GÁLATAS 1:7 - Chatino Tataltepec

⁷ Pana liñi la ñacui̱ na cha' nga'aa ntsu'u xa' la cha' tso'o ji'i̱ Jesucristo nu taca cua'ni lyaá ji'na. Ndi'ya̱ ndyaca cha': Ntsu'u xi ñati̱ nu ndyu'ni cha' quichi̱ yaa cha' hique ma̱; cua nti' tsa ngu' bi', cha' xcutsa'a̱ ngu' ñi'ya̱ ntsu'u cha' ji'i̱ Cristo.

GÁLATAS 1:7 ပူးပေါင်းရင်းမြစ်များ

SAN MATEO 24:24

cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

LOS HECHOS 13:10

bi' cha' nchcui' lo'o nu cucha'a̱ bi': ―Lye tsa ñilo'o nu'u̱ ji'i̱ ngu' ―nacui̱ Pablo ji'i̱ nu cucha'a̱ bi'―. Liye' tsa ti' nu'u̱ ña'a̱ nu'u̱ ji'i̱ ya, cha' msu ji'i̱ nu xña'a̱ laca nu'u̱ ―nacui̱―. Ndaca'a tsa nu'u̱ ji'i̱ ngu' cha' ná cua'ni ngu' sca cha' tso'o ti; bi' cha' juani culo na' cña jinu'u̱ cha' nga'aa cua'a nu'u̱ ji'i̱ ngu' nu nti' xñi cha' ji'i̱ ycui' Ndyosi nu Xu'na ya.

LOS HECHOS 15:24

Cua ndyuna ya cha' cua ndyaa xi ngu' tya'a ya ca slo cu'ma̱, lo'o jua'a̱ cua ngulu'u ngu' ji'i̱ ma̱ cha' ntsu'u cha' xi'yu ma̱ quiji̱ ngu' qui'yu tya'a ma̱; nacui̱ ngu' bi' cha' ntsu'u cha' cua'ni ma̱ lcaa cña nu nguscua jyo'o Moisés lo quityi nu ngua sa'ni. Pana ná ngulo ya cña ji'i̱ ngu' bi', cha' tsaa ngu' slo cu'ma̱; jlo ti' ya cha' xñi'i̱ xi ti' ma̱ ndi'i̱ ma̱ nu lo'o ná nchca cuayá' ti' ma̱ si cha' liñi laca cha' bi'.

LOS HECHOS 20:30

Lo'o jua'a̱ laja ycui' ngu' tya'a ma̱ tyu'u tucua xi ngu' cuiñi bi'; cha' cuiñi ti culu'u ngu' bi' ji'i̱ lcaa tya'a ñati̱ ji'i̱ Jesucristo, cha' nga'aa tyi'u ti' ngu' ni sca cha' liñi nu cua nchcui' ma̱ lo'o ngu'.

2 CORINTIOS 11:13

Ná chañi cha' ndyu'ni ngu' bi' cña ji'i̱ Cristo; na cuiñi ti ngu' bi', quiña'a̱ tsa cha' cuiñi nda ngu' bi' lo'o ñati̱ macala su ndya'a̱ ngu'. Xa' ña'a̱ xi ndu'ni loo ngu' bi', cha' ñilo'o ngu' ji'i̱ xa' ñati̱ cha' laca ngu' bi' ñati̱ tso'o, cha' ñati̱ nu ndyu'ni cña ji'i̱ Cristo laca ngu' bi'.

2 CORINTIOS 2:17

Si'i ngana ndyu'ni ya lo'o cha' ji'i̱ ycui' Ndyosi bi', si'i na nchcutsa'a̱ ya ji'i̱ lo'o xa' la cha'; tyucui ti' tyiquee ya nchcui' ya lo'o ñati̱ ñi'ya̱ laca si na ndi'i̱ ycui' Ndyosi slo ya, xqui'ya cha' ycui' Ndyosi laca nu ngua'a̱ loo ji'i̱ ya cha' cua'ni ya cña bi' cuentya ji'i̱ Cristo.

