APOCALIPSIS 22:10 - Chatino Tataltepec

¹⁰ Li' nchcui' xca̱ lo'o na' chaca quiya': ―Cua nchcui' Ni ñi'ya̱ caca cha' nde loo la, bi' cha' ná xco'o nu'u̱ quityi re; nga'a̱ cha' cuna ñati̱ chalyuu lcaa cha' bi', xqui'ya cha' cua ngulala ti caca lcaa cha' nu nscua lo quityi re.

APOCALIPSIS 22:10 ပူးပေါင်းရင်းမြစ်များ

SAN MATEO 10:27

Lcaa cha' nu nchcui' na' lo'o cu'ma̱ nde su ndi'i̱ ma̱ ycui' ti ma̱, chcui' ma̱ cha' bi' lo'o lcaa ñati̱ nde loo la; jua'a̱ scaa cha' nu nclyu'u na' ji'i̱ ma̱ cuaana ti, cui̱i̱ chcui' ma̱ cha' bi' lo'o lcaa ngu' quichi̱.

ROMANOS 13:11

Cua'ni ma̱ cha' tyi'u ti' ma̱ lcaa cha' bi'. Cua jlo ti' ma̱ cha' cua ndyalaa hora cha' clyana na ji'i̱ ycui' Ndyosi; bi' cha' juani que ti' ma̱ lacua, cha' tii ti ti' ma̱ tyi'i̱ ma̱ chalyuu. Cua tya̱a̱ ti ycui' Jesús cha' cua'ni lyaá Ni ji'na, cha' ca̱qui'ya Ni ji'na. Nu lo'o ngusñi na cha' ji'i̱ Jesús tya clyo, li' ngua ti' na cha' tya lyiji tsa tyalaa tsa̱ bi' cha' tya̱a̱ ycui' Jesús; pana juani cua ngulala ti tyalaa tsa̱ bi'.

ROMANOS 13:12

Ñi'ya̱ laca chalyuu talya, jua'a̱ laca lo'o ndi'i̱ na chalyuu, xqui'ya cha' cuxi nu ntsu'u ji'na. Pana juani cua tye ti talya bi', cua tya̱a̱ ti Cristo cha' culotsu' Ni cha' cuxi bi'. Li' caca chalyuu ji'na ñi'ya̱ si cua nguxee tso'o, cha' lubii tsa xee caca li'. Bi' cha' nga'a̱ cha' xtyanu na ji'i̱ cha' cuxi nu ndu'ni ngu', cha' cuxi tsa tyiquee ngu' nu ndya'a̱ chalyuu talya bi'. Cua'ni cho'o na tyucui ña'a̱ na, cha' nguula tsa cua'ni na cña cuentya ji'i̱ Cristo nde chalyuu, ñi'ya̱ si laca na sendaru ji'i̱ Cristo.

2 TESALONICENSES 2:3

Ná taquiya' ma̱ ji'i̱ ngu' cuiñi nu chcui' jua'a̱. Nu lo'o tya lyiji tyalaa tsa̱ bi', lye tsa xu̱u̱ tya'a ñati̱ chalyuu lo'o ycui' Ndyosi; li' ca̱a̱ sca ñati̱ nu ndu'ni cña ji'i̱ nu xña'a̱ nde chalyuu, nu ntsu'u cha' tsaa ca bilyaa lo'o tye chalyuu.

1 PEDRO 4:7

Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

APOCALIPSIS 1:11

Ndi'ya̱ nchcui' nu bi' lo'o na': ―Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ nu nchcui' bi'―. Scua clya nu'u̱ lcaa cha' nu cacha' na' jinu'u̱ juani; lcaa cha' nu ña'a̱ nu'u̱ juani, scua clya nu'u̱ ji'i̱ lo quityi. Li' ta nu'u̱ quityi re cha' tsaa slo nu cati tya'a taju ñati̱ nu ntsu'u cha' ji'i̱ lo'o Jesucristo ca quichi̱ tyi ngu', ca loyuu su cuentya Asia nu ñacui̱ na' re: quichi̱ Efeso, jua'a̱ quichi̱ Esmirna, jua'a̱ quichi̱ Pérgamo, jua'a̱ quichi̱ Tiatira, jua'a̱ quichi̱ Sardis, jua'a̱ quichi̱ Filadelfia, jua'a̱ quichi̱ Laodicea.

