2 CORINTIOS 3:7 - Chatino Tataltepec

⁷ Cña nu ngulo Moisés ji'i̱ ngu' bi' cuentya ji'i̱ ycui' Ndyosi ni, chu̱' quee cuaja' nscua cha' bi'; nguscua Ni letra hichu̱' quee cuaja' bi', cha' chcui' ngu' lo. Ndubi tsa ña'a̱ xee ji'i̱ ycui' Ndyosi ngua, nu lo'o nda ca ti Ni cha' cusu' bi'; hasta tyucui ña'a̱ loo nu cusu' Moisés ndubi tsa ña'a̱ ngua, ni nga'aa ngua ña'a̱ tya'a ngu' Israel ji'i̱ loo nu cusu' bi'. Pana yala ti nteje tacui cha' bi', xtyi'i ti nguliji xee bi' loo yu li'. Lo'o xee ndubi ndyalaa cha' cusu' bi' lacua, masi xcui' jua'a̱ ndyijii ñati̱ lo'o yabe' nu ntsu'u ji'i̱ ngu' xqui'ya cña nu nclyo cha' cusu' bi';

2 CORINTIOS 3:7 ပူးပေါင်းရင်းမြစ်များ

LOS HECHOS 6:15

Ña'a̱ tsa ngu' cusu' nu laca loo bi' ji'i̱ Esteban li', cha' ñi'ya̱ ña'a̱ loo xca̱ ji'i̱ ycui' Ndyosi, jua'a̱ ña'a̱ loo Esteban, cha' laca yu sca ñati̱ nu lubii tsa cresiya ji'i̱.

ROMANOS 10:4

Pana cua ñaa Jesús chalyuu juani, cua ngusñi na cha' ji'i̱ yu, bi' cha' taca ca tso'o cresiya ji'na cuentya ji'i̱ ycui' Ndyosi; nga'aa nti' cha' taquiya' tsa na cha' cusu' nu cua nda jyo'o Moisés bi', cha' si jua'a̱ taca ca tso'o cresiya ji'na.

ROMANOS 4:15

Xcui' na xcube' ti Ni ji'na, nu lo'o caca cuayá' ji'na slo ycui' Ndyosi cuentya ji'i̱ cha' cusu' bi'; pana ná caja ñi'ya̱ nu sta Ni qui'ya ji'na si ná nscua sca cha' nu ndaca'a ji'na jua'a̱.

ROMANOS 5:20

Nu lo'o cuna na ni cña laca nu nclyo ycui' Ndyosi ji'na, li' nchca cuayá' la ti' na ñi'ya̱ laca qui'ya nu sta Ni ji'na. Masi ndube tsa ti' na cha' ntsu'u tsa cha' cuxi ji'na, la cui' jua'a̱ jlo ti' na cha' ntaja'a̱ Ni cua'ni lyaá Ni ji'na; jlo ti' na cha' nchca ji'i̱ Ni, cha' tso'o tsa ndu'ni Ni lo'o na.

ROMANOS 7:10

Ngua ti' ycui' Ndyosi cha' caja chalyuu ji'na nquicha', nu lo'o taquiya' na ji'i̱ lcaa cña nu ngulo Ni nu ngua sa'ni. Pana si'i jua'a̱ ngua lo'o na'; cua chcuna' ti chalyuu 'na li', cha' ngua tii na' cha' ntsu'u tsa qui'ya 'na li'.

ROMANOS 7:22

Tyucui tyiquee na' ndiya tsa ti' na' cua'ni na' lcaa cña nu ngulo ycui' Ndyosi ji'na nu ngua sa'ni;

ROMANOS 7:5

Nu ngua cua tsubi' la, cuxi ti ndi'i̱ na, cha' ñati̱ chalyuu laca na; ngua ti' na cua'ni na lcaa lo cha' cuxi nu ndiya ti' na ji'i̱, masi cua ndyuna na cha' cusu' nu nti' cua'a ji'na. Bi' cha' la cui' cha' cuxi bi' ngua'ni lo'o na cha' chcuna' lyiji chalyuu ji'na.

1 CORINTIOS 13:10

pana nde loo la li', lo'o cua'ni ycui' Ndyosi cha' caca cuayá' ti' na lcaa cha', li' nga'aa tyi'u ti' na nu xca ti cha' nu nchca cuayá' ti' na juani.

2 CORINTIOS 3:3

Cristo ngua'ni cña bi' ne' cresiya ji'i̱ cu'ma̱, nu lo'o nda Ni ji'i̱ cua cha' ndyaa ya ca su ndi'i̱ ma̱; bi' laca sca cña ji'i̱ Xtyi'i ycui' Ndyosi nu lu'ú ca, nu ngua'ni Ni ne' cresiya ji'i̱ cu'ma̱ ñati̱ chalyuu, ni si'i cha' nscua sca cha' chu̱' quee cuaja' ti.

