EFESIOS 4:22 - Chatino Tataltepec

²² bi' cha' cua'ni tye ma̱ ji'i̱ cha' cuxi nu ngua'ni ma̱ tya sa'ni la. Quiña'a̱ tsa cha' ndatsaa cha' cuxi bi' ji'i̱ ma̱ nu ngua li', ndacui tsa ti' ma̱ ji'i̱ cha' cuxi bi', ña'a̱ cuayá' nu chcuna' tsiya' ti chalyuu ji'i̱ ma̱ xqui'ya cha' cuxi bi'.

EFESIOS 4:22 ပူးပေါင်းရင်းမြစ်များ

ROMANOS 6:6

Cuxi tsa ñati̱ ngua na; pana juani laca na ñi'ya̱ laca si lo'o na ngujuii na lo sca crusi lo'o ngujuii ycui' Jesús, cha' ngüityi̱ yu tsiya' ti cha' cuxi nu ntsu'u ne' cresiya ji'na li'. Bi' cha' juani nga'aa caca ji'i̱ cha' cuxi bi' caca loo ji'na chaca quiya'.

ROMANOS 7:11

Cha' cuxi laca nu ngua'ni ngana 'na; bi' cha' tya ngua'ni la na' cha' cuxi, masi cua nchcui' cha' cusu' bi' lo'o na' cha' ná cua'ni na' jua'a̱. Na nchcube' tsa cha' cuxi bi' 'na, cua laca cha' 'na ñi'ya̱ laca si cua ngujuii na'.

2 CORINTIOS 11:3

ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

GÁLATAS 1:13

Cua jlo ti' ma̱ ñi'ya̱ nu ngua'ni na' nde chalyuu tya sa'ni la, ñi'ya̱ ndaquiya' tsa na' ji'i̱ lcaa cña tacati nu ndu'ni ngu' judío tya'a ya. Cua jlo ti' ma̱ cha' ti'í tsa nguxcube' na' ji'i̱ lcaa ñati̱ nu ntsu'u cha' ji'i̱ lo'o Jesucristo nu ngua li'; ngua ti' na' cua'ni tye na' ji'i̱ ñati̱ bi' tsiya' ti.

EFESIOS 2:3

Ca ta'a na ni, chañi cha' ñi'ya̱ nu ndaquiya' ngu' bi' ji'i̱ nu cuxi, jua'a̱ ngua'ni na tya tsubi' la; ngua'ni na cua ña'a̱ ca cha' cuxi nu ndijña ti' cresiya ji'na. Na laca nu ngua ti' ycui' ca na cha' cua'ni na, ngua'ni na ji'i̱ li'; cua ña'a̱ ca cha' cuxi nu ngua'ya hique ti na, ngua'ni na cha' bi'. Bi' cha' ndyanu cha' xcube' ycui' Ndyosi ji'na, cha' ñasi̱' tsa Ni xqui'ya cha' cuxi nu ngua'ni na lo'o Ni; stu'ba ti xcube' Ni ji'na lo'o cua ña'a̱ ca ñati̱ chalyuu li'.

EFESIOS 4:17

Chacuayá' ji'i̱ ycui' nu Xu'na na chcui' na' xi lo'o cu'ma̱ juani: Nti' tsa na' culo na' cña ji'i̱ cu'ma̱ cha' nga'aa cua'ni ma̱ ñi'ya̱ nu ndu'ni ngu' nu ná nslo ji'i̱ ycui' Ndyosi tsiya' ti; cua ña'a̱ ca cha' cuxi nu nda'ya hique ngu', xcui' jua'a̱ ndu'ni ngu' bi' chalyuu. Sca cha' tonto tsa ndu'ni ngu' bi',

EFESIOS 4:25

Juani nga'aa chcui' ma̱ cha' cuiñi lo'o tya'a ñati̱ ma̱ lacua; xcui' cha' liñi chcui' scaa ma̱ lo'o tya'a ma̱, cha' sca ti ñati̱ laca na, sca ti cha' ntsu'u ji'na lo'o tya'a na.

EFESIOS 4:31

Cua'ni tye ma̱ ji'i̱ lcaa cha' su chi̱i̱ nti' ma̱ ña'a̱ ma̱ ji'i̱ tya'a ñati̱ ma̱ lacua; jua'a̱ cha' liye' ti' ma̱, jua'a̱ cha' ñasi̱' ti' ma̱, cua'ni tye ma̱ ji'i̱ lcaa cha' bi'. Nga'aa xi'ya cui̱i̱ ma̱ cha' suba' ji'i̱ tya'a ma̱, nga'aa chcui' ma̱ cuentyu ji'i̱ tya'a ma̱, nga'aa ntsu'u cha' chcui' cuxi ma̱ ji'i̱ tya'a ma̱ tsiya' ti.

COLOSENSES 2:11

La cui' jua'a̱ xqui'ya Cristo cua ngulacua̱ Ni ji'i̱ ma̱; ni si'i na ngusi'yu lo quiji̱ ma̱ lo'o ngulacua̱ ma̱ ñi'ya̱ nu ndu'ni ngu' judío lo'o sñi' ngu', ycui' Cristo ngulacua̱ ji'i̱ ma̱ lo'o cua ngua'ni lyaá Ni ji'i̱ ma̱ ji'i̱ qui'ya nu ntsu'u ji'i̱ ma̱ nde chalyuu.

