EFESIOS 1:7 - Chatino Tataltepec

⁷ Cua ngulaá na ji'i̱ nu cuxi nu ntsu'u ji'na, xqui'ya cha' cua ngujuii Sñi' ycui' Ni lo crusi cuentya ji'na, cha' cua ngüi'ya Ni cha' clyu ti' ji'na ji'i̱ qui'ya nu ntsu'u ji'na li'; tlyu tsa cha' tso'o nu cua ngua'ni ycui' Ndyosi lo'o na laca bi'.

EFESIOS 1:7 ပူးပေါင်းရင်းမြစ်များ

SAN MATEO 20:28

Na' nu cua nda Ni 'na lijya̱a̱ cha' caca na' ñati̱, ná lijya̱ na' nde chalyuu cha' caja msu 'na; ycui' na' laca na' msu ji'i̱ ñati̱, bi' cha' lijya̱ na'. Na cua lijya̱ na' cha' cajaa na' cha' cati̱ qui'ya nu ntsu'u ji'i̱ ñati̱, cha' cua'ni lyaá na' ji'i̱ quiña'a̱ tsa ñati̱ li' ―nacui̱ Jesús ji'i̱ ngu'.

SAN MATEO 26:28

cha' ñi'ya̱ nti' tañi na', jua'a̱ nti' nu nde. Laca bi' sca cha' nu culu'u liñi ji'i̱ ma̱ cha' chaca quiya' quiñi cha' ji'i̱ ycui' Ndyosi lo'o ñati̱ chalyuu, nu lo'o tyalú tañi na' lo crusi. Jua'a̱ cua'ni lyaá Ni ji'i̱ quiña'a̱ tsa tya'a ma̱, nu lo'o cua'ni clyu ti' Ni ji'i̱ qui'ya nu ntsu'u ji'i̱ ma̱.

SAN MATEO 6:12

Lo'o jua'a̱ cui'ya nu'u̱ cha' clyu ti' ji'i̱ ya ji'i̱ lcaa cha' cuxi nu ntsu'u tyiquee ya, cha' jua'a̱ cua ngüi'ya ya cha' clyu ti' ji'i̱ ñati̱ nu ngua'ni cha' cuxi lo'o ya.

SAN MARCOS 14:24

―Ñi'ya̱ nti' tañi na', jua'a̱ nti' nu nde ―nacui̱ Jesús ji'i̱ ngu'―. Tyalú tañi na' cha' caja ñi'ya̱ cuityi̱ qui'ya nu ntsu'u ji'i̱ lcaa ñati̱, cha' jua'a̱ quiñi cha' ji'i̱ ycui' Ndyosi lo'o ñati̱ chalyuu chaca quiya'.

SAN LUCAS 1:77

Culu'u nu'u̱ ji'i̱ ñati̱ cha' ji'i̱ ycui' nu Xu'na na; cua'ni nu'u̱ cha' ca cuayá' ti' ngu' cha' cua'ni clyu ti' ycui' Ndyosi ji'i̱ qui'ya nu ntsu'u ji'i̱ ngu', cha' li' taca clyaá ngu' bi' ji'i̱ nu cuxi.

SAN LUCAS 24:47

Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'.

SAN JUAN 20:23

Cua'ni clyu ti' ycui' Ndyosi ji'i̱ qui'ya nu ntsu'u ji'i̱ ñati̱ lo'o chcui' ma̱ lo'o ngu' cha' cua'ni clyu ti' Ni ji'i̱ ngu', lo'o jua'a̱ tyanu qui'ya nu ntsu'u ji'i̱ ñati̱ lo'o chcui' ma̱ lo'o ngu' cha' ná cua'ni clyu ti' Ni ji'i̱ ngu'.

