2 PEDRO 3:16 - Chatino Tataltepec

¹⁶ Tyu̱u̱ tya'a quityi nguscua Pablo bi', pana sca ti cuayá' nchcui' ca ta'a quityi bi' ji'i̱ cha' ji'i̱ ycui' Ndyosi nu cua nchcui' na ji'i̱ juani. Ntsu'u xi cha' nu nguscua nu Pablo bi' nu tucui xi cha' caca cuayá' tso'o ti' na ji'i̱; lo'o jua'a̱ ntsu'u ngu' nu lye tsa nclyu'u cha' cuiñi xqui'ya quityi bi', cha' ná nchca cuayá' ti' ngu' bi' cha' bi' tsiya' ti. Ná ngua tsa'a̱ tso'o ngu' bi', cha' bilya ca cuayá' tso'o ti' ngu' cha' bi'; bi' cha' ni sca quityi ji'i̱ ycui' Ndyosi ná liñi nclu'u ngu' bi' ji'i̱. Pana tye cha' ji'i̱ ngu' bi' tsiya' ti xqui'ya cha' cuiñi nu nclu'u ngu' ji'i̱ tya'a ñati̱ ngu'.

2 PEDRO 3:16 ပူးပေါင်းရင်းမြစ်များ

SAN MATEO 15:3

Li' nguxacui̱ Jesús cha' ji'i̱ ngu' tlyu bi': ―Lo'o cu'ma̱ ni ―nacui̱ Jesús ji'i̱ ngu'―, ¿ni cha' laca xti la cha' ntsu'u tyiquee ma̱ ji'i̱ cña nu ngulo ycui' Ndyosi ji'na? Lo'o jua'a̱ lye tsa ndube ti' ma̱ ji'i̱ scaa cha' nu nda jyo'o cusu' lo'o na.

SAN MATEO 15:6

Jua'a̱ laca cha' cuxi nu nclyu'u ma̱ ji'i̱ ngu', cha' nga'aa cua'ni tlyu ngu' ji'i̱ sti ngu', ji'i̱ xtya'a̱ ngu'; jua'a̱ nchcui' ma̱, masi xa' ña'a̱ ngulo ycui' Ndyosi cña ji'na. Nga'aa tso'o cha' nu nda ycui' Ni lo'o na, nti' ma̱; tso'o la cha' nu nda jyo'o cusu' cha' cua'ni na, nti' ma̱ cuentya ji'i̱ ma̱.

SAN MATEO 22:29

Li' nguxacui̱ Jesús cha' ji'i̱ ngu' bi': ―Ná jlo ti' ma̱ tsiya' ti, cha' ná nchca cuayá' ti' ma̱ ji'i̱ quityi ji'i̱ ycui' Ndyosi; ná nchca cuayá' ti' ma̱ cha' nchca tsa ji'i̱ ycui' Ni cua'ni Ni cña tonu.

FILIPENSES 3:19

Nga'a̱ cha' tyaa ngu' bi' ca chalyuu talya nu lo'o cajaa ngu', xqui'ya cha' sca ndyosi cuiñi ntsu'u ji'i̱ ngu' bi'; cua ña'a̱ ca na nu ndacui tsa ti' ngu' ji'i̱ cha' caja ji'i̱ ngu' nde chalyuu, bi' laca ndyosi ji'i̱ ngu' bi'. Lo'o jua'a̱ tyixi tsa ndu'ni ngu' lo'o tya'a ngu', masi nga'a̱ cha' ca tyuju'u tsa ti' ngu'; xcui' ntsu'u tyiquee ngu' ji'i̱ cua ña'a̱ ca na nu ntsu'u nde chalyuu.

HEBREOS 5:11

Cua quiña'a̱ tsa cha' nti' ya chcui' ya lo'o ma̱ cha' ji'i̱ Cristo, cha' quiña'a̱ tsa cha' tya lyiji ca cuayá' ti' ma̱. Pana ná nchca culu'u tso'o ya lcaa cha' bi' ji'i̱ ma̱; tlyu tsa cña caca, xqui'ya cha' ycui' cu'ma̱ ná ndyu'ni yala ma̱ cha' ca cuayá' ti' ma̱ cha' bi'.

SANTIAGO 1:8

cha' tucua cha' ntsu'u tyiquee ngu' bi'; ná sca cha' caja ji'i̱ ngu' cha' xcui' na ncha'a̱ ti tyiquee ngu'. Sca ti cha' chcui' ngu' sca tsa̱, chaca tsa̱ xa' cha' chcui' ngu' bi' li'.

1 PEDRO 1:1

Pedro laca na' nu nscua na' quityi re cha' ca̱a̱ slo lcaa cu'ma̱ nu ngusñi ma̱ cha' ji'i̱ Jesús, cu'ma̱ ngu' nu ndi'i̱ tyijyu'. Ntsu'u cu'ma̱ nu ndyalaa ma̱ nde loyuu su cuentya Ponto; xi xa' la tya'a cu'ma̱ ndyalaa ma̱ nde loyuu su cuentya Galacia, jua'a̱ loyuu su cuentya Capadocia, jua'a̱ loyuu su cuentya Asia, jua'a̱ loyuu su cuentya Bitinia cua lye tsa ngañi ma̱. Cña nu nda ycui' Jesucristo 'na, bi' laca cha' tsa'a na' chcui' na' cha' ji'i̱ Ni lo'o xa' la ñati̱.

