2 CORINTIOS 4:10 - Chatino Tataltepec

¹⁰ Macala su ndya'a̱ ya nde chalyuu, lu'ba ti nchca quicha ya, ntsu'u tsa cha' ti'í nu ndyu'ni ngu' lo'o ya, tsa ña'a̱ nu ngua ji'i̱ Cristo lo'o ya̱a̱ yu nde chalyuu, nu lo'o ndyujuii ngu' ji'i̱ yu. Pana li' ca jlo ti' xa' ñati̱ cha' ña'a̱ ti tya lu'ú ycui' Cristo, nu lo'o ña'a̱ ngu' bi' cha' ña'a̱ ti tya lu'ú ya.

2 CORINTIOS 4:10 ပူးပေါင်းရင်းမြစ်များ

SAN JUAN 14:19

Ca tiya' la xi, li' nga'aa ña'a̱ ñati̱ chalyuu jna'; pana cu'ma̱, tya ña'a̱ ma̱ jna'. Li' caca tso'o tyiquee ma̱, xqui'ya cha' lu'ú na'.

ROMANOS 6:5

Jua'a̱ ndyaca cha' cua laca ntsu'u cha' ji'na lo'o nu Cristo bi'. Ngujuii yu nu lo'o ngüityi̱ yu qui'ya nu ntsu'u ji'na. Lo'o na ni, ñi'ya̱ laca si na cua ngujuii na, jua'a̱ laca na; pana lo'o tyu'ú na chaca quiya', li' caja chaca chalyuu cucui ji'na, ñi'ya̱ lo'o ndyu'ú Jesús chaca quiya'.

ROMANOS 6:8

Lo'o na laca na jua'a̱, nu lo'o ntsu'u cha' ji'na lo'o Cristo, cha' laca na ñi'ya̱ si cua ngujuii na lo'o Cristo; lo'o li' caca na ñi'ya̱ laca si cua ndyu'ú na lo'o Cristo chaca quiya'.

ROMANOS 8:36

Ndi'ya̱ nchcui' sca cha' nu nscua lo quityi ji'i̱ ycui' Ndyosi: Xqui'ya ycui' Ndyosi, cua ña'a̱ ca hora ndyujuii ngu' ji'na. Ndyu'ni ngu' lo'o na ñi'ya̱ si laca na xlya', la cui' xlya' nu ndya'a̱ lo'o ngu' ji'i̱ slo ñati̱ nu ndujuii ji'i̱.

2 CORINTIOS 1:5

Ñi'ya̱ lo'o ngua'ni lya' ti' ñati̱ ji'i̱ Cristo tya sa'ni la, jua'a̱ nda ngu' quiña'a̱ tsa cha' ti'í ji'na juani, nu lo'o nchcui' na cha' ji'i̱ Cristo; pana ña'a̱ ti nxtyucua tsa Cristo ji'na, la cui' hora lo'o nchcube' na.

2 CORINTIOS 1:9

cha' cua ndyalaa tyempo nu cua cajaa ti ya. Pana jua'a̱ ngua cha' tso'o la jlya ti' ya ji'i̱ sca ti ycui' Ndyosi, cha' nchca ji'i̱ Ni cua'ni Ni cha' tyu'ú ñati̱ chaca quiya' masi cua ngujuii ngu'; bi' cha' nchca ji'i̱ Ni cua'ni lyaá Ni ji'na, si'i na culacua ti' na cha' ycui' ca ti na ntsu'u cha' cua'ni na cha' clyaá na laja cha' cuxi bi'.

