EFESIOS 6:12 - Chatino Tataltepec12 Si'i na nxu̱u̱ tya'a na lo'o ñati̱ chalyuu ti, siya' la juersa ntsu'u ji'i̱ ngu' bi'; tya'a cusu̱u̱ na laca lcaa cui'i̱ cuxi nu ntsu'u nde cua̱. Nguula tsa nu bi', hasta ngua ti' bi' tyiji̱loo ji'i̱ ycui' Ndyosi; pana ná ngua ji'i̱. La cui' laca nu ngua ti' caca xu'na chalyuu, lo'o jua'a̱ nclyo bi' cña ji'i̱ ñati̱ cha' cua'ni ngu' lcaa lo cha' cuxi nde chalyuu juani. အခန်းကိုကြည့်ပါ။ |
EFESIOS 6:12
25 ပူးပေါင်းရင်းမြစ်များ
―Chubi tsa toni'i̱ su tyatí̱ ma̱ ca bi', bi' cha' cua'ni yala ma̱ cha' quije tyucui̱i̱ ji'i̱ ma̱ nu tyalaa ca toni'i̱ bi'. Ndi'ya̱ ñacui̱ na' ji'i̱ ma̱: Ntsu'u quiña'a̱ tsa ñati̱ nu cua nchcui' cha' cua tyatí̱ ti ngu' toni'i̱ bi', pana na ndu'ni ti ngu' jua'a̱; ná nchca quije ji'i̱ ngu' tsiya' ti ñi'ya̱ caca nu tyatí̱ ngu' toni'i̱ bi'.
cha' ñi'ya̱ si ndya'a̱ ngu' cuityi̱', jua'a̱ ndya'a̱ ñati̱ bi' chalyuu; ñi'ya̱ si talya tsa ña'a̱ su ndya'a̱ ngu', jua'a̱ ndyu'ni ngu' bi'. Bi' cha' ntsu'u cha' culu'u nu'u̱ cha' jna' ji'i̱ ngu' bi', cha' xñi ngu' cha' jna'. Li' nga'aa tya'a̱ ngu' su talya ña'a̱, ñi'ya̱ si cuityi̱' ti ngu'; taca tya'a̱ ngu' tyucui̱i̱ su xee cuentya ji'i̱ ycui' Ndyosi, taca ña'a̱ ngu' li'. Satanás laca nu nclyo cña ji'i̱ ngu' bi' juani, pana ca li' caca ngu' ñati̱ ji'i̱ ycui' Ndyosi. Ntsu'u cha' xñi ngu' bi' cha' jna', cha' taca cui'ya ycui' Ni cha' clyu ti' ji'i̱ cha' cuxi nu ntsu'u ji'i̱ ngu' bi'. Li' caca stu'ba cha' ji'i̱ ngu' bi' lo'o ñati̱ nu cua lubii cresiya ji'i̱ xqui'ya na'”, nacui̱ ycui' Jesús 'na li'.
Bi' cha' jlo ti' na' juani cha' nga'aa ntsu'u ni sca na nu caca cua'ni cha' culaya' ycui' Ndyosi ji'na, cha' ntsu'u tsa tyiquee Ni ña'a̱ Ni ji'na; masi cua ngujuii na, masi tya lu'ú na, ná culaya' Ni ji'na. Ni xca̱ ji'i̱ ycui' Ndyosi nu ntucua nde cua̱, ni sca cui'i̱ nu laca loo nde lo yuu, ná nchca ji'i̱ tsiya' ti cua'ni cha' culaya' Ni ji'na. Masi chalyuu su ndi'i̱ na juani, masi chalyuu nu caca nde loo la, ná culaya' Ni ji'na. Ná ntsu'u nu laca loo nde chalyuu nu nchca ji'i̱ culo ji'na ya' nu Xu'na na;
Cu'ma̱ tya'a ngusñi na cha' ji'i̱ Cristo, ntsu'u sca cha' nu nti' na' chcui' na' lo'o ma̱: Ñi'ya̱ nu ña'a̱ ti cuaña' na juani, ná caca tyu'u cha' ji'na lo'o ycui' Ndyosi lo'o culo Ni cña lo'o cua ndye chalyuu; ná caca tsaa na ñi'ya̱ nu quicha ti ti' na ca chalyuu cucui nu caca nde loo la, su ná ntsu'u quicha tsiya' ti.
Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.
