̱ lo'o xa' jo'ó. Jua'a̱ laca cha' bi' lacua.

3 JUAN 1:4

Sca ti cha' nclyacua ti' na' cuentya ji'i̱ cu'ma̱, si chañi cha' ndaquiya' ma̱ ji'i̱ cha' liñi nu cua nda Jesús lo'o na, cha' cuañi' la cu'ma̱ cuentya jna'; tso'o tsa ntsu'u tyiquee na' lo'o ndyuna na' cha' jua'a̱ ndu'ni ma̱.