GÁLATAS 3:29 - Chatino Tataltepec

²⁹ Nu lo'o ngusñi na cha' ji'i̱ ycui' Cristo, li' la cui' jua'a̱ laca na ñati̱ nu ndyu'u ji'i̱ jyo'o Abraham, masi tiya' la ñaa na chalyuu. Su cua ndye, li' tyanu cha' ji'na, lcaa ña'a̱ cha' nu cua ngüiñi ji'i̱ ycui' Ndyosi lo'o nu Abraham bi' cua sa'ni la cha' tyacua ji'na.

GÁLATAS 3:29 ပူးပေါင်းရင်းမြစ်များ

SAN MATEO 3:9

Ná culacua ti' ma̱ cha' caca tso'o ji'i̱ ma̱ slo ycui' Ndyosi si xcui' ndyi'u ti' ma̱ ji'i̱ jyo'o cusu' ji'i̱ ma̱, nu cusu' Abraham bi'. Ná talo ycui' Ni ji'i̱ cha' cuxi nu ndu'ni ma̱ tsiya' ti, masi ñati̱ tya'a ji'i̱ jyo'o Abraham laca ma̱, nchcui' ma̱. Na cuiñi ma̱. Si nti' ycui' Ndyosi, taca ji'i̱ Ni cuiñá Ni ji'i̱ ñati̱ tya'a ji'i̱ jyo'o Abraham, masi lo'o quee to' sta'a̱ re, taca ji'i̱ Ni si nti' Ni. Nga'aa taquiya' Ni ji'i̱ cu'ma̱ li'.

ROMANOS 8:17

Nu lo'o cua laca na sñi' ycui' Ni, lo'o ji'na tyacua lcaa cha' tso'o nu ta Ni li', lcaa ña'a̱ cha' nu cua nda Ni ji'i̱ Cristo; pana si cua nti' na cha' stu'ba ti tyi'i̱ na lo'o Cristo ca su tlyu ca su ntucua Ni, li' ntsu'u cha' talo na lo'o ndyu'ni lya' ti' ngu' ji'na nde chalyuu ti, ñi'ya̱ ndalo ycui' Cristo lo'o ngua'ni lya' ti' ngu' ji'i̱ yu.

1 CORINTIOS 15:23

Ntsu'u ñi'ya̱ caca cha' re: tya clyo cua ndyu'ú ycui' Cristo chaca quiya'; tiya' la lo'o tyalaa tsa̱ nu ca̱a̱ Cristo chaca quiya', li' tyu'ú na, lcaa na nu ntsu'u cha' ji'na lo'o ycui' Ni;

2 CORINTIOS 10:7

Na la xña nchcui' ti ma̱ ji'i̱ ya. Pana tso'o la si culacua xi ti' ma̱ ñi'ya̱ ndyu'u scaa cha' nu liñi ca; nu ñati̱ nu nti' cha' cuentya ji'i̱ Cristo laca ngu' bi' ni, ndu'ni cha' culacua tso'o la xi ti' ngu' bi', cha' caca cuayá' ti' ngu' li', cha' lo'o cuare laca ya cuentya ji'i̱ Cristo.

GÁLATAS 3:16

Jua'a̱ ngua'ni ycui' Ndyosi lo'o nu Abraham bi'; cua ngüiñi cha' ji'i̱ Ni lo'o jyo'o cusu' bi', jua'a̱ lo'o sca ñati̱ nu tyu'u ji'i̱ jyo'o cusu' bi' tyempo nde loo la. Ná nacui̱ quityi ji'i̱ ycui' Ndyosi cha' quiñi cha' ji'i̱ Ni lo'o tyu̱u̱ tya'a ñati̱ bi'. “Na cua ngüiñi cha' ji'i̱ ycui' Ndyosi lo'o sca ti ñati̱ nu tyu'u ji'i̱ Abraham nde loo la”, nacui̱ quityi. Lo'o nu sca ti ñati̱ bi' ni, Cristo laca bi'.

