Li' nguxacui̱ Jesús cha' ji'i̱ nu xña'a̱ bi': ―Tyaatsu' nu'u̱ slo na', Satanás ―nacui̱ Jesús―. Yaa clya nu'u̱. Cua nscua sca cha' lo quityi ji'i̱ ycui' Ndyosi ndi'ya̱: “Sca ti ji'i̱ ycui' Ndyosi nu Xu'na ma̱ cua'ni tlyu ma̱ ji'i̱, sca ti cha' ji'i̱ ycui' Ni nga'a̱ cha' taquiya' ma̱ ji'i̱ nde chalyuu”, nacui̱ quityi.
APOCALIPSIS 19:10 - Chatino Tataltepec10 Li' ngutu̱ sti̱' na' ngustii na' nde loo su ndu̱ xca̱ bi', cha' cua'ni tlyu na' ji'i̱ ngua ti' na', pana nga'aa nda bi' chacuayá' 'na: ―Nga'aa cua'ni nu'u̱ jua'a̱ lo'o na' ―nacui̱ nu xca̱ bi' 'na―. La cui' tya'a ndyu'ni na cña ji'i̱ ycui' Ni laca na. La cui' tya'a na' laca lcaa cu'ma̱ nu ngusñi tso'o ma̱ cha' tso'o nu cua nda Jesús lo'o ma̱. Ji'i̱ ycui' Ndyosi cua'ni tlyu nu'u̱ tso'o la ―nacui̱ xca̱ jna'. Nu cha' tso'o nu nda Jesús lo'o ñati̱, la cui' cha' laca nu nda ycui' Ndyosi lo'o ñati̱ nu laca tu'ba ji'i̱ Ni. အခန်းကိုကြည့်ပါ။ |
APOCALIPSIS 19:10
40 ပူးပေါင်းရင်းမြစ်များ
Lo'o ti nchcui' yu lo'o ngu' li': ―Cha' nu ngua ca ti 'na, bi' laca cha' nu cua ndacha' na' ji'i̱ ma̱ lo'o tya ndi'i̱ na' lo'o cu'ma̱ tya tsubi' la ―nacui̱ yu―. Cua nacui̱ na' ji'i̱ ma̱ cha' nga'a̱ cha' caca 'na lcaa cha' nu cua nscua cuentya 'na lo quityi nu nguscua jyo'o Moisés, lo'o jua'a̱ lo quityi nu nguscua jyo'o ngu' nu ngua tu'ba ji'i̱ ycui' Ndyosi nu ngua sa'ni, lo'o jua'a̱ lo quityi Salmos nscua cha' bi'.
Na cua nguscua jyo'o cusu' xi cha' lo quityi ji'i̱ ycui' Ndyosi nu ngua sa'ni; lcaa quityi bi' nchcui' cha' ntsu'u cha' ca̱a̱ sca ñati̱ tlyu lo yuu chalyuu tyempo nde loo la; bi' laca nu cuityi̱ yabe' nu ntsu'u ji'i̱ lcaa ñati̱, si xñi ngu' cha' ji'i̱ yu, nacui̱ cha' nu nscua lo quityi bi'. Na cua ndyalaa yu bi' lo yuu re juani, Jesús naa yu.
Ná ngua cuayá' ti' ngu' quichi̱ Jerusalén tilaca laca Jesús, lo'o jua'a̱ ná ngua cuayá' ti' ngu' nu laca loo ji'i̱ quichi̱ bi' tilaca laca yu. Ná nda ngu' cuentya ñi'ya̱ ndyu'u cha' nu nguscua jyo'o cusu' nu ngua tu'ba ji'i̱ ycui' Ndyosi sa'ni; masi ndyuna ngu' lo'o ndya'a̱ nchcui' ngu' lo quityi bi' ne' laa lcaa tsa̱ nu ndi'i̱ cña' ngu', ná nda ngu' cuentya si cha' ji'i̱ ycui' Jesús nchcui' quityi bi'. Bi' cha' cuxi tsa cña ngua'ni ngu' lo'o Jesús nu lo'o ngusta ngu' qui'ya ji'i̱ yu. La cui' tya'a cña nu nguscua jyo'o cusu' lo quityi cha' cua'ni ngu' lo'o yu, cua ngua'ni ngu' li'.
