EFESIOS 2:19 - Chatino Tataltepec

¹⁹ bi' cha' juani nga'aa tyijyu' ycui' Ndyosi ji'i̱ cu'ma̱. Cuentya ji'i̱ ycui' Ndyosi ni, ná laca ma̱ ñi'ya̱ si laca ma̱ ngu' xta nu ndi'i̱ sca chalyuu tyijyu' nu si'i quichi̱ tyi ma̱; lcaa chacuayá' nu ntsu'u ji'i̱ ycui' Ni cua nda ycui' Ndyosi ji'i̱ ma̱ juani, cha' laca ma̱ ñati̱ ji'i̱ Ni. Stu'ba ntsu'u cha' ji'i̱ ma̱ lo'o lcaa ñati̱ nu ngusñi cha' ji'i̱ ycui' Ndyosi xa' quichi̱, bi' cha' laca ma̱ ñi'ya̱ nti' si stu'ba ti ndi'i̱ ma̱ lo'o ycui' Ndyosi.

EFESIOS 2:19 ပူးပေါင်းရင်းမြစ်များ

SAN MATEO 10:25

Sca ti cuayá' cha' ti'í caca ji'i̱ ngu' cuañi' bi' li', ñi'ya̱ nu ndyaca ji'i̱ mstru ji'i̱ ngu'; sca ti cuayá' cña ti'i̱ caca ji'i̱ msu bi' li', ñi'ya̱ nu ndyaca ji'i̱ xu'na ngu'. Bi' cha' taca ca cuayá' ti' ma̱ cha' ti'í tsa chcui' ngu' ji'i̱ ma̱ nu ntsu'u cha' ji'i̱ ma̱ lo'o na', cha' laca̱ nu Xu'na ma̱; cua nchcui' ngu' cha' Beelzebú nu xu'na cuiñaja laca na'.

GÁLATAS 6:10

Bi' cha' tso'o si lcaa quiya' lo'o ña'a̱ na ñi'ya̱ caca xtyucua na ji'i̱ cua ña'a̱ ca ñati̱, li' cua'ni clya na cha' xtyucua na ji'i̱ ngu' bi'. Clyo ndu'ni cha' xtyucua na ji'i̱ tya'a na, nu ngu' nu ntsu'u cha' ji'i̱ lo'o Cristo.

EFESIOS 2:12

Ñati̱ nu ndi'i̱ xa' chalyuu laca cu'ma̱, bi' cha' ná stu'ba cha' ji'i̱ ma̱ lo'o ngu' judío, nu ngu' nu cua ngusubi ycui' Ndyosi ji'i̱ nu ngua sa'ni, cha' caca ngu' bi' ñati̱ ji'i̱ Ni. Ni sca quiya' sa'ni la ná nda Ni cha' lo'o cu'ma̱ ngu' xa' tsu'; ná ntsu'u cha' tso'o nu caca ji'i̱ ma̱ nde loo la, cha' ná jlo ti' ma̱ ni sca cha' ji'i̱ ycui' Ndyosi tsiya' ti chalyuu bi' ca su ndi'i̱ ma̱. Ná ntsu'u cha' ji'i̱ cu'ma̱ lo'o Cristo tsiya' ti nu ngua tsubi'.

EFESIOS 3:15

Lcaa na lo'o tya'a na ndyu'u tsa na ji'i̱ ycui' Ndyosi ni, cha' ngüiñá Ni lcaa lo ñati̱, masi nde cua̱, masi nde loyuu chalyuu. Lo'o jua'a̱ nda Ni xtañi lcaa na.

EFESIOS 3:6

Bilya cuna ñati̱ chalyuu cha' nu ndacha' Ni 'na. Pana ndi'ya̱ ndyu'u cha' bi': Ngu' nu si'i ngu' judío laca ngu' ni, caca ngu' bi' la cui' ñi'ya̱ laca ngu' judío nu ntsu'u cha' ji'i̱ lo'o ycui' Ndyosi, nu lo'o ca cuayá' ti' ngu' cha' ji'i̱ Cristo; si xñi ngu' bi' cha' ji'i̱ Jesucristo, lo'o ngu' bi' caca tso'o cresiya ji'i̱ ngu' cuentya ji'i̱ ycui' Ndyosi li'. Caca stu'ba cha' ji'i̱ tyucuaa lo ngu' li', cha' tsa tlyu ti tya'a ngusñi ngu' cha' ji'i̱ Cristo caca ngu'. Lo'o ji'i̱ ngu' nu si'i ngu' judío laca ngu' bi', tyacua lcaa cha' nu cua nacui̱ Ni cha' tyacua ji'i̱ ngu' xqui'ya Jesucristo.

FILIPENSES 3:20

Pana nu na ni, ca su ntucua ycui' Ndyosi tsiya' ti, ca ndacua ntsu'u quichi̱ tyi na nu chañi ca. Lo'o juani chaa tsa ti' na ntajatya na ji'i̱ Jesucristo nu Xu'na na, ni jacua' tyu'u Ni nde cua̱ su ntsu'u quichi̱ nu ca tyi na, cha' ca̱qui'ya Ni ji'na nde chalyuu, cha' cua'ni lyaá lyiji Ni ji'na.

HEBREOS 11:13

Ña'a̱ ti jlya ti' lcaa jyo'o bi' ji'i̱ ycui' Ndyosi lo'o ngujuii ngu', masi nga'aa na'a̱ ngu' lo'o ndyu'u tucua lcaa cha' nu nacui̱ Ni cha' caca; pana tso'o tsa ngua tyiquee ngu' bi', cha' nu jlo ti' ngu' cha' cua ngulala ti caca cha' bi', ñi'ya̱ si tsa lyiji ti na'a̱ ngu' ji'i̱. Jlo ti' ngu' cha' tyijyu' ngutu'u ycui' ca ngu' lijya̱ ngu', lo'o ná ntsu'u tyi ngu' lo yuu bi'.

HEBREOS 13:14

Nde lo yuu chalyuu ná ntsu'u se'i̱ tso'o su tyanu na; xcui' na ndu̱ ti' na cha' tyalaa na chaca se'i̱ su tso'o la tsiya' ti, su tsaa na lo'o cua ndye chalyuu re.

1 PEDRO 2:11

Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱.

1 JUAN 3:1

Tlyu tsa cha' tso'o laca cha' ntsu'u tsa tyiquee ycui' Ndyosi Sti na ña'a̱ Ni ji'i̱ ca ta'a ngu' tya'a ntsu'u cha' ji'na lo'o Jesucristo; bi' cha' laca cha' nchcui' ycui' Ndyosi ji'na cha' sñi' ycui' Ni laca na, lo'o jua'a̱ chañi laca cha' bi'. Ná ntaja'a̱ ñati̱ chalyuu tyuloo ji'na cha' sñi' Ni laca na; la cui' jua'a̱ lo'o nguti'i̱ Jesucristo chalyuu, ná ntaja'a̱ ngu' tyuloo ngu' ji'i̱ yu li'.