EFESIOS 2:10 - Chatino Tataltepec

¹⁰ Na cua ngüiñá Ni ji'i̱ ca ta'a na, cua ngua'ni stu'ba Ni cha' ji'na lo'o Jesucristo; juani cua nti' Ni cha' xcui' cha' tso'o ti cua'ni na lo'o ndi'i̱ na chalyuu, cha' cua laca nda Ni cña tso'o nu taca cua'ni sa scaa na nde chalyuu.

EFESIOS 2:10 ပူးပေါင်းရင်းမြစ်များ

SAN MATEO 5:16

Lo'o jua'a̱ cu'ma̱ ni, si xee laca ma̱ nu culu'u tyucui̱i̱ ji'i̱ ñati̱, xcui' cha' tso'o cua'ni ma̱ cha' ña'a̱ xa' ñati̱ ña'a̱ cha' tso'o nu ndu'ni ma̱, nu laca ma̱ sñi' ycui' Ndyosi. Lo'o li' tyi'u ti' ngu' ji'i̱ ycui' Ndyosi Sti na, cua'ni tlyu ngu' ji'i̱ ycui' Ndyosi nu ntucua nde cua̱.

SAN JUAN 3:21

Ñati̱ nu xñi lcaa cha' liñi nu nda Ni lo'o ñati̱ ni, nda ycui' Ndyosi xee nu tyu'ú ne' cresiya ji'i̱ ngu' bi'. Ndi'i̱ ngu' su xee bi', cha' taca ca jlo ti' xa' ñati̱ cha' ndyu'ni ngu' bi' cua ña'a̱ ca cña nu nclyo ycui' Ndyosi ji'i̱ ngu'.

LOS HECHOS 9:31

Li' ndyaa ti'i̱ ti̱ ñati̱ ji'i̱ Jesucristo, masi ca loyuu Judea, masi ca loyuu Galilea, masi ca loyuu Samaria; lcaa tsa̱ ndyaca tsa'a̱ la ngu' cha' ji'i̱ Jesucristo. Ndyu'ni tlyu ngu' ji'i̱ Jesús, lo'o jua'a̱ ndyu'ni ngu' lcaa cña nu nti' ycui' Ndyosi nu Xu'na na cha' cua'ni ngu'. Xtyi'i ycui' Ndyosi nda juersa ji'i̱ ngu' bi', lo'o jua'a̱ ndyatu̱ la ngu' nu ngusñi cha' ji'i̱ Jesús li'.

LOS HECHOS 9:36

Cua ndi'i̱ sca nu cuna'a̱ nu naa Tabita nde quichi̱ Jope, jua'a̱ ñati̱ ji'i̱ Jesucristo laca ma' bi'. Dorcas nchcui' ngu' cha'cña ji'i̱ ngu' griego ji'i̱ ma'. Tso'o tsa tyiquee nu cuna'a̱ bi', tso'o tsa nxtyucua ma' ji'i̱ lcaa ngu' ti'i.

ROMANOS 8:1

Pana juani ni, ndi'ya̱ ngua'ni ycui' Ndyosi: Nga'aa ndyanu yabe' hichu̱' na, si stu'ba ntsu'u cha' ji'na lo'o Jesucristo; nga'aa taca ji'i̱ nu cuxi nu ntsu'u chalyuu cojolaqui ji'na juani, cha' Xtyi'i ycui' Ndyosi laca loo ji'na lo'o ndi'i̱ na nde chalyuu.

ROMANOS 8:29

Masi tya lo'o nguxana chalyuu, tya li' jlo ti' ycui' Ni tilaca laca nu tyaja'a̱ xñi cha' ji'i̱ Ni nde loo la. Ngua ti' Ni cha' caca na ñi'ya̱ laca Jesús, Sñi' ycui' ca Ni, ngua ti' Ni cha' caca Jesús tya'a na; quiña'a̱ tsa tya'a sñi' ycui' Ni caca na li', pana loo la laca Jesús.

