2 PEDRO 2:1 - Chatino Tataltepec1 Cua ntsu'u xi ngu' cuiñi nu nguti'i̱ laja ngu' Israel sa'ni la; tu'ba ji'i̱ ycui' Ndyosi ngua ngu', nacui̱ ycui' ngu' cuiñi bi'. La cui' jua'a̱ tyu'u tucua ñati̱ cuiñi laja cu'ma̱ nde loo la; li' culu'u ngu' cuiñi bi' ji'i̱ ma̱, culu'u ngu' cua ña'a̱ ca cha' nu ca'ya hique ycui' ca ngu'. Lo'o li' ñacui̱ ngu' bi' cha' cuentya ji'i̱ ycui' Ndyosi nchcui' ngu'. Si cuna ma̱ cha' nu chcui' ngu' bi', li' xana cha' cusu̱u̱ ji'i̱ ma̱ lo'o tya'a ma̱ ña'a̱ cuayá' nu tya'be tya'a ma̱. Li' caca ma̱ tucua latya ma̱ xqui'ya cha' cuiñi bi'. Tlyu tsa cña nu ngua'ni ycui' nu Xu'na na cha' cua'ni lyaá Ni ji'i̱ lcaa na lo'o ji'i̱ ngu' bi', pana ná nti' nu ngu' cuiñi bi' cha' caca ycui' Ndyosi Xu'na ngu' bi' tsiya' ti; ná ntsu'u cha' tsiya' ti ji'i̱ ngu' bi' lo'o ycui' Ndyosi, bi' cha' yala ti tye cha' ji'i̱ nu ngu' cuiñi bi'. အခန်းကိုကြည့်ပါ။ |
2 PEDRO 2:1
73 ပူးပေါင်းရင်းမြစ်များ
cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.
’Lo'o chaca cha' ni: cua'ni tii ti' ma̱ ña'a̱ ma̱ ji'i̱ ngu' cuiñi nu nchcui' cuiñi ti cha' cuentya ji'i̱ ycui' Ndyosi nclu'u ngu' cha' ji'i̱ ma̱. Sca na'ni tso'o laca nu naa xlya'; lo'o nu ngu' cuiñi bi' ni, nti' ngu' cha' culacua ti' ma̱ cha' ñati̱ tso'o laca ngu' ñi'ya̱ laca xlya'. Tso'o tsa nchcui' ngu' bi' lo'o ma̱, tso'o tsa ndu'ni ngu' lo'o ma̱; pana cha' cuiñi laca nu nchcui' cha' tso'o tsa ngu' bi', cha' tyaala tsa ngu', cuiñi tsa ngu' bi'. Si'i ñi'ya̱ laca xlya' laca ngu' bi'; ñi'ya̱ laca sca bo'o nu tyaala tsa, jua'a̱ laca ngu' bi'.
Cristo cuiñi caca ngu' bi'. Lo'o jua'a̱ tyu'u tucua xi nu cuiñi nu chcui' cha' tu'ba ji'i̱ ycui' Ndyosi laca ycui' ca ngu'; cha' cuiñi ti cua'ni ngu' bi' cha' tlyu, cha' cube tsa ti' xa' ñati̱. Cua'ni ngu' cuiñi bi' jua'a̱, cha' tyiji̱loo ngu' ji'i̱ ma̱ nti' ngu', lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.
’Lo'o jua'a̱ tya'na tsa cu'ma̱ lo'o tso'o tsa nchcui' lcaa ñati̱ ji'i̱ ma̱. La cui' jua'a̱ ngua'ni jyo'o cusu' ji'i̱ ma̱ nu ngua sa'ni, cha' tso'o tsa nchcui' ngu' ji'i̱ ngu' nu nchcui' cha' cuiñi ti ji'i̱ ycui' Ndyosi lo'o ngu'; ndiya tsa ti' ngu' ji'i̱ cha' cuiñi bi'. Jua'a̱ ngulu'u Jesús ji'i̱ lcaa ngu' nu ndyaca tsa'a̱ ji'i̱.
Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.