Lo'o jua'a̱ ngua'ni Ni cha' ndyuloo na' ji'i̱ Jesús, nu sca ti Sñi' ycui' Ni, cha' li' nchca 'na ta na' cha' ji'i̱ Ni lo'o lcaa cu'ma̱, ñati̱ nu ndi'i̱ xa' tsu'. Li' ndacha' na' ji'i̱ lcaa ma̱ cha' xqui'ya Jesús taca clyaá ma̱ ji'i̱ cha' cuxi nu ntsu'u ji'i̱ ma̱. Nu lo'o ngusñi ca ti na' cha' bi', li' hora ti ndu'u na' nguta'a̱ na' nde loyuu su naa Arabia; ca bi' nguti'i̱ na' ycui' ti na'. Ná nguta'a̱ na' ndyaana na' sca cui̱i̱ nu ta sca ñati̱ lo'o na'; la cui' ti jua'a̱ ná nguta'a̱ na' nde quichi̱ Jerusalén cha' chcui' na' lo'o ngu' tya'a ndyu'ni na' cña nu ndi'i̱ nde jua, masi cua nda ngu' bi' cha' ji'i̱ Jesús lo'o ñati̱ clyo la, nu lo'o tya lyiji cuna na' cha' bi'. Pana nguta'a̱ na' nde Arabia, lo'o tiya' la li' nguxtyu̱u̱ na' nguta'a̱ na' nde quichi̱ Damasco.
Ca bi' laca Cristo loo la ji'i̱ lcaa ñati̱; nga'aa ntsu'u nu tlyu la que Cristo ca bi', nga'aa ntsu'u nu culo cña ji'i̱ yu. Ná ntsu'u chaca xu'na ñati̱ nde chalyuu nu taca tyiji̱loo ji'i̱ Cristo; la cui' ti ca chaca chalyuu ca nde cua̱ ni, ná ntsu'u cui'i̱ cuxi, ni ná ntsu'u ñati̱ cuentya ji'i̱ ycui' Ndyosi nu taca tyiji̱loo ji'i̱ Cristo.
Lye tsa tya na xlya'be ji'i̱ ycui' Ndyosi Sti na, nu laca Sti Jesucristo nu Xu'na na. Cua ndyaca stu'ba cha' ji'na lo'o Cristo; bi' cha' lo'o ycui' Ndyosi, tso'o tsa nti' Ni ña'a̱ Ni ji'na. Lcaa lo cha' tso'o nu tyacua ji'na cha' ngusñi na cha' ji'i̱ Jesucristo, cua ngua'ni Ni cha' bi' lo'o na xqui'ya Cristo.
pana juani caca cuayá' ti' lcaa cui'i̱ nu laca loo nde cua̱, nu lo'o ña'a̱ cui'i̱ bi' ji'i̱ ñati̱ chalyuu nu tsa tlyu ti ndyu'ni tlyu ji'i̱ Cristo. Lo'o jua'a̱ cui'i̱ nu ngua ti' tyiji̱loo ji'i̱ ycui' Ndyosi sa'ni la ni, caca cuayá' ti' cui'i̱ bi' cha' nchca la ji'i̱ ycui' Ndyosi que cua ña'a̱ ca na nu ngüiñá ycui' Ni.
La cui' ti lo crusi bi' cua ntiji̱loo Cristo ji'i̱ lcaa nu laca xu'na na, jua'a̱ ji'i̱ lcaa cui'i̱ nu laca loo ji'na. Lo'o ngua'ni chi̱ Ni loo Cristo xqui'ya cha' cua ntiji̱loo yu ji'i̱ lcaa xu'na na bi', li' ndyalo'o Cristo ji'i̱ xu'na bi' laja ñati̱ nu lijya̱ qui'i ti, cha' ña'a̱ cui'ya lcaa ñati̱ cha' cua ntiji̱loo Cristo ji'i̱ lcaa xu'na bi'.
Jua'a̱ si ntsu'u sca cha' cuijya ji'i̱ ngu' lo'o tya'a ngu' ni, cua laca nscua cha' ñi'ya̱ nu tso'o la quijya ngu', cha' taca cua'ni tsaca yu ngana ji'i̱ tya'a yu. Si ná taquiya' ngu' ji'i̱ cha' nu cua nscua bi', li' ná caja cha' xlya'be ji'i̱ ñati̱ nu cua ngua'ni ngana ji'i̱ tya'a yu lo'o cua ndye cha' cuijya ji'i̱ ngu' li'.
Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.
ကြော်ငြာတွေ