1 CORINTIOS 3:9

Tya'a ndyu'ni ya cña ji'i̱ ycui' Ndyosi laca cuare; lo'o cu'ma̱ ni, ndu'ni Ni cña ne' cresiya ji'i̱ ma̱, cña ji'i̱ ycui' Ndyosi laca bi'. Lo'o jua'a̱ taca ta na' chaca cui̱i̱ lo'o ma̱ juani: ñi'ya̱ si laca ma̱ sca ni'i̱ tonu, jua'a̱ laca ma̱ cuentya ji'i̱ ycui' Ndyosi;

2 CORINTIOS 5:17

Lo'o juani nu lo'o cua ngusñi sca ñati̱ cha' ji'i̱ Cristo, li' cua nguxcutsa'a̱ Ni cha' ji'i̱ ñati̱ bi'; cua ndye cha' ji'i̱ yu lo'o cha' cuxi nu ngua'ni yu nu ngua tya tsubi' la. Chaca chalyuu cucui, bi' laca nu cua ngujui ji'i̱ yu juani.

2 CORINTIOS 5:5

Na cua ngua'ni cho'o ycui' Ndyosi cha' jua'a̱ caca ji'na ca li'; cua nda Ni Xtyi'i ycui' Ni cha' tyanu ne' cresiya ji'na juani. Laca bi' sca cha' nu nda Ni ji'na yala ti, cha' tyi'u ti' na lcaa cha' nu cua'ni Ni cuentya ji'na ca nde loo la.

2 CORINTIOS 9:8

Taca xtyucua ycui' Ndyosi ji'i̱ ma̱ lo'o quiña'a̱ tsa cha', lo'o li' tyu'u scua ji'i̱ ma̱ lcaa cha' nu lyiji ji'i̱ ma̱; lo'o jua'a̱ tya caja la ñi'ya̱ xtyucua ma̱ ji'i̱ xa' ñati̱ lo'o cua ña'a̱ ca cña tso'o.

GÁLATAS 6:15

Nu lo'o stu'ba ntsu'u cha' ji'na lo'o Jesucristo, ná ndu'ni cha' masi ngulacua̱ na, masi ná ngulacua̱ na, sca ti cuayá' laca na. Sca ti cha' nu ndulo la ji'na juani, cha' xcutsa'a̱ Ni tsiya' ti lcaa cha' nu ndu'ni na lo'o ndi'i̱ na chalyuu, cha' xcui' cha' tso'o cua'ni na li'.

EFESIOS 1:1

Pablo laca na' nu nscua na' quityi re. Ngulo ycui' Ndyosi cña 'na, bi' cha' ndya'a̱ na' nchcui' na' cha' ji'i̱ Jesucristo lo'o ngu' xa' quichi̱ tyijyu' la. Lo'o nu juani nscua na' quityi re cha' ca̱a̱ ca slo cu'ma̱ ngu' Efeso, cha' laca ma̱ ñati̱ ji'i̱ ycui' Ndyosi, cha' tso'o tsa ngusñi ma̱ cha' ji'i̱ Jesucristo.

EFESIOS 1:4

Lo'o tya lyiji tya' chalyuu, tya li' cua ngusubi ycui' Ndyosi ji'na cha' caca na ñati̱ ji'i̱ ycui' Ni, nu lo'o caca stu'ba cha' ji'na lo'o Cristo. Ngua ti' Ni cha' tyu'utsu' na ji'i̱ lcaa lo cha' cuxi, cha' jua'a̱ nga'aa nti' cha' sta Ni qui'ya ji'na tsiya' ti.

EFESIOS 2:13

Pana juani xa' ña'a̱ cha' ndyaca ji'i̱ ma̱, tya lo'o ngua stu'ba cha' ji'i̱ ma̱ lo'o Jesucristo. Nu ngua sa'ni la, ná nslo ma̱ ji'i̱ ycui' Ndyosi tsiya' ti; tyijyu' tsa ntucua ycui' Ndyosi ca su ndi'i̱ ma̱, ngua ti' ma̱. Pana juani cacua tsa ntucua ycui' Ndyosi ji'i̱ ma̱; cua nguije Ni ji'i̱ ma̱, xqui'ya cha' ngujuii nu Cristo bi' lo crusi.

EFESIOS 2:15

La cui' cha' cusu' nu jlya tsa ti' nu ngu' judío tya'a na' ji'i̱, bi' laca nu nñilo'o ji'i̱ ya cha' ná ca ti̱ cha', cha' ntsu'u tsa su ndatsaa cha' bi' ji'i̱ ya. Pana cua ngua'ni tye Jesús ji'i̱ cha' cusu' bi', nu lo'o ngujuii yu lo crusi; bi' cha' tyucuaa lo ñati̱ na, cua ndyaca na chaca tya ñati̱ juani, xqui'ya cha' cua ngua stu'ba cha' ji'na lo'o ycui' Ndyosi. Lo'o jua'a̱ ndu'ni Ni cha' caja ñi'ya̱ caca tyi'i̱ ti̱ ti na lo'o Ni, jua'a̱ lo'o tya'a ñati̱ na.