2 CORINTIOS 13:4

Chañi tsa cha' ndye juersa ji'i̱ Cristo nu lo'o ndyujuii ngu' ji'i̱, lo'o ngujui'i̱ ca'a̱ ngu' ji'i̱ lo crusi; pana tlyu tsa cña ngua'ni ycui' Ndyosi cuentya ji'i̱ yu, bi' cha' laca cha' ña'a̱ ti tya lu'ú yu juani. Ñi'ya̱ nti' Cristo, cha' ná nguxlyú cha' hichu̱' ñati̱ nu ndyujuii ji'i̱, la cui' jua'a̱ cuare, si'i na lye tsa nclyo ya cña ji'i̱ cu'ma̱ nquicha'; pana juani caca cuayá' ti' ma̱ cha' ña'a̱ ti tya lu'ú ya xi, cha' la cui' chacuayá' ji'i̱ ycui' Ndyosi ndya'a̱ lo'o ya lijya̱ ya, la cui' tya'a chacuayá' nu ntsu'u ji'i̱ Cristo.

2 CORINTIOS 4:11

Cua ña'a̱ ca hora lo'o ndi'i̱ ya chalyuu ntsu'u tsa cha' cuxi nu taca cujuii ji'i̱ ya, cha' quiña'a̱ tsa cha' cuxi ndyacua ji'i̱ ya lcaa se'i̱ su ndya'a̱ ya xqui'ya Jesús. Pana jua'a̱ taca ña'a̱ ngu' cha' tya ndi'i̱ Jesús lo'o ya; bi' cha' laca tya ntsu'u chalyuu ji'i̱ ya, masi quicha ti ti' ya ndya'a̱ ya.

GÁLATAS 6:17

Tya tsubi' la, tlyu tsa cña nda ma̱ 'na, cha' ná ndaquiya' ma̱ ji'i̱ cha' nu nchcui' na' lo'o ma̱; bi' cha' juani nga'aa cua'ni ma̱ cha' cusu̱u̱ lo'o na' chaca quiya'. Cua ntsu'u cuayá' nu nscua lo cuaña' na', bi' laca cuayá' su nguxcube' ngu' 'na xqui'ya cha' ndyu'ni na' cña ji'i̱ Jesús.

COLOSENSES 1:24

Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.

2 TIMOTEO 2:11

Nga'a̱ cha' xñi tso'o ma̱ cha' liñi nu ndi'ya̱ nchcui': Si cajaa na cha' laca na ñati̱ ji'i̱ Jesucristo, lo'o ti tyaa na tyi'i̱ na lo'o ycui' Ndyosi li'.

1 PEDRO 4:13

Nga'a̱ cha' caca tso'o tyiquee ma̱ lo'o tyi'u ti' ma̱ cha' ñi'ya̱ ngua lya' ti' ngu' ji'i̱ ycui' Cristo, jua'a̱ ca lya' ti' ngu' ji'i̱ cu'ma̱ juani. Tlyu tsa laca Cristo cuentya ji'i̱ ycui' Ndyosi, lye tsa quiji'i̱ xee ji'i̱ Ni lo'o ca̱a̱ ycui' Cristo chaca quiya' nde loo la; li' ca chaa la ti' ma̱, ca tso'o la tyiquee ma̱.

1 PEDRO 4:14

Nu lo'o nchcui' ngu' cha' ti'í ji'i̱ ma̱ xqui'ya Cristo, ca tso'o tyiquee ma̱ cha' ndi'i̱ Xtyi'i ycui' Ndyosi lo'o ma̱, lo'o jua'a̱ tlyu tsa cha' tso'o ntsu'u ji'i̱ ycui' Ni. Nchcui' ngu' bi' cha' cuxi ji'i̱ ycui' Ndyosi; pana cu'ma̱ ni, tso'o tsa si tya cua'ni tlyu ma̱ ji'i̱ Ni.

APOCALIPSIS 1:17

Lo'o cua na'a̱ na' ji'i̱ Ni, tsiya' ca nclyú na' nde quiya' Ni; cua culiji ti ti' na' ngua, xqui'ya cha' ndyutsi̱i̱ tsa na'. Li' ya' tsu' cui̱ Ni ngusta Ni hichu̱' na', ndi'ya̱ nchcui' Ni lo'o na': ―Ná cutsi̱i̱ nu'u̱ ―nacui̱ Ni―. Na' ntucua̱ lo'o nguxana chalyuu, lo'o jua'a̱ la cui' na' tyucua̱ lo'o tye chalyuu.