GÁLATAS 3:18

Si ntsu'u cha' taquiya' na ji'i̱ lcaa cña nu ngulo Moisés ji'na, cha' jua'a̱ clyaá na ji'i̱ nu cuxi, li' nga'aa nti' cha' jlya ti' na cha' nu cua ngüiñi ji'i̱ ycui' Ndyosi lo'o na cha' cua'ni lyaá Ni ji'na. Pana cha' liñi laca cha' cua ngüiñi cha' ji'i̱ ycui' Ni lo'o Abraham, cha' cua'ni Ni sca cha' xlya'be lo'o na nu lo'o cua'ni lyaá Ni ji'na.

GÁLATAS 3:28

Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

GÁLATAS 3:7

Lo'o jua'a̱ nga'a̱ cha' ca cuayá' ti' ma̱ cha' cua ña'a̱ ca ñati̱ nu ngusñi cha' ji'i̱ Cristo, chañi cha' laca ñati̱ bi' ñi'ya laca ngu' judío, cha' ndyu'ni ngu' bi' la cui' ñi'ya̱ nu ngua'ni jyo'o Abraham, masi tyempo juani.

GÁLATAS 4:1

Ndi'ya̱ cha' nti' na' ta na' lo'o ma̱: Sca nu sube ni, masi nguxtyanu jyo'o sti lcaa cha' tso'o ji'i̱ lo'o ngujuii sti, cha' tya cuañi' nu sube bi', stu'ba nti' lo'o msu nu ngüi'ya ti sti; na ji'i̱ nu sube bi' laca lcaa cha' tso'o bi', pana tya lyiji casu' yu.

GÁLATAS 4:7

Nga'aa laca ma̱ ñi'ya̱ laca sca msu nu ngüi'ya ti ñati̱, na cua laca ma̱ sñi' ycui' Ndyosi; bi' cha' juani ta Ni lcaa cha' nu ndyanu cha' tyacua ji'i̱ ma̱ chacuayá' ji'i̱ Cristo, cha' laca ma̱ sñi' ycui' Ni.

GÁLATAS 5:24

Cua ngujuii Cristo lo crusi cha' cati̱ qui'ya nu ntsu'u ji'na; bi' cha' cua ngua'ni tye na ji'i̱ lcaa cha' cuxi nu ntsu'u ne' cresiya ji'na tya tsubi' la, lcaa na nu ndacui ti' na ji'i̱ nquicha', ngua'ni tye na ji'i̱ xqui'ya cha' ntsu'u cha' ji'na lo'o ycui' Cristo. Lo'o jua'a̱ lcaa cha' nu tiji̱' ti' na ji'i̱, cua nguxtyanu na ji'i̱ cha' cuxi bi' juani.

GÁLATAS 6:16

Lcaa ñati̱ nu ndu'ni jua'a̱ xqui'ya Jesús laja lo'o ndi'i̱ ngu' chalyuu, taca tyi'i̱ tyiquee ngu' ti̱ ti li', lo'o jua'a̱ cua'ni tya'na ti' ycui' Ndyosi ji'i̱ ngu' bi' li'; jua'a̱ cua'ni Ni lo'o lcaa na nu chañi cha' laca na ñati̱ ji'i̱ Ni.

EFESIOS 3:6

Bilya cuna ñati̱ chalyuu cha' nu ndacha' Ni 'na. Pana ndi'ya̱ ndyu'u cha' bi': Ngu' nu si'i ngu' judío laca ngu' ni, caca ngu' bi' la cui' ñi'ya̱ laca ngu' judío nu ntsu'u cha' ji'i̱ lo'o ycui' Ndyosi, nu lo'o ca cuayá' ti' ngu' cha' ji'i̱ Cristo; si xñi ngu' bi' cha' ji'i̱ Jesucristo, lo'o ngu' bi' caca tso'o cresiya ji'i̱ ngu' cuentya ji'i̱ ycui' Ndyosi li'. Caca stu'ba cha' ji'i̱ tyucuaa lo ngu' li', cha' tsa tlyu ti tya'a ngusñi ngu' cha' ji'i̱ Cristo caca ngu'. Lo'o ji'i̱ ngu' nu si'i ngu' judío laca ngu' bi', tyacua lcaa cha' nu cua nacui̱ Ni cha' tyacua ji'i̱ ngu' xqui'ya Jesucristo.

