Lo'o li' tya ngulu'u la Jesús xi ji'i̱ ngu': ―Lcaa chacuaya' ji'i̱ Sti na' ndyanu ya' na'. Ni sca ñati̱ ná jlo ti' ñi'ya̱ laca cha' nu ntsu'u ne' cresiya 'na nu laca̱ Sñi' ycui' Ni; sca ti ycui' Ndyosi Sti na' jlo ti' ñi'ya̱ laca cha' nu ntsu'u ne' cresiya 'na. Lo'o jua'a̱, ni sca ñati̱ ná jlo ti' ñi'ya̱ laca cha' nu ntsu'u ne' cresiya ji'i̱ Sti na'; sca ti na' nu laca̱ Sñi' ycui' Ni jlo ti' na', lo'o jua'a̱ culu'u na' cha' bi' ji'i̱ ñati̱ nu subi na' ji'i̱ cha' ca tsa'a̱ ngu' 'na.
FILIPENSES 2:9 - Chatino Tataltepec9 Bi' cha' juani cua ndyaa lo'o Ni ji'i̱ yu cha' stu'ba ti tyi'i̱ yu ca su tlyu la ca su ntucua ycui' Ni; juani tlyu tsa chacuayá' cua nda Ni ji'i̱ Jesús. Tyucui ña'a̱ chalyuu nga'aa ntsu'u la xa' chacuayá' nu tlyu la, အခန်းကိုကြည့်ပါ။ |
FILIPENSES 2:9
46 ပူးပေါင်းရင်းမြစ်များ
Li' nchcui' yu lo'o ngu' nu ndyaa cuentya ji'i̱ yu bi': ―Cua nda Sti na' lcaa na jna'. Ná tucui jlo ti' cha' laca na' Sñi' ycui' Ni; sca ti ycui' Sti na', bi' nu jlo ti'. Ná tucui jlo ti' tilaca laca ycui' Sti na'; sca ti na', jlo ti' na' tilaca laca Ni. Lo'o jua'a̱ ca jlo ti' xi xa' la ñati̱ nu nti' na' cha' culu'u na' ji'i̱ ngu' tilaca laca ycui' Sti na', ca cuayá' ti' ngu' bi' li'.
’Nga'aa tyi'i̱ na' lo yuu chalyuu ―nacui̱ Jesús―, cha' cua tya̱a̱ ti na' nde su ntucua nu'u̱; pana ngu' bi', tya tyi'i̱ la ngu' nde chalyuu. Lubii tsa laca nu'u̱, Sti na', bi' cha' ndijña na' cha' clyu ti' jinu'u̱ cuentya ji'i̱ ngu' nu cua nda nu'u̱ 'na. Cua nti' na' cha' cua'a nu'u̱ ji'i̱ ngu' bi' lo'o juersa ji'i̱ ycui' nu'u̱, cha' ná quiñu'u̱ tyiquee ngu'. Ñi'ya̱ nu stu'ba cha' jinu'u̱ lo'o na' ―nacui̱―, jua'a̱ cua'ni nu'u̱ lo'o ngu' bi', cha' caca stu'ba cresiya ji'i̱ ngu' bi' lo'o tya'a ngu' nu ngusñi cha' jinu'u̱.
Lo'o tya ndi'i̱ na' lo'o ñati̱ nu nda nu'u̱ 'na ―nacui̱ Jesús―, li' ndaca'a na' ji'i̱ ngu' bi' lo'o juersa ji'i̱ ycui' nu'u̱. Ná nda na' chacuayá' tyacua cha' cuxi ji'i̱ ngu'; ni tsaca ngu' bi', ná nguna' chalyuu ji'i̱ ngu'. Sca ti nu ñati̱ nu nguscua tya sa'ni la cha' chcuna' cha' ji'i̱, bi' laca nu ndye cha' ji'i̱ tsiya' ti, cha' nga'a̱ cha' caca lcaa cha' nu nguscua ngu' lo quityi cusu' cuentya jinu'u̱.
Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.
Jua'a̱ ndu'ni tlyu ma̱ ji'i̱ Jesucristo nu Xu'na na, nu lo'o ndu'ni ma̱ cña ji'i̱ Ni; jua'a̱ ca cuayá' ti' ngu' li' cha' ndyanu Xtyi'i ycui' Ni ne' cresiya ji'i̱ ma̱. Lo'o li' caca cuayá' ti' ngu' cha' tso'o tsa ndu'ni ycui' Ndyosi lo'o ma̱, cha' stu'ba ti ndu'ni ycui' Ndyosi Sti na cña lo'o Jesucristo nu Xu'na na.
