2 CORINTIOS 3:3 - Chatino Tataltepec

³ Cristo ngua'ni cña bi' ne' cresiya ji'i̱ cu'ma̱, nu lo'o nda Ni ji'i̱ cua cha' ndyaa ya ca su ndi'i̱ ma̱; bi' laca sca cña ji'i̱ Xtyi'i ycui' Ndyosi nu lu'ú ca, nu ngua'ni Ni ne' cresiya ji'i̱ cu'ma̱ ñati̱ chalyuu, ni si'i cha' nscua sca cha' chu̱' quee cuaja' ti.

2 CORINTIOS 3:3 ပူးပေါင်းရင်းမြစ်များ

SAN MATEO 16:16

Hora ti nguxacui̱ Simón Pedro cha' ji'i̱ Jesús li': ―Cristo laca nu'u̱ ―nacui̱―. Sñi' ycui' Ndyosi nu lu'ú ca laca nu'u̱.

1 CORINTIOS 3:5

¿Tilaca laca nu Apolos bi' lacua? ¿Tilaca laca na' lacua? ¿Ha si'i cña ji'i̱ ycui' Ndyosi ndyu'ni ca ta'a ya? ¿Ha si'i xqui'ya cha' nda ya cha' lo'o ma̱, bi' cha' ngusñi ma̱ cha' ji'i̱ Cristo li'? Cua laca cña ndyu'ni scaa ya, la cui' cña ñi'ya̱ nu cua nda ycui' nu Xu'na na cha' cua'ni ya.

2 CORINTIOS 3:6

Laca bi' sca cha' nu cua nguxana ca ti, sca cña nu ndyu'ni Xtyi'i ycui' Ndyosi laca. Ná laca bi' ñi'ya̱ laca sca cña nu ndacane ti quityi cusu' ji'na cha' cua'ni na. Ndyijii na xqui'ya yabe' nu ntsu'u ji'na xqui'ya cña nu nclyo quityi cusu' bi' ji'na, pana juani ndyiji chalyuu cucui ji'na xqui'ya Xtyi'i ycui' Ndyosi.

2 CORINTIOS 3:7

Cña nu ngulo Moisés ji'i̱ ngu' bi' cuentya ji'i̱ ycui' Ndyosi ni, chu̱' quee cuaja' nscua cha' bi'; nguscua Ni letra hichu̱' quee cuaja' bi', cha' chcui' ngu' lo. Ndubi tsa ña'a̱ xee ji'i̱ ycui' Ndyosi ngua, nu lo'o nda ca ti Ni cha' cusu' bi'; hasta tyucui ña'a̱ loo nu cusu' Moisés ndubi tsa ña'a̱ ngua, ni nga'aa ngua ña'a̱ tya'a ngu' Israel ji'i̱ loo nu cusu' bi'. Pana yala ti nteje tacui cha' bi', xtyi'i ti nguliji xee bi' loo yu li'. Lo'o xee ndubi ndyalaa cha' cusu' bi' lacua, masi xcui' jua'a̱ ndyijii ñati̱ lo'o yabe' nu ntsu'u ji'i̱ ngu' xqui'ya cña nu nclyo cha' cusu' bi';

2 CORINTIOS 6:16

Ñi'ya̱ nti' cu'ma̱ nu tyaca'a tsa ma̱ ji'i̱ ycui' Ndyosi ni, ná taca cua'ni tya'a ma̱ lo'o xa' ñati̱ nu ngusñi cha' ji'i̱ cua ña'a̱ ca jo'ó; tyaca'a tsa na ji'i̱ ycui' Ndyosi nu lu'ú ca xqui'ya cha' ndyanu Xtyi'i ycui' Ndyosi ne' cresiya ji'na. Ndi'ya̱ nacui̱ ycui' Ndyosi: Tyi'i̱ na' ca slo ñati̱ bi', lo'o jua'a̱ tya'a̱ na' lo'o ñati̱ bi'; caca na' ycui' Ndyosi cuentya ji'i̱ ngu' bi', bi' cha' taca caca ngu' bi' ñati̱ 'na. Jua'a̱ nacui̱ Ni.

1 TESALONICENSES 1:9

La cui' ngu' bi' nda ngu' cha' lo'o ya ñi'ya̱ ngua lo'o ndyalaa ya slo ma̱ tya clyo, cha' li' nguxtyanu ma̱ ji'i̱ lcua ti lo jo'ó nu ntsu'u ji'i̱ ma̱ tya sa'ni la, cha' cua'ni ma̱ cña ji'i̱ ycui' Ndyosi nu lu'ú ca, nu sca ti Ndyosi nu chañi ca.