2 CORINTIOS 4:2

Cua nguxtyanu ya ji'i̱ lcaa cha' cuxi nu ndyu'ni ngu' cuaana ti, lcaa cha' nu ntyuju'u tsa ti' ngu' cua'ni ngu' ji'i̱. Si'i na nñilo'o ya ji'i̱ ngu', la cui' jua'a̱ ná nchcutsa'a̱ ya cha' ji'i̱ ycui' Ndyosi lo'o xi xa' la cha', nu lo'o nchcui' ya cha' bi' lo'o ngu'; tso'o ti nclyu'u ya tyucui cha' ji'i̱ Jesús ji'i̱ ngu'. Lo'o jua'a̱ chañi tsa laca cha' bi', cha' jua'a̱ caca cuayá' ti' lcaa ñati̱ cha' tyucui tyiquee ya ndu'ni ya cña ji'i̱ ycui' Ndyosi; jua'a̱ nti' ycui' Ni ña'a̱ Ni ji'i̱ ya.

GÁLATAS 1:6

Ndube tsa ti' na' cha' yala ti nguta'a̱chu̱' ma̱ ji'i̱ ycui' Ndyosi, masi ngusubi Ni ji'i̱ ma̱ xqui'ya cha' ntsu'u tsa tyiquee Cristo ña'a̱ ji'na; ndube ti' na' cha' nduna ma̱ chaca cha' nu si'i cha' ji'i̱ ycui' Ndyosi laca, nu nacui̱ ngu' cha' taca cua'ni lyaá ji'na ji'i̱ nu cuxi.

GÁLATAS 2:4

Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.

GÁLATAS 4:17

Chañi cha' nti' tsa nu ngu' cuiñi bi', cha' taquiya' ma̱ ji'i̱ cha' nu nchcui' ngu' bi' lo'o ma̱. Pana si'i cha' tso'o tyiquee ngu' ndyu'ni ngu' jua'a̱; na cua nti' ngu' bi', cha' nga'aa taquiya' ma̱ ji'i̱ cha' nu nchcui' ya lo'o ma̱, cha' taquiya' la ma̱ ji'i̱ ycui' ca ngu' bi'.

GÁLATAS 5:10

Cuentya jna', ndyi'u tsa ti' na' ji'i̱ ma̱ xqui'ya ycui' nu Xu'na na, cha' jlya ti' na' cha' stu'ba ti ntsu'u tyiquee ma̱ lo'o cha' nu cua nchcui' ca na'. Ná ndu'ni cha' tilaca laca nu ndya'a̱ nchcui' cha' cuiñi lo'o ma̱ cha' xcutsi̱i̱ ji'i̱ ma̱, xcube' tsa ycui' Ndyosi ji'i̱ ñati̱ bi'.

GÁLATAS 5:12

Nu ngu' nu ndya'a̱ ndatsaa ji'i̱ ma̱ cha' culacua̱ ma̱ cuentya ji'i̱ ngu', tso'o la masi tye cuaña' ycui' ca ngu' si'yu ngu', si jua'a̱ nti' ngu'.

GÁLATAS 6:17

Tya tsubi' la, tlyu tsa cña nda ma̱ 'na, cha' ná ndaquiya' ma̱ ji'i̱ cha' nu nchcui' na' lo'o ma̱; bi' cha' juani nga'aa cua'ni ma̱ cha' cusu̱u̱ lo'o na' chaca quiya'. Cua ntsu'u cuayá' nu nscua lo cuaña' na', bi' laca cuayá' su nguxcube' ngu' 'na xqui'ya cha' ndyu'ni na' cña ji'i̱ Jesús.

2 TIMOTEO 2:18

Nguxtyanu ngu' bi' cha' liñi ji'i̱ ycui' Ndyosi, lo'o nu juani nacui̱ ngu' bi' cha' nga'aa tyu'ú na chaca quiya': “Na cua ndyu'ú ngu' chaca quiya', lcaa ngu' nu ntsu'u cha' tyu'ú”, nacui̱ ngu' cuiñi bi'. Pana ntsu'u xi ngu' tya'a na nu cua ngusñi cha' nu nchcui' ngu' bi', lo'o juani nga'aa jlo tso'o ti' ngu' ni cha' nu jlya ti' ngu' tya clyo.