Ndiya tsa ti' nu'u̱ lcaa cha' liñi nu ndu'ni ñati̱; ñasi̱' tsa nu'u̱ lo'o ndyu'ni ñati̱ cha' cuxi lo'o ycui' Ndyosi Sti nu'u̱. Bi' cha' ngusubi na' jinu'u̱ cha' tya'a̱ nu'u̱ lo cña jna', nacui̱ ycui' Ndyosi. Jua'a̱ tso'o tsa nti' nu'u̱ juani, cha' tlyu la chacuayá' cua nda na' jinu'u̱ que ji'i̱ xa' la ñati̱, nacui̱ ycui' Ndyosi.
Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.
Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.
ngua'ni tlyu ycui' Ndyosi Sti Jesús ji'i̱ yu, ndubi tsa ña'a̱ ngua tyucui ña'a̱ loo Jesús lo'o xee ji'i̱ ycui' Ni li'. Masi ná na'a̱ ya ji'i̱ ycui' Ndyosi nu laca loo ji'i̱ lcaa xu'na chalyuu, pana jlo ti' ya cha' nguti'i̱ Ni cacua ti tsa̱ bi', cha' li' ndyuna ya lo'o nchcui' Ni lo'o ngu'. Ndi'ya̱ nacui̱ Ni: “Nu nde laca Sñi' na' nu tyaca'a tsa 'na. Tso'o tsa ntsu'u tyiquee na' ña'a̱ na' ji'i̱ yu”, nacui̱ Ni.
Tso'o tsa nchcui' liñi Jesucristo ji'i̱ ycui' Ndyosi Sti yu ña'a̱ cuayá' ndyujuii ngu' ji'i̱ yu. Pana lo'o ndyu'ú Jesús chaca quiya' lo'o ngujuii yu, li' na'a̱ ngu' cha' tlyu tsa cha' nu ntsu'u ji'i̱ yu. Lo'o juani laca Jesucristo loo ji'i̱ tyucui ña'a̱ chalyuu, xqui'ya cha' laca yu loo ji'i̱ lcaa nu laca xu'na chalyuu. Ntsu'u tsa tyiquee Jesús ña'a̱ yu ji'na, bi' cha' ngujuii yu lo crusi; cua ndyalú tañi yu, cha' ngua'ni lyaá yu ji'na ji'i̱ nu cuxi nu ntsu'u ji'na.
Li' cua ndya'a cati quiya' nguañi ngula'á xca̱ lo'o cui'chcua̱ ji'i̱. Nguañi nda xtyi'i tyu̱u̱ tya'a ñati̱ nde cua̱ li', nu ndi'ya̱ nchcui': Ca juani ndyanu tachaa cha' ji'i̱ ycui' nu Xu'na na, jua'a̱ ji'i̱ Cristo, cha' caca Ni loo ji'i̱ tyucui ña'a̱ chalyuu, nacui̱ ngu'. Lo'o juani ná nga'a̱ cha' tye cha' culo Ni cña chalyuu.
Cui̱i̱ tsa ndyula tu'ba ngu' li': Cua ndyujuii ngu' ji'i̱ nu ñi'ya̱ ña'a̱ xlya' bi' tsaca quiya', nacui̱ ngu'. Xqui'ya ñati̱ chalyuu, bi' cha' ngujuii Ni. Lo'o juani nga'a̱ cha' chcui' na ji'i̱ Ni, cha' lcaa lo cña tsiya' ti nchca ji'i̱ Ni cua'ni Ni; jua'a̱ na ji'i̱ Ni laca lcaa lo na tsiya' ti. Lcaa cha' jlo ti' Ni, lcaa cña nchca ji'i̱ Ni; bi' cha' ndyu'ni chi̱ na loo Ni, ndyu'ni tlyu na ji'i̱ Ni, lo'o jua'a̱ tso'o tsa chcui' na ji'i̱ Ni lo'o ñati̱. Jua'a̱ nacui̱ xca̱ ji'i̱ ycui' Ndyosi lo'o ndyula tu'ba ngu'.
ကြော်ငြာတွေ