1 PEDRO 2:8

Ndi'ya̱ nscua chaca cha' nu nchcui' ji'i̱ quee bi' chaca se'i̱ lo quityi: Tyeje sna quiya' ngu' chu̱' quee bi', clyú ngu' tyucui̱i̱ su lijya̱ ngu' lo'o tyucua quee bi' quiya' ngu'. Jua'a̱ nscua cha' lo quityi bi'; na nclyú ngu' tyucui̱i̱ cha' ná ndaquiya' ngu' ji'i̱ cha' nu nchcui' ycui' Ndyosi. Ngua'ni ycui' Ndyosi jua'a̱ cha' ná taca tya'a̱ ngu' tyucui̱i̱ ji'i̱ Ni si ná xñi ngu' cha' ji'i̱ ycui' Ni.

2 PEDRO 2:1

Cua ntsu'u xi ngu' cuiñi nu nguti'i̱ laja ngu' Israel sa'ni la; tu'ba ji'i̱ ycui' Ndyosi ngua ngu', nacui̱ ycui' ngu' cuiñi bi'. La cui' jua'a̱ tyu'u tucua ñati̱ cuiñi laja cu'ma̱ nde loo la; li' culu'u ngu' cuiñi bi' ji'i̱ ma̱, culu'u ngu' cua ña'a̱ ca cha' nu ca'ya hique ycui' ca ngu'. Lo'o li' ñacui̱ ngu' bi' cha' cuentya ji'i̱ ycui' Ndyosi nchcui' ngu'. Si cuna ma̱ cha' nu chcui' ngu' bi', li' xana cha' cusu̱u̱ ji'i̱ ma̱ lo'o tya'a ma̱ ña'a̱ cuayá' nu tya'be tya'a ma̱. Li' caca ma̱ tucua latya ma̱ xqui'ya cha' cuiñi bi'. Tlyu tsa cña nu ngua'ni ycui' nu Xu'na na cha' cua'ni lyaá Ni ji'i̱ lcaa na lo'o ji'i̱ ngu' bi', pana ná nti' nu ngu' cuiñi bi' cha' caca ycui' Ndyosi Xu'na ngu' bi' tsiya' ti; ná ntsu'u cha' tsiya' ti ji'i̱ ngu' bi' lo'o ycui' Ndyosi, bi' cha' yala ti tye cha' ji'i̱ nu ngu' cuiñi bi'.

2 PEDRO 2:14

Xcui' cha' suba' nda'ya hique ngu' cuxi bi' lo'o ña'a̱ ngu' ji'i̱ sca nu cuna'a̱, cha' ná tye cha' nti' ngu' bi' cua'ni suba' ngu' lo'o. Lo'o jua'a̱ hora ti culu'u ngu' bi' cha' cuxi ji'i̱ xa' ñati̱ nu bilya ca cuayá' tso'o ti' cha' ji'i̱ Jesucristo. Lye tsa ngua tsa'a̱ ngu' cuiñi bi' ji'i̱ lcaa lo cha' cuxi, bi' cha' lye tsa ndacui ti' ngu' bi'; ná nga'a̱ cha' tyaala' ji'i̱ ngu' bi' tsiya' ti. Pana cua nda ycui' Ndyosi yabe' ji'i̱ ngu' cuiñi bi';

2 PEDRO 3:14

Cu'ma̱ tya'a tso'o na, na ndu̱ ti' ma̱ ji'i̱ cha' bi', bi' cha' ntsu'u cha' cua'ni ma̱ xcui' cha' tso'o ti, xcui' cha' lubii ti lo'o tya'a ñati̱ ma̱, cha' ti̱ ti tyi'i̱ tyiquee ma̱ cuentya ji'i̱ ycui' Ni.

2 PEDRO 3:2

Ntsu'u cha' tyi'u ti' ma̱ cha' nu cua nchcui' ngu' nu ngua tu'ba ji'i̱ ycui' Ndyosi cua sa'ni la; tso'o si tyi'u ti' ma̱ cha' bi' lu'ba ti, lo'o jua'a̱ ji'i̱ cha' nu cua nchcui' ycui' nu Xu'na na nu ngua'ni lyaá ji'na. Cua ngusubi ycui' nu Xu'na na ji'i̱ ya cha' culu'u ya cha' ji'i̱ ycui' Ni ji'i̱ cu'ma̱, bi' cha' tso'o si taquiya' ma̱ ji'i̱ lcaa cha' nu cua ndyuna ma̱ lo'o ngulu'u ya ji'i̱ ma̱.

JUDAS 1:4

Ndu'ni cha' ca cuayá' ti' ma̱ cha' cua ndyatí̱ xi ñati̱ cuiñi bi' laja cu'ma̱, masi ná stu'ba cha' nu jlya ti' ma̱ lo'o ngu'. Cua sa'ni tsa nscua cha' lo quityi ji'i̱ ycui' Ndyosi cha' xcube' Ni ji'i̱ nu ngu' cuxi bi'; pana ná ndaquiya' ngu' bi' ji'i̱ cha' nu nchcui' ycui' Ndyosi tsiya' ti, ni ná ndube ti' ngu' bi' si ntsu'u tsa tyiquee Ni ña'a̱ Ni ji'i̱ ñati̱ chalyuu. Nacui̱ ngu' bi', cha' ná ndu'ni cha' masi cua'ni ngu' cha' suba', masi cua'ni ngu' lcaa lo cha' cuxi, cha' si ntsu'u tsa tyiquee Ni ña'a̱ Ni ji'na, ná xcube' Ni ji'na li', nti' ngu'. Cuiñi tsa ngu' bi', si'i ycui' Jesucristo laca xu'na ngu' bi'. Pana nu na ni, sca ti ycui' Jesucristo laca nu Xu'na na, sca ti ycui' Ni laca nu chañi cha' laca Ni loo ji'na.