2 CORINTIOS 4:5 - Chatino Tataltepec

⁵ Nu cha' nu nda ya lo'o ngu' ni, si'i cha' ji'i̱ ycui' ca ya nchcui' ya. Ndi'ya̱ laca cha' nu nchcui' ya lo'o ngu': Jesucristo laca Xu'na tyucui ña'a̱ nde cua̱, lo'o la cui' Ni laca Ni loo ji'i̱ tyucui ña'a̱ nde chalyuu. Bi' cha' ñacui̱ ya cha' xqui'ya Jesús nu Xu'na na ndyu'ni ya cña cuentya ji'i̱ ma̱.

2 CORINTIOS 4:5 ပူးပေါင်းရင်းမြစ်များ

SAN MATEO 23:8

’Pana cu'ma̱ ni, ná tso'o si ñacui̱ ngu' ji'i̱ ma̱ cha' mstru laca ma̱; tso'o la si sca ti cha' ntsu'u tyiquee ma̱ lo'o tya'a ma̱, cha' sca ti mstru ntsu'u ji'i̱ ma̱, bi' laca Cristo.

SAN MATEO 3:11

Lo'o na' ni, ntyucuatya na' ji'i̱ ma̱ lo'o hitya, si chañi cha' cua ngua tyuju'u ti' ma̱ ji'i̱ qui'ya nu ntsu'u ji'i̱ ma̱; pana cua ca̱a̱ ti sca ñati̱ nu tso'o la que na'. Lo'o na', cua'ni tlyu na' ji'i̱ ñati̱ bi'; tso'o tsa caca tyiquee na', masi caña nu ntsu'u quiya' ñati̱ bi' culo na'. Lo'o nu ñati̱ bi' ni, ná tyucuatya yu ji'i̱ ngu' lo'o hitya ti; pana cua'ni yu cha' tyanu Xtyi'i ycui' Ndyosi ne' cresiya ji'i̱ ngu' nu lo'o tyucuatya yu ji'i̱ ngu', lo'o li' subii Ni ji'i̱ ngu' lo'o xee ji'i̱ Ni cha' caca lubii ne' cresiya ji'i̱ ngu'.

SAN JUAN 7:18

Sca ñati̱ nu nchcui' cha' ji'i̱ ycui' ca lo'o ngu', jua'a̱ nti' yu cha' caca tlyu ycui' ca ti yu. Xa' ña'a̱ ndu'ni na', cha' tyucui tyiquee na' ndu'ni tlyu na' ji'i̱ ycui' Ndyosi nu Xu'na na' nu ngulo cña 'na ca̱a̱ na' nde chalyuu. Ná ntsu'u cha' cuiñi 'na tsiya' ti.

LOS HECHOS 10:36

Cua nda ycui' Ndyosi cha' lo'o ya nu laca ya ngu' Israel, cha' ti̱ ti tyi'i̱ cresiya ji'i̱ ñati̱ chalyuu xqui'ya Jesucristo, nu laca Xu'na lcaa ñati̱.

LOS HECHOS 2:36

’Ntsu'u sca cha' ji'i̱ ycui' Jesús nu nga'a̱ cha' ca cuayá' ti' lcaa na nu laca na ngu' Israel: La cui' Jesús nu ngujui'i̱ ca'a̱ na ji'i̱ lo crusi cha' cujuii na ji'i̱, la cui' yu bi', cua nda ycui' Ndyosi chacuayá' ji'i̱ yu cha' caca yu Xu'na na, cha' laca yu nu Cristo.

LOS HECHOS 5:31

Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.

1 CORINTIOS 1:23

Pana nu na ni, ndacha' na ji'i̱ ngu' cha' ji'i̱ Cristo nu cua ngujuii lo crusi cha' cua'ni lyaá ji'na. Li' chiya'a̱ nti' ngu' judío lo'o ndyuna ngu' cha' nu nchcui' na re; lo'o jua'a̱ ngu' xa' tsu', cha' tonto nchcui' na nti' ngu' bi', si'i cha' bi' tsiya' ti nti' ngu' bi'.

1 CORINTIOS 10:33

Lcaa su ndyu'ni na' cña ndube ti' na' ji'i̱ xa' ñati̱, si caca tso'o cresiya ji'i̱ ngu' lo'o cua'ni na' cña bi'. Si'i na tyacua cha' tso'o ji'i̱ ycui' ca na', nti' na' cha' caca tso'o cresiya ji'i̱ cua ña'a̱ ca ñati̱, cha' caja ñi'ya̱ clyaá ngu' ji'i̱ nu cuxi li'.

1 CORINTIOS 12:3

Bi' cha' nti' tsa na' cha' caca cuayá' ti' ma̱ cha' re. Si'i Xtyi'i ycui' Ndyosi ndu'ni cha' ñacui̱ ngu': “Cuiñaja laca nu Jesús bi'”. Ná taca ñacui̱ ngu' jua'a̱ xqui'ya Xtyi'i ycui' Ndyosi. Lo'o ñacui̱ ngu': “Xu'na na laca Jesús”, Xtyi'i ycui' Ndyosi laca nu ndu'ni cha' ñacui̱ ngu' jua'a̱ li'.

