2 CORINTIOS 8:7 - Chatino Tataltepec

⁷ Nu cu'ma̱ ni, tso'o tsa jlya ti' ma̱ ji'i̱ ycui' Ndyosi, tso'o tsa nchca ji'i̱ ma̱ culu'u ma̱ cha' ji'i̱ ycui' Ndyosi ji'i̱ xa' ñati̱, tso'o tsa nchca cuayá' ti' ma̱ ñi'ya̱ ndyu'u sca cha'; na cua nti' tsa ma̱ xtyucua ma̱ ji'i̱ ngu', la cui' jua'a̱ ntsu'u tsa tyiquee ma̱ ña'a̱ ma̱ ji'i̱ ya. Nchca tsa ji'i̱ ma̱ cuentya ji'i̱ lcaa cña, nti' ya; bi' cha' nclyacua ti' ya cha' ná tyiquee' yala tsa cua'ni ma̱ cha' xti'i̱ ma̱ cñi bi'.

2 CORINTIOS 8:7 ပူးပေါင်းရင်းမြစ်များ

SAN MATEO 25:22

Lo'o li' ndyalaa chaca msu nu nda xu'na tucua mil cñi plata ji'i̱. “Xu'na”, nacui̱ msu bi', “nda nu'u̱ tucua mil cñi plata 'na, lo'o nu juani cua ngujui la tya tyucuaa mil cñi 'na cha' ngua'ni na' cña lo'o cñi bi' jinu'u̱”.

ROMANOS 15:14

Cu'ma̱ tya'a ntsu'u cha' ji'na lo'o Cristo, nslo tsa na' ji'i̱ ma̱ cha' tso'o tsa tyiquee ma̱; tso'o tsa nchca cuayá' ti' ma̱ cha' ji'i̱ Cristo, lo'o jua'a̱ nchca tsa ji'i̱ ma̱ ta ma̱ cui̱i̱ lo'o ngu' tya'a ma̱.

1 CORINTIOS 1:5

Ntsu'u tsa cha' nu cua nda ycui' Ndyosi lo'o ma̱, cha' cua ngua stu'ba cha' ji'i̱ ma̱ lo'o Cristo; bi' laca cha' nu ntsu'u ne' cresiya ji'i̱ ma̱ juani. Bi' cha' cua jlo tso'o ti' ma̱ lcaa cha' nu ji'i̱ Jesús, lo'o jua'a̱ nchca ji'i̱ ma̱ nchcui' ma̱ cha' bi' lo'o ñati̱.

1 CORINTIOS 12:13

Ca ta'a na, masi ngu' judío, masi ngu' xa' tsu' laca na, masi msu nu ngüi'ya ñati̱, masi msu nu ndi'i̱ tso'o ti laca na, na cua ntyucuatya na chacuayá' ji'i̱ Xtyi'i ycui' Ndyosi; cua ndyanu Xtyi'i ycui' Ndyosi bi' ne' cresiya ji'i̱ sa scaa na, cha' stu'ba ntsu'u tyiquee na lo'o lcua ti tya'a ñati̱ nu ngusñi cha' ji'i̱ Cristo.

1 CORINTIOS 12:8

Ndi'ya̱ laca cña nu taca cua'ni na xqui'ya Xtyi'i ycui' Ndyosi: ntsu'u ngu' nu ndacha' liñi ñi'ya̱ nu ngua ji'i̱ Jesús; lo'o jua'a̱ ntsu'u ngu' nu tso'o tsa nclyu'u tyucui̱i̱ cha' xñi na cha' ji'i̱ ycui' Ndyosi;

