―La cui' laca na' ―nacui̱ Jesús li'―, ñi'ya̱ nu nacui̱ nu'u̱ laca na'. Lo'o chaca cha' cacha' na' ji'i̱ ma̱ juani, cha' nde loo la ña'a̱ ma̱ 'na nu cua nda Ni 'na lijya̱a̱ cha' caca na' ñati̱, nu lo'o tyucua na' la'a tsu' cui̱ ca su ntucua ycui' Ndyosi Sti na', nu lcaa tsiya' ti cña nchca ji'i̱ Ni. Li' ca̱a̱ na' chaca quiya' laja coo nde cua̱.
EFESIOS 1:20 - Chatino Tataltepec20 la cui' tya'a cña tonu laca, ñi'ya̱ nu ngua'ni Ni nu lo'o nda Ni xtyi'i ñaa ne' cresiya ji'i̱ Cristo chaca quiya', cha' tyu'ú yu nu lo'o ngujuii yu; tiya' la li' ndyalo'o Ni ji'i̱ yu cha' ndyaa tucua yu la'a tsu' cui̱ ca su ntucua ycui' Ndyosi, ca chaca chalyuu tso'o la hasta ca nde cua̱. အခန်းကိုကြည့်ပါ။ |
EFESIOS 1:20
33 ပူးပေါင်းရင်းမြစ်များ
―Chañi cha' nu nda ma̱, na' laca̱ nu bi' ―nacui̱ Jesús ji'i̱ ngu' li'―. Lo'o jua'a̱ nde loo la ña'a̱ ma̱ 'na nu cua nda Ni 'na lijya̱a̱ cha' caca na' ñati̱; ña'a̱ ma̱ 'na lo'o ntucua na' la'a tsu' cui̱ su tlyu bi', ca su ntucua ycui' Ndyosi Sti na' nu lcaa tsiya' ti cña nchca ji'i̱ Ni; ña'a̱ ma̱ 'na lo'o ca̱a̱ na' chaca quiya' laja coo nde cua̱ li'.
Cua'a̱ jyaca̱ ma̱ xi lacua. Ta na' sca cha' lo'o ma̱, lo'o lcaa ngu' loyuu re, cha' ycui' Jesucristo laca nu ngua'ni cha' ndyaca tso'o nu quicha re. La cui' Jesús Nazaret nu ndyujuii ma̱ ji'i̱ lo crusi, bi' laca nu cua ngua'ni ycui' Ndyosi cha' ndyu'ú chaca quiya' lo'o ngujuii. Ycui' Jesús bi' nda chacuayá' cha' ngua tso'o quiya' yu re, bi' cha' ndu̱ yu ca nde tso'o ti yu juani.
Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.
lo'o jua'a̱ laca Jesús nu sca ti Sñi' nu ntsu'u ji'i̱ ycui' Ndyosi. Ndi'ya̱ caca cuayá' tso'o ti' na cha' bi': chacuayá' ji'i̱ ycui' Ndyosi Sti yu ndyu'ú Jesús chaca quiya' lo'o cua ngujuii yu, tlyu tsa cha' ngua'ni Ni li'. Nu lo'o nda ycui' Ndyosi Xtyi'i ycui' Ni ji'i̱ Jesús, nda Ni cha' lo'o na cha' Sñi' ycui' ca Ni laca nu Jesús bi'.
Lye tsa tya na xlya'be ji'i̱ ycui' Ndyosi Sti na, nu laca Sti Jesucristo nu Xu'na na. Cua ndyaca stu'ba cha' ji'na lo'o Cristo; bi' cha' lo'o ycui' Ndyosi, tso'o tsa nti' Ni ña'a̱ Ni ji'na. Lcaa lo cha' tso'o nu tyacua ji'na cha' ngusñi na cha' ji'i̱ Jesucristo, cua ngua'ni Ni cha' bi' lo'o na xqui'ya Cristo.
Lo'o juani ni, tsa bi' ti cha' nti' na', cha' tyuloo lyiji na' ji'i̱ Cristo, cha' ca tii na' cha' tya ndyu'ni ycui' Ndyosi cña lo'o na' lo'o la cui' tya'a juersa nu cua ntsu'u ji'i̱ Ni lo'o ngua'ni Ni cha' ndyu'ú Jesús chaca quiya'. Ná ndu'ni cha' masi jua'a̱ chcube' na' ñi'ya̱ nu cua nchcube' ycui' Jesús, masi chcuna' chalyuu 'na tsiya' ti ñi'ya̱ lo'o cua ngujuii ycui' Cristo lo crusi.
