EFESIOS 2:8 - Chatino Tataltepec

⁸ na cua ngulaá na ji'i̱ nu cuxi, xqui'ya cha' jua'a̱ ti ndu'ni Ni cha' tso'o lo'o na lo'o ngusñi na cha' ji'i̱ Cristo. Ni si'i sca cña nu ngua'ni ycui' ca na laca bi', sca cha' tso'o nu ngua'ni ycui' Ndyosi cuentya ji'na jua'a̱ ti laca bi'.

EFESIOS 2:8 ပူးပေါင်းရင်းမြစ်များ

SAN MATEO 16:17

―Tso'o ntsu'u tyiquee nu'u̱ Simón, sñi' Jonás ―nacui̱ Jesús ji'i̱ li'―. Si'i ñati̱ chalyuu ti nu ngulu'u cha' bi' jinu'u̱; pana ycui' Ndyosi Sti na' nu ntucua nde cua̱, nda Ni cha' bi' nu ngua'ya hique nu'u̱.

SAN MATEO 20:9

Li' ndyalaa ngu' nu nguxana ca ti cña ca slo yu, pana nda yu xcaya' ngu' ñi'ya̱ si ntsu'u ngu' cña tyucui tsa̱.

SAN MARCOS 16:16

Nu lo'o xñi ñati̱ cha' 'na, tyucuatya ngu' chacuayá' jna' li', clyaá ngu' bi' ji'i̱ nu cuxi li'. Ñati̱ nu ná tyaja'a̱ xñi cha' 'na tsiya' ti, tyanu qui'ya ji'i̱ ngu' li'.

SAN LUCAS 7:50

Pana ndi'ya̱ nchcui' Jesús lo'o nu cuna'a̱ bi' li': ―Cua ngulaá nu'u̱ ji'i̱ cha' cuxi nu ntsu'u jinu'u̱ xqui'ya cha' jlya ti' nu'u̱ 'na. Ti̱ ti tyi'i̱ tyiquee nu'u̱, tyaa nu'u̱ lacua.

SAN JUAN 3:36

Lo'o xñi ñati̱ cha' ji'i̱ Jesús, Sñi' ycui' Ndyosi, ná nga'a̱ cha' tye chalyuu tso'o nu ta Ni ji'i̱ ngu' bi'. Pana ñati̱ nu ná taquiya' tsiya' ti ji'i̱ cha' nu nchcui' Jesús, ná ta Ni chalyuu tso'o ji'i̱ ngu' bi'; xcube' tsa Ni ji'i̱ ngu' bi' li'.

SAN JUAN 4:10

Li' nguxacui̱ Jesús cha' ji'i̱ nu cuna'a̱ bi': ―¿Ha ná jlo ca ti' nu'u̱ ña'a̱ cha' tso'o nu nda ycui' Ndyosi ji'i̱ ñati̱? ―nacui̱ Jesús―. Si jlo ca ti' nu'u̱ tilaca laca nu ngüijña hitya co'o jinu'u̱, ná tyiquee' chcui' nu'u̱ lo'o na' cha' ta na' hitya co'o ycui' nu'u̱ li' ―nacui̱―, lo'o li' ta na' hitya co'o nu'u̱ nu chañi ca cha' cua'ni cu'ú cresiya jinu'u̱.

SAN JUAN 5:24

’Liñi tsa cha' nu ta na' lo'o ma̱ juani: Cua ña'a̱ ca ñati̱ nu taquiya' ji'i̱ lcaa cha' nu chcui' na' lo'o ngu', lcaa ñati̱ nu jlya ti' ji'i̱ ycui' Ndyosi Sti na' nu nda jna' lijya̱a̱, bi' ngu' laca nu ná nga'a̱ cha' tye chalyuu tso'o nu ta ycui' Ndyosi ji'i̱ ngu' bi'. Ná cua'ni cuayá' Ni ji'i̱ ngu' bi', ná nscua cha' cajaa ngu' bi'; lcaa tyempo tyi'i̱ ngu' bi' lo'o ycui' Ndyosi ―nacui̱ Jesús ji'i̱ ngu'―.