EFESIOS 2:2

Nu ngua tyempo bi', ndya'a̱ tsa ma̱ ndu'ni ma̱ cua ña'a̱ ca cha' cuxi nu ndu'ni ñati̱ chalyuu; ndaquiya' tsa ma̱ ji'i̱ nu xña'a̱ nu laca loo ji'i̱ lcaa cui'i̱ cuxi nu ndya'a̱ nde chalyuu, la cui' nu cuxi bi' laca nu ndatsaa ji'i̱ ñati̱ chalyuu cha' ná taquiya' ngu' ji'i̱ ycui' Ndyosi.

EFESIOS 2:6

Cua chcuna' ti cresiya ji'na nquicha', lo'o li' cua ngua'ni lyaá Ni ji'na, cha' cua ngua stu'ba cha' ji'na lo'o Jesús. Ñi'ya̱ lo'o nda Ni xtyi'i ñaa ne' cresiya ji'i̱ Jesucristo chaca quiya', cha' tyu'ú yu nu lo'o ngujuii yu, jua'a̱ ngua'ni Ni lo'o na, cha' clyaá na ji'i̱ nu cuxi. Cua nti' Ni cha' caca stu'ba cha' ji'na lo'o Jesús, masi chalyuu juani, masi ca chaca chalyuu tso'o la nde cua̱ ca su laca ycui' Ni loo.

EFESIOS 4:1

Preso laca na' juani xqui'ya cha' nda na' cha' ji'i̱ nu Xu'na na lo'o ñati̱. Pana nchcui' na' lo'o ma̱ cha' tso'o ti cua'ni ma̱ lo'o xa' ñati̱; ñi'ya̱ nu nchcui' cha' ji'i̱ ycui' Ndyosi nu ngua tsa'a̱ ma̱ tya lo'o ngusubi Ni ji'i̱ ma̱ tya clyo, la cui' jua'a̱ cua'ni ma̱ lo'o xa' ñati̱.

EFESIOS 4:24

nga'a̱ cha' xñi tso'o ma̱ cha' ji'i̱ ycui' Ndyosi cha' xa' ña'a̱ cua'ni ma̱ su ndi'i̱ ma̱ chalyuu, cha' taca cua'ni ma̱ ñi'ya̱ nu nti' ycui' Ndyosi cha' cua'ni ma̱. Bi' cha' xcui' cha' tso'o cua'ni ma̱ chalyuu, xcui' cha' lubii cua'ni ma̱, si chañi cha' laca ma̱ ñati̱ ji'i̱ ycui' Ndyosi.

FILIPENSES 1:6

bi' cha' cua jlo ti' na' juani cha' ña'a̱ ti tya cua'ni ycui' Ndyosi cña ne' cresiya ji'i̱ ma̱, ña'a̱ cuayá' nu tyu'u scua cña bi', nu lo'o tya̱a̱ Jesucristo chaca quiya', cha' la cui' ycui' Ni laca nu nguxana ngua'ni cña ne' cresiya ji'i̱ ma̱ tya clyo.

FILIPENSES 2:13

Tyi'u ti' ma̱ cha' lcaa tsa̱ ndu'ni ycui' Ndyosi cña laja ne' cresiya ji'i̱ ma̱, cha' taca cua'ni ma̱ cña ji'i̱ Ni; jua'a̱ ndu'ni Ni cha' tyaja'a̱ ma̱ cua'ni ma̱ lcaa ña'a̱ nu nti' ycui' Ndyosi cha' cua'ni ma̱.

COLOSENSES 1:10

Lo'o li' lcaa tsa̱ lo'o ndya'a̱ ma̱ chalyuu taca cua'ni ma̱ cña, cua ña'a̱ ca cña nu nti' ycui' Ndyosi cha' cua'ni ma̱; taca cua'ni ma̱ lcaa lo cña tso'o cuentya ji'i̱ ycui' Ndyosi li', lo'o jua'a̱ taca ca cuayá' la ti' ma̱ ñi'ya̱ ndyu'u lcaa cha' ji'i̱ Ni.