1 CORINTIOS 13:2

Ná ndu'ni cha' masi cacha' na lcaa cha' nu nda ycui' Ndyosi lo'o ñati̱, si ná ntsu'u tyiquee na ña'a̱ na ji'i̱ ngu'. Ná ndu'ni cha' masi jlo ti' na lcaa cha' ji'i̱ ycui' Ndyosi, masi tso'o tsa nchca cuayá' ti' na sca cha' nu ná ngujui ñi'ya̱ nu caca cuayá' ti' ñati̱ nu ngua sa'ni la; ná sca na laca na cuentya ji'i̱ ycui' Ndyosi si ná ntsu'u tyiquee na ña'a̱ na ji'i̱ ñati̱. La cui' ti masi jlya tsa ti' na ji'i̱ ycui' Ndyosi ñi'ya̱ nti' si caca cuityi̱ na ji'i̱ sca ca'ya cua̱, pana si ná ntsu'u tyiquee na ña'a̱ na ji'i̱ ñati̱, ná sca na laca na li'.

1 CORINTIOS 13:8

Nde loo la ná ntsu'u cha' tye cha' ntsu'u tyiquee na ña'a̱ na ji'i̱ ñati̱. Nde loo la tyalaa tyempo nu lo'o nga'aa ndu'ni cha' tya chcui' la ycui' Ndyosi lo'o na nde chalyuu, nga'aa ndu'ni cha' chcui' la na cha'cña ji'i̱ xa' ñati̱, ni nga'aa ndu'ni cha' caca cuayá' ti' na lcaa cha' ji'i̱ ycui' Ndyosi ca lo'o caca tyempo bi'; pana ná tye chca cha' ntsu'u tyiquee na ña'a̱ na ji'i̱ ñati̱.

1 CORINTIOS 14:12

Cua jlo ti' na' cha' nti' tsa ma̱ cha' caca cua'ni ma̱ cua ña'a̱ ca cña nu nda Xtyi'i ycui' Ndyosi ji'na; bi' cha' jña la ma̱ chacuayá' ji'i̱ ycui' Ndyosi cha' taca ji'i̱ ma̱ cua'ni ma̱ lcaa lo cña tso'o, cua ña'a̱ ca cña nu xtyucua ji'i̱ ngu' tya'a ngusñi ma̱ cha' ji'i̱ Jesús ca bi', cha' tyatí̱ la ti' tyiquee ngu'.

1 CORINTIOS 4:7

¿Ni cha' laca cha' ndulo tsa cha' ji'i̱ ycui' ma̱ cuentya ji'i̱ ma̱, pana ná ndube ti' ma̱ ji'i̱ xa' ñati̱? Ycui' Ndyosi cua nda lcaa na nu ntsu'u ji'i̱ ma̱, lcaa cña nu nchca ji'i̱ ma̱; bi' cha' lacua ná ntsu'u cha' cua'ni tyucuaa ti' ma̱ ji'i̱ tya'a ma̱. Si'i xqui'ya cña nu ndyu'ni ycui' ma̱ ngutsa'a̱ chalyuu ji'i̱ ma̱, xqui'ya ycui' Ndyosi cua laca ma̱ ñi'ya̱ nu laca ma̱ juani.

2 CORINTIOS 7:7

Lo'o jua'a̱ tso'o tsa cha' nu nda yu lo'o ya cuentya ji'i̱ cña nu ndyu'ni cu'ma̱; nacui̱ yu cha' cua nti' tsa cu'ma̱ ña'a̱ loo ma̱ ji'i̱ ya chaca quiya', lo'o jua'a̱ nacui̱ yu cha' ntyuju'u ti ti' ma̱ ndi'i̱ ma̱ xqui'ya cha' cuxi nu ngua ji'i̱ ma̱ tya li', nacui̱ yu cha' nga'aa ndiya ti' ma̱ cha' cuxi nu nchcui' ngu' 'na tsubi' la. Xqui'ya lcaa cha' bi', chaa la ti' na' ndi'i̱ na' juani.

2 CORINTIOS 8:6

Bi' cha' cua nchcui' ya lo'o yu Tito bi', cha' cua'ni lyiji yu cha' xti'i̱ yu msta̱ nu nda cu'ma̱ cha' tso'o ntsu'u tyiquee ma̱, cha' tya tsubi' la cua nguxana nxti'i̱ yu msta̱ bi'.

