2 PEDRO 1:10 - Chatino Tataltepec10 Bi' cha' ña'a̱ ti tya cua'ni la ma̱ lcaa cha' tso'o bi', ñi'ya̱ nu nguscua na' tya clyo; jua'a̱ tyi'u la ti' ma̱ cha' cua ngusubi ycui' Ndyosi ji'i̱ ma̱, cha' caca ma̱ ñati̱ ji'i̱ ycui' Ni. Lo'o li' ná nga'a̱ cha' chcuna' ma̱, si jua'a̱ cua'ni ma̱ lcaa lo cha' tso'o bi'; အခန်းကိုကြည့်ပါ။ |
Liñi tsa laca cha' nu nchcui' ycui' Ndyosi; cua'ni Ni cha' ná xtyanu na cha' bi', si jlya ti' na cha' nu nchcui' ycui' Ndyosi ndi'ya̱: “Cua nslo ycui' nu Xu'na na tilaca laca ñati̱ ji'i̱ Ni”. Lo'o chaca cha' nchcui' ndi'ya̱: “Cua ña'a̱ ca ñati̱ nu ntsu'u cha' ji'i̱ lo'o Cristo ni, ntsu'u cha' xtyanu ngu' bi' lcaa cha' cuxi”. Jua'a̱ nacui̱ quityi ji'i̱ ycui' Ndyosi.
Ñi'ya̱ nti' chcua̱ ngratu nu nsalú ngu' nde siyu' yaca ni'i̱, cha' tachaa ti xñi ca'a̱ chcua̱ bi' ji'i̱ quee nde siyu' hitya, cha' tyacui se'i̱ ti yaca ni'i̱ bi' lo hitya, cha' ná caca tyu'utsu' yaca ni'i̱ bi' tsiya' ti li'; la cui' jua'a̱ ndu'ni Jesús lo'o na, cha' ndu'ni yu cha' tyanu tachaa cha' ji'i̱ ycui' Ni ne' cresiya ji'na, cha' ná tya'a̱chu̱' na ji'i̱ Ni tsiya' ti. Cua ndyalaa Jesús nde cua̱, ñi'ya̱ laca si cua nteje tacui yu tasá tlyu nu ndacui cla'be ne' laa tonu; juani cua ndyaa tucua yu la cui' ca su ntucua ycui' Ndyosi.
Tya clyo la cua jlo ti' ycui' Ndyosi Sti na lcaa ña'a̱ cha' nu caca nde loo la, bi' cha' ngusubi ycui' Ni ji'i̱ ma̱. Lo'o juani ndyu'ni Xtyi'i ycui' Ndyosi cña cha' tyanu lubii cresiya ji'i̱ ma̱, cha' taquiya' ma̱ ji'i̱ ycui' Jesucristo; na cua ngujuii yu lo crusi xqui'ya cu'ma̱, ndyalú tañi yu cha' caja ñi'ya̱ caca lubii cresiya ji'i̱ ma̱. Lo'o juani nti' na' cha' ña'a̱ ti tya cua'ni ycui' Ndyosi cha' tso'o lo'o ma̱, cha' jua'a̱ ti̱ ti tyi'i̱ tyiquee ma̱ lcaa hora.
Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.
Cua nda Ni chacuayá' ji'na cha' caja chalyuu nu ná nga'a̱ cha' tye ji'na, jua'a̱ cua nda Ni chacuayá' ji'na cha' tyi'i̱ na chalyuu ñi'ya̱ nu nti' Ni cha' tyi'i̱ ñati̱ ji'i̱ Ni; bi' cha' nchca ji'na, cha' nxtyucua Ni ji'na. Cua ngusubi Ni ji'na, cua nda Ni chacuayá' ji'na cha' tyuloo na ji'i̱ ycui' Ni; lo'o jua'a̱ cua ngua cuayá' ti' na cha' nga'aa ntsu'u chaca nu tlyu la, nga'aa ntsu'u chaca nu nchca la ji'i̱.
Cu'ma̱ ngu' tya'a tso'o na ni, cua nguscua na' lcaa cha' bi' cha' ca tii ti' ma̱, cha' ná ta ma̱ chacuayá' ji'i̱ nu ngu' cuiñi bi' cha' culu'u ngu' ji'i̱ ma̱. Cha' liñi laca nu ngua tsa'a̱ ma̱ clyo, lo'o juani ná tso'o si taquiya' ma̱ ji'i̱ cha' cuiñi nu nclyu'u ngu' bi'; ná tso'o tya'a̱chu̱' ma̱ ji'i̱ cha' liñi bi' li'.
Sca ti ycui' Ndyosi ntsu'u chalyuu. Taca cua'ni lyaá Ni ji'na xqui'ya Jesucristo nu Xu'na na; sca ti ycui' Ni nchca ji'i̱ Ni ña'a̱si̱i̱ Ni ji'na, laja lo'o ndya'a̱ na tyucui̱i̱ tso'o nu ngulu'u Ni ji'na. Xtyucua Ni ji'na cha' ná tyeje sna quiya' na, cha' ná tyu'utsu' na ji'i̱ tyucui̱i̱ bi', ña'a̱ cuayá' nu tyalaa na tso'o ti ca su ndubi tsa ña'a̱ xee, ca su ntucua ycui' Ndyosi. Lubii tsiya' ti caca cresiya ji'na lo'o cua ndyalaa na ca slo Ni, lo'o jua'a̱ caca chaa tsa ti' na li'. Bi' cha' juani cua'ni tlyu na ji'i̱ ycui' Ndyosi nu ntucua ca su tlyu nde cua̱, cha' sca ti ycui' Ndyosi ntsu'u nu tlyu tsa laca Ni; sca ti ycui' Ni laca Ni loo ji'i̱ lcaa lo na nu ntsu'u chalyuu, jua'a̱ sca ti ycui' Ni nchca ji'i̱ Ni cua'ni Ni lcaa lo cña tonu tsiya' ti. Lu'ú ycui' Ndyosi tya lo'o bilya tya' chalyuu, lo'o jua'a̱ lu'ú Ni juani; ná nga'a̱ cha' tye tyempo cha' lu'ú Ni ca nde loo la. Jua'a̱ laca cha' lacua.