COLOSENSES 3:10

cha' juani cua ngujui chaca chalyuu cucui ji'i̱ ma̱. Chaca lo ñati̱ cua laca ma̱ juani; cua nguxcutsa'a̱ ycui' Ndyosi lcaa cha' nu ntsu'u ne' cresiya ji'i̱ ma̱ juani, cha' jua'a̱ caca ma̱ ñi'ya̱ nu laca ycui' Ni, nu lo'o ndyaca tsa'a̱ lyiji ma̱ lcaa cha' nu ntsu'u ji'i̱ ycui' Ni.

1 TIMOTEO 2:10

tso'o la ña'a̱ nu cuna'a̱ nu xcui' cha' tso'o ndu'ni cuentya ji'i̱ ycui' Ndyosi.

1 TIMOTEO 5:10

Scua ngu' xtañi ma' cusu' nu nchcui' ngu' ji'i̱ cha' tso'o tsa cña ndu'ni ma' cusu' bi': si cua ngua'ni cu'ú tso'o ma' ji'i̱ nu sube; si cua nda ma' su tyi'i̱ ñati̱ nu lijya̱ tyijyu'; si cua nguxtyucua ma' ji'i̱ tya'a ñati̱ ji'i̱ Jesucristo, masi tlyu cña ntsu'u cha' cua'ni ma'; si ngua tya'na ti' ma' ji'i̱ ñati̱ nu quicha ti'. Si jua'a̱ xcui' cña tso'o ndu'ni ma' cusu' bi', scua ngu' xtañi ma' lo quityi bi' lacua.

1 TIMOTEO 5:25

La cui' jua'a̱ lo'o ñati̱ nu tso'o tsa tyiquee, jlo ti' xa' ñati̱ ni cha' tso'o nu ndyu'ni ngu' bi'. Pana si ntsu'u ñati̱ nu tso'o tyiquee, nu ná jlo ti' xa' ñati̱ ji'i̱, ca nde loo la tyu'u tucua cha', ca cuayá' ti' ngu' ji'i̱ cha' tso'o nu ngua'ni ngu' bi' li'.

1 TIMOTEO 6:18

Culo nu'u̱ cña ji'i̱ ngu' culiya' bi' ndi'ya̱: Xcui' cha' tso'o cua'ni ngu'; cua'ni tya'na ti' ngu' ji'i̱ xa' ñati̱, lo'o jua'a̱ tyi'u ti' ngu' ji'i̱ ngu' ti'i, cha' ta ngu' na nu lyiji ji'i̱ ngu' ti'i bi'.

2 TIMOTEO 2:21

Ñi'ya̱ nti' ya' xña nu ntsu'u ne' cosiña, jua'a̱ laca ñati̱ ji'i̱ Jesucristo; nti' na cha' cua'ni ycui' nu Xu'na na cha' tso'o lo'o na, cha' cube ti' Ni ji'na ñi'ya̱ lo'o ndube ti' xu'na ni'i̱ ji'i̱ ca'ña ji'i̱, nu quiña'a̱ tsa nga'a̱. Ná caca cua'ni na cha' tso'o bi' si ná lubii cresiya ji'na; bi' cha' ndu'ni cha' xtyanu na lcaa cha' cuxi cha' caca lubii cresiya ji'na, cha' sca ti cña nu nda ycui' Ndyosi ji'na cua'ni na li'.

2 TIMOTEO 3:17

La cui' quityi bi' laca nu culu'u ji'i̱ lcaa tya'a na nu laca na ñati̱ ji'i̱ ycui' Ndyosi, ñi'ya̱ taca cua'ni tso'o na lcaa cña nu nda Ni ji'na cha' cua'ni na nde chalyuu.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

TITO 2:7

Xcui' tso'o ti cua'ni nu'u̱, cha' jua'a̱ ca tsa'a̱ nu ngu' cuañi' bi' lcaa cha' tso'o lo'o ña'a̱ ngu' cua ña'a̱ ca cha' nu ndyu'ni nu'u̱; lcaa cha' liñi culu'u tso'o nu'u̱ ji'i̱ ngu' bi', si'i cha' laja ti chcui' nu'u̱ lo'o ngu'.

