EFESIOS 4:12 - Chatino Tataltepec12 Jua'a̱ ndu'ni cho'o Ni ji'na, ñati̱ nu ntsu'u cha' ji'i̱ lo'o Ni, cha' taca cua'ni na cña ji'i̱ Ni, cha' tachaa la tyanu cha' ne' cresiya ji'na nu tsa tlyu ti ngusñi na cha' ji'i̱ Cristo. အခန်းကိုကြည့်ပါ။ |
EFESIOS 4:12
45 ပူးပေါင်းရင်းမြစ်များ
Li' ndu'u Bernabé ndyaa yu, ndyalaa yu ca quichi̱ bi', na'a̱ yu ñi'ya̱ laca cha' tso'o nu ngua'ni ycui' Ndyosi lo'o ngu' bi'. Tso'o tsa ntsu'u tyiquee Bernabé li'. Nda yu sca cui̱i̱ lo'o taju ñati̱ ji'i̱ Jesucristo ca bi', cha' tyucui tyiquee ngu' cua'ni ngu' cña lcaa tsa̱, lcaa ña'a̱ cña nu nti' ycui' nu Xu'na na cha' cua'ni na.
Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu.
Li' ndyaa ti'i̱ ti̱ ñati̱ ji'i̱ Jesucristo, masi ca loyuu Judea, masi ca loyuu Galilea, masi ca loyuu Samaria; lcaa tsa̱ ndyaca tsa'a̱ la ngu' cha' ji'i̱ Jesucristo. Ndyu'ni tlyu ngu' ji'i̱ Jesús, lo'o jua'a̱ ndyu'ni ngu' lcaa cña nu nti' ycui' Ndyosi nu Xu'na na cha' cua'ni ngu'. Xtyi'i ycui' Ndyosi nda juersa ji'i̱ ngu' bi', lo'o jua'a̱ ndyatu̱ la ngu' nu ngusñi cha' ji'i̱ Jesús li'.
Cua jlo ti' na' cha' nti' tsa ma̱ cha' caca cua'ni ma̱ cua ña'a̱ ca cña nu nda Xtyi'i ycui' Ndyosi ji'na; bi' cha' jña la ma̱ chacuayá' ji'i̱ ycui' Ndyosi cha' taca ji'i̱ ma̱ cua'ni ma̱ lcaa lo cña tso'o, cua ña'a̱ ca cña nu xtyucua ji'i̱ ngu' tya'a ngusñi ma̱ cha' ji'i̱ Jesús ca bi', cha' tyatí̱ la ti' tyiquee ngu'.
Cu'ma̱ tya'a ngusñi na cha' ji'i̱ Jesús, ndi'ya̱ cua'ni ma̱ nu lo'o tyu'u ti'i̱ ma̱ lo'o tya'a ma̱: Tyatu̱ tsaca ma̱ cha' cacha' ni ji̱i̱ caca nu cula tu'ba ma̱ cuentya ji'i̱ ycui' Ndyosi; cuati tyatu̱ chaca nu culu'u cha' ji'i̱ ycui' Ni ji'i̱ tya'a ma̱; lo'o li' chcui' tsaca ngu' sca cha' nu nti' Ni ta Ni lo'o ma̱; lo'o jua'a̱ taca ta ma̱ xi cha' lo'o cha'cña ji'i̱ xa' ñati̱, si lo'o nchca ji'i̱ ma̱ xtyacui ma̱ cha' bi', cha' caca cuayá' ti' lcaa ñati̱ nu nga'a̱ ca ndacua. Lcaa ña'a̱ nu cua'ni ma̱ ntsu'u cha' tyatí̱ la ti' tyiquee lcaa ñati̱ tya'a ndyu'u ti'i̱ ma̱.
Ni si'i xcui' na cua nti' ya cha' tyu'u lubii cha' ji'i̱ ya lo'o cu'ma̱; laca cha' ndube ti' ya cha' ña'a̱ ycui' Ndyosi ji'i̱ ya, bi' cha' tsa lo cua ti cha' nchcui' ya, tsa ña'a̱ cha' nu nti' ycui' Cristo cha' chcui' ya lo'o cu'ma̱. La cui' jua'a̱ lcaa cña nu ndyu'ni ya, na xtyucua ya ji'i̱ ma̱ laca cña bi', cha' ntsu'u tsa tyiquee ya ña'a̱ ya ji'i̱ cu'ma̱ tya'a tso'o na.