2 CORINTIOS 9:14

Li' chcui' ngu' bi' lo'o ycui' Ndyosi cuentya ji'i̱ ma̱, cha' tso'o tsa ntsu'u tyiquee ngu' ña'a̱ ngu' ji'i̱ ma̱; tyi'u ti' ngu' cha' quiña'a̱ tsa cha' tso'o ndu'ni ycui' Ndyosi lo'o ñati̱ xqui'ya msta̱ nu cua nda ma̱ ji'i̱ ngu' bi'.

2 CORINTIOS 9:8

Taca xtyucua ycui' Ndyosi ji'i̱ ma̱ lo'o quiña'a̱ tsa cha', lo'o li' tyu'u scua ji'i̱ ma̱ lcaa cha' nu lyiji ji'i̱ ma̱; lo'o jua'a̱ tya caja la ñi'ya̱ xtyucua ma̱ ji'i̱ xa' ñati̱ lo'o cua ña'a̱ ca cña tso'o.

EFESIOS 4:29

Ná chcui' ma̱ cha' ti'í lo'o tya'a ñati̱ ma̱; clyana ma̱ cha' tso'o nu chcui' ma̱ lo'o tya'a ma̱; clyana ma̱ ñi'ya̱ nu caca xtyucua ma̱ ji'i̱ ngu' cha' tyatí̱ la ti' ngu' ji'i̱ ycui' Ndyosi, cha' tyanu sca cha' tso'o ne' cresiya ji'i̱ ngu' nu lo'o cuna ngu' cha' nu chcui' ma̱.

FILIPENSES 1:11

Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.

FILIPENSES 1:9

Ndi'ya̱ laca cha' nu nchcui' na' lo'o ycui' Ndyosi cuentya ji'i̱ ma̱: ndijña na' chacuayá' ji'i̱ Ni cha' ña'a̱ ti tso'o la tyu'u tyiquee ma̱ ña'a̱ ma̱ ji'i̱ tya'a ñati̱ ma̱, cha' jua'a̱ taca ca cuayá' la ti' ma̱ lcaa cha', cha' jua'a̱ taca culacua tso'o la ti' ma̱;

2 TESALONICENSES 1:3

Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

2 TIMOTEO 2:1

Sñi' na', nti' na' cha' ta na' chaca cui̱i̱ lo'o nu'u̱ juani: Caca tlyu tyiquee nu'u̱ xqui'ya Jesucristo nu xcui' cha' tso'o ndu'ni lo'o na.

HEBREOS 12:28

Lo'o jua'a̱ ná taca cha'a̱ chalyuu cucui nu ngujui ji'na xqui'ya Cristo, ná clyiji tsiya' ti bi'; bi' cha' tso'o tyu'u tyiquee na ña'a̱ na ji'i̱ ycui' Ndyosi lacua. Cua'ni chi̱ na loo ycui' Ndyosi, cha' jua'a̱ nti' Ni cha' cua'ni na; tyi'u ti' na cha' lcaa tsa̱ cua'ni tlyu na ji'i̱ ycui' Ni, cha' cube tsa ti' na ji'i̱ Ni.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

2 PEDRO 3:18

Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.

APOCALIPSIS 3:17

Quiña'a̱ tsa cha' ntsu'u ji'i̱ ya, nacui̱ ma̱. Cua ngujui sca chalyuu tso'o ji'i̱ ya, bi' cha' nga'aa ntsu'u cha' nu lyiji ji'i̱ ya, nacui̱ ma̱. Pana ná nda ma̱ cuentya cha' tya'na tsa ma̱ nti' na' ña'a̱ na' ji'i̱ ma̱. Tso'o la si ca tyuju'u ti' ma̱, nti' na', cha' nga'aa ntsu'u cha' ji'i̱ ma̱ tsiya' ti; ntsu'u tsa cha' nu lyiji ji'i̱ ma̱ nti' na' ña'a̱ na' ji'i̱ ma̱, bi' cha' ná nchca culacua tso'o ti' ma̱ tsiya' ti.