TITO 3:3

Cua sa'ni la ná nda na cuentya tsiya' ti ñi'ya̱ ntsu'u cha' ji'i̱ ycui' Ndyosi; ná ndaquiya' na ji'i̱ Ni li', cha' cua ngüiñilo'o nu xña'a̱ ji'na cha' cua'ni na lcaa cha' cuxi nu ndijña cresiya ji'na cha' cua'ni na. Ngua chaa ti' na lo'o ndyu'ni na cha' cuxi bi' li', masi ngua'ni lya' ti' na ji'i̱ ñati̱, masi ngua liye' ti' na ña'a̱ na ji'i̱ ngu', masi ngua ti'í ti' na ña'a̱ na ji'i̱ tya'a na; lo'o jua'a̱ ngu' tya'a na, ngua ti'í ti' ngu' ña'a̱ ngu' ji'na.

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

HEBREOS 3:13

Ná tso'o si cñilo'o nu cuxi ji'i̱ ma̱, lo'o li' xana caca cuxi cresiya ji'i̱ ma̱. Bi' cha' lcaa tsa̱ nga'a̱ cha' xtyucua ma̱ ji'i̱ tya'a ma̱, cha' tyanu tachaa la cha' ji'i̱ Jesús ne' cresiya ji'i̱ ngu' tya'a ma̱, cha' ná cñilo'o nu cuxi ji'i̱ ma̱ tyucui lo'o tya ndi'i̱ ti ma̱ chalyuu.

SANTIAGO 1:21

Lo'o jua'a̱ nga'a̱ cha' culochu̱' na lcaa cha' suba', lcaa cha' cuxi nu tya ntsu'u ne' cresiya ji'na; tucuá na cha' ji'i̱ ycui' Ndyosi lacua, xñi tso'o na lcaa cha' nu nda Ni cha' tyanu ne' cresiya ji'na, cha' bi' laca cha' nu taca cua'ni lyaá ji'na ji'i̱ nu cuxi nu ntsu'u ji'na.

SANTIAGO 1:26

Ná tyiquee' ntsu'u xi ngu' tya'a ma̱ nu nti' cha' tacati tsa ndu'ni ycui' ca ngu'. Pana laja ti ndu'ni ngu' cha' tacati ngu', si ná ndube ti' ngu' ñi'ya̱ nchcui' ngu' lo'o ñati̱; na ñilo'o ngu' ji'i̱ ycui' ca ngu' cha' tacati ngu' li'.

1 PEDRO 1:18

Cua ngua'ni lyaá Ni ji'i̱ ma̱ ji'i̱ lcaa cha' cuxi nu ntsu'u ji'i̱ ma̱, bi' cha' nga'aa ntsu'u cha' cube ti' ma̱ ji'i̱ lcaa cha' nu nguxtyanu jyo'o cusu' ji'na cha' cua'ni na. Nda jyo'o cusu' bi' cha' bi' lo'o na, masi jlo ti' ngu' bi' cha' ná caja ñi'ya̱ nu clyaá na ji'i̱ qui'ya nu ntsu'u ji'na lo'o cha' bi'. Pana cua nda ycui' Ndyosi caya' cha' tyu'ú na su lubii juani; si'i cñi plata laca cha' bi', ni si'i cñi oro laca nu nda Ni, cha' si cñi laca bi' ni, quiñu'u̱ bi' masi chalyuu juani ti.

1 PEDRO 4:3

Tyempo nu nteje tacui, cua ngua'ni ma̱ lcaa cha' cuxi ñi'ya̱ nu ndiya ti' ñati̱ nu ná ntsu'u cha' ji'i̱ lo'o ycui' Ndyosi tsiya' ti. Cuayá' tsa lo cua ti cha' cuxi: bi' cha' nga'aa cua'ni suba' ma̱ lo'o tya'a ñati̱ ma̱ juani, nga'aa cua'ni ma̱ lcaa lo cha' cuxi nu ndiya ti' ma̱ cua sa'ni la; nga'aa caca cu'bi ma̱, nga'aa tyeje tacui ma̱ cuayá' cacu ma̱, co'o ma̱, ñi'ya̱ nu ndyu'ni ngu' nu ná ndube ti' lo'o ndya'a̱ ngu' bi' ta'a; nga'aa cua'ni tlyu ma̱ ji'i̱ lcui̱ jo'ó, cha' suba' tsa cha' bi' cuentya ji'i̱ ycui' Ndyosi.

2 PEDRO 2:13

chcube' ngu' bi' ñi'ya̱ nu nguxcube' ycui' ngu' ji'i̱ xa' ñati̱. Tsa̱ lo'o talya ndu'ni suba' ngu' cuxi bi', cha' ná nchca taja ti' ngu' bi' ndu'ni ngu' cha' cuxi bi'; ná nchca tyuju'u ti' ngu' bi' tsiya' ti, masi cuxi tsa cña nu ndyu'ni ngu'. Lo'o jua'a̱ stu'ba ti ndyu'u ti'i̱ ngu' bi' lo'o ma̱ lo'o ndyu'ni ma̱ ta'a, ñi'ya̱ si chañi cha' tya'a na laca ngu' bi'.

2 PEDRO 2:7

Sca ti jyo'o Lot, ngulo Ni ji'i̱ yu cha' ngutu'u yu quichi̱ Sodoma bi'; bi' cha' sca ti nu cusu' Lot bi' ná ngujuii yu lo'o ndye cha' ji'i̱ quichi̱ Sodoma bi'. Ñati̱ tso'o ngua Lot; bi' cha' ngulacua tsa ti' yu, lye tsa ngua xñi'i̱ ti' yu, xqui'ya lcaa cha' suba', lcaa cha' cuxi nu ngua'ni lcaa ñati̱ quichi̱ bi'.