SAN JUAN 6:35

―Ñi'ya̱ ndu'ni tyaja lo'o ndye ndyacu na ji'i̱, jua'a̱ cua'ni na' lo'o ñati̱, si xñi ngu' cha' jna' ―nacui̱ Jesús li'―. Ta na' sca chalyuu ji'i̱ ngu' su xcui' ndyaala' ti' ngu' ―nacui̱ Jesús ji'i̱ ngu' bi'―. Lo'o lcaa ñati̱ nu tyu'u cha' ji'i̱ ngu' lo'o na', nga'aa jña la ngu' xa' lo na cacu ngu'; lo'o xñi ngu' cha' jna', nga'aa tyucua nguityi ngu' li' ―nacui̱―.

SAN JUAN 6:37

Lcaa ñati̱ nu cua nda Sti na' jna', ngu' nu ngusñi cha' jna' ni, caca ngu' bi' ñati̱ 'na li'. Tucuá na' cha' ji'i̱ ngu' bi', ná culo'o na' ji'i̱ ngu' cha' tyaa ngu' chaca se'i̱.

SAN JUAN 6:40

Nde laca cña nu nti' Sti na' nu cua nda jna' lijya̱a̱ cha' caca: cua nti' Ni cha' ná tye chalyuu su tyi'i̱ ngu' lo'o Ni, lcaa ñati̱ nu ndyuloo jna' cha' laca̱ Sñi' Ni, lcaa ñati̱ nu xñi cha' jna'. Lo'o li' chañi cha' cua'ni na' cha' tyu'ú ngu' chaca quiya' lo'o cua tye ti chalyuu.

SAN JUAN 6:44

Ná tucui caca ñati̱ jna' si ná lo'o ycui' Ndyosi Sti na' ngua'ni cha' caca ngu' jua'a̱. Lo'o li' na' laca̱ nu cua'ni cha' tyu'ú ngu' bi' chaca quiya' lo'o cua tye ti chalyuu ―nacui̱ Jesús―.

SAN JUAN 6:65

Li' nacui̱ Jesús: ―Bi' cha' nacui̱ na' ji'i̱ ma̱ tsa̱ cha' ná tucui caca ñati̱ jna' si ná cua'ni Sti na' cha' ñati̱ 'na caca ngu' bi'.

LOS HECHOS 13:39

taca tyu'u laja ti ma̱ ji'i̱ qui'ya nu ntsu'u ji'i̱ ma̱ si xñi ma̱ cha' ji'i̱ Jesús. Ná ndu'ni cha' masi tso'o tsa ndaquiya' ma̱ ji'i̱ lcaa cha' nu nguscua jyo'o Moisés sa'ni, ná nchca ji'i̱ cha' bi' cuityi̱ qui'ya nu ntsu'u ji'i̱ ma̱.

LOS HECHOS 14:27

bi' cha' ndyalaa ngu' chaca quiya' quichi̱ Antioquía bi'. Li' ndyu'u ti'i̱ lcaa ñati̱ ji'i̱ Jesucristo slo ngu'; ndu̱ Pablo lo'o Bernabé nda ngu' cha' lo'o tya'a ngu', lcaa ña'a̱ cha' nu cua ngua'ni ycui' Ndyosi lo'o ngu' ca su ndyaa ngu' tyijyu', cha' jua'a̱ cua nda Ni chacuayá' cha' xñi ngu' xa' tsu' cha' ji'i̱ Jesucristo.

LOS HECHOS 15:11

Ná tso'o cha' chcui' ma̱ jua'a̱. Cua ngusñi na cha' ji'i̱ Ni, cha' ngua'ni lyaá ycui' Jesús ji'na ji'i̱ qui'ya nu ntsu'u ji'na, xqui'ya cha' tso'o ti nti' Ni ña'a̱ Ni ji'na; la cui' jua'a̱ ngua'ni Ni lo'o ngu' xa' tsu' nu ngusñi cha' ji'i̱ Ni.