TITO 3:7

tlyu tsa cha' tso'o nu ngua'ni ycui' Ndyosi lo'o na jua'a̱, cha' caca na ñi'ya̱ si laca na sñi' ycui' Ni, nu ndu̱ ti' na cha' caja chalyuu cucui nu ná nga'a̱ cha' tye ji'na.

HEBREOS 1:14

Lcaa nu laca xca̱ ji'i̱ ycui' Ndyosi nde cua̱ ni, lcaa tsa̱ ndu'ni bi' cña nu nclyo ycui' Ndyosi ji'i̱; cui'i̱ nu tso'o tsa laca nu ngu' xca̱ bi'. Nda Ni ji'i̱ ngu' xca̱ bi' ca̱a̱ nde chalyuu, cha' xtyucua ngu' ji'i̱ ca ta'a ñati̱ nu cua clyaá ti ji'i̱ nu cuxi xqui'ya Jesús, cha' cua ngulala ti tye chalyuu.

HEBREOS 11:7

Jlya ti' jyo'o Noé ji'i̱ ycui' Ndyosi, bi' cha' ndyuna yu cha' nu nchcui' Ni lo'o yu, nu lo'o nacui̱ Ni ñi'ya̱ ña'a̱ cha' cuxi nu lijya̱ caca nde loo la, masi ycui' yu ná ngua tii yu ñi'ya̱ caca cha' bi'. Ngusñi yu cha' ji'i̱ ycui' Ndyosi, li' ngüiñá yu sca yaca ni'i̱ su tyi'i̱ yu lo'o lcaa tya'a ndi'i̱ yu; jua'a̱ ngua cha' ngulaá ngu' ji'i̱ tyo clyaa bi'. Jlo ti' na juani cha' cuxi tsa ngua chalyuu cusu' bi', cha' sca ti Noé jlya ti' yu cha' nu nchcui' Ni lo'o; ngua'ni ycui' Ndyosi cha' ngua tso'o cresiya ji'i̱ yu li'.

HEBREOS 6:17

La cui' jua'a̱ ngua'ni ycui' Ndyosi. Ngua ti' Ni cacha' liñi Ni ji'i̱ ngu' ñi'ya̱ nu caca cha' bi' ji'i̱ ngu' bi' ca nde loo la, cha' ca cuayá' ti' ngu' cha' nga'aa tya'a̱chu̱' Ni tsiya' ti ji'i̱ sca cha' nu cua nacui̱ Ni tsaca quiya'; bi' cha' xtañi ycui' Ni ngulotu̱ Ni clyo, cha' jua'a̱ ngüiñi cha' ji'i̱ Ni lo'o jyo'o bi'.

SANTIAGO 2:5

Cu'ma̱ ngu' tya'a na nu tyaca'a tsa ma̱ 'na, cui'ya ma̱ cuentya ji'i̱ cha' re: Cua ngusubi ycui' Ndyosi ji'i̱ ñati̱ ti'i cha' taca xñi tso'o ngu' cha' ji'i̱ ycui' Ni; ta Ni chalyuu tso'o ji'i̱ ngu' bi' li', la cui' chalyuu nu nacui̱ Ni cha' caja ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. Masi ti'i tsa ñati̱ bi' nde chalyuu, pana culiya' ngu' cuentya ji'i̱ ycui' Ndyosi.

APOCALIPSIS 21:7

Ndi'ya̱ caca ji'i̱ ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu; cua'ni tlyu ngu' bi' 'na cha' na' laca̱ ycui' Ndyosi cuentya ji'i̱ ngu', lo'o jua'a̱ caca ngu' bi' sñi' na'.