1 JUAN 2:26

Tsa bi' ti cha' nchcui' na' cuentya ji'i̱ ñati̱ nu nñilo'o ji'i̱ ma̱ jua'a̱.

1 JUAN 4:1

Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.

2 JUAN 1:10

Bi' cha' juani si tyalaa ñati̱ slo ma̱ nu ná nda la cui' cha' ji'i̱ Jesús bi' lo'o ma̱, nga'aa ta ma̱ su tyi'i̱ ngu' bi', ni ná ta ma̱ xlyo ni'i̱ ji'i̱ ngu' bi'.

2 JUAN 1:7

Ntsu'u tsa ñati̱ cuiñi nu nchcui' cha' ná chañi cha' ngua Jesús ñati̱ lo'o ya̱a̱ yu chalyuu. Tyucui ña'a̱ lo yuu chalyuu ndya'a̱ ñati̱ nu nchcui' cha' cuiñi bi'; na nñilo'o ngu' bi' ji'i̱ tya'a ñati̱ na, jua'a̱ tya'a cusu̱u̱ ji'i̱ Cristo laca ngu' bi'.

JUDAS 1:4

Ndu'ni cha' ca cuayá' ti' ma̱ cha' cua ndyatí̱ xi ñati̱ cuiñi bi' laja cu'ma̱, masi ná stu'ba cha' nu jlya ti' ma̱ lo'o ngu'. Cua sa'ni tsa nscua cha' lo quityi ji'i̱ ycui' Ndyosi cha' xcube' Ni ji'i̱ nu ngu' cuxi bi'; pana ná ndaquiya' ngu' bi' ji'i̱ cha' nu nchcui' ycui' Ndyosi tsiya' ti, ni ná ndube ti' ngu' bi' si ntsu'u tsa tyiquee Ni ña'a̱ Ni ji'i̱ ñati̱ chalyuu. Nacui̱ ngu' bi', cha' ná ndu'ni cha' masi cua'ni ngu' cha' suba', masi cua'ni ngu' lcaa lo cha' cuxi, cha' si ntsu'u tsa tyiquee Ni ña'a̱ Ni ji'na, ná xcube' Ni ji'na li', nti' ngu'. Cuiñi tsa ngu' bi', si'i ycui' Jesucristo laca xu'na ngu' bi'. Pana nu na ni, sca ti ycui' Jesucristo laca nu Xu'na na, sca ti ycui' Ni laca nu chañi cha' laca Ni loo ji'na.

APOCALIPSIS 12:9

cua ngulo'o Ni ji'i̱ ngu' nu ndu̱ cuentya ji'i̱ nu cuaña bi' li'. Sa'ni ndya'a̱ nu cuaña bi', ycui' nu xña'a̱ naa bi'; la cui' bi' laca nu naa Satanás. Xcui' na ñilo'o bi' ji'i̱ ñati̱ tyucui ña'a̱ chalyuu. Pana cua ngulo'o ycui' Ni ji'i̱ nu xña'a̱ lo'o xca̱ ji'i̱, ndyaa ngu' nde lo yuu chalyuu li'.

APOCALIPSIS 13:14

Lo'o jua'a̱ nguñilo'o ni' ji'i̱ lcaa ñati̱ tyucui ña'a̱ chalyuu xqui'ya cha' tlyu nu ndyu'ni ni' lo'o ndi'i̱ ni' slo nu na'ni nu ya̱a̱ tya clyo bi'. Li' nchcui' ni' lo'o lcaa ñati̱ chalyuu cha' cuiñá ngu' sca lcui̱ tyu̱, cha' cua'ni tlyu ngu' ji'i̱ lcui̱ bi'; ngüiñá ngu' lcui̱ ji'i̱ nu na'ni nu ya̱a̱ tya clyo bi' li', na'ni nu ngua tso'o masi ti'í tsa ngula'a hique ni'.