Cu'ma̱ tya'a ngusñi na cha' ji'i̱ Jesucristo, chcui' salya' na' lo'o ma̱ juani, nu lo'o cua tye ti xcua se'i̱ cha' nu nscua na' lo quityi re. Cua'ni lyiji ma̱ ñi'ya̱ nu nga'a̱ cha' cua'ni ma̱ cha' laca ma̱ ñati̱ ji'i̱ ycui' Ndyosi. Cua'a̱ jyaca̱ ma̱ ji'i̱ lcaa cha' nu nda na' lo quityi re. Cua'ni ma̱ cha' caca stu'ba tyiquee ma̱ lo'o xa' ñati̱ tya'a ma̱. Tso'o ti tyi'i̱ ma̱ lo'o lcaa ñati̱. Lo'o li' la cui' ycui' Ndyosi laca nu tyi'i̱ lo'o ma̱ lcaa tsa̱; ntsu'u tsa tyiquee Ni ña'a̱ Ni ji'na, lo'o jua'a̱ ndu'ni Ni cha' ti̱ ti tyi'i̱ tyiquee na.
Cu'ma̱ ngu' tya'a na, nu ntsu'u tsa tyiquee na' ña'a̱ na' ji'i̱ ma̱, jua'a̱ laca cha' nu cua nda ycui' Ndyosi lo'o na, cha' nu caca ji'na nde loo la. Bi' cha' lacua, ntsu'u cha' cua'ni tye na ji'i̱ lcaa cha' cuxi nu nti' cua'ni ñu'u̱ ji'i̱ cresiya ji'na, ji'i̱ tyucui ña'a̱ na. Lo'o jua'a̱ lye tsa cua'ni na cña cha' caca na ñati̱ ji'i̱ ycui' Ni; na laca nu cua'ni na nde chalyuu, cua'ni na ji'i̱ ñi'ya̱ nti' si cua ndu̱ ycui' Ndyosi ña'a̱ Ni ji'na.
Ca ta'a na nu ngusñi na cha' ji'i̱ Cristo scaa quichi̱, tsa tlyu ti na ntsu'u cha' ji'na lo'o Cristo. Ndi'ya̱ laca na cuentya ji'i̱ Cristo: ñi'ya̱ nti' si laca na sca tsu' ya' Cristo, cha' cua'ni na cña nu ntsu'u ji'i̱ Ni chalyuu. La cui' jua'a̱, lcaa ca na nu ña'a̱ na nu ntsu'u nde chalyuu ni, cua ntsu'u bi' xqui'ya Cristo.
xqui'ya Cristo, bi' cha' ndyaca na sca ti ñati̱ cuentya ji'i̱ ycui' Ndyosi. Ntsu'u cña cha' cua'ni sa scaa na lo'o tya'a na; nga'a̱ cha' cua'a na ji'i̱ tya'a na cha' ná xñi na tyucui̱i̱ cuxi, cha' jua'a̱ stu'ba ti ntsu'u tyiquee na lo'o tya'a na. Si tso'o ti ndi'i̱ na lo'o tya'a na, li' tsa tlyu ti xtyucua na ji'i̱ tya'a na, cha' tachaa la tyanu cha' ji'i̱ Jesús ne' cresiya ji'i̱ scaa na, xqui'ya cha' ntsu'u tsa tyiquee na ña'a̱ na ji'i̱ tya'a na.
Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.
Taquiya' ma̱ ji'i̱ ñati̱ nu laca cña cuentya ji'i̱ ña'a̱ taju ngu' tya'a ma̱; cua'ni ma̱ lcaa cña nu ndijña ngu' bi' ji'i̱ ma̱ cha' cua'ni ma̱. Tlyu tsa cña nu ntsu'u ji'i̱ ngu' bi', cha' xcui' ndube ti' ngu' ñi'ya̱ nu ndyu'ni sa scaa ma̱; nga'a̱ cha' xacui̱ ngu' cha' ji'i̱ ycui' Ndyosi si chañi cha' ña'a̱ ti tya tso'o ndyu'ni ma̱, xqui'ya cha' ngusñi ma̱ cha' ji'i̱ Ni. Pana tso'o la nti' ngu' bi', si ña'a̱ ti tso'o ntsu'u tyiquee ma̱ cua'ni ma̱ ñi'ya̱ nu nacui̱ ngu' ji'i̱ ma̱ cha' cua'ni ma̱. Si ná cua'ni ma̱ jua'a̱, caca xñi'i̱ ti' ngu' bi' li', cha' nga'aa caca xtyucua ngu' ji'i̱ ma̱ li'.
Cua'ni yala na lacua, cha' cuna tso'o na lcaa cha' nu ntsu'u ji'i̱ Cristo; cua'ni na cha' caca na ñati̱ nu nclyacua tso'o ti ti', cha' ná tso'o si xcui' na nchcui' na ji'i̱ cha' nu ngua tsa'a̱ na tya clyo ti. Juani cua jlo tso'o ti' na macala ntucua quiya' cha' ji'i̱ Cristo: cua nchcui' na ñi'ya̱ caca tyu'utsu' na ji'i̱ cha' cuxi nu ngua'ni na tya sa'ni la, ñi'ya̱ caca xñi na cha' ji'i̱ Cristo;
ကြော်ငြာတွေ