2 CORINTIOS 5:21 - Chatino Tataltepec

²¹ Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

2 CORINTIOS 5:21 ပူးပေါင်းရင်းမြစ်များ

SAN LUCAS 1:35

Li' nda xca̱ sca cha' lo'o: ―Ta ycui' Ndyosi Xtyi'i Ni cha' tya̱a̱ su ndi'i̱ nu'u̱, cha' tyu'ú tyucui ña'a̱ nu'u̱; sca cha' tlyu nu cua'ni ycui' Ndyosi nu laca loo caca cha' bi'. Nu lo'o cala sñi' nu'u̱, sca ñati̱ nu lubii tsa cuentya ji'i̱ ycui' Ndyosi caca cubi' nu cala bi', la cui' bi' laca nu caca naa Sñi' ycui' Ndyosi.

LOS HECHOS 3:14

Xcui' cha' tso'o ngua'ni nu Jesús bi', xcui' lubii cresiya ji'i̱ yu, lo'o ná nda ma̱ chacuayá' tyu'u yu laja ti li'. Ngüijña ma̱ chacuayá' ji'i̱ gobernador bi', cha' tyu'u laja ti chaca nu laca preso, nu cua ndyujuii ji'i̱ tyu̱u̱ tya'a ñati̱.

ROMANOS 1:17

Lo'o cuna na cha' tso'o ji'i̱ Jesús bi', li' caca cuayá' ti' na ñi'ya̱ ndu'ni ycui' Ndyosi cha' ca tso'o cresiya ji'i̱ ñati̱ cuxi; xqui'ya cha' nu jlya ti' na ji'i̱ cña nu ngua'ni Jesús, bi' cha' taca caca tso'o cresiya ji'i̱ ñati̱ cuxi na, sca ti si xñi na cha' ji'i̱ ycui' Ni. Ndi'ya̱ ndyu'u sca cha' nu nscua lo quityi cusu': “Nu lo'o jlya ti' na ji'i̱ ycui' Ni cha' taca cua'ni Ni cha' caca tso'o cresiya ji'na, li' caja sca chalyuu nu ná nga'a̱ cha' tye ji'na”.

ROMANOS 4:25

Nda Ni chacuayá' cujuii ngu' ji'i̱ Jesús, cha' cuityi̱ qui'ya nu ntsu'u ji'na; lo'o li' ndyu'ú Jesús chaca quiya', cha' caca tso'o cresiya ji'na cuentya ji'i̱ ycui' Ndyosi.

ROMANOS 5:19

Tya clyo cua ntsu'u sca ñati̱ nu ná ndaquiya' ji'i̱ cña nu ngulo ycui' Ndyosi ji'i̱ yu, bi' cha' ndyanu qui'ya ji'i̱ lcaa na lo'o tya'a na juani. Lo'o tiya' la li', ya̱a̱ chaca ñati̱ nu ndaquiya' ji'i̱ cña nu ngulo Ni ji'i̱; xqui'ya nu bi' ndyaca tso'o cresiya ji'i̱ lcaa na cuentya ji'i̱ ycui' Ndyosi juani.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

2 CORINTIOS 5:17

Lo'o juani nu lo'o cua ngusñi sca ñati̱ cha' ji'i̱ Cristo, li' cua nguxcutsa'a̱ Ni cha' ji'i̱ ñati̱ bi'; cua ndye cha' ji'i̱ yu lo'o cha' cuxi nu ngua'ni yu nu ngua tya tsubi' la. Chaca chalyuu cucui, bi' laca nu cua ngujui ji'i̱ yu juani.

GÁLATAS 3:13

Cua ngulo Cristo ji'na ji'i̱ yabe' nu ngusta ycui' Ndyosi hichu̱' na xqui'ya cha' ná ndaquiya' na ji'i̱ lcaa cha' tsiya' ti nu nda Ni lo'o na; yabe' nu ntsu'u ji'na bi' cua ndyanu hichu̱' ycui' Jesús li'. Ndi'ya̱ nscua cha' lo quityi ji'i̱ ycui' Ndyosi: “Si tlyu tsa yabe' ntsu'u ji'i̱ sca ñati̱, ntsu'u cha' cujui'i̱ ca'a̱ ngu' ji'i̱ ña'a̱ lu'ú ti lo sca yaca ndu̱ cha' cajaa yu”.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

FILIPENSES 3:9

cha' stu'ba ti tyu'u tyiquee na' lo'o Ni. Ná ngüityi̱ ycui' Ndyosi qui'ya 'na nu lo'o ndaquiya' tsa na' ji'i̱ nu cha' cusu' bi'; laca cha' cua ngüityi̱ ycui' Ni qui'ya 'na lo'o jlya ti ti' na' ji'i̱ cña nu ngua'ni Cristo, tsa bi' ti cha'. Bi' cha' ngua'ni Ni cha' caca tso'o cresiya jna'.

HEBREOS 4:15

Laca Jesús sti jo'ó nu laca loo la cuentya ji'na, lo'o jua'a̱ tya'na tsa ti' Jesús ña'a̱ yu ji'na. Cua jlo ti' yu cha' ntsu'u tsa quiya' lo'o cua cua'ni ti nu cuxi ngana ji'na, cha' nu lo'o tya ndi'i̱ Jesús lo yuu chalyuu, la cui' jua'a̱ lye tsa ngua'ni cuayá' nu xña'a̱ ji'i̱ yu, si cua'ni yu cha' cuxi. Pana nu Jesús bi' ni, ni sca cha' cuxi ná ngua'ni yu, bi' cha' taca caca yu sti jo'ó nu laca loo la cuentya ji'na, cha' jlo ti' Jesús ñi'ya̱ nñilo'o tsa nu xña'a̱ ji'na.

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

1 PEDRO 3:18

Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.

1 JUAN 3:5

Cua jlo ti' ma̱ cha' cua ya̱a̱ Jesucristo chalyuu cha' cuityi̱ Ni qui'ya nu ntsu'u ji'i̱ ñati̱; pana ycui' Cristo ni, ná ntsu'u qui'ya ji'i̱ yu tsiya' ti.