Na' nu cua nda Ni 'na lijya̱a̱ cha' caca na' ñati̱, ná lijya̱ na' nde chalyuu cha' caja msu 'na; ycui' na' laca na' msu ji'i̱ ñati̱, bi' cha' lijya̱ na'. Na cua lijya̱ na' cha' cajaa na' cha' cati̱ qui'ya nu ntsu'u ji'i̱ ñati̱, cha' cua'ni lyaá na' ji'i̱ quiña'a̱ tsa ñati̱ li' ―nacui̱ Jesús ji'i̱ ngu'.
EFESIOS 5:2 - Chatino Tataltepec2 Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'. အခန်းကိုကြည့်ပါ။ |
EFESIOS 5:2
54 ပူးပေါင်းရင်းမြစ်များ
Na' laca̱ nu cha' tso'o nu caja ji'i̱ ñati̱ ―nacui̱ Jesús―. Ngutu'u na' nde slo ycui' Ndyosi lijya̱ na' chalyuu cha' caca na' ñati̱, cha' caja ñi'ya̱ nu tyaala' ti' ngu'. Nu lo'o xñi ñati̱ cha' jna', ná nga'a̱ cha' tye chalyuu ji'i̱ ngu' bi' li'; ta na' tyucui ña'a̱ na' ji'i̱ ngu', cha' jua'a̱ caja chalyuu cucui ji'i̱ ngu'.
Cua ngusubi ycui' Ndyosi 'na cha' cua'ni na' cña ji'i̱ Jesucristo; cña bi' laca cha' tsa'a na' ta na' cha' tso'o ji'i̱ ycui' Ndyosi lo'o ngu' xa' tsu', lcaa su ndi'i̱ ngu'. Jua'a̱ ndyu'ni na', cha' tyucui tyiquee ngu' caca ngu' bi' ñati̱ ji'i̱ ycui' Ndyosi xqui'ya cña nu cua'ni Xtyi'i ycui' Ndyosi ne' cresiya ji'i̱ ngu'. Li' tyaja'a̱ Ni quiñi cha' ji'i̱ Ni lo'o ngu' bi' xqui'ya na'.
Cua ngua'ni Ni sca cha' tlyu nu ná ngua cua'ni nu cha' cusu' nu nda jyo'o Moisés lo'o ñati̱ nu ngua sa'ni. Ná ngua cña cha' bi', xqui'ya cha' cuxi tsa tyiquee ñati̱ chalyuu na; pana ngua ji'i̱ ycui' Ndyosi cua'ni cha' tlyu bi', nu lo'o nda Ni ji'i̱ Sñi' ycui' ca Ni ya̱a̱ chalyuu re cha' ngua ñati̱. Nda Ni ji'i̱ nu Jesús bi' ya̱a̱, cha' caca yu sca msta̱ lu'ú; bi' laca msta̱ nu ngua ji'i̱ cuityi̱ qui'ya nu ntsu'u ji'na. Ngua Jesús ñati̱; stu'ba ti ngua yu ñi'ya̱ laca cua ña'a̱ ca ñati̱ chalyuu, cha' jua'a̱ ngua ji'i̱ yu cua'ni tye yu ji'i̱ qui'ya nu ntsu'u ji'i̱ ñati̱ cuxi na. Bi' cha' ngua Ni ñati̱.
La cui' jua'a̱ laca cu'ma̱, cha' ntsu'u qui'ya bi' chu̱' ma̱. Laca qui'ya bi' ji'i̱ ma̱ ñi'ya̱ laca scua̱ tiye' nu nga'aa tso'o tsiya' ti; tso'o si xcua̱a̱ ma̱ ji'i̱, chaca quiya' quixa' cucui scua̱ bi'. Lo'o jua'a̱ cu'ma̱, nga'a̱ cha' culotsu' ma̱ qui'ya nu ntsu'u ji'i̱ ma̱, cha' xcutsa'a̱ Ni cha' nu ntsu'u tyiquee ma̱, cha' caca lubii cresiya ji'i̱ ma̱. Na cua laca lubii bi' ji'i̱ ma̱ xqui'ya Jesús. Lo'o caca ta'a pascua ni, li' tyi'u ti' na cha' ngua'ni tye ycui' Cristo ji'i̱ qui'ya nu ntsu'u ji'na. Xqui'ya lcaa na ngujuii Ni lo crusi, ngua Cristo msta̱ lu'ú cuentya ji'i̱ qui'ya nu ntsu'u ji'na.
