APOCALIPSIS 7:15 - Chatino Tataltepec

¹⁵ Bi' cha' ndu̱ ngu' nde loo su tlyu su ntucua ycui' Ndyosi juani ―nacui̱ nu cusu' bi'―, cha' tsa̱ lo'o talya ndyu'ni ngu' bi' cña ji'i̱ Ni ca su ndi'i̱ Ni. Ycui' Ni nu ntucua lo yaca xlya tlyu bi' tyanu cacua ti su ndi'i̱ ngu', cha' cua'a ji'i̱ ngu' cha' ná tyacua cha' cuxi ji'i̱ ngu'.

APOCALIPSIS 7:15 ပူးပေါင်းရင်းမြစ်များ

SAN JUAN 1:14

Ngua yu bi' ñati̱, la cui' yu nu laca cha' ji'i̱ ycui' Ndyosi. Stu'ba ti nguti'i̱ yu lo'o na nde chalyuu. Cua na'a̱ ya ji'i̱ yu cha' tlyu tsa cha' ntsu'u ji'i̱ yu, cha' laca yu nu sca ti Sñi' ycui' Ndyosi. Xcui' tso'o tsa ndu'ni yu lo'o na, xcui' cha' liñi nchcui' yu.

1 CORINTIOS 3:16

Nu laa tlyu su ndu'ni tlyu ngu' judío ji'i̱ ycui' Ndyosi tyaca'a tsa ji'i̱ Ni laca bi', cha' cuentya ji'i̱ Ni ndya' ni'i̱ bi'; tyaala tsa ycui' Ni si cua'ni ñu'u̱ ñati̱ ji'i̱ laa bi'. Lo'o cu'ma̱ ni, tyucui ña'a̱ taju cu'ma̱ nu ngusñi ma̱ cha' ji'i̱ Cristo, tyaca'a tsa ma̱ cuentya ji'i̱ ycui' Ndyosi; na cua ndyanu Xtyi'i ycui' Ndyosi ne' cresiya ji'i̱ ma̱. Lo'o jua'a̱ cua'ni tye ycui' Ni ji'i̱ cua ña'a̱ ca ñati̱ nu cua'ni ñu'u̱ tyucui̱i̱ ji'i̱ sca ñati̱ nu tya'a ngusñi na cha' ji'i̱ Jesús.

2 CORINTIOS 6:16

Ñi'ya̱ nti' cu'ma̱ nu tyaca'a tsa ma̱ ji'i̱ ycui' Ndyosi ni, ná taca cua'ni tya'a ma̱ lo'o xa' ñati̱ nu ngusñi cha' ji'i̱ cua ña'a̱ ca jo'ó; tyaca'a tsa na ji'i̱ ycui' Ndyosi nu lu'ú ca xqui'ya cha' ndyanu Xtyi'i ycui' Ndyosi ne' cresiya ji'na. Ndi'ya̱ nacui̱ ycui' Ndyosi: Tyi'i̱ na' ca slo ñati̱ bi', lo'o jua'a̱ tya'a̱ na' lo'o ñati̱ bi'; caca na' ycui' Ndyosi cuentya ji'i̱ ngu' bi', bi' cha' taca caca ngu' bi' ñati̱ 'na. Jua'a̱ nacui̱ Ni.

HEBREOS 12:2

Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

HEBREOS 8:1

Ndi'ya̱ ndyu'u cha' nu nti' na' chcui̱' lo'o ma̱ juani: Ca cua̱ ntucua Jesús, nde la'a tsu' cui̱ ca su ntucua ycui' Ndyosi, cha' nclyo Ni cña tyucui ña'a̱ chalyuu; ca bi' ntucua Jesús cha' laca Ni sti jo'ó nu laca loo la cuentya ji'na.

APOCALIPSIS 11:19

Li' na'a̱ na' su ntucua laa tlyu ji'i̱ ycui' Ndyosi nde cua̱, na'a̱ na' ca ne' laa su nscua cñá' tacati, su ngutucua ycui' Ndyosi laja ñati̱ ji'i̱ Ni nu ngua tya sa'ni la. Lo'o li' lye tsa nguañi nde chalyuu, lye tsa ndyubii, cuati lye tsa ndañi nchcui' tyi'yu; li' ngulacui̱ chalyuu, jua'a̱ clyaa tsa tyo quee ngua'ya.

APOCALIPSIS 13:6

Li' nguxana na'ni chiya'a̱ ña'a̱ bi' nda ni' qui'ya ji'i̱ ycui' Ndyosi: nchcui' cuxi na'ni bi' ji'i̱ lcaa cña nu ndu'ni Ni; jua'a̱ nchcui' cuxi ni' ji'i̱ su tlyu nde cua̱ ca su ntucua ycui' Ni; jua'a̱ cuxi tsa nchcui' ni' ji'i̱ lcaa ñati̱ ji'i̱ ycui' Ni.