LOS HECHOS 16:14

Lidia naa sca nu cuna'a̱ bi'; ngu' Tiatira laca, lo'o cña ji'i̱ laca cha' ndujui' late' nde quichi̱ Filipos bi', sca lo late' nu cuaa ña'a̱, nu tso'o xi ña'a̱. Ndu'ni tlyu ma' cusu' bi' ji'i̱ ycui' Ndyosi, cha' tso'o ndyuna ma' cha' ji'i̱ ycui' Ndyosi nu Xu'na na; jua'a̱ nguxtyucua Ni ji'i̱ ma' cha' cui'ya tso'o cuentya ñi'ya̱ nu ndyu'u cha' nu ngulu'u Pablo ji'i̱ ngu'.

LOS HECHOS 16:31

―Xñi nu'u̱ cha' ji'i̱ ycui' Jesucristo nu Xu'na na ―nacui̱ Pablo ji'i̱ yu―, bi' nu taca ji'i̱ cua'ni lyaá ji'i̱ lcaa ma̱, lo'o jinu'u̱, lo'o ji'i̱ sñi' nu'u̱, lo'o ji'i̱ lcaa ngu' nu ndi'i̱ slo nu'u̱.

ROMANOS 10:14

Pana ná caca chcui' ngu' lo'o ycui' Ndyosi chacuayá' ji'i̱ Jesús si bilya xñi ngu' cha' ji'i̱ yu; jua'a̱ ná caca xñi ngu' cha' ji'i̱ Jesús si bilya cuna ngu' cha' bi'; ni ná caca cuna ngu' cha' bi' si bilya caja ñati̱ nu ta cha' bi' lo'o ngu'.

ROMANOS 10:17

Pana nu na ni, cua ngusñi na cha' ji'i̱ Jesús nu ngua tya clyo, tya lo'o ndyuna na cha' tso'o nu cua nchcui' ngu' lo'o na cha' ji'i̱ Cristo.

ROMANOS 4:16

Ngüiñi cha' ji'i̱ Ni lo'o jyo'o Abraham lo'o ngusñi ti yu cha' ji'i̱ Ni, cha' caca cuayá' ti' lcaa na cha' xcui' cha' tso'o ntsu'u tyiquee Ni; bi' cha' nda Ni cha' bi' lo'o na. Ndyanu cha' bi' ji'i̱ lcaa ñati̱ ji'i̱ Abraham nu cala chalyuu ca nde loo la. Ni si'i tsa lo cua ti ñati̱ nu taquiya' ji'i̱ cha' cusu' ti laca nu tyanu cha' tso'o bi' ji'i̱, la cui' jua'a̱ tyanu cha' bi' ji'i̱ lcaa ñati̱ tya'a na nu xñi na cha' ji'i̱ ycui' Ndyosi ñi'ya̱ ngusñi ycui' Abraham cha' ji'i̱ Ni; jua'a̱ nti' na lo'o nacui̱ na cha' sti lcaa na ngua jyo'o Abraham bi' cuentya ji'i̱ ycui' Ndyosi.

ROMANOS 4:5

Pana nu lo'o jlya ti ti' na ji'i̱ Jesús cha' ngulotsu' yu yabe' nu ntsu'u ji'na, li' taca xquiñi Ni cha' ji'i̱ Ni lo'o na cha' caca tso'o cresiya ji'na, masi ná sca na ndacui Ni ji'na.

ROMANOS 9:16

Bi' cha' laca cha' si'i na ndu'ni clyu ti' ycui' Ndyosi ji'na xqui'ya cha' nu ndiya ti ti' na ji'i̱ Ni, si'i na ndu'ni clyu ti' Ni ji'na xqui'ya cha' nguula tsa ndyu'ni na cña ji'i̱ Ni; laca cha' tya'na ti ti' Ni ña'a̱ Ni ji'na, bi' cha' ngua'ni lyaá Ni ji'na.

GÁLATAS 3:14

Jua'a̱ ngua cha' lo'o ngu' xa' tsu' caja cha' tso'o ji'i̱ ngu' xqui'ya Jesucristo, cha' tso'o nu cua ngüiñi ji'i̱ ycui' Ndyosi lo'o nu jyo'o Abraham bi' nu ngua sa'ni. Li' caca ji'i̱ ngu' xa' tsu' ñi'ya̱ nu nchcui' ycui' Ndyosi lo'o Abraham, cha' caja Xtyi'i ycui' Ni ji'i̱ lcaa na nu lo'o xñi na cha' ji'i̱ Cristo.

