COLOSENSES 2:3 - Chatino Tataltepec

³ Xqui'ya cha' ngusñi na cha' ji'i̱ Cristo, bi' cha' taca quijeloo cha' ji'na macala su ntucua quiya' lcaa cha' nu ntsu'u tyiquee ycui' Ndyosi, masi lcaa cha' nu nda'ya hique Ni cha' cua'ni Ni nde chalyuu.

COLOSENSES 2:3 ပူးပေါင်းရင်းမြစ်များ

SAN MATEO 10:26

’Bi' cha' nacui̱ na' cha' ná cutsi̱i̱ ma̱ ji'i̱ ñati̱ chalyuu ti. Lcaa cha' nu ngua'ni ngu' cuaana ti, nti' ngu', quijeloo cha' bi' ji'i̱ ñati̱ nde loo la; lcaa cha' nu ntsu'u cuatsi' ti ji'i̱ ngu', nti' ngu', caca cuayá' ti' ñati̱ ji'i̱ cha' bi' nde loo la.

SAN LUCAS 11:49

’Tii tsa ycui' Ndyosi, bi' cha' ndi'ya̱ nchcui' Ni tya sa'ni la: “Tya culo na' cña ji'i̱ ngu' cha' ca̱a̱ ngu' slo ñati̱ chalyuu. Chcui' ngu' bi' cha' liñi lo'o xa' ñati̱ cuentya 'na. Lo'o li' cujuii ñati̱ chalyuu ji'i̱ tyu̱u̱ tya'a ngu' bi', jua'a̱ cua'ni lya' ti' ñati̱ ji'i̱ xa' la ngu' bi'”, nacui̱ quityi ji'i̱ ycui' Ndyosi bi'.

ROMANOS 11:33

Tlyu tsa cha' tso'o ndyu'u ca slo ycui' Ndyosi; lcaa cha' nchca cuayá' ti' Ni, lcaa cha' jlo ti' ycui' Ni. Sca ti ycui' Ndyosi jlo ti' na ca laca nu lijya̱ nde loo la, sca ti ycui' Ndyosi jlo ti' na laca nu ndu'ni ycui' Ni. Ndi'ya̱ cha' nscua lo quityi cusu' cuentya ji'i̱ cha' bi':

1 CORINTIOS 1:24

Pana xa' ña'a̱ nti' lcaa tya'a na nu cua ngusubi ycui' Ndyosi ji'na, masi laca na ngu' judío, masi laca na ngu' xa' tsu'. Sca ti cha' ji'i̱ Cristo nchcui' na, cha' ji'i̱ ycui' Cristo ntsu'u lcaa chacuayá', lcaa cha' tso'o nu cua nti' ycui' Ndyosi cha' caca cuayá' ti' na.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

EFESIOS 1:8

Ntsu'u tsa tyiquee Ni ña'a̱ Ni ji'na, bi' cha' ngua'ni Ni jua'a̱. Ndu'ni Ni cha' ca jlo ti' na lcaa cha' ji'i̱ Ni, cha' ca cuayá' ti' na ñi'ya̱ caca cha' bi'.

COLOSENSES 1:19

Cua nacui̱ ycui' Ndyosi cha' caca Sñi' Ni ñi'ya̱ laca ycui' Ni tsiya' ti,

COLOSENSES 1:28

Bi' cha' lye tsa nchcui' ya cha' ji'i̱ Cristo lo'o lcaa ñati̱; tso'o ti, qui'i ti nclyu'u ya cha' bi' ji'i̱ ngu', ndacane ya ji'i̱ ngu' cha' nga'aa cua'ni ngu' cha' cuxi. Cua nti' tsa ya cha' tso'o tsa caca tyucui ti' tyiquee scaa ngu' cuentya ji'i̱ Cristo nu lo'o tyalaa ngu' ca slo ycui' Ni.

COLOSENSES 1:9

Bi' cha' juani lu'ba ti nchcui' ya lo'o ycui' Ndyosi cuentya ji'i̱ cu'ma̱; tya lo'o ngujui cha' ji'i̱ ya cha' cua ngusñi ma̱ cha' bi', ndijña ya cha' ji'i̱ ycui' Ndyosi cha' ta Ni chacuayá' cha' caca cuayá' lyiji ti' ma̱ lcaa cha' ñi'ya̱ nu nti' Ni cha' cua'ni ma̱, cha' jua'a̱ taca culacua tso'o ti' ma̱, taca ca'ya cha' tso'o hique ma̱ xqui'ya Xtyi'i ycui' Ndyosi li'.

COLOSENSES 3:16

Nga'a̱ cha' tyanu tyucui cha' ji'i̱ Cristo ca ne' cresiya ji'i̱ ma̱. Tso'o tsa ndyu'u cha' bi', bi' cha' tso'o ti culu'u ma̱ cha' bi' ji'i̱ tya'a ma̱ ña'a̱ cuayá' nu cuna tso'o lcaa ngu'. La cui' jua'a̱ cula tu'ba ma̱ lcaa lo ji̱i̱ nu ntsu'u ji'i̱ ycui' Ndyosi, masi ji̱i̱ salmo nu nscua lo quityi nu ngua sa'ni, masi cua ña'a̱ ca ji̱i̱ nu ca'ya hique ma̱ nu nchcui' cha' ji'i̱ ycui' Ndyosi; cula tu'ba ma̱ ji̱i̱ cha' cuna ycui' Ndyosi, xqui'ya cha' tso'o tsa ntsu'u tyiquee ma̱ ña'a̱ ma̱ ji'i̱ ycui' Ni.

COLOSENSES 3:3

Nu juani ni, nga'aa ntsu'u cha' ji'i̱ ma̱ lo'o cha' cuxi nu ndyaca nde chalyuu; cua ndyanu tso'o cha' ji'i̱ ma̱ lo'o ycui' Ndyosi xqui'ya Cristo.

2 PEDRO 1:5

Bi' cha' tyucui tyiquee ma̱, lo'o tyucui juersa ji'i̱ ma̱, cua'ni ma̱ xcui' cha' tso'o bi', cha' culu'u ma̱ ji'i̱ xa' ñati̱ cha' chañi cha' cua ngusñi ma̱ cha' ji'i̱ Jesucristo. Lo'o jua'a̱ ntsu'u cha' caca cuayá' la ti' ma̱ lcaa cha', ña'a̱ cha' nu ndiya la ti' ycui' Ni.

APOCALIPSIS 2:17

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caca tyaala' ti' tyiquee ngu' bi', cacu ngu' cha' tso'o nu cua nguxco'o na' cha' caja ji'i̱ ngu'. Lo'o jua'a̱ ta na' sca quee sube ti nu ngati̱ ña'a̱, nu nscua xtañi scaa ngu' chu̱', cha' ca cuayá' ti' ngu' bi', cha' tso'o ti nti' na' ña'a̱ na' ji'i̱ ngu'; chaca xtañi nu tso'o la laca nu nscua chu̱' quee bi'. Ná caja chacuayá' ji'i̱ xa' ñati̱ tyuloo xtañi bi'; cua laca ti ñati̱ nu caja xtañi bi' ji'i̱, bi' laca nu caja chacuayá' cha' tyuloo ji'i̱, nacui̱ Ni.”