Stu'ba ti ndu̱ yu bi' lo'o ycui' Ndyosi Sti yu lo'o ntucua quiya' ndya' chalyuu, masi lo'o ndya' tyucui ña'a̱ nde cua̱, masi lo'o ndya' tyucui ña'a̱ nde lo yuu. Cua ngüiñá Ni lcaa na nu nchca ña'a̱ na ji'i̱ nde lo yuu chalyuu; lo'o jua'a̱ cua ngüiñá Ni lcaa na nu ná nchca ña'a̱ na ji'i̱, ñi'ya̱ nti' lcaa cui'i̱ nu laca loo nde cua̱; jua'a̱ cua ngüiñá Ni lcaa lo xu'na nu culo cña ji'i̱ ngu', masi nde lo yuu chalyuu, masi nde cua̱. Stu'ba ti ndu̱ Cristo lo'o ycui' Ndyosi Sti yu nu lo'o ngüiñá Ni tyucui ña'a̱ chalyuu; la cui' jua'a̱ xqui'ya yu bi', bi' cha' ndya' lcaa lo na.
Lcaa xee lubii nu ntsu'u ca slo ycui' Ndyosi, cua ndyanu xee bi' lo Jesús Sñi' Ni lo'o ñaa Jesús nguti'i̱ yu chalyuu. Ñi'ya̱ nu laca ycui' Ndyosi, la cui' jua'a̱ laca nu Jesús bi'; liñi tsa nclyo Jesús cña ji'i̱ lcaa na nu ntsu'u chalyuu tsiya' ti, bi' cha' laca ndi'i̱ tso'o ti lcaa na bi'. Nu lo'o ndye ngua'ni Jesús cña nu ntsu'u ji'i̱ yu nde chalyuu, cha' ngüityi̱ yu yabe' nu ntsu'u ji'i̱ ñati̱, li' nguxtyu̱u̱ yu ndyaa yu ca slo ycui' Ndyosi Sti yu, ndyaa tucua yu nde la'a tsu' cui̱ su tlyu ca su ntucua ycui' Ni.
Ycui' Ndyosi laca nu ngua'ni cña cha' ndyu'ú Jesucristo nu Xu'na na chaca quiya' lo'o ngujuii. Lo'o juani laca Jesús loo, cha' ña'a̱si̱i̱ Ni ji'na nu laca na ñati̱ ji'i̱ Ni, xqui'ya cha' ngujuii Ni cuentya ji'na. Nu lo'o ngujuii Jesús, li' ngüiñi cha' ji'i̱ Ni lo'o lcaa ñati̱ ji'i̱ Ni, sca cha' cucui nu ná nga'a̱ cha' tye tsiya' ti.
Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.
Cua'ni tlyu na ji'i̱ ycui' Ndyosi, la cui' bi' laca nu ndu'ni tlyu Jesucristo nu Xu'na na ji'i̱, la cui' Sti Jesucristo nu Xu'na na laca bi'. Tya'na tsa ti' ycui' Ni ña'a̱ Ni ji'na, bi' cha' ngua'ni cucui Ni cresiya ji'na; ntsu'u chalyuu cucui ji'na juani, xqui'ya cha' ndyu'ú ycui' Jesucristo chaca quiya' nu lo'o ngujuii yu. Lo'o nu juani cua ndu̱ ti' na cha' caja chalyuu nu ná nga'a̱ cha' tye ji'na,
Lo'o cua na'a̱ na' ji'i̱ Ni, tsiya' ca nclyú na' nde quiya' Ni; cua culiji ti ti' na' ngua, xqui'ya cha' ndyutsi̱i̱ tsa na'. Li' ya' tsu' cui̱ Ni ngusta Ni hichu̱' na', ndi'ya̱ nchcui' Ni lo'o na': ―Ná cutsi̱i̱ nu'u̱ ―nacui̱ Ni―. Na' ntucua̱ lo'o nguxana chalyuu, lo'o jua'a̱ la cui' na' tyucua̱ lo'o tye chalyuu.
ကြော်ငြာတွေ