APOCALIPSIS 21:23 - Chatino Tataltepec

²³ Nga'aa cua'nijo'o xee cuichaa cuentya ji'i̱ quichi̱ bi', la cui' jua'a̱ nga'aa nti' cha' quiji'i̱ xee co' lo. Tso'o tsa ña'a̱ xee quichi̱ bi', xqui'ya cha' lubii tsa xee nu nda ycui' Ndyosi, jua'a̱ lubii tsa xee su ntucua nu ñi'ya̱ ña'a̱ xlya' bi';

APOCALIPSIS 21:23 ပူးပေါင်းရင်းမြစ်များ

SAN MATEO 16:27

Chañi cha' chaca quiya' ca̱a̱ na' nu cua nda Ni 'na lijya̱ na' cha' caca na' ñati̱, stu'ba ti ca̱a̱ na' lo'o lcaa xca̱ ji'i̱ ycui' Ndyosi; ndubi tsa ña'a̱ loo na' lo'o xee ji'i̱ ycui' Ndyosi Sti na' li'. Lo'o li' ta na' xcaya' ngu', ni cña nu cua ngua'ni scaa ngu' lo'o ya̱a̱ ngu' chalyuu.

SAN MARCOS 8:38

Caca tyuju'u ti' na' nu cua nda Ni 'na lijya̱a̱ cha' caca na' ñati̱, nu lo'o ña'a̱ na' ji'i̱ scaa ñati̱ chalyuu nu ntyuju'u ti' jna', masi tyuju'u ti' ngu' bi' ji'i̱ cha' tso'o nu nchcui' ti na'. Si xqui'ya na' tyuju'u ti' ngu' bi' slo ngu' cuxi chalyuu juani, masi slo ngu' suba' chalyuu juani, li' caca tyuju'u ti' na' ji'i̱ ngu' bi' nu lo'o ca̱a̱ na' chaca quiya' nde loo la cha' caca na' loo ji'i̱ ñati̱. Li' lye tsa ña'a̱ xee caca lo'o tya̱a̱ na' chaca quiya' chacuayá' ji'i̱ Sti na'. Ca̱a̱ na' lo'o xca̱ nu tacati tsa ji'i̱ ycui' Ni, cha' lubii tsiya' ti ngu' xca̱ bi' ―nacui̱ Jesús ji'i̱ ngu'.

SAN LUCAS 2:32

Caca ycui' nu bi' sca xee tlyu nu tyu'u ne' cresiya ji'i̱ ñati̱ tyucui ña'a̱ chalyuu; tlyu tsa cha' tso'o caca ycui' nu bi' cuentya ji'i̱ ñati̱ jinu'u̱, nu ngu' Israel bi'. Jua'a̱ cha' nda nu cusu' Simeón bi' lo'o ycui' Ndyosi.

SAN JUAN 1:14

Ngua yu bi' ñati̱, la cui' yu nu laca cha' ji'i̱ ycui' Ndyosi. Stu'ba ti nguti'i̱ yu lo'o na nde chalyuu. Cua na'a̱ ya ji'i̱ yu cha' tlyu tsa cha' ntsu'u ji'i̱ yu, cha' laca yu nu sca ti Sñi' ycui' Ndyosi. Xcui' tso'o tsa ndu'ni yu lo'o na, xcui' cha' liñi nchcui' yu.

SAN JUAN 1:18

Ni sca ñati̱ ná na'a̱ ngu' ji'i̱ ycui' Ndyosi; sca ti Jesús nu ngulu'u ji'na ñati̱ chalyuu na ñi'ya̱ laca ycui' Ndyosi. Lo'o nu Jesús bi' ni, laca yu nu sca ti Sñi' ycui' Ndyosi, nu tyaca'a tsa ji'i̱ Ni.

SAN JUAN 1:4

Ca slo ycui' Ndyosi ndu'u yu bi' ya̱a̱ cha' caca tso'o cresiya ji'i̱ ñati̱ chalyuu na. Ngua'ni yu cha' caca cuayá' ti' na lcaa cha' liñi, xqui'ya xee nu ta Ni cha' tyanu ne' cresiya ji'na.

SAN JUAN 1:9

Nu laca xee nu chañi ca, cua lijya̱ yu bi' lo yuu cha' ta xee nu caca tyu'ú ne' cresiya ji'i̱ cua ña'a̱ ca ñati̱.

SAN JUAN 17:24

’Sti na' ―nacui̱ Jesús ji'i̱ ycui' Ndyosi Sti yu―, cua nti' na' cha' tyi'i̱ ñati̱ nu nda nu'u̱ 'na ca su tyucua na'. Li' ña'a̱ ngu' bi' 'na nde su tlyu la su nda nu'u̱ 'na, cha' tyaca'a tsa na' jinu'u̱ tya lo'o tya lyiji xana chalyuu.

