EFESIOS 3:21 - Chatino Tataltepec

²¹ Cua'ni tlyu na ji'i̱ ycui' Ndyosi, lcaa na nu tsa tlyu ti ndyu'ni tlyu na ji'i̱ Ni; la cui' ti tlyu tsa laca Ni cuentya ji'i̱ Jesucristo. Jua'a̱ caca ji'i̱ Ni tyucui tyempo nde chalyuu, la cui' ti ná ntsu'u tsa̱ nu tye cha' ji'i̱ Ni tsiya' ti. Jua'a̱ caca cha' tu'ni.

EFESIOS 3:21 ပူးပေါင်းရင်းမြစ်များ

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

SAN LUCAS 2:14

Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.

ROMANOS 11:36

Lcaa na nu ntsu'u chalyuu, na ji'i̱ ycui' Ndyosi laca bi', cha' cua ngüiñá ycui' Ni lcaa na, cha' caca bi' cña ji'i̱ Ni. Nga'aa caca tye cha' cua'ni tlyu na ji'i̱ ycui' Ndyosi. Lo'o jua'a̱ chañi tsa cha' bi'.

ROMANOS 16:27

Sca ti ycui' Ndyosi jlo ti' lcaa cha', bi' cha' lcaa tyempo ná nga'a̱ cha' tye cha' cua'ni tlyu na ji'i̱ ycui' Ni chacuayá' ji'i̱ Jesucristo. Jua'a̱ nti' na cha' caca tu'ni.

GÁLATAS 1:5

Bi' cha' ná nga'a̱ cha' tye tsa̱ nu cua'ni tlyu na ji'i̱ ycui' Ndyosi. Jua'a̱ caca cha' bi' lacua.

EFESIOS 1:6

Lo'o juani ntsu'u cha' cua'ni tlyu na ji'i̱ ycui' Ndyosi, cha' jua'a̱ tlyu tsa cha' tso'o nu ngua'ni Ni lo'o na. Xlya'be tsa nti' Ni ña'a̱ Ni ji'na, cha' cua nda Ni ji'i̱ Sñi' ycui' ca Ni lijya̱, nu tyaca'a tsa ji'i̱ Ni, cha' jua'a̱ caca stu'ba cha' ji'na lo'o Ni.

EFESIOS 2:7

Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na;

EFESIOS 4:1

Preso laca na' juani xqui'ya cha' nda na' cha' ji'i̱ nu Xu'na na lo'o ñati̱. Pana nchcui' na' lo'o ma̱ cha' tso'o ti cua'ni ma̱ lo'o xa' ñati̱; ñi'ya̱ nu nchcui' cha' ji'i̱ ycui' Ndyosi nu ngua tsa'a̱ ma̱ tya lo'o ngusubi Ni ji'i̱ ma̱ tya clyo, la cui' jua'a̱ cua'ni ma̱ lo'o xa' ñati̱.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

FILIPENSES 2:11

Cui̱i̱ tsa chcui' lcaa ñati̱ cha' Jesucristo laca Xu'na lcaa ca chalyuu, jua'a̱ tso'o tsa cua'ni tlyu ngu' ji'i̱ ycui' Ndyosi Sti na.

FILIPENSES 4:20

Tso'o si tyucui tyempo cua'ni tlyu na ji'i̱ ycui' Ndyosi Sti na lacua. Jua'a̱ caca tu'ni.

2 TIMOTEO 4:18

Lo'o jua'a̱ tya cua'a Ni jna' ji'i̱ lcaa lo cha' cuxi nu tyacua na' ji'i̱; jlo ti' na' cha' ña'a̱ ti tya ña'a̱si̱i̱ Ni jna', cha' tso'o ti tyalaa na' su nclyo ycui' Ndyosi cña. Nga'aa tye tsa̱ cha' cua'ni tlyu na ji'i̱ ycui' Ndyosi ca bi'. Jua'a̱ caca cha' tu'ni.

HEBREOS 13:21

Ycui' Ndyosi ndu'ni cha' ti̱ ti tyi'i̱ tyiquee na, lo'o juani nti' na' cha' xtyucua Ni ji'i̱ ma̱ lo'o cua ña'a̱ ca cha' nu lyiji ji'i̱ ma̱, cha' taca cua'ni ma̱ lcaa cña, ñi'ya̱ nu nti' Ni cha' cua'ni ma̱; nti' na' cha' cuentya ji'i̱ ma̱ cua'ni Ni na laca nu tso'o la nti' Ni, chacuayá' ji'i̱ Jesucristo. Lo'o jua'a̱ ná nga'a̱ cha' tye cha' cua'ni tlyu Ni ji'i̱ Cristo. ¡Jua'a̱ caca cha' lacua!

1 PEDRO 2:5

cha' lo'o cu'ma̱ caca ma̱ ñi'ya̱ si laca ma̱ tyuu cha' tya' sca ni'i̱ ji'i̱ ycui' Ndyosi, masi ña'a̱ lu'ú ti ma̱. Li' xñi ycui' Ni tyuu bi', cha' cuiñá Ni sca ni'i̱ nu tacati tsa cuentya ji'i̱ ycui' Ni. Chaca cha' ni, ñi'ya̱ nti' sti jo'ó nu lubii cresiya ji'i̱ tsiya' ti, jua'a̱ caca lcaa cu'ma̱, cha' taca ji'i̱ ma̱ sta ma̱ msta̱ slo ycui' Ndyosi juani xqui'ya Jesucristo; nu msta̱ bi' laca ycui' ca ma̱, si chañi cha' tyucui tyiquee ma̱ nti' ma̱ taquiya' ma̱ ji'i̱ cha' nu nchcui' ycui' Ndyosi.

1 PEDRO 5:11

Ná nga'a̱ cha' tye tsa̱ nu cua'ni tlyu na ji'i̱ ycui' Ndyosi li', cha' laca Ni loo tsiya' ti. Jua'a̱ caca cha' tu'ni.

2 PEDRO 3:18

Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.