2 CORINTIOS 5:13 - Chatino Tataltepec

¹³ Ná ndu'ni cha' masi ñacui̱ ngu' bi' cha' tonto tsa ya; jua'a̱ laca ya tu'ni, xqui'ya cha' ndyu'ni ya cña ji'i̱ ycui' Ndyosi. Masi jua'a̱ laca ya nti' ngu' bi', pana tyucui tyiquee ya taca xtyucua ya ji'i̱ cu'ma̱ li'.

2 CORINTIOS 5:13 ပူးပေါင်းရင်းမြစ်များ

SAN MARCOS 3:21

Lo'o ndyuna tya'a Jesús cha' bi', ngulacua tsa ti' ngu' li'. Hora ti ndu'u ngu' lijya̱ ngu' slo Jesús, xqui'ya cha' ntsu'u ñati̱ nu nacui̱ cha' cua ngua loco yu.

ROMANOS 12:3

Tlyu tsa cha' tso'o nu ngua'ni ycui' Ndyosi lo'o na', nu lo'o nda Ni cña jna'; bi' cha' nchcui' tsa na' lo'o ma̱ juani, cha' nga'aa cua'ni tyucuaa ti' ma̱ lo'o xa' ñati̱. Nga'a̱ cha' culacua ti' ma̱ cha' lcaa cña nu cua nchca ji'i̱ ma̱ juani, Cristo ngua'ni cha' caca ji'i̱ ma̱, nu lo'o ngusñi ma̱ cha' ji'i̱ Ni.

2 CORINTIOS 11:1

Lo'o juani tyu'u cha' clyu ti' ji'i̱ ma̱ lo'o na', talo tyiquee ma̱ xi jna', masi cha' tonto ti na' nchcui' tsa na' cha' ji'i̱ ycui' ca ti na'.

2 CORINTIOS 12:11

Cu'ma̱ ngua'ni ma̱ lo'o na' cha' nchcui' na' cha' tonto re, pana cu'ma̱ laca nu nga'a̱ cha' chcui' tso'o ma̱ 'na nquicha'. Masi ná sca cha' ndyaca 'na tsiya' ti, si'i na xti la cña nchca 'na lo'o quiña'a̱ la cña nchca ji'i̱ nu ngu' cuiñi bi', masi tyaca'a tsa ndyu'ni ma̱ ji'i̱ ngu'; si'i jua'a̱ ndyu'u cha'.

2 CORINTIOS 12:6

Ni si'i na tonto laca na' cha' nchcui' tsa na' ji'i̱ ycui' ca ti na' jua'a̱, cha' liñi laca nu nda na' lo'o ma̱ juani. Pana nga'aa nti' na' chcui' na' quiña'a̱ la cha' lo'o ma̱ juani, cha' ná nti' na' cha' cua'ni chi̱ ngu' loo na' si bilya ña'a̱ ngu' ñi'ya̱ ndyu'ni na', si bilya cuna ngu' cha' nu nda na'; tsa ña'a̱ cuayá' nu ndyuloo ti ngu' 'na, jua'a̱ ti taca cua'ni chi̱ ngu' loo na' nti' na'.

2 CORINTIOS 7:12

Bi' cha' laca nguscua na' nu quityi bi'; si'i na ngulacua tsa ti' na' xqui'ya yu nu ngua'ni cha' cuxi bi', ni si'i na ngulacua tsa ti' na' xqui'ya ngu' nu ngua cuxi ji'i̱. Ngua ti' na' cha' culacua tso'o ti' ma̱ ji'i̱ cha' nu cua nchcui' ya lo'o ma̱, ñi'ya̱ laca si ndu̱ ycui' Ndyosi ña'a̱ Ni ji'na; bi' cha' nguscua na' quityi nu ndyaa slo ma̱ bi'.

COLOSENSES 1:24

Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.

1 TESALONICENSES 1:5

xqui'ya cha' ngusñi ma̱ cha' tso'o nu cua nchcui' ya lo'o ma̱, la cui' cha' tlyu nu nda Xtyi'i ycui' Ni cha' chcui' ya lo'o ma̱; Xtyi'i ycui' Ndyosi ngua'ni cña laja lo'o nchcui' ya lo'o ma̱, bi' cha' ngusñi ma̱ cha' bi'. Lo'o jua'a̱ jlo ti' ma̱ ñi'ya̱ ngua cña nu ngua'ni ya lo'o nguti'i̱ ya ca slo cu'ma̱.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.