LOS HECHOS 10:43

Na cua nguscua jyo'o cusu' xi cha' lo quityi ji'i̱ ycui' Ndyosi nu ngua sa'ni; lcaa quityi bi' nchcui' cha' ntsu'u cha' ca̱a̱ sca ñati̱ tlyu lo yuu chalyuu tyempo nde loo la; bi' laca nu cuityi̱ yabe' nu ntsu'u ji'i̱ lcaa ñati̱, si xñi ngu' cha' ji'i̱ yu, nacui̱ cha' nu nscua lo quityi bi'. Na cua ndyalaa yu bi' lo yuu re juani, Jesús naa yu.

LOS HECHOS 2:38

―Tso'o si caca tyuju'u ti' ma̱ ji'i̱ cha' cuxi, lcaa cha' cuxi nu ntsu'u tyiquee ma̱ xtyanu ma̱ ji'i̱ li' ―nacui̱ Pedro ji'i̱ ngu'―. Lo'o jua'a̱ tyucuatya ngu' ji'i̱ ma̱ chacuayá' ji'i̱ Jesús li'. Cuityi̱ Ni lcaa qui'ya nu ntsu'u ji'i̱ ma̱ li', jua'a̱ ta Ni Xtyi'i ycui' Ni cha' tyanu Ni ne' cresiya ji'i̱ ma̱.

LOS HECHOS 20:28

Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu.

LOS HECHOS 3:19

Bi' cha' ntsu'u cha' ca tyuju'u ti' ma̱ ji'i̱ lcaa cha' cuxi nu ntsu'u tyiquee ma̱ ji'i̱, cuati jña ma̱ cha' clyu ti' ji'i̱ ycui' Ndyosi cha' cuityi̱ Ni lcaa cha' cuxi nu ngua'ni ma̱. Cua'ni nu Xu'na na cha' taca ca tso'o cresiya ji'i̱ ma̱ chaca quiya' li'.

ROMANOS 2:4

¿Ni cha' laca ná ndube ti' ma̱ cha' tso'o tsa ntsu'u tyiquee ycui' Ndyosi ña'a̱ Ni ji'na? Ntucuá Ni cña ji'na, ndalo tsa tyiquee Ni ji'na; tso'o tsa nti' ycui' Ndyosi ña'a̱ Ni ji'na, cha' caja ñi'ya̱ nu tya'a̱chu̱' na ji'i̱ cha' cuxi nu ndiya tsa ti' na ji'i̱.

ROMANOS 3:24

Pana cua'ni Ni cha' caca tso'o cresiya ji'na, cha' tso'o ti ntsu'u tyiquee Ni ña'a̱ Ni ji'na; sca cha' tso'o nu ngua'ni ti Ni cuentya ji'na laca, cha' tlyu tsa cña nu ngua'ni ycui' Jesucristo cha' cati̱ qui'ya nu ntsu'u ji'na, nu lo'o ngujuii yu lo crusi cha' cua'ni lyaá yu ji'na.

ROMANOS 3:25

Nda ycui' Ndyosi ji'i̱ Jesús ñaa chalyuu cha' tyaja'a̱ yu cajaa yu; masi ycui' yu chcube' yu cña loo lcaa ñati̱ chalyuu, cha' qui'ya ycui' yu yabe' nu ntsu'u ji'na. Caca cha' bi' ji'na si tyaja'a̱ na xñi na cha' ji'i̱ Jesús. Lo'o jua'a̱ nti' Ni culu'u Ni ji'na cha' xcui' cha' liñi ndu'ni Ni lo'o na, masi ná ngua'ni cuentya Ni ji'i̱ qui'ya nu ntsu'u ji'i̱ jyo'o cusu' ji'na; pana ndalo tsa tyiquee Ni ji'i̱ ngu' bi' li'.