Cua ngulo Cristo ji'na ji'i̱ yabe' nu ngusta ycui' Ndyosi hichu̱' na xqui'ya cha' ná ndaquiya' na ji'i̱ lcaa cha' tsiya' ti nu nda Ni lo'o na; yabe' nu ntsu'u ji'na bi' cua ndyanu hichu̱' ycui' Jesús li'. Ndi'ya̱ nscua cha' lo quityi ji'i̱ ycui' Ndyosi: “Si tlyu tsa yabe' ntsu'u ji'i̱ sca ñati̱, ntsu'u cha' cujui'i̱ ca'a̱ ngu' ji'i̱ ña'a̱ lu'ú ti lo sca yaca ndu̱ cha' cajaa yu”.
jua'a̱ ndu'ni tlyu ngu' ji'i̱ lcui̱ jo'ó; jua'a̱ ndu'ni cucha'a̱ ngu' bi' ji'i̱ tya'a ñati̱ ngu', lo'o jua'a̱ liye' ti' ngu' ña'a̱ ngu' ji'i̱ tya'a ñati̱ ngu', lye tsa nxu̱u̱ tya'a ngu'; jua'a̱ ndacui tsa ti' ngu' ji'i̱ cha' tso'o nu ntsu'u ji'i̱ tya'a ñati̱ ngu', cha' xi ndaca tsa nchca ñasi̱' ngu'; ná ntaja'a̱ ngu' tsiya' ti tya'a̱ tyiquee ngu' cha' ji'i̱ tya'a ñati̱ ngu', tsa cu' ti ndya'a̱ tyiquee ngu' cha' ji'i̱ ycui' ca ngu'; jua'a̱ nclyana tsa ngu' cha' cusu̱u̱ lo'o tya'a ñati̱ ngu', ndatsaa ngu' ji'i̱ tya'a ñati̱ ngu' cha' ná cua'ni stu'ba cha' ji'i̱ ngu' lo'o xa' la tya'a ngu';
Li' nga'aa cua'ni na ñi'ya̱ ndu'ni nu sube nu lu'ba ti ncha'a̱ cña ji'i̱, cha' nu ndijya ngu'; ni ná ta na chacuayá' cojolaqui ngu' ji'na xa' tyucui̱i̱, nu lo'o chcui' ngu' lo'o na cua ña'a̱ ca cha' nu bilya cuna na ji'i̱. Ntsu'u tsa cha' cuiñi nu nda ñati̱ nu tajua' tsa nchcui' lo'o na, ñati̱ nu nti' tsa cha' tsalo'o ji'na nde tyucui̱i̱ cuxi.
Nga'a̱ cha' tyaa ngu' bi' ca chalyuu talya nu lo'o cajaa ngu', xqui'ya cha' sca ndyosi cuiñi ntsu'u ji'i̱ ngu' bi'; cua ña'a̱ ca na nu ndacui tsa ti' ngu' ji'i̱ cha' caja ji'i̱ ngu' nde chalyuu, bi' laca ndyosi ji'i̱ ngu' bi'. Lo'o jua'a̱ tyixi tsa ndu'ni ngu' lo'o tya'a ngu', masi nga'a̱ cha' ca tyuju'u tsa ti' ngu'; xcui' ntsu'u tyiquee ngu' ji'i̱ cua ña'a̱ ca na nu ntsu'u nde chalyuu.
