GÁLATAS 3:27 - Chatino Tataltepec27 Lo'o ngua stu'ba cha' ji'na lo'o Ni, li' cua ntyucuatya ngu' ji'i̱ lcaa na chacuayá' ji'i̱ Cristo, cha' jua'a̱ cua ndyanu lcaa cha' ji'i̱ Cristo ne' cresiya ji'na, ñi'ya̱ nti' si cua laca cha' bi' sca late' nu quixi̱i̱ chu̱' na. အခန်းကိုကြည့်ပါ။ |
Li' ntyucuatya ngu' ji'i̱ Lidia lo'o ji'i̱ lcaa tya'a ngu' nu ndi'i̱ slo. ―Si chañi cha' nclyacua ti' ma̱ cha' laca na' ñati̱ ji'i̱ Jesucristo ―nacui̱ nu cuna'a̱ bi' ji'i̱ ya―, tya̱a̱ ma̱ to' tyi na', tyanu ma̱ xi slo cua lacua. Tyu̱u̱ quiya' nchcui' ma' lo'o ya cha' tsaa ya, bi' cha' ndyaa ya lo'o ma' ca toni'i̱ ji'i̱ ma'.
―Tso'o si caca tyuju'u ti' ma̱ ji'i̱ cha' cuxi, lcaa cha' cuxi nu ntsu'u tyiquee ma̱ xtyanu ma̱ ji'i̱ li' ―nacui̱ Pedro ji'i̱ ngu'―. Lo'o jua'a̱ tyucuatya ngu' ji'i̱ ma̱ chacuayá' ji'i̱ Jesús li'. Cuityi̱ Ni lcaa qui'ya nu ntsu'u ji'i̱ ma̱ li', jua'a̱ ta Ni Xtyi'i ycui' Ni cha' tyanu Ni ne' cresiya ji'i̱ ma̱.
Nchcui' quityi cha' cua'ni ycui' Ndyosi cha' caca tso'o cresiya ji'na cuentya ji'i̱ ycui' Ni, si xñi na cha' ji'i̱ Jesucristo. Stu'ba ti cua'ni Ni lo'o ca ta'a na nu laca na ngu' judío; jua'a̱ lo'o lcaa ñati̱ nu cua ngusñi cha' ji'i̱ ycui' Ndyosi ca chaca tsu' chalyuu, stu'ba ti cua'ni Ni lo'o lcaa ñati̱.
Ca ta'a na, masi ngu' judío, masi ngu' xa' tsu' laca na, masi msu nu ngüi'ya ñati̱, masi msu nu ndi'i̱ tso'o ti laca na, na cua ntyucuatya na chacuayá' ji'i̱ Xtyi'i ycui' Ndyosi; cua ndyanu Xtyi'i ycui' Ndyosi bi' ne' cresiya ji'i̱ sa scaa na, cha' stu'ba ntsu'u tyiquee na lo'o lcua ti tya'a ñati̱ nu ngusñi cha' ji'i̱ Cristo.
Ñi'ya̱ nu ngua'ni lyaá Ni ji'i̱ ngu' nu nguta'a̱ ne' yaca ni'i̱ bi' lo hitya nu ngua sa'ni la, cha' ndaquiya' ngu' bi' ji'i̱ cha' nu nchcui' ycui' Ni; jua'a̱ clyaá ma̱ juani, cha' cua ndaquiya' ma̱ ji'i̱ cha' nu nchcui' Ni. Cua ndyaa ma̱ lo hitya cha' tyucuatya ma̱ li'. Si'i na caata ti na chcu laca cha' bi', si'i cha' cuu' cuaña' na, bi' cha' tyucuatya na li'; ndi'ya̱ laca cha': na cua ndijña na ji'i̱ ycui' Ndyosi cha' cua'ni lubii Ni ji'i̱ cresiya ji'na xqui'ya cha' cua ndyu'ú Jesucristo chaca quiya', bi' cha' ntyucuatya na.