ROMANOS 9:23

Pana ngua ti' Ni cha' caca cuayá' ti' na ñi'ya̱ tlyu tsa cha' tso'o nu ndyu'ni Ni lo'o na, cha' tya'na tsa ti' Ni ña'a̱ Ni ji'na. Tya tsubi' la cua ngusubi ycui' Ndyosi ji'na, cha' lo'o na caja cha' tso'o nu ntsu'u ji'i̱ ycui' Ndyosi ji'na.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

2 CORINTIOS 8:9

Cua jlo ti' ma̱ ñi'ya̱ ndu'ni Jesucristo nu Xu'na na, cha' xcui' tso'o tsa ndu'ni Ni lo'o ñati̱. Lcaa na cua ntsu'u ji'i̱ Ni, pana cua ntaja'a̱ Ni ngua Ni sca ñati̱ ti, ñi'ya̱ nti' sca ñati̱ ti'i nu ná sca na ntsu'u ji'i̱ tsiya' ti. Xqui'ya cu'ma̱, bi' cha' ngua'ni Ni jua'a̱, cha' tiya' la li' taca caja lcaa na nu ntsu'u ji'i̱ ycui' Ni ji'i̱ ma̱.

EFESIOS 1:14

Xtyi'i ycui' Ndyosi ni, bi' laca nu nda Ni ji'na yala la, cha' caca cuayá' ti' na cha' chañi cha' cua'ni Ni lo'o na ñi'ya̱ nu nacui̱ Ni cha' cua'ni Ni lo'o lcaa ñati̱ ji'i̱ Ni; ndyu'ni Xtyi'i ycui' Ni cha' taca ca cuayá' ti' na cha' tye cua'ni lyaá lyiji Ni ji'i̱ lcaa na nu ngusñi na cha' ji'i̱ Ni. ¡Bi' cha' ntsu'u cha' cua'ni tlyu na ji'i̱ ycui' Ni, cha' tlyu tsa cha' tso'o nu ndyu'ni Ni lo'o na!

EFESIOS 1:18

Lo'o jua'a̱ nchcui' na' lo'o Ni cha' saala Ni hique ma̱, cha' ca cuayá' tso'o ti' ma̱ ña'a̱ cha' tso'o nu tyacua ji'i̱ ma̱ juani, cha' cua ngusubi Ni ji'i̱ ma̱; tlyu tsa cha' tso'o cua nacui̱ Ni cha' tyacua ji'i̱ ma̱, lo'o ji'i̱ lcaa ñati̱ nu ngusñi cha' ji'i̱ Ni.

EFESIOS 1:6

Lo'o juani ntsu'u cha' cua'ni tlyu na ji'i̱ ycui' Ndyosi, cha' jua'a̱ tlyu tsa cha' tso'o nu ngua'ni Ni lo'o na. Xlya'be tsa nti' Ni ña'a̱ Ni ji'na, cha' cua nda Ni ji'i̱ Sñi' ycui' ca Ni lijya̱, nu tyaca'a tsa ji'i̱ Ni, cha' jua'a̱ caca stu'ba cha' ji'na lo'o Ni.

EFESIOS 1:8

Ntsu'u tsa tyiquee Ni ña'a̱ Ni ji'na, bi' cha' ngua'ni Ni jua'a̱. Ndu'ni Ni cha' ca jlo ti' na lcaa cha' ji'i̱ Ni, cha' ca cuayá' ti' na ñi'ya̱ caca cha' bi'.

EFESIOS 2:4

Pana ndyi'ya tsa ycui' Ndyosi cha' clyu ti' ji'na, cha' ntsu'u tsa tyiquee Ni ña'a̱ Ni ji'na;

EFESIOS 2:7

Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na;

EFESIOS 3:16

Juani chcui' na' lo'o ycui' Ndyosi Sti na cuentya ji'i̱ cu'ma̱; quiña'a̱ tsa cha' tso'o ntsu'u ji'i̱ Ni, bi' cha' taca xtyucua Ni ji'i̱ ma̱. Ndijña na' ji'i̱ Ni cha' ta Ni juersa nu tyanu ne' cresiya ji'i̱ ma̱, cha' caca tlyu tyiquee ma̱ nu lo'o ta Ni Xtyi'i ycui' Ni cha' tyi'i̱ bi' lo'o ma̱;

EFESIOS 3:8

Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

FILIPENSES 4:19

Tlyu tsa cha' tso'o ntsu'u ji'i̱ ycui' Ni, bi' cha' ta Ni lcaa na nu lyiji cha' tyiji̱ yu'u ji'i̱ ma̱ chalyuu; cua jlo ti' na' cha' jua'a̱ ndu'ni ycui' nu Xu'na na' lo'o ñati̱ xqui'ya Jesucristo.