Ndya tsa na' xlya'be ji'i̱ ycui' Ndyosi cha' stu'ba cha' ji'na lo'o Cristo. Laca cha' ñi'ya̱ si ndya'a̱ lo'o ycui' Ndyosi ji'na ndya'a̱ qui'i ti na calle, cha' ndyu'ni chi̱ Ni loo Jesucristo cha' cua ntiji̱loo yu ji'i̱ nu cuxi. Jua'a̱ ji'na ta Ni su tya'a̱ na laja ñati̱ bi', cha' lo'o na nsañi na cha' ji'i̱ ycui' Cristo ca slo lcaa ñati̱; ndacha' na cha' ji'i̱ ycui' Ndyosi ca slo ñati̱, masi nchcui' na lo'o ñati̱ nu nti' clyaá ji'i̱ nu cuxi, masi nchcui' na lo'o xa' ñati̱ nu ná nti' cuna cha' tso'o bi'. Pana ñi'ya̱ laca sca na tyixi xtyi'i nu nda xtyi'i ntyucua lcaa se'i̱, jua'a̱ laca cña nu ndu'ni na cuentya ji'i̱ ycui' Ndyosi. Ndiya tsa ti' ycui' Ndyosi ji'i̱, la cui' jua'a̱ ndiya ti' Ni cña nu ndyu'ni Cristo nde chalyuu xqui'ya na.
Cua jlo ti' ma̱ ñi'ya̱ ndu'ni Jesucristo nu Xu'na na, cha' xcui' tso'o tsa ndu'ni Ni lo'o ñati̱. Lcaa na cua ntsu'u ji'i̱ Ni, pana cua ntaja'a̱ Ni ngua Ni sca ñati̱ ti, ñi'ya̱ nti' sca ñati̱ ti'i nu ná sca na ntsu'u ji'i̱ tsiya' ti. Xqui'ya cu'ma̱, bi' cha' ngua'ni Ni jua'a̱, cha' tiya' la li' taca caja lcaa na nu ntsu'u ji'i̱ ycui' Ni ji'i̱ ma̱.
Cuentya ji'i̱ cha' cusu' bi' laca na' ñi'ya̱ laca si cua ngujuii na', ñi'ya̱ laca si stu'ba ti nga'a̱ na' lo crusi lo'o Jesús; juani nga'aa si'i ycui' ca ti na' laca na' loo ne' cresiya 'na, cha' Cristo laca nu laca loo ne' cresiya 'na juani. Ndi'i̱ tso'o ti na' chalyuu juani sca ti xqui'ya cha' jlya ti' na' ji'i̱ cña nu cua ngua'ni ycui' Jesús, nu sca ti Sñi' ycui' Ndyosi; bi' laca nu ntsu'u tsa tyiquee ña'a̱ jna', bi' laca nu cua nda chacuayá' ji'i̱ ngu' cha' cujuii ngu' ji'i̱ ycui' yu cuentya jna'.
ndijña na' ji'i̱ Ni cha' ca cuayá' ti' ma̱ cha' ngua'ni Ni cha' cua ndyanu Xtyi'i ycui' Jesús ne' cresiya ji'i̱ ma̱, nu lo'o ngusñi tso'o ma̱ cha' ji'i̱ ycui' Ndyosi; ndijña na' ji'i̱ Ni cha' tsa cu' ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱, xqui'ya cha' tso'o tsa ngusñi su̱u̱ cha' bi' ne' cresiya ji'i̱ ma̱;
Pana xa' ña'a̱ cua'ni na. Chcui' na lo'o ngu' ji'i̱ lcaa cha' liñi nu ntsu'u ji'i̱ ycui' Ndyosi; culu'u na ji'i̱ ngu' cha' ntsu'u tsa tyiquee na ña'a̱ na ji'i̱ lcaa tya'a ñati̱ na, cha' nga'a̱ cha' xñi tso'o na lcaa cha' ji'i̱ Cristo cha' caca stu'ba cha' ji'na lo'o ycui' Ni. Nu Cristo bi' ni, la cui' bi' laca loo ji'i̱ lcaa tya'a na nu tsa tlyu ti ngusñi na cha' ji'i̱ Ni;
Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.