APOCALIPSIS 20:10

Lo'o li' tyucua ya' Ni ji'i̱ nu xña'a̱ nu ngüiñilo'o ji'i̱ ngu' tya clyo, tyalo'o Ni ji'i̱ lo tayu' su ntsu'u quii' ndyaqui̱ lo'o yuu sufri; la cui' se'i̱ laca su cua nchcua̱a̱ Ni ji'i̱ nu na'ni chiya'a̱ ña'a̱ bi', su cua nchcua̱a̱ Ni ji'i̱ nu cuiñi nu nacui̱ cha' tu'ba ji'i̱ ycui' Ndyosi laca. Tsa̱ lo'o talya ná tye cha' ti'í tsa chcube' ngu' ca bi'.

APOCALIPSIS 21:22

Ná ntucua laa ca quichi̱ bi', ná na'a̱ na' cha' ntucua bi' tsiya' ti. Tso'o cha' ntucua ycui' Ndyosi nu Xu'na na quichi̱ bi', ycui' Ni nu nchca ji'i̱ ndu'ni Ni lcaa lo cña; la cui' jua'a̱ ntucua nu ñi'ya̱ ña'a̱ xlya' bi'. Bi' cha' ni sca laa nga'aa nti' quichi̱ bi'.

APOCALIPSIS 22:3

Pana lquichi̱ bi' nga'aa caja cha' ti'í ji'i̱ ngu' tsiya' ti, ñi'ya̱ nu ntsu'u nde chalyuu xqui'ya yabe' nu ntsu'u ji'i̱ ñati̱. Ca quichi̱ bi' stu'ba ti caca loo ycui' Ndyosi lo'o nu ñi'ya̱ ña'a̱ xlya' bi'; ndacua ntucua yaca xlya tlyu ji'i̱ Ni, cha' cua'ni tlyu lcaa ñati̱ nu ndyu'ni cña ji'i̱ Ni ji'i̱ ycui' Ni nu ntucua ca ndacua.

APOCALIPSIS 22:5

Nga'aa caca talya su ndi'i̱ ngu' ca bi'; bi' cha' nga'aa cua'nijo'o xee cuichaa ji'i̱ ngu', nga'aa nti' cha' cua'a̱ ngu' xee nde ni'i̱. Ycui' Ndyosi nu Xu'na na, bi' laca nu ta xee ji'i̱ ngu', ni ná tye tyempo cha' stu'ba ti caca ngu' loo lo'o ycui' Ni.

APOCALIPSIS 4:4

Nde chu̱' la ntucua xa' la yaca xlya; lo yaca bi' ntyucua calaa ntucua jacua tya'a ngu' cusu', tsa lo scuii ti ntucua ngu' tyi'i̱ ca chu̱' su ntucua Ni. Lacu' ngu' bi' late' ngati̱, jua'a̱ ntucua sne' oro hique scaa ngu'.

APOCALIPSIS 4:8

Scuá tya'a lu'be ntsu'u ji'i̱ scaa na'ni bi', pana ntucua cloo ni' tyucui ña'a̱ hichu̱' lu'be ni'; lo'o nde ne' lu'be ni', la cui' jua'a̱ ntucua cloo ni'. Nga'aa nchca ti̱ cha' ndula tu'ba ni' tsa̱ lo'o talya: Xcui' na lubii tsa cresiya ji'i̱ ycui' Ndyosi nu nchca ji'i̱ ndu'ni lcaa cña, nacui̱ ni' lo'o ndyula tu'ba ni'. Nu ngua tya clyo lu'ú ycui' Ni, la cui' jua'a̱ na lu'ú Ni juani, lo'o ña'a̱ ti tya lu'ú Ni tyempo nde loo la. Jua'a̱ nacui̱ ni' lo'o ndyula tu'ba ni'.

APOCALIPSIS 4:9

Lu'ba ti ndyula tu'ba nu ca ta'a jacua na'ni tacati bi' li'. Ndu'ni tlyu ni' ji'i̱ Ni, ndu'ni chi̱ ni' loo ycui' Ni; ndya tsa ni' xlya'be ji'i̱ ycui' Ni nu ntucua lo yaca xlya tlyu bi', cha' lcaa yija̱ lu'ú ycui' Ndyosi.

APOCALIPSIS 7:9

Tiya' la li' na'a̱ na' ndu̱ tsa tlyu ti ñati̱ nu cua ngua'ni lyaá Jesús ji'i̱; quiña'a̱ tsa ñati̱ nga'a̱, bi' cha' ná tucui ngua ji'i̱ culacua ji'i̱ ñati̱ bi'. Tyucui ña'a̱ chalyuu mala su ndi'i̱ ñati̱ ngutu'u ngu' ya̱a̱ ngu'; lcaa lo ñati̱ chalyuu ya̱a̱, cha' cua ña'a̱ ca quichi̱ tyi ngu' ngutu'u ngu', cua ña'a̱ ca lo cha'cña nu nchcui' ñati̱ chalyuu nchcui' ngu' bi'. Ndyatu̱ ngu' nde loo su ntucua yaca xlya tlyu, nde loo su ndu̱ nu ñi'ya̱ ña'a̱ xlya' bi'. Late' ngati̱ lacu' ngu', ntucua laca' nguiña ya' ngu' ndu̱ ngu'.