COLOSENSES 1:14

xqui'ya Cristo cua ngulaá na ji'i̱ nu cuxi, xqui'ya Cristo cua ngüi'ya Ni cha' clyu ti' ji'na ji'i̱ qui'ya nu ntsu'u ji'na lo'o Ni.

COLOSENSES 1:27

Sca cha' tlyu nu tso'o tsa laca cha' bi', sca cha' nu caja ji'i̱ lcaa lo ñati̱ chalyuu laca cha' ji'i̱ ycui' Ndyosi bi'; pana ná ngujui chacuayá' cha' caca cuayá' ti' ñati̱ ji'i̱ ycui' Ndyosi cha' bi' nu ngua cua sa'ni la. Ndi'ya̱ ndyu'u cha' bi', cha' nu bilya cuna ngu': Taca tyi'i̱ Cristo lo'o na nde chalyuu, masi juani ti; lo'o jua'a̱ tiya' la li' taca tyu'u cha' ji'na lo'o ycui' Ndyosi ca su tlyu su xee tsa ca su ntucua ycui' Ni.

COLOSENSES 2:13

Ñi'ya̱ laca si cua ngujuii ma̱, jua'a̱ ngua cu'ma̱, xqui'ya cha' cua ntsu'u tsa qui'ya ji'i̱ ma̱ lo'o ycui' Ndyosi. Lo'o jua'a̱ ná ngujui ñi'ya̱ nu culacua̱ ycui' Ndyosi ji'i̱ ma̱ li', xqui'ya cha' ná ntsu'u cha' ji'i̱ ma̱ tsiya' ti lo'o Ni nu ngua tyempo bi'. Pana juani cua ngua'ni Ni cha' tyu'ú ma̱ chaca quiya' ñi'ya̱ nu ndyu'ú ycui' Cristo. Cua ngüi'ya Ni cha' clyu ti' ji'na ji'i̱ lcaa qui'ya nu ntsu'u ji'na lo'o Ni.

COLOSENSES 2:2

Jua'a̱ ndyu'ni na' cña, cha' caca tyucui ti' tyiquee ngu', cha' stu'ba ti caca tyiquee ngu' lo'o xa' la tya'a ngu'. Nga'aa cutsi̱i̱ ngu' nu lo'o chcui' ngu' cha' ji'i̱ Cristo li', xqui'ya cha' tso'o tsa nchca cuayá' ti' ngu' ji'i̱ cha' bi'. Jua'a̱ li' quijeloo cha' ji'i̱ ngu', cha' ycui' Cristo laca cha' bi', la cui' cha' ji'i̱ ycui' Ndyosi nu bilya caca cuayá' ti' ngu' ji'i̱ cua sa'ni la.

1 TIMOTEO 2:6

Nda Jesucristo chacuayá' cha' ndyujuii ngu' ji'i̱ yu cua tsubi' la; jua'a̱ nda yu caya' lo qui'ya nu ntsu'u ji'i̱ ñati̱ chalyuu, nu lo'o ngujuii yu lo crusi. Ngua'ni ycui' Ndyosi cña bi' la cui' hora lo'o ngua ti' Ni cha' cua'ni Ni ji'i̱.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

TITO 3:6

Tso'o tsa nda Ni Xtyi'i ycui' Ni cha' tyanu ne' cresiya ji'na chacuayá' ji'i̱ Jesucristo nu ngua'ni lyaá ji'na;

HEBREOS 9:22

Cuentya ji'i̱ cha' cusu' bi', xcui' lo'o tañi sca na'ni nu cua ndyujuii ngu', jua'a̱ ngua lubii lcaa na; lo'o jua'a̱ juani, sca ti ndyiji cha' clyu ti' ji'na lo'o ycui' Ndyosi, cha' nu cua ngujuii Cristo cuentya ji'na.