2 CORINTIOS 3:6

Laca bi' sca cha' nu cua nguxana ca ti, sca cña nu ndyu'ni Xtyi'i ycui' Ndyosi laca. Ná laca bi' ñi'ya̱ laca sca cña nu ndacane ti quityi cusu' ji'na cha' cua'ni na. Ndyijii na xqui'ya yabe' nu ntsu'u ji'na xqui'ya cña nu nclyo quityi cusu' bi' ji'na, pana juani ndyiji chalyuu cucui ji'na xqui'ya Xtyi'i ycui' Ndyosi.

2 CORINTIOS 3:8

pana juani tlyu la cha' ndyaca nu lo'o nda na cha' ji'i̱ Jesús lo'o ñati̱, lo'o li' ndu'ni Xtyi'i ycui' Ni cña ne' cresiya ji'i̱ ngu' bi'.

GÁLATAS 3:10

Pana cua ña'a̱ ca ñati̱ nu tsa bi' ti cña nti' cha' taquiya' ji'i̱ cha' cusu' nu nguscua jyo'o Moisés, tyanu yabe' hichu̱' ñati̱ bi', cha' ndi'ya̱ nchcui' quityi ji'i̱ ycui' Ndyosi: “Tyanu yabe' hichu̱' lcaa ñati̱ si ná taquiya' ngu' ji'i̱ lcaa ca cha' nu nscua lo quityi bi'”.

GÁLATAS 3:21

Tso'o si cua'ni na cña nu nscua lo quityi cusu' cha' cua'ni na lacua. Lo'o jua'a̱ ndu'ni tsa cha' xñi na lcaa cha' nu nda ycui' Ndyosi lo'o ñati̱. Pana masi taquiya' na ji'i̱ lcaa cha' cusu' bi', ná taca caja chalyuu cucui bi' ji'na jua'a̱ ti; ná taca ca tso'o cresiya ji'na cuentya ji'i̱ ycui' Ni xqui'ya cha' ndyu'ni ti na lcaa cña nu nscua lo quityi cusu' bi' cha' cua'ni na; ná caca jua'a̱ tsiya' ti.

HEBREOS 12:18

Lo'o ndyuna ma̱ cha' ji'i̱ ycui' Ndyosi juani, ná ndyaca ji'i̱ ma̱ ñi'ya̱ nu ngua ji'i̱ ngu' Israel nu ngua sa'ni la, nu lo'o ngutu̱ ngu' bi' quiya' ca'ya Sinaí. Ná nchca tii ma̱ juani, ñi'ya̱ nu ngua ti' ngu' bi' lo'o lye tsa ndyaqui̱ sii' ca'ya Sinaí bi' nu ngua li'; talya tsa ña'a̱ ngua li', ná ngua ña'a̱ ngu' tsiya' ti, jua'a̱ lye tsa ngua cui'i̱.

HEBREOS 3:3

Pana juani lye la ndu'ni tlyu na ji'i̱ Jesús, cha' ná stu'ba jyo'o Moisés lo'o yu bi'. Ñi'ya̱ laca lo'o ndye ndya' sca ni'i̱ ni, tso'o tsa nchcui' ngu' cha' ji'i̱ cuityi nu ngüiñá ji'i̱ ni'i̱ bi', masi ná nchcui' lye ngu' cha' ji'i̱ ycui' ni'i̱; la cui' jua'a̱ laca lo'o Jesús ni, lye la ndyi'u ti' ngu' ji'i̱ ycui' Jesús, masi nga'aa lye ndyi'u ti' ngu' ji'i̱ nu Moisés bi'.

HEBREOS 9:4

Nde ne' cuarto bi' ntucua mesa oro su ndaqui̱ sti jo'ó yana jo'ó lo; la cui' ca bi' ntucua cñá' tacati, nu ngüixi̱i̱ tyi'i̱ ca chu̱' yaca lo'o chcua̱ oro. Ne' cñá' bi' cua ntsu'u co'o tsa yu'be ti na nu ñi'ya̱ ña'a̱ scua̱ ña'a̱, nu nda ycui' Ndyosi cha' ndyacu ngu' Israel ca lo nati̱' btyi su nguta'a̱ yu'u ngu' nu ngua sa'ni; ne' sca caatya̱ oro ntsu'u co'o na nu ndyacu ngu' bi'. Lo'o jua'a̱ ca ne' cñá' bi' ntsu'u co'o yaca xca̱ ji'i̱ jyo'o Aarón, yaca nu ntyucua sati̱ chu̱' jua'a̱ ti; jua'a̱ ntsu'u tyucuaa quee cuaja', nu nscua nu tii tya'a cha' bi' lo, nu ndacha' ni cña nu cua ngulo ycui' Ndyosi ji'i̱ ngu' cha' cua'ni ngu'. Ca ta'a na bi' ntsu'u co'o ne' cñá' tacati bi'.