Nu cu'ma̱ ni, tso'o tsa jlya ti' ma̱ ji'i̱ ycui' Ndyosi, tso'o tsa nchca ji'i̱ ma̱ culu'u ma̱ cha' ji'i̱ ycui' Ndyosi ji'i̱ xa' ñati̱, tso'o tsa nchca cuayá' ti' ma̱ ñi'ya̱ ndyu'u sca cha'; na cua nti' tsa ma̱ xtyucua ma̱ ji'i̱ ngu', la cui' jua'a̱ ntsu'u tsa tyiquee ma̱ ña'a̱ ma̱ ji'i̱ ya. Nchca tsa ji'i̱ ma̱ cuentya ji'i̱ lcaa cña, nti' ya; bi' cha' nclyacua ti' ya cha' ná tyiquee' yala tsa cua'ni ma̱ cha' xti'i̱ ma̱ cñi bi'.
Pana nu na ni, chañi laca cha' ngulacua̱ ycui' Ndyosi ji'na, masi xa' ña'a̱ nchcui' nu ngu' bi'. Cua ndu'ni tlyu na ji'i̱ ycui' Ndyosi xqui'ya Xtyi'i ycui' Ni; chaa tsa ti' na ndi'i̱ na chalyuu nu lo'o cua ngujui chalyuu ji'na xqui'ya Jesucristo, cha' nga'aa jlya ti' na ji'i̱ sca cha' nu ndatsaa ñati̱ chalyuu ji'na cha' cua'ni na ji'i̱.
Lcaa nu laca xca̱ ji'i̱ ycui' Ndyosi nde cua̱ ni, lcaa tsa̱ ndu'ni bi' cña nu nclyo ycui' Ndyosi ji'i̱; cui'i̱ nu tso'o tsa laca nu ngu' xca̱ bi'. Nda Ni ji'i̱ ngu' xca̱ bi' ca̱a̱ nde chalyuu, cha' xtyucua ngu' ji'i̱ ca ta'a ñati̱ nu cua clyaá ti ji'i̱ nu cuxi xqui'ya Jesús, cha' cua ngulala ti tye chalyuu.
Cui'ya ma̱ cuentya lacua, cha' cua'a̱ jyaca̱ ma̱ ji'i̱ lcaa cha' nu cua nda Cristo lo'o ma̱. Nguxcube' tsa ycui' Ndyosi ji'i̱ jyo'o cusu' ji'na, nu lo'o ná ntaja'a̱ ngu' cua'a̱ jyaca̱ ngu' ji'i̱ cha' nu nchcui' jyo'o Moisés lo'o ngu' nde chalyuu chacuayá' ji'i̱ ycui' Ndyosi; ná ngua xna ngu' bi' ji'i̱ ycui' Ndyosi. La cui' jua'a̱ tlyu la cha' caca ji'na juani, si ná taquiya' na ji'i̱ Cristo nu ngutu'u ca slo ycui' Ndyosi ya̱a̱ nde lo yuu chalyuu, lo'o jua'a̱ cua xa' ndyaa tucua Ni ca slo ycui' Ndyosi chaca quiya' juani.
Ñati̱ nu jlya ti' ji'i̱ yu cha' laca yu nu sca ti Sñi' ycui' Ndyosi, ycui' ca ngu' jlo ti' ngu' ne' cresiya ji'i̱ ngu' cha' chañi tsa laca cha' bi'; ñati̱ nu ná ntaja'a̱ tucuá cha' ji'i̱ Ni, cha' laca Jesucristo Sñi' ycui' ca Ni, bi' ngu' laca nu ná jlya ti' tsiya' ti cha' cua nchcui' ycui' Ndyosi cha' ji'i̱ Sñi' ycui' ca Ni. Ñati̱ cuiñi laca ycui' Ndyosi nti' ngu' bi'.
Nde nscua na' cha' nu ngulu'u Jesucristo 'na. Juan laca na', lo'o nde nscua na' sca cha' nu ntsu'u yacu̱' ti tya sa'ni la. Tya clyo la cua nda ycui' Ndyosi cha' bi' lo'o Jesús cha' culu'u ji'i̱ ñati̱ ji'i̱ ycui' lcaa ña'a̱ cha' nu cua lijya̱ ti cha' caca nde chalyuu. Li' nda Jesús cha' bi' lo'o na', nu lo'o nda Ni sca xca̱ ji'i̱ Ni nu ngutu'u nde cua̱ ya̱a̱ ca slo na', cha' ndyu'ni na' cña ji'i̱ Ni.
Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.
Nu ngu' tya'a ngusñi na cha' ji'i̱ Jesús ni, cua ntiji̱loo ngu' ji'i̱ nu xña'a̱ bi', xqui'ya cha' ngujuii Jesús nu ñi'ya̱ ña'a̱ xlya' bi'. Ná ntsi̱i̱ ngu' bi' ta ngu' cha' tso'o ji'i̱ Jesús lo'o xa' ñati̱; ntaja'a̱ ngu' bi' chcui' ngu' cha' bi', masi cujuii ñati̱ ji'i̱ ngu' bi' xqui'ya cha' ñasi̱' tsa ñati̱ ji'i̱ Jesús.
Ngunasi̱' tsa nu cuaña bi' ji'i̱ nu cuna'a̱ bi' li', ndyaa ndyaana ni' cha' cusu̱u̱ lo'o lcaa ñati̱ nu tyu'u ji'i̱ nu cuna'a̱ ca tiya' la; nxu̱u̱ tya'a ni' lo'o lcaa ñati̱ nu taquiya' ji'i̱ cña nu ngulo ycui' Ndyosi ji'na, nu ña'a̱ ti ná ntsi̱i̱ ngu' cha' cacha' liñi ngu' cha' ji'i̱ Jesús ji'i̱ xa' ñati̱.
Cui̱i̱ nchcui' xca̱ bi' lo'o ngu' li': ―Cutsi̱i̱ cu'ma̱ ji'i̱ ycui' Ndyosi, cube ti' ma̱ ji'i̱ Ni cha' tlyu tsa cña ndu'ni Ni chalyuu ―nacui̱ xca̱ bi'―. Cua ndyalaa tyempo cha' cua'ni cuayá' Ni ji'i̱ lcaa ñati̱ chalyuu. Cua'ni tlyu ma̱ ji'i̱ ycui' Ndyosi cha' cua ngüiñá Ni nde cua̱, jua'a̱ ngüiñá Ni chalyuu, jua'a̱ ngüiñá Ni tyujo'o, jua'a̱ ngüiñá Ni lcaa su ntyucua hitya ―nacui̱ xca̱.
¿Ha ná ntsi̱i̱ ngu' jinu'u̱? ¿Ha ná tyaja'a̱ ngu' ñacui̱ ngu' cha' tlyu tsa cña nu ndu'ni nu'u̱? Sca ti ycui' nu'u̱ nu lubii tsa cresiya jinu'u̱. Cua na'a̱ ngu' lcaa su ndyu'ni cuayá' nu'u̱ ji'i̱ ñati̱ cha' liñi tsa ndyu'u cha'; bi' cha' tya̱a̱ lcaa ñati̱ tyucui ña'a̱ chalyuu ca su ntucua nu'u̱, cha' cua'ni tlyu ngu' jinu'u̱. Ndye ji̱i̱ nu ndyula tu'ba ngu' li'.
Nchcui' nu xca̱ ji'i̱ ycui' Ndyosi bi' lo'o na' li': ―Scua clya nu'u̱ cha' re lo quityi ―nacui̱―: “Tso'o ntsu'u tyiquee ñati̱ nu nguane na' ji'i̱ cha' tsaa su caja clyo'o lo'o yu nu ngujuii lo crusi cuentya ji'i̱ ngu'”, nacui̱ Ni. La cui' cha' liñi nu nda ycui' Ndyosi lo'o ñati̱ laca cha' bi' ―nacui̱ xca̱ bi' jna'.
Lcaa quiya' lo'o ndyula tu'ba na'ni bi', li' ndyatu̱ sti̱' nu ngu' cusu' bi' nde loo su ntucua ycui' Ni lo yaca xlya tlyu bi'; ndu'ni tlyu ngu' cusu' bi' ji'i̱ ycui' Ni cha' lcaa yija̱ lu'ú Ni. Li' nda'ya ngu' sne' oro nu ntucua hique ngu', nsta ngu' ji'i̱ nde loo su tlyu su ntucua ycui' Ni. Ndi'ya̱ nchcui' ngu' lo'o Ni li':
ကြော်ငြာတွေ