Ná cube ti' ma̱ ji'i̱ cua ña'a̱ ca ñati̱ nu cua'ni tyucuaa ti' lo'o ma̱, ngu' nu tacati la ndu'ni ycui' ngu', nti' ngu', cha' ndyu'ni tlyu ngu' ji'i̱ sca xca̱ nu ntsu'u ji'i̱ ycui' Ndyosi ca nde cua̱; si'i ji'i̱ ycui' Ndyosi ndyu'ni tlyu ngu' bi'. Ñati̱ nu ndu'ni jua'a̱ ni, nti' ngu' cha' xa' la cha' ji'i̱ ycui' Ndyosi cua ngulu'uloo ji'i̱ ngu'. Lye tsa ndu'ni tyucuaa ti' ngu' bi' lo'o tya'a ngu', masi ná ntsu'u cha' cua'ni ngu' bi' jua'a̱, cha' ña'a̱ ti tya ntsu'u cha' cuxi ne' cresiya ji'i̱ ngu' bi';
Cui'ya tso'o ma̱ cuentya lacua, cha' ná tucui taca cñilo'o ji'i̱ ma̱ lo'o cua ña'a̱ ca cha' cuiñi nu chcui' ngu' lo'o ma̱, masi tajua' tsa chcui' ngu' bi'. Si'i ycui' Cristo nu ntucua quiya' cha' ji'i̱ ngu' lo'o nchcui' ngu' jua'a̱; bi' laca cña cua̱ ti, bi' laca cha' cuiñi nu nchcui' ñati̱ chalyuu ti, masi nchcui' ngu' cha' ji'i̱ sca jo'ó, masi nchcui' ngu' cha' ji'i̱ sca cui'i̱ nu ntsu'u nde chalyuu ti.
Ná tso'o ndu'ni ñati̱ nu ná ndube ti' ji'i̱ tya'a, masi ji'i̱ sti ngu', masi ji'i̱ xtya'a̱ ngu', masi ji'i̱ sñi' ngu'; cha' cuiñi nchcui' ngu' lo'o nacui̱ ngu' cha' ngusñi ngu' cha' ji'i̱ Jesucristo si ná ña'a̱si̱i̱ ngu' ji'i̱ tya'a ngu', cha' tso'o la ndyu'ni xa' ñati̱ nu ná ndaquiya' cha' ji'i̱ Jesucristo tsiya' ti.
Lo'o juani ni, tlyu la cha' ti'í tyacua ji'i̱ tya'a ñati̱ na nu chi̱i̱ tsa nti' ña'a̱ ngu' ji'i̱ Jesús, nu sca ti Sñi' ycui' Ndyosi bi', ngu' nu lye tsa chcui' lo ji'i̱ cña nu ngua'ni nu Jesús bi'; sca ti xqui'ya cha' ngujuii yu lo crusi, bi' cha' cua ndyaca lubii cresiya ji'na. Lo'o jua'a̱ si chcui' suba' na ji'i̱ Xtyi'i ycui' Ndyosi, li' lye la cha' nchcube' tyacua ji'na, cha' xcui' tso'o tsa ndu'ni Ni lo'o na xqui'ya Xtyi'i ycui' Ni.
Ntsu'u tsa tyiquee ma̱ ña'a̱ ma̱ ji'i̱ Jesús, masi bilya ña'a̱ ma̱ ji'i̱ Ni; hasta juani tya lyiji ña'a̱ ma̱ ji'i̱, pana jlya ti' ma̱ cha' lu'ú Ni. Chañi cha' tso'o tsa ntsu'u tyiquee ma̱ juani xqui'ya Jesús, ni ná tye chca cha' chcui' ma̱ lcaa cha' tso'o nu ntsu'u tyiquee ma̱ cuentya ji'i̱ ycui' Jesús lo'o xa' ñati̱.
Lo'o jua'a̱ ndacui tsa ti' ngu' cuiñi bi' ji'i̱ na nu ntsu'u ji'i̱ ma̱; nti' tsa ngu' cua'ni ngu' ngana ji'i̱ ma̱, bi' cha' tajua' ti chcui' ngu' cha' cuiñi ti lo'o ma̱. Pana ntsu'u cha' xcube' Ni ji'i̱ ngu' cuiñi bi', cha' cua sa'ni cua nchcui' Ni cha' ná tso'o cua'ni ngu' cha' cuxi jua'a̱. Si'i na laja' ycui' Ni; jlo ti' Ni ñi'ya̱ ndu'ni ngu' cuiñi bi', lo'o jua'a̱ cua'ni tye Ni ji'i̱ ngu' bi' yala ti.
Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.
