EFESIOS 3:8 - Chatino Tataltepec

⁸ Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

EFESIOS 3:8 ပူးပေါင်းရင်းမြစ်များ

SAN LUCAS 14:22

Ca tiya' la li' nacui̱ nu msu bi' ji'i̱ xu'na: “Cusu'”, nacui̱, “cua ngua'ni na' lcaa cña nu ngulo nu'u̱ 'na, lo'o ña'a̱ ti tya ntsu'u la se'i̱ su tyi'i̱ ngu' ta'a re.”

SAN JUAN 1:16

Lcaa na tsiya' ti ntsu'u ji'i̱ Jesús, lo'o lcaa tsa̱ ndyiji cha' tso'o ji'na xqui'ya Jesús.

LOS HECHOS 5:41

Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús.

LOS HECHOS 9:15

Nguxacui̱ ycui' nu Xu'na na cha' ji'i̱ Ananías li': ―Ntsu'u cha' tsaa nu'u̱ ca slo nu Saulo bi' ―nacui̱ Ni ji'i̱―. Cua ngusubi na' ji'i̱ yu cha' cua'ni yu cña jna' ―nacui̱ Ni―. Tsaa yu bi' ca slo ngu' xa' loyuu, tsaa yu ca slo nu laca xu'na loyuu tyijyu', lo'o jua'a̱ tsaa yu ca slo tya'a ma̱, nu ngu' Israel bi'. Ta yu cha' jna' lo'o lcaa ñati̱ ca su tya'a̱ yu, bi' laca cña jna' nu cua'ni yu.

ROMANOS 11:33

Tlyu tsa cha' tso'o ndyu'u ca slo ycui' Ndyosi; lcaa cha' nchca cuayá' ti' Ni, lcaa cha' jlo ti' ycui' Ni. Sca ti ycui' Ndyosi jlo ti' na ca laca nu lijya̱ nde loo la, sca ti ycui' Ndyosi jlo ti' na laca nu ndu'ni ycui' Ni. Ndi'ya̱ cha' nscua lo quityi cusu' cuentya ji'i̱ cha' bi':

ROMANOS 12:10

Ndi'ya̱ caca tyiquee ma̱ ña'a̱ ma̱ ji'i̱ ngu' tya'a ntsu'u cha' ji'i̱ ma̱ lo'o Cristo: caca ñi'ya̱ si laca ngu' bi' tya'a ngula ma̱ tsiya' ti; bi' cha' cua'ni chi̱ ma̱ loo tya'a ma̱, xti ti cha' tyu'u tyiquee ycui' ca ma̱ li'.

ROMANOS 2:4

¿Ni cha' laca ná ndube ti' ma̱ cha' tso'o tsa ntsu'u tyiquee ycui' Ndyosi ña'a̱ Ni ji'na? Ntucuá Ni cña ji'na, ndalo tsa tyiquee Ni ji'na; tso'o tsa nti' ycui' Ndyosi ña'a̱ Ni ji'na, cha' caja ñi'ya̱ nu tya'a̱chu̱' na ji'i̱ cha' cuxi nu ndiya tsa ti' na ji'i̱.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

1 CORINTIOS 15:9

Ná tso'o na' tsiya' ti nti' na', masi ngusubi Ni 'na cha' sañi na' cha' ji'i̱ Jesús ca xa' quichi̱ tyijyu', cha' ntsu'u xa' la ngu' tya'a ya nu nchca la ji'i̱ ngu' cua'ni ngu' cña bi'. Ná stu'ba na' lo'o ngu' bi', cha' tya tsubi' la lya' tsa ti' na' ji'i̱ lcaa ñati̱ ji'i̱ Jesucristo.

1 CORINTIOS 2:9

Ñi'ya̱ nu nscua cha' lo quityi cusu', jua'a̱ laca cha' bi'. Ndi'ya̱ nchcui' quityi bi': Cua ngua'ni cho'o ycui' Ndyosi cha' tso'o nu tyacua ji'i̱ ñati̱ nu ntsu'u tyiquee ji'i̱ ycui' Ni; laca bi' cha' nu bilya ña'a̱ ñati̱ chalyuu ji'i̱, cha' nu bilya cuna ñati̱ ji'i̱, ni ná ngulacua ti' ngu' cha' caca cha' bi'.