Ná ta nu'u̱ chacuayá' xtyí lo'o ngu' jinu'u̱ cha' tya cuañi' nu'u̱, nti' ngu'. Cua'ni nu'u̱ xcui' cña tso'o cha' ña'a̱ lcaa tya'a ñati̱ ji'i̱ Jesucristo; xcui' cha' tso'o chcui' nu'u̱, xcui' cha' tso'o cua'ni nu'u̱, lo'o jua'a̱ tso'o tsa tyu'u tyiquee nu'u̱ ña'a̱ nu'u̱ ji'i̱ xa' la ñati̱. Li' ca cuayá' ti' ngu' cha' tso'o tsa ngusñi nu'u̱ cha' ji'i̱ Jesucristo, xqui'ya cha' xcui' lubii ti cresiya jinu'u̱ ndyu'ni nu'u̱ cña.
Masi jua'a̱ ngua'ni ngu' cña nu ngua li', pana tlyu la cña nu ngua'ni Cristo juani, cha' ndyalú tañi ycui' yu lo'o ngujuii yu lo crusi cuentya ji'na. Xqui'ya Xtyi'i ycui' Ni, bi' cha' ngua ji'i̱ Cristo ta yu tyucui ña'a̱ ycui' ca yu, cha' sca ti quiya' cati̱ qui'ya nu ntsu'u ji'na lo'o ycui' Ndyosi; nu ycui' Cristo ni, ná ntsu'u qui'ya ji'i̱ yu tsiya' ti, bi' cha' taca cua'ni lubii Ni cresiya ji'na, nu lo'o tyi'u ti' na ñi'ya̱ nu ngua'ni Ni lo'o ndyalú tañi ycui' Ni. Li' cuityi̱ Ni lcaa cha' cuxi nu ndyu'ni ñu'u̱ tsa ji'na, jua'a̱ taca ji'na cua'ni na cña ji'i̱ ycui' Ndyosi nu lu'ú ca nde chalyuu li'.
Ngua'ni jyo'o cusu' ji'na jua'a̱ lo'o ngua'ni tlyu ngu' ji'i̱ ycui' Ndyosi ne' laa nu ngua li', cha' caca lubii lcaa na nu cua'nijo'o ji'i̱ ngu'; nde chalyuu ti ntucua lcaa na bi', masi ndi'i̱ bi' cuentya ji'i̱ ycui' Ndyosi. Pana tlyu la cña laca cati̱ qui'ya nu ntsu'u ji'i̱ ñati̱ chalyuu ca slo ycui' Ndyosi, tso'o la cña laca nu cua'ni lyaá Ni ji'i̱ ñati̱ ji'i̱ cha' cuxi bi'.
Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.
Nu lo'o cube ti' na cha' cuentya ji'na ntaja'a̱ Cristo ngujuii yu lo crusi, cha' ntsu'u tsa tyiquee Ni ña'a̱ Ni ji'na, li' ca cuayá' ti' na ña'a̱ cha' nu tso'o la cua'ni na, si ntsu'u tyiquee na ña'a̱ na ji'i̱ tya'a ngusñi na cha' ji'i̱ Ni. Tso'o si tyaja'a̱ na xtyucua na ji'i̱ tya'a na jua'a̱, masi hasta cajaa ycui' na cuentya ji'i̱ ngu' tya'a na.
Tso'o tsa nchcui' liñi Jesucristo ji'i̱ ycui' Ndyosi Sti yu ña'a̱ cuayá' ndyujuii ngu' ji'i̱ yu. Pana lo'o ndyu'ú Jesús chaca quiya' lo'o ngujuii yu, li' na'a̱ ngu' cha' tlyu tsa cha' nu ntsu'u ji'i̱ yu. Lo'o juani laca Jesucristo loo ji'i̱ tyucui ña'a̱ chalyuu, xqui'ya cha' laca yu loo ji'i̱ lcaa nu laca xu'na chalyuu. Ntsu'u tsa tyiquee Jesús ña'a̱ yu ji'na, bi' cha' ngujuii yu lo crusi; cua ndyalú tañi yu, cha' ngua'ni lyaá yu ji'na ji'i̱ nu cuxi nu ntsu'u ji'na.
Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.
ကြော်ငြာတွေ