SAN JUAN 5:23

Cua nti' Ni cha' cua'ni chi̱ lcaa ñati̱ loo na' ñi'ya̱ nu ndu'ni chi̱ ngu' loo ycui' Ni. Pana si ná tyaja'a̱ ñati̱ cua'ni chi̱ ngu' loo na' nu laca̱ Sñi' ycui' Ni, la cui' jua'a̱ ná taca cua'ni chi̱ ngu' loo ycui' Ndyosi nu nda 'na lijya̱a̱.

LOS HECHOS 22:11

Ngua cuityi̱' na' xqui'ya xee tlyu bi' li', bi' cha' nu ngu' tya'a ndya'a̱ na' bi', ngusñi ngu' ya' na' cha' tsaa la ya tyucui̱i̱ nde quichi̱ Damasco bi'.

APOCALIPSIS 14:4

Ñati̱ lubii tsiya' ti laca nu ngu' quiña'a̱ bi'. Ná ngutu'u cha' ji'i̱ ngu' bi' lo'o xa' nu cuna'a̱ nu lo'o nguti'i̱ ngu' chalyuu, ná ngua'ni ngu' bi' cha' suba' tsiya' ti; nguta'a̱ ngu' lo'o nu ñi'ya̱ ña'a̱ xlya' bi' macala su ndya'a̱. Cua ngua'ni lyaá Ni ji'i̱ ngu' bi', cha' bi' laca ñati̱ nu tso'o nti' ycui' Ndyosi ña'a̱ Ni ji'i̱ tya lo'o nguxana cha' ji'i̱ nu ñi'ya̱ ña'a̱ xlya' bi'. Tya clyo ngusubi Ni ji'i̱ ngu' bi', cha' cua'ni ngu' cña ji'i̱ Ni.

APOCALIPSIS 18:1

Tiya' la li' na'a̱ na' ji'i̱ chaca xca̱ ji'i̱ ycui' Ndyosi lijya̱ ca'ya nde lo yuu chalyuu; tlyu tsa chacuayá' ntsu'u ji'i̱ xca̱ bi', lo'o jua'a̱ ndubi tsa ña'a̱ tyucui ña'a̱ yu, ña'a̱ cuayá' nda yu xee tyucui ña'a̱ chalyuu.

APOCALIPSIS 21:11

Tso'o tsa ña'a̱ xee nu ntucua lo quichi̱ bi', cha' xee ji'i̱ ycui' Ndyosi laca bi'. Ndubi tsa ña'a̱ tyucui ña'a̱ quichi̱ bi'; ñi'ya̱ ña'a̱ sca quee ndubi, ñi'ya̱ laca quee jaspe, jua'a̱ ña'a̱ xee nu ntucua lo quichi̱ bi'.

APOCALIPSIS 21:25

Lcaa tsa̱ tsiya' ti tyucua yaala tolo'o ji'i̱ quichi̱ bi'; ná tyacu̱' chca bi', cha' ná caca talya ca bi'.

APOCALIPSIS 22:5

Nga'aa caca talya su ndi'i̱ ngu' ca bi'; bi' cha' nga'aa cua'nijo'o xee cuichaa ji'i̱ ngu', nga'aa nti' cha' cua'a̱ ngu' xee nde ni'i̱. Ycui' Ndyosi nu Xu'na na, bi' laca nu ta xee ji'i̱ ngu', ni ná tye tyempo cha' stu'ba ti caca ngu' loo lo'o ycui' Ni.

APOCALIPSIS 5:6

Li' na'a̱ na' ndu̱ sca ñati̱; ñi'ya̱ ña'a̱ sca xlya' cuañi', jua'a̱ ña'a̱ ñati̱ bi'. Ndu̱ yu bi' nde loo su tlyu su ntucua ycui' Ndyosi, laja su ndu̱ nu ngu' cusu' bi', laja nu na'ni tacati bi'. Tya tyaca̱' nscua cuayá' hichu̱' yu tya lo'o ndyujuii ngu' ji'i̱ yu tsaca quiya', jua'a̱ ña'a̱ yu bi'. Cati tya'a sata ntucua hique nu ñi'ya̱ ña'a̱ xlya' nu ndu̱ cuentya ji'i̱ Jesús. La cui' jua'a̱ ntucua cati tya'a cloo Ni; nu cloo Ni ni, bi' laca cati tya'a cui'i̱ lubii nu laca Xtyi'i ycui' Ndyosi nu ndu'u ndyaa tyucui ña'a̱ chalyuu.

APOCALIPSIS 7:17

Ña'a̱si̱i̱ nu ñi'ya̱ ña'a̱ xlya' bi' ji'i̱ ngu', cha' ndi'i̱ Ni la cui' ca su ntucua ycui' Ndyosi loo; bi' laca nu tsalo'o ji'i̱ ngu' su caja hitya co'o ngu' cha' caja chalyuu cucui ji'i̱ ngu' li'. Lo'o jua'a̱ xquityi Ni hitya cloo ngu' cha' nga'aa cunaa ngu' li'.