GÁLATAS 3:22

Cua nchcui' quityi ji'i̱ ycui' Ndyosi cha' nu cuxi laca loo la ji'i̱ lcaa ñati̱ chalyuu, ñi'ya̱ si na cua laca na preso ji'i̱. Si jlo ti' na cha' nu cuxi laca loo ji'na, li' taca ji'i̱ Ni cua'ni lyaá Ni ji'na; ta Ni chalyuu cucui ji'na li', nu lo'o xñi na cha' ji'i̱ ycui' Jesucristo. Bi' laca nu cha' tso'o nu cua ngüiñi ji'i̱ ycui' Ni lo'o na.

EFESIOS 1:19

Nchcui' na' lo'o Ni cha' ca cuayá' tso'o ti' ma̱ lcaa cha' nu nchcui' na' re, cha' ndu'ni tsa Ni cña ne' cresiya ji'na, lcaa na nu ngusñi na cha' ji'i̱ Ni. Cña nu ndu'ni Ni lo'o na cha' caca na ñati̱ ji'i̱ Ni,

EFESIOS 2:10

Na cua ngüiñá Ni ji'i̱ ca ta'a na, cua ngua'ni stu'ba Ni cha' ji'na lo'o Jesucristo; juani cua nti' Ni cha' xcui' cha' tso'o ti cua'ni na lo'o ndi'i̱ na chalyuu, cha' cua laca nda Ni cña tso'o nu taca cua'ni sa scaa na nde chalyuu.

EFESIOS 2:5

bi' cha' nda ycui' Ndyosi chalyuu ji'na chaca quiya', xqui'ya cha' cua ndyu'ú Cristo chaca quiya'. Cua ndye chalyuu ji'na ngua ti' na nquicha', xqui'ya cha' ná ndaquiya' na ji'i̱ cha' nu nchcui' ycui' Ndyosi; pana xqui'ya cha' xcui' tya'na tsa ti' Ni ña'a̱ Ni ji'na, bi' cha' cua ngulaá na ji'i̱ nu cuxi, cha' cua ngüityi̱ Ni qui'ya nu ntsu'u ji'na.

FILIPENSES 1:29

Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'.

COLOSENSES 2:12

Lo'o cua ntyucuatya ma̱ ni, ñi'ya̱ laca si cua nguatsi' ma̱ ne' cuaá lo'o Cristo, jua'a̱ laca ma̱ lo'o Cristo; lo'o li' ñi'ya̱ si cua ndyu'ú ma̱ stu'ba ti lo'o Cristo chaca quiya', jua'a̱ laca cha' bi' li'. Ycui' Ndyosi laca nu ndu'ni cha' tyu'ú ma̱, xqui'ya cha' ntsu'u cha' ji'i̱ ma̱ lo'o Ni.

2 TESALONICENSES 1:9

Chañi cha' xcube' Ni ji'i̱ ngu' bi'; nga'aa ña'a̱ ngu' bi' ji'i̱ ycui' nu Xu'na na tsiya' ti, nga'a̱ cha' tsaa ngu' ca su ná nga'a̱ cha' tye cha' chcube' ngu'. Nga'aa ña'a̱ ngu' bi' xee ndubi ji'i̱ ycui' Ni li', nga'aa ña'a̱ ngu' ji'i̱ ycui' Ndyosi nu nchca ji'i̱ ndu'ni lcaa cña tsiya' ti.

HEBREOS 6:4

Ná caja ñi'ya̱ cua'ni na lo'o ñati̱ nu nguxtyanu tsiya' ti ji'i̱ cha' bi'. Cua jlo ti' ngu' ñi'ya̱ laca lo'o cua ndyaala hique ngu' cha' ngulacua tso'o ti' ngu', jua'a̱ cua jlo ti' ngu' cha' tso'o tsa cua ña'a̱ ca cha' nu nda ycui' Ndyosi ya̱a̱ slo ngu'. Lo'o ngu' bi', cua ngua'ni Xtyi'i ycui' Ndyosi cña ne' cresiya ji'i̱ ngu' xqui'ya Jesús nquicha'.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.