EFESIOS 1:9 - Chatino Tataltepec

⁹ Ñi'ya̱ nu ngua'ya cha' hique Ni tya sa'ni, jua'a̱ ngua'ni Ni li'; masi ná ndacha' Ni ji'i̱ ñati̱ chalyuu nu ngua sa'ni ñi'ya̱ caca cha' bi', tya li' ngua ti' Ni cha' cua'ni Ni cha' cala Cristo nde chalyuu. Hasta juani cua ngua cuayá' tso'o ti' na ñi'ya̱ ngua ti' ycui' Ndyosi cha' cua'ni Ni xqui'ya Cristo;

EFESIOS 1:9 ပူးပေါင်းရင်းမြစ်များ

SAN MATEO 13:11

Li' nguxacui̱ Jesús cha' ji'i̱ ngu' bi': ―Cua nda ycui' Ndyosi chacuayá' cha' ca cuayá' ti' ma̱ sca cha' nu ntsu'u cuaana ti ji'i̱ jyo'o cusu', ñi'ya̱ caca lo'o caca ycui' Ni loo ne' cresiya ji'i̱ ñati̱. Xa' ñati̱ nu ná ngusñi cha' ji'i̱ ycui' Ndyosi ni, ná ta ngu' cuentya lo'o cuna ngu' sca cui̱i̱ nu nchcui' na'; tucui tsa cha' bi' nti' ngu'.

SAN LUCAS 12:32

’Ná cutsi̱i̱ cu'ma̱. Ñati̱ 'na laca ma̱, masi xti ti ngu' tya'a ma̱, cu'ma̱ nu laca ma̱ taju ñati̱ ji'i̱ ycui' Ndyosi; cua ngujui chalyuu tso'o ji'i̱ ma̱ cha' ycui' Ndyosi Sti na laca loo ji'i̱ ma̱, cha' jua'a̱ nti' ycui' Ni.

SAN LUCAS 2:14

Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.

LOS HECHOS 13:48

Ndyuna nu ngu' xa' tsu' cha' bi', lo'o li' tso'o tsa ntsu'u tyiquee ngu'. Tso'o tsa laca cha' ji'i̱ ycui' Ndyosi nu Xu'na na, ngulacua ti' ngu' bi'; jua'a̱ ngusñi ngu' cha' bi'. Jlya ti' ngu' bi' cha' ji'i̱ Jesús, lcaa ngu' nu cua ngusubi ycui' Ndyosi ji'i̱; ngujui chalyuu nu ná nga'a̱ cha' tye ji'i̱ ngu' bi' li'.

LOS HECHOS 2:23

Cua sa'ni la cua jlo ti' ycui' Ndyosi, tya li' cua nchcui' Ni ñi'ya̱ nu caca ji'i̱ Jesús. Ndacha' lo Ni ji'i̱ ngu' cha' cujuii ñati̱ cuxi ji'i̱ ycui' Jesús. Jua'a̱ ngua li'; tsubi' ti ngusñi ma̱ ji'i̱ yu, ngujui'i̱ ca'a̱ ma̱ ji'i̱ yu lo crusi. Cua ndyujuii ma̱ ji'i̱ yu lo'o nda ma̱ cña ji'i̱ ñati̱ cuxi bi', cha' cua ngua'ni ngu' cña cuxi bi' cuentya ji'i̱ ma̱, ñi'ya̱ nu nacui̱ Ni cha' caca.

ROMANOS 11:25

Cu'ma̱ ngu' tya'a ntsu'u cha' ji'na lo'o Cristo, nti' na' cha' caca cuayá' ti' ma̱ cha' tucui re, sca cha' ji'i̱ ycui' Ndyosi nu ntsu'u cuatsi' ti nquicha'; lo'o caca cuayá' ti' ma̱ cha' re, nga'aa chcui' ma̱ cha' tyixi lo'o ngu' judío li'. Ndi'ya̱ laca cha': Quiña'a̱ tsa tya'a ngu' judío ntsu'u nu ndyacu̱' hique ngu' tsiya' ti, cha' ná caca cuna ngu' cha' ji'i̱ Jesús; ña'a̱ cuayá' nu tye cuna lcaa ngu' xa' tsu' nu nga'a̱ cha' xñi cha' ji'i̱ Jesús,

ROMANOS 8:28

Jlo ti' na cha' cua nda ycui' Ndyosi chacuayá' ñi'ya̱ caca lcaa cha' nu ndyaca chalyuu, cha' caca tso'o chalyuu su ndi'i̱ na si ntsu'u tyiquee na ña'a̱ na ji'i̱ Ni. Na cua ngusubi Ni ji'na juani, cha' caca na ñi'ya̱ nu ngua ti' Ni tya clyo cha' caca na.