1 CORINTIOS 15:47

Lo'o yuu ti ngüiñá Ni ji'i̱ Adán nu nguti'i̱ chalyuu clyo. Pana ca slo ycui' Ndyosi ngutu'u nu chaca ñati̱ nu ya̱a̱ chalyuu ca tiya' la, la cui' Jesucristo nu Xu'na na.

1 CORINTIOS 2:2

Laja lo'o nguti'i̱ na' quichi̱ tyi ma̱, ngüiñi ti' na' cha' ná ta na' xi xa' la cha' lo'o ma̱ tsiya' ti; sca ti cha' ji'i̱ ycui' Jesucristo, la cui' Cristo nu ngujui'i̱ ca'a̱ ngu' ji'i̱ lo crusi, tsa bi' ti cha' nchcui' na' lo'o ma̱ li'.

1 CORINTIOS 4:15

Ntsu'u tsa ngu' tya'a ntsu'u cha' ji'na lo'o Cristo nu taca xtyucua ngu' ji'i̱ ma̱, pana sca ti na' ndu'ni na' ñi'ya̱ nu ndu'ni sti ma̱, cha' ndye ndacha' na' cha' tso'o nu cua nda Jesucristo lo'o na ji'i̱ ma̱; xqui'ya na' ngusñi ma̱ cha' ji'i̱ Jesús.

1 CORINTIOS 8:6

Pana nu ñati̱ tya'a ntsu'u cha' ji'na lo'o Jesús, sca ti ycui' Ndyosi Sti na jlya ti' na ji'i̱ tsiya' ti; la cui' ti jua'a̱ sca ti ycui' Jesucristo nu Xu'na na ngusñi na cha' ji'i̱. Ngüiñá Ni tyucui ña'a̱ chalyuu, xqui'ya Jesús ndya' lcaa lo na; cuentya ji'i̱ ycui' Jesús laca lcaa lo na nu ntsu'u chalyuu, lo'o jua'a̱ xqui'ya ycui' Jesús ndi'i̱ na chalyuu.

2 CORINTIOS 1:19

cha' nu Jesucristo bi', nu sca ti Sñi' ycui' Ndyosi ni, si'i tucua cha' ntsu'u tyiquee Ni. Cua nchcui' ya cha' ji'i̱ Ni su ndi'i̱ cu'ma̱, lo'o na', lo'o Silvano, lo'o Timoteo, nchcui' cua cha' ji'i̱ Ni. Ná chcui' Ni cha' si'i jua'a̱ laca sca cha' si cua nchcui' Ni tsaca quiya' cha' jua'a̱ laca cha' bi'. Sca ti Cristo laca nu chañi cha' nchcui' Ni cha' liñi,

2 CORINTIOS 1:24

Pana tso'o la masi si'i xqui'ya cuare ti taquiya' ma̱ cha' ji'i̱ ycui' Ndyosi, cha' ne' tyiquee ycui' ca ma̱ cua ngusñi tso'o ma̱ cha' ji'i̱ Jesús. Na cua nti' ya xtyucua ya ji'i̱ ma̱ cha' ca chaa la ti' ma̱ laja lo'o ndyu'ni tlyu ycui' ca ma̱ ji'i̱ Jesús.

GÁLATAS 5:13

Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na.

FILIPENSES 1:15

Chañi cha' ntsu'u ñati̱ nu nchcui' cha' ji'i̱ Cristo lo'o tya'a xqui'ya cha' chi̱i̱ ti nti' ñati̱ bi', na cua nti' tsa ñati̱ bi' xu̱u̱ tya'a lo'o ya; pana tya ntsu'u la xi xa' la ngu' nu nchcui' cha' bi' xqui'ya cha' tso'o ti tyiquee ngu'.

FILIPENSES 2:11

Cui̱i̱ tsa chcui' lcaa ñati̱ cha' Jesucristo laca Xu'na lcaa ca chalyuu, jua'a̱ tso'o tsa cua'ni tlyu ngu' ji'i̱ ycui' Ndyosi Sti na.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

TITO 1:11

Nga'a̱ cha' tacu̱' ma̱ tu'ba ngu' cuiñi bi', cha' ná tacu̱' ngu' cha' ji'i̱ quiña'a̱ ñati̱, ña'a̱ tya'a nga'a̱ ni'i̱ ti ngu' nu cua ngusñi cha' liñi bi'. Nclyu'u ngu' cuiñi bi' cha' ji'i̱ tya'a na; pana na cuiñi ngu' bi', cha' cua nti' ngu' caja cñi ji'i̱ ngu'.

2 PEDRO 2:3

Lo'o jua'a̱ ndacui tsa ti' ngu' cuiñi bi' ji'i̱ na nu ntsu'u ji'i̱ ma̱; nti' tsa ngu' cua'ni ngu' ngana ji'i̱ ma̱, bi' cha' tajua' ti chcui' ngu' cha' cuiñi ti lo'o ma̱. Pana ntsu'u cha' xcube' Ni ji'i̱ ngu' cuiñi bi', cha' cua sa'ni cua nchcui' Ni cha' ná tso'o cua'ni ngu' cha' cuxi jua'a̱. Si'i na laja' ycui' Ni; jlo ti' Ni ñi'ya̱ ndu'ni ngu' cuiñi bi', lo'o jua'a̱ cua'ni tye Ni ji'i̱ ngu' bi' yala ti.