GÁLATAS 1:16

Lo'o jua'a̱ ngua'ni Ni cha' ndyuloo na' ji'i̱ Jesús, nu sca ti Sñi' ycui' Ni, cha' li' nchca 'na ta na' cha' ji'i̱ Ni lo'o lcaa cu'ma̱, ñati̱ nu ndi'i̱ xa' tsu'. Li' ndacha' na' ji'i̱ lcaa ma̱ cha' xqui'ya Jesús taca clyaá ma̱ ji'i̱ cha' cuxi nu ntsu'u ji'i̱ ma̱. Nu lo'o ngusñi ca ti na' cha' bi', li' hora ti ndu'u na' nguta'a̱ na' nde loyuu su naa Arabia; ca bi' nguti'i̱ na' ycui' ti na'. Ná nguta'a̱ na' ndyaana na' sca cui̱i̱ nu ta sca ñati̱ lo'o na'; la cui' ti jua'a̱ ná nguta'a̱ na' nde quichi̱ Jerusalén cha' chcui' na' lo'o ngu' tya'a ndyu'ni na' cña nu ndi'i̱ nde jua, masi cua nda ngu' bi' cha' ji'i̱ Jesús lo'o ñati̱ clyo la, nu lo'o tya lyiji cuna na' cha' bi'. Pana nguta'a̱ na' nde Arabia, lo'o tiya' la li' nguxtyu̱u̱ na' nguta'a̱ na' nde quichi̱ Damasco.

GÁLATAS 2:8

La cui' ycui' Ndyosi nu nda ji'i̱ Pedro ndyaa nclyu'u yu cha' ji'i̱ Ni ji'i̱ ngu' judío, la cui' ycui' Ndyosi bi' laca nu cua nda Ni 'na ndya'a na' nclyu'u na' cha' tso'o bi' ji'i̱ ngu' xa' tsu'.

EFESIOS 2:7

Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na;

EFESIOS 3:1

Xqui'ya cha' nu cua nchcui' ca na', bi' cha' nchcui' tsa na' lo'o Cristo cuentya ji'i̱ cu'ma̱. La cui' Pablo laca na'; ntsu'u na' ne' chcua̱ juani xqui'ya cha' cua nchcui' na' cha' ji'i̱ Jesucristo lo'o ñati̱, cha' nguxtyucua na' ji'i̱ cu'ma̱ nu si'i ngu' judío laca ma̱.

EFESIOS 3:16

Juani chcui' na' lo'o ycui' Ndyosi Sti na cuentya ji'i̱ cu'ma̱; quiña'a̱ tsa cha' tso'o ntsu'u ji'i̱ Ni, bi' cha' taca xtyucua Ni ji'i̱ ma̱. Ndijña na' ji'i̱ Ni cha' ta Ni juersa nu tyanu ne' cresiya ji'i̱ ma̱, cha' caca tlyu tyiquee ma̱ nu lo'o ta Ni Xtyi'i ycui' Ni cha' tyi'i̱ bi' lo'o ma̱;

EFESIOS 3:19

Bi' cha' nti' tsa na' cha' ca cuayá' tso'o ti' ma̱ cha' ntsu'u tsa tyiquee Cristo ña'a̱ Ni ji'na, masi sca cha' tlyu tsa nu ná nchca ca cuayá' tso'o ti' na ji'i̱ laca cha' bi'. Lo'o jua'a̱ nti' na' cha' tyi'i̱ ycui' Ndyosi lo'o lcaa ma̱, cha' ná tyu'u tyiquee ma̱ ji'i̱ xa' la cha' tsiya' ti.

EFESIOS 3:2

Cua ngua cuayá' ti' ma̱ cha' ycui' Ndyosi laca nu nda cña bi' 'na, cha' xtyucua na' ji'i̱ ma̱, xqui'ya cha' ntsu'u tsa tyiquee Ni ña'a̱ Ni ji'na.