1 CORINTIOS 1:21

Ngua'ni Ni cha' ná caja ñi'ya̱ tyuloo ñati̱ chalyuu ji'i̱ Ni cha' hique ti ngu'; jua'a̱ tso'o la, ngua ti' ycui' Ndyosi. Pana ndu'ni lyaá Ni ji'i̱ ñati̱ nu xñi cha' ji'i̱ Ni; la cui' cha' nu ndacha' na ji'i̱ ngu', masi cha' tonto nchcui' na, nacui̱ ngu' li'.

GÁLATAS 1:12

Si'i ñati̱ laca nu nda cha' bi' lo'o na' tya clyo, ni sca ñati̱ chalyuu ná ngulu'u cha' bi' 'na; ycui' Jesucristo ngulu'u loo yu 'na, ycui' bi' laca nu cua nda cha' bi' lo'o na' li'.

GÁLATAS 1:15

Pana yala la ngua'ni ycui' Ndyosi; masi bilya cala na' cua ngusubi Ni 'na cha' caca na' ñati̱ ji'i̱ Ni, xqui'ya cha' jua'a̱ ngua ti' ycui' Ni; na cua ngusubi Ni 'na xqui'ya cha' ntsu'u tsa tyiquee Ni ña'a̱ Ni 'na.

GÁLATAS 1:16

Lo'o jua'a̱ ngua'ni Ni cha' ndyuloo na' ji'i̱ Jesús, nu sca ti Sñi' ycui' Ni, cha' li' nchca 'na ta na' cha' ji'i̱ Ni lo'o lcaa cu'ma̱, ñati̱ nu ndi'i̱ xa' tsu'. Li' ndacha' na' ji'i̱ lcaa ma̱ cha' xqui'ya Jesús taca clyaá ma̱ ji'i̱ cha' cuxi nu ntsu'u ji'i̱ ma̱. Nu lo'o ngusñi ca ti na' cha' bi', li' hora ti ndu'u na' nguta'a̱ na' nde loyuu su naa Arabia; ca bi' nguti'i̱ na' ycui' ti na'. Ná nguta'a̱ na' ndyaana na' sca cui̱i̱ nu ta sca ñati̱ lo'o na'; la cui' ti jua'a̱ ná nguta'a̱ na' nde quichi̱ Jerusalén cha' chcui' na' lo'o ngu' tya'a ndyu'ni na' cña nu ndi'i̱ nde jua, masi cua nda ngu' bi' cha' ji'i̱ Jesús lo'o ñati̱ clyo la, nu lo'o tya lyiji cuna na' cha' bi'. Pana nguta'a̱ na' nde Arabia, lo'o tiya' la li' nguxtyu̱u̱ na' nguta'a̱ na' nde quichi̱ Damasco.

EFESIOS 1:11

Lcaa cha' nu ndyaca nde chalyuu, ndyaca bi' xqui'ya cha' nti' Ni cha' caca jua'a̱. Lo'o jua'a̱ na ni, tya clyo cua ngusubi Ni ji'na cha' caca na ñati̱ ji'i̱ Ni, cha' caca stu'ba cha' ji'na lo'o Cristo, xqui'ya cha' jua'a̱ nti' ycui' Ndyosi cha' caca.

EFESIOS 1:8

Ntsu'u tsa tyiquee Ni ña'a̱ Ni ji'na, bi' cha' ngua'ni Ni jua'a̱. Ndu'ni Ni cha' ca jlo ti' na lcaa cha' ji'i̱ Ni, cha' ca cuayá' ti' na ñi'ya̱ caca cha' bi'.

EFESIOS 3:11

Ngua'ni Ni cha' tlyu bi', nu lo'o nda Ni ji'i̱ Jesucristo nu Xu'na na ñaa chalyuu, ñi'ya̱ nu ngua ti' Ni cua'ni Ni tya lo'o bilya tya' chalyuu.

1 TIMOTEO 3:16

Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.

2 TIMOTEO 1:9

cha' ycui' Ndyosi laca nu ngua'ni lyaá ji'na; cua ngusubi Ni ji'na cha' cua'ni na cña nu nti' Ni cha' cua'ni na. Ntaja'a̱ Ni cua'ni lyaá Ni ji'na cha' tso'o tyiquee ti Ni, masi si'i xqui'ya cha' tso'o nu ngua'ni ycui' ca na. Ntsu'u tsa tyiquee Ni ña'a̱ Ni ji'na; jua'a̱ laca cha' nu ngulu'u Jesucristo ji'na, cha' ngua ti' ycui' Ndyosi cua'ni Ni cha' tso'o lo'o na nu lo'o tya lyiji cuiñá Ni chalyuu.