1 PEDRO 2:24

Ycui' Cristo laca nu sca ti quiya' ngujui'i̱ ca'a̱ ngu' ji'i̱ lo crusi cha' taca cuityi̱ Ni qui'ya nu ntsu'u ji'i̱ lcaa na, cha' clyaá na ji'i̱ qui'ya nu ntsu'u ji'na; bi' cha' cuentya ji'i̱ Cristo taca tyi'i̱ na chalyuu juani, cha' jua'a̱ tyaja'a̱ na cua'ni na xcui' cha' tso'o nu nti' ycui' nu Xu'na na cha' cua'ni na. Xqui'ya cha' nchcube' ycui' Cristo, bi' cha' ngua ti̱ cha' cuxi nu ntsu'u tyiquee na, ñi'ya̱ nti' lo'o ngua ti̱ cha' quicha na lo'o ndyaca tso'o na.

1 PEDRO 3:18

Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.

1 JUAN 2:12

Cu'ma̱ sñi' na', nscua na' quityi re cha' ca̱a̱ slo ma̱, xqui'ya cha' ngua'ni clyu ti' ycui' Ndyosi ji'i̱ ma̱; xqui'ya Jesucristo cua ngüityi̱ Ni qui'ya nu ntsu'u ji'i̱ ma̱.

1 JUAN 2:2

Ngua cuxi tyiquee na cuentya ji'i̱ ycui' Ndyosi Sti na, xqui'ya cha' ngua'ni na cha' cuxi; bi' cha' nchcube' Jesucristo cña loo na, cha' qui'ya ycui' yu yabe' nu ntsu'u ji'na xqui'ya cha' cuxi nu ngua'ni na. La cui' jua'a̱ qui'ya Jesucristo yabe' nu ntsu'u ji'i̱ lcaa ñati̱ chalyuu nu tso'o ntsu'u tyiquee ña'a̱ ji'i̱ ycui' Ni.

1 JUAN 4:10

Nde laca cha' nu nchcui' na' lo'o ma̱: Si'i cha' ntsu'u tyiquee na ña'a̱ na ji'i̱ ycui' Ndyosi, masi ycui' Ndyosi laca nu ntsu'u tsa tyiquee Ni ña'a̱ Ni ji'na tya clyo, bi' cha' nda Ni ji'i̱ Sñi' ycui' ca Ni ya̱a̱ chalyuu cha' ngujuii yu lo crusi, cha' cua ngua cuxi tyiquee na lo'o ycui' Ndyosi nu Xu'na na xqui'ya cha' cuxi nu ngua'ni na; pana Jesucristo nu sca ti Sñi' ycui' Ni, bi' laca nu cua nchcube' cña loo na, ngüi'ya Ni yabe' nu ntsu'u ji'na.

APOCALIPSIS 14:4

Ñati̱ lubii tsiya' ti laca nu ngu' quiña'a̱ bi'. Ná ngutu'u cha' ji'i̱ ngu' bi' lo'o xa' nu cuna'a̱ nu lo'o nguti'i̱ ngu' chalyuu, ná ngua'ni ngu' bi' cha' suba' tsiya' ti; nguta'a̱ ngu' lo'o nu ñi'ya̱ ña'a̱ xlya' bi' macala su ndya'a̱. Cua ngua'ni lyaá Ni ji'i̱ ngu' bi', cha' bi' laca ñati̱ nu tso'o nti' ycui' Ndyosi ña'a̱ Ni ji'i̱ tya lo'o nguxana cha' ji'i̱ nu ñi'ya̱ ña'a̱ xlya' bi'. Tya clyo ngusubi Ni ji'i̱ ngu' bi', cha' cua'ni ngu' cña ji'i̱ Ni.

APOCALIPSIS 5:9

Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.