APOCALIPSIS 1:3

Tso'o tsa caca tyiquee ma̱, ñati̱ nu chcui' lo quityi re, jua'a̱ cu'ma̱ lo'o cuna ma̱ cha' nu nchcui' quityi re, lcaa ña'a̱ cha' nu cua lijya̱ ti cha' caca nde chalyuu; nu lo'o taquiya' na ji'i̱ lcaa cha' nu nscua re, tso'o tsa caca tyiquee na li'. Lo'o jua'a̱ cua ngulala ti caca cha' nu nscua re.

APOCALIPSIS 10:4

Lo'o ndye nchcui' tyi'yu bi', li' cua scua ti na' cha' nu nda tyi'yu bi', pana ndyuna na' nchcui' sca nu ntucua ca slo ycui' Ndyosi li': ―Xu'ba cuatsi' nu'u̱ cha' nu nda nu cati tya'a tyi'yu bi' ―nacui̱ Ni jna'―. Nga'aa scua nu'u̱ cha' bi' lo quityi.

APOCALIPSIS 22:16

Xa' nchcui' Jesús li': ―Cua nda na' xca̱ 'na cha' ca̱a̱ ca su ndi'i̱ taju ñati̱ cu'ma̱ macala laca su ntsu'u quichi̱ tyi ma̱. Na' laca̱ nu tya'a ñati̱ ji'i̱ jyo'o David, nu ñati̱ tlyu nu cua ya̱a̱ chalyuu nu ngua sa'ni. Ñi'ya̱ laca xee nu nda cuii tlyu nu ntyucua nde cuxee, jua'a̱ laca xee nu ta na' cha' tyu'u ne' cresiya ji'i̱ ñati̱ ―nacui̱ Jesús.

APOCALIPSIS 22:18

Tsa lo cua ti cha' nda ycui' Ndyosi cha' scua na' lo quityi re, bi' cha' nga'aa scua ma̱ xi xa' la cha' lo quityi re. Si tya scua la ngu' xi xa' la cha', li' ta Ni cha' ti'í ji'i̱ ngu' bi', la cui' ña'a̱ cha' ti'í nu nscua lo quityi re. La cui' jua'a̱, ná cuityi̱ ma̱ ni tsaca cha' nu nscua re; nu lo'o cuityi̱ ngu' sca cha', li' xlyaá Ni chalyuu nu nga'a̱ cha' caja ji'i̱ ngu' bi'. Li' nga'aa caja chacuayá' cacu ngu' bi' si'yu nu ntsu'u lo yaca bi', nga'aa tyalaa ngu' bi' ca quichi̱ tlyu nu lubii tsa ña'a̱, ñi'ya̱ nu nchcui' quityi re. Jua'a̱ nchcui' na' lo'o lcaa ñati̱ nu ndyuna cha' nu nscua lo quityi re, la cui' cha' nu caca nde loo la laca bi'.

APOCALIPSIS 22:20

Ycui' Jesús nchcui' cha' liñi tsa nscua lcaa cha' re: ―Chañi cha' bi'. Yala ti ca̱a̱ na' chaca quiya' ―nacui̱ Ni. Jua'a̱ caca tu'ni. Ca̱a̱ nu'u̱ lacua, La Jesús.

APOCALIPSIS 22:7

―Yala ti tya̱a̱ na' chaca quiya' ―nacui̱ Jesús. Tso'o tsa caca tyiquee lcaa ñati̱ nu taquiya' ji'i̱ cha' nu cua nda Ni lo'o na', nu cua nscua na' lo quityi re; cha' bi' laca nu ndacha' ji'na ñi'ya̱ caca chalyuu nde loo la.

APOCALIPSIS 22:9

Hora ti nchcui' yu lo'o na' li': ―Ná cua'ni nu'u̱ jua'a̱. Lo'o na', tya'a ndyu'ni na cña ji'i̱ ycui' Ni laca na'; stu'ba ntsu'u cha' 'na lo'o jyo'o ñati̱ tya'a ma̱ nu ngua tu'ba ji'i̱ ycui' Ni nde chalyuu, jua'a̱ tya'a na' lo'o cua ña'a̱ ca ñati̱ nu taquiya' ji'i̱ cha' nu nscua lo quityi re. Sca ti ycui' Ndyosi laca nu nga'a̱ cha' cua'ni tlyu na ji'i̱.

APOCALIPSIS 5:1

Li' na'a̱ na' cha' ntsu'u quityi ya' tsu' cui̱ nu cusu' laca loo nu ntucua lo yaca xlya bi'. Sca quityi nchcu̱', nu ngutu ti ña'a̱ laca bi'; jua'a̱ tyucuaa chu̱' quityi bi' cua nscua cha'. Cati se'i̱ nga'a̱ nguiña' tu'ba quityi su ndyacu̱' bi'.