FILIPENSES 2:3

Cua'ni ma̱ cha' ná quiña'a̱ cha' tyu'u tyiquee ma̱ lo'o cua'ni ma̱ sca cña; si'i xcui' cha' ji'i̱ ycui' ca ma̱ culacua ti' ma̱, ni si'i na cua'ni tyucuaa ti' ma̱ lo'o tya'a ma̱. Tso'o la si culacua ti' ma̱ cha' tso'o la laca nu xa' la ngu' tya'a ma̱, pana ná tso'o ycui' ca ma̱;

FILIPENSES 4:19

Tlyu tsa cha' tso'o ntsu'u ji'i̱ ycui' Ni, bi' cha' ta Ni lcaa na nu lyiji cha' tyiji̱ yu'u ji'i̱ ma̱ chalyuu; cua jlo ti' na' cha' jua'a̱ ndu'ni ycui' nu Xu'na na' lo'o ñati̱ xqui'ya Jesucristo.

COLOSENSES 1:27

Sca cha' tlyu nu tso'o tsa laca cha' bi', sca cha' nu caja ji'i̱ lcaa lo ñati̱ chalyuu laca cha' ji'i̱ ycui' Ndyosi bi'; pana ná ngujui chacuayá' cha' caca cuayá' ti' ñati̱ ji'i̱ ycui' Ndyosi cha' bi' nu ngua cua sa'ni la. Ndi'ya̱ ndyu'u cha' bi', cha' nu bilya cuna ngu': Taca tyi'i̱ Cristo lo'o na nde chalyuu, masi juani ti; lo'o jua'a̱ tiya' la li' taca tyu'u cha' ji'na lo'o ycui' Ndyosi ca su tlyu su xee tsa ca su ntucua ycui' Ni.

1 TIMOTEO 1:13

Ngusubi Ni jna', masi suba' tsa nchcui' na' ji'i̱ Ni cua sa'ni la, tyempo lo'o nguxcube' na' ji'i̱ ñati̱ ji'i̱ Jesucristo; tyaala tsa na' nu ngua li'. Pana ná jlo ti' na' tyempo bi', cha' bilya xñi na' cha' tso'o ji'i̱ ycui' Ndyosi, bi' cha' ngua tya'na tsa ti' Ni jna'.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

1 TIMOTEO 2:7

Ngusubi Ni 'na cha' ndya'a na' nda na' cha' tso'o bi' lo'o ñati̱ cuentya ji'i̱ ycui' Ni, cha' lo'o ngu' xa' tsu' ndyuna ngu' cha' tso'o bi' li'; ndya'a na' ngulu'u na' ji'i̱ ngu' ñi'ya̱ caca xñi ngu' cha' ji'i̱ ycui' Ndyosi. Cha' liñi nscua na' nde, si'i cha' cuiñi nchcui' na'.

2 TIMOTEO 1:11

Cha' ji'i̱ Jesucristo, bi' laca cha' nu nchcui' na' lo'o ñati̱. Cua ngusubi ycui' Ndyosi 'na cha' ndya'a na' nclyu'u na' cha' bi' ji'i̱ ngu' xa' tsu' cuentya ji'i̱ ycui' Ni,

APOCALIPSIS 3:18

Ta na' sca cui̱i̱ lo'o ma̱ lacua, bi' cha' cua'a̱ jyaca̱ ma̱ ji'i̱ cha' nu chcui' na' lo'o ma̱, cha' chañi taca culu'u cha' bi' ji'i̱ ma̱ ñi'ya̱ caca xutacui cha' cuxi nu ntsu'u ji'i̱ ma̱: Nga'a̱ cha' cua'ni ma̱ cha' caja sca chalyuu cucui ji'i̱ ma̱ su nga'aa cua'ni ma̱ cha' cuxi, cha' nga'aa ntsu'u cha' ca tyuju'u la ti' ma̱ li'. Cua'ni ma̱ cha' culacua tso'o xi ti' ma̱ lacua, cha' ca cuayá' ti' ma̱ scaa cha'.