Ndu'ni cha' ca cuayá' ti' ma̱ cha' cua ndyatí̱ xi ñati̱ cuiñi bi' laja cu'ma̱, masi ná stu'ba cha' nu jlya ti' ma̱ lo'o ngu'. Cua sa'ni tsa nscua cha' lo quityi ji'i̱ ycui' Ndyosi cha' xcube' Ni ji'i̱ nu ngu' cuxi bi'; pana ná ndaquiya' ngu' bi' ji'i̱ cha' nu nchcui' ycui' Ndyosi tsiya' ti, ni ná ndube ti' ngu' bi' si ntsu'u tsa tyiquee Ni ña'a̱ Ni ji'i̱ ñati̱ chalyuu. Nacui̱ ngu' bi', cha' ná ndu'ni cha' masi cua'ni ngu' cha' suba', masi cua'ni ngu' lcaa lo cha' cuxi, cha' si ntsu'u tsa tyiquee Ni ña'a̱ Ni ji'na, ná xcube' Ni ji'na li', nti' ngu'. Cuiñi tsa ngu' bi', si'i ycui' Jesucristo laca xu'na ngu' bi'. Pana nu na ni, sca ti ycui' Jesucristo laca nu Xu'na na, sca ti ycui' Ni laca nu chañi cha' laca Ni loo ji'na.
Lo'o jua'a̱ nguñilo'o ni' ji'i̱ lcaa ñati̱ tyucui ña'a̱ chalyuu xqui'ya cha' tlyu nu ndyu'ni ni' lo'o ndi'i̱ ni' slo nu na'ni nu ya̱a̱ tya clyo bi'. Li' nchcui' ni' lo'o lcaa ñati̱ chalyuu cha' cuiñá ngu' sca lcui̱ tyu̱, cha' cua'ni tlyu ngu' ji'i̱ lcui̱ bi'; ngüiñá ngu' lcui̱ ji'i̱ nu na'ni nu ya̱a̱ tya clyo bi' li', na'ni nu ngua tso'o masi ti'í tsa ngula'a hique ni'.
Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.
Jlo ti' na' lcaa ña'a̱ nu ndu'ni cu'ma̱, nacui̱ Ni. Jlo ti' na' cha' lye tsa ndyu'ni lya' ti' ngu' ji'i̱ ma̱, cha' ti'i tsa ma̱ cuentya ji'i̱ ngu' bi', masi liñi la ñacui̱ na cha' ntsu'u tsa cha' tso'o ji'i̱ cu'ma̱ cuentya jna', nacui̱ Ni. Lo'o jua'a̱ jlo ti' na' cha' cuxi tsa nchcui' ngu' ji'i̱ ma̱. Nacui̱ ngu' cha' sñi' ycui' Ndyosi laca ycui' ngu'; pana sca cha' ndu'ni ti ngu' laca cha' bi', cha' stu'ba ntsu'u cha' ji'i̱ ngu' bi' lo'o Satanás, nacui̱ Ni.
Nda na' cuentya ji'i̱ lcaa ña'a̱ nu ndu'ni ma̱, nacui̱ Ni. Cua nda na' sca cña tso'o cha' cua'ni ma̱, lo'o ná tucui taca tacu̱' cha' ji'i̱ ma̱ li', masi jlo ti' na' cha' ná caca ji'i̱ ma̱ chcui' lye ma̱ lo'o ñati̱ cuentya jna', cha' ná nguula ti' tyiquee ma̱ tsiya' ti; pana ña'a̱ ti tya ndaquiya' ma̱ ji'i̱ lcaa cha' nu nclyu'u na' ji'i̱ ma̱, bilya xtyanu ma̱ 'na.
Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.
Cui̱i̱ ngusi'ya jyo'o bi': ―Ndyosi Xu'na ya ―nacui̱ ngu'―, xcui' lubii tsa cresiya jinu'u̱; xcui' cha' liñi ndu'ni nu'u̱ ―nacui̱ jyo'o bi'―. ¿Ha tya tiya' tsa cua'ni cuayá' nu'u̱ ji'i̱ ñati̱ chalyuu? ¿Ha tya tiya' tsa xcube' nu'u̱ ji'i̱ ngu' xqui'ya cha' cua ndyujuii ngu' ji'i̱ ya? ―nacui̱ jyo'o bi'.
ကြော်ငြာတွေ