APOCALIPSIS 19:20

Nxu̱u̱ tya'a ngu', lo'o li' ngua nu na'ni chiya'a̱ ña'a̱ bi' preso; lo'o jua'a̱ nu cuiñi nu ndu'ni cha' tu'ba ji'i̱ ycui' Ndyosi laca, lo'o bi' ngua preso. La cui' nu cuiñi bi' ngua'ni cha' tlyu ca slo na'ni bi' tya tsubi' la, cha' xcutsi̱i̱ ji'i̱ ñati̱; cua ngüiñilo'o bi' ji'i̱ lcaa ñati̱, bi' cha' nda ngu' chacuayá' chca'a̱ cuayá' ji'i̱ na'ni chiya'a̱ ña'a̱ bi' nde tyaca̱a̱ ngu', jua'a̱ ngua'ni tlyu ngu' ji'i̱ lcui̱ ji'i̱ ni' li'. Lo'o li' nchcua̱a̱ ycui' Ndyosi ji'i̱ nu na'ni chiya'a̱ ña'a̱ bi' lo'o nu cuiñi bi', ndyaa ngu' ña'a̱ lu'ú ti ngu' nde lo tayu' su ntsu'u quii' tlyu nu ti'í tsa ndyumi̱' ngu' cha' lo'o yuu sufri ndyaqui̱.

APOCALIPSIS 2:2

Cua jlo ti' na' lcaa ña'a̱ nu ndu'ni ma̱, nacui̱ Jesús. Jlo ti' na' cha' ndalo tsa tyiquee ma̱, masi ndyiji tsa cha' ti'í ji'i̱ ma̱ cha' ndacu̱' ma̱ cha' ji'i̱ ngu' xña'a̱, nacui̱ Ni. Lo'o jua'a̱ jlo ti' na' cha' ná ndalo ma̱ tsiya' ti ji'i̱ ñati̱ cuxi. Cua ngua'ni cuayá' ma̱ ji'i̱ ñati̱ nu nacui̱ cha' cua nda na' ji'i̱ ycui' ngu' lijya̱ slo ma̱, masi ná nda na' ji'i̱ ngu' bi' lijya̱; cua nquijeloo cha' ji'i̱ ma̱ cha' cuiñi ngu' bi', nacui̱ Ni.

APOCALIPSIS 2:20

Pana nde qui'ya nu ntsu'u cha' sta na' hichu̱' ma̱, nacui̱ Ni, laca cha' tya nda ma̱ chacuayá' ji'i̱ nu cuna'a̱ Jezabel bi', cha' culu'u cha' cuxi ji'i̱ ngu' tya'a ma̱. Ycui' ma' nacui̱ ma' cha' laca ma' tu'ba ji'i̱ ycui' Ndyosi, pana ndatsaa tsa ma' bi' ji'i̱ ñati̱ nu ntsu'u cuentya jna'; nclu'u qui'i̱ ji'i̱ ngu' cha' cua'ni ngu' cha' suba' lo'o xa' cuna'a̱, jua'a̱ nclu'u ma' ji'i̱ ngu' cha' cacu ngu' msta̱ nu nscua slo lcui̱ jo'ó ji'i̱ ngu', nacui̱ Ni.

APOCALIPSIS 2:6

Pana nde cña ngua'ni ma̱ nu tso'o tsa nti' na' ña'a̱ na' ji'i̱, nacui̱ Ni, cha' stu'ba nti' ma̱ lo'o na' cuentya ji'i̱ ngu' nicolaítas; tso'o cha' ná ndiya ti' ma̱ tsiya' ti lcaa ña'a̱ nu ndyu'ni ngu' bi'.

APOCALIPSIS 20:3

Ntucua ya' xca̱ bi' ji'i̱ nu cuaña bi' ndyaa nde ne' tyuquee; li' ngua'a̱ xca̱ ya' to' tyuquee, cuati ngua'a̱ sello nguiña' to' tyuu, cha' nga'aa tyu'u nu cuaña bi', cha' ná taca ñilo'o bi' ji'i̱ ñati̱ chalyuu ña'a̱ cuayá' tye tyu'u scua sca mil yija̱. Pana lo'o cua ndye yija̱ bi', li' nscua cha' tyu'u bi' tya xi tya tyempo cha' tya cua'ni la cha' cuxi.