TITO 3:1

Culu'u nu'u̱ ji'i̱ ngu' cha' taquiya' ngu' ji'i̱ lcaa ngu' nu laca loo, ji'i̱ lcaa ngu' tisiya; nga'a̱ cha' cua'ni ngu' lcaa lo cña tso'o nu culo ngu' bi' ji'i̱ ngu' cha' cua'ni ngu'.

TITO 3:14

Ntsu'u cha' ca tsa'a̱ ca ta'a ñati̱ ji'i̱ Jesucristo tya'a na cha' cua'ni ngu' lcaa lo cha' tso'o, cha' taca xtyucua ngu' ji'i̱ tya'a ñati̱ ngu' nu lyiji xi ji'i̱; ná tso'o si taja ti ndi'i̱ ngu' chalyuu.

TITO 3:8

Nga'a̱ cha' jlya tso'o ti' ma̱ cha' liñi nu nscua na' re, bi' cha' lye chcui' nu'u̱ cha' bi' lo'o lcaa ñati̱ nu ngusñi cha' ji'i̱ ycui' Ndyosi ca bi', cha' xcui' cha' tso'o cua'ni ma̱ li'. Tso'o tsa laca cha' liñi, taca xtyucua cha' bi' ji'i̱ cua ña'a̱ ca ñati̱;

HEBREOS 10:24

Culacua tso'o ti' na, cha' caja ñi'ya̱ xtyucua na ji'i̱ xa' la ngu' tya'a ngusñi na cha' ji'i̱ Jesús; xtyucua na ji'i̱ ngu' bi', cha' xcui' cha' tso'o ti cua'ni ngu' lo'o tya'a ngu', cha' jua'a̱ caca tso'o tyiquee ngu' ña'a̱ ngu' ji'i̱ tya'a ngu'.

HEBREOS 13:21

Ycui' Ndyosi ndu'ni cha' ti̱ ti tyi'i̱ tyiquee na, lo'o juani nti' na' cha' xtyucua Ni ji'i̱ ma̱ lo'o cua ña'a̱ ca cha' nu lyiji ji'i̱ ma̱, cha' taca cua'ni ma̱ lcaa cña, ñi'ya̱ nu nti' Ni cha' cua'ni ma̱; nti' na' cha' cuentya ji'i̱ ma̱ cua'ni Ni na laca nu tso'o la nti' Ni, chacuayá' ji'i̱ Jesucristo. Lo'o jua'a̱ ná nga'a̱ cha' tye cha' cua'ni tlyu Ni ji'i̱ Cristo. ¡Jua'a̱ caca cha' lacua!

1 PEDRO 2:12

Xcui' cha' liñi cua'ni ma̱ lacua; xcui' cha' tso'o cua'ni ma̱, xqui'ya nu ñati̱ nu ná jlya ti' ji'i̱ ycui' Ndyosi tsiya' ti, cha' lo'o ngu' bi' taca ca cuayá' ti' ngu' cha' ñati̱ tso'o laca ma̱. Nu juani nti' ngu' bi' cha' cuxi tsa ñati̱ laca ma̱, bi' cha tso'o la si cua'ni ma̱ xcui' cha' tso'o ti cha' ña'a̱ ñati̱ bi' ji'i̱ ma̱; li' ta ngu' bi' cuentya cha' chañi cha' ñati̱ tso'o laca ma̱. Lo'o ñati̱ bi' cua'ni tlyu ji'i̱ ycui' Ndyosi tsa̱ nu cua'ni cuayá' Ni ji'i̱ ñati̱ li'.

1 JUAN 1:7

Pana si lubii cresiya ji'na ñi'ya̱ lo'o lubii cresiya ji'i̱ ycui' Ni, ndu'ni na cha' tso'o li'; stu'ba ti caca tyiquee na lo'o tya'a ngusñi na cha' ji'i̱ Jesús li'. Lo'o jua'a̱ cuityi̱ Ni qui'ya nu ntsu'u ji'na, xqui'ya cha' cua ndyalú tañi Jesús Sñi' ycui' Ni lo'o ngujuii yu lo crusi.

1 JUAN 2:6

Ñati̱ nu nchcui' lo'o xa' la ngu' cha' ñati̱ ji'i̱ Jesucristo laca ycui', ntsu'u cha' cua'ni ñati̱ bi' cña, cua ña'a̱ ca cña nu ngua'ni ycui' Jesucristo.