HEBREOS 10:16

Nde laca cha' cucui nu cua quiñi ti 'na lo'o ngu' chaca quiya', nacui̱ nu Xu'na na: Lo'o tyalaa tyempo bi', li' cua'ni na' cha' tyanu tso'o cha' ne' cresiya ji'i̱ ñati̱ 'na, lcaa cha' ñi'ya̱ nu chcui' na' lo'o ngu' li'; tyucui tyiquee ngu' cua'ni ngu' cña 'na li'.

HEBREOS 8:10

Lo'o juani nde laca cha' cucui nu cua quiñi ti 'na lo'o ngu' Israel juani, nacui̱ Ni. Nu lo'o tyalaa tyempo, li' cua'ni na' cha' tyanu tso'o lcaa cha' ne' cresiya ji'i̱ ngu', ñi'ya̱ nu chcui' na' lo'o ngu' li'. Tyucui ti' tyiquee ngu' cua'ni ngu' cña 'na li'; caca na' ycui' Ndyosi nu Xu'na ngu' li', lo'o jua'a̱ caca ngu' bi' ñati̱ jna'.

HEBREOS 9:14

Masi jua'a̱ ngua'ni ngu' cña nu ngua li', pana tlyu la cña nu ngua'ni Cristo juani, cha' ndyalú tañi ycui' yu lo'o ngujuii yu lo crusi cuentya ji'na. Xqui'ya Xtyi'i ycui' Ni, bi' cha' ngua ji'i̱ Cristo ta yu tyucui ña'a̱ ycui' ca yu, cha' sca ti quiya' cati̱ qui'ya nu ntsu'u ji'na lo'o ycui' Ndyosi; nu ycui' Cristo ni, ná ntsu'u qui'ya ji'i̱ yu tsiya' ti, bi' cha' taca cua'ni lubii Ni cresiya ji'na, nu lo'o tyi'u ti' na ñi'ya̱ nu ngua'ni Ni lo'o ndyalú tañi ycui' Ni. Li' cuityi̱ Ni lcaa cha' cuxi nu ndyu'ni ñu'u̱ tsa ji'na, jua'a̱ taca ji'na cua'ni na cña ji'i̱ ycui' Ndyosi nu lu'ú ca nde chalyuu li'.

APOCALIPSIS 2:1

Li' nacui̱ Jesús: ―Nde cha' nu scua nu'u̱ cha' tsaa slo nu ñati̱ nu ndu̱ cuentya jna' nde quichi̱ Efeso, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, la cui' na' nu ndacui nu cati tya'a cuii bi' ya' na', nu ndu̱ na' cla'be laja nu cati tya'a candyeru oro bi':

APOCALIPSIS 2:12

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Pérgamo, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, nacui̱ Jesús, na' nu ntsu'u xlyu cusu̱u̱ 'na nu cha tsa tyucuaa chu̱' xlyu bi'.

APOCALIPSIS 2:18

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Tiatira, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui̱' lo'o ma̱, na' nu laca̱ nu sca ti Sñi' ycui' Ndyosi, na' nu ngulane tsa xee cloo na' ñi'ya̱ laca lo'o lye tsa ndyatu̱ quii' su talya ña'a̱, na' nu ndubi tsa ña'a̱ quiya' na' ñi'ya̱ laca sca chcua̱ ngatsi nu scui chu̱'.

APOCALIPSIS 2:8

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Esmirna, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, na' nu ntucua̱ lo'o nguxana lcaa cha', la cui' na' nu tya tyucua̱ lo'o tye lcaa cha': Chañi cha' ngujuii na', pana cua ndyu'ú na' chaca quiya'.

APOCALIPSIS 3:1

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Sardis, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱: Ndi'i̱ Xtyi'i ycui' Ndyosi lo'o na', bi' laca cati tya'a cui'i̱ lubii nu nda Ni ndyaa tyucui ña'a̱ chalyuu. La cui' jua'a̱ ya' na' ndacui nu cati tya'a cuii ndubi bi'. Cua nda na' cuentya ji'i̱ lcaa ña'a̱ nu ndu'ni ma̱, nacui̱ Ni. Jlo ti' na' cha' ngunu'u̱ cresiya ji'i̱ ma̱, masi nacui̱ ngu' quichi̱ cha' lubii tsa ndu'ni ma̱, nacui̱ Ni.

APOCALIPSIS 3:14

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Laodicea, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱: Chañi cha' ndyu'u tucua cha', lcaa cha' nu nda na' lo'o ñati̱; liñi tsa nchcui' na' cha' ji'i̱ ycui' Ndyosi Sti na' lo'o ñati̱, cha' tyucui tyiquee na' ndu'ni na' cña ji'i̱ ycui' Ni. Nu lo'o nguxana ndya' lcaa na nu ntsu'u chalyuu, stu'ba ti ndu̱ na' lo'o ycui' Ni nu ngua li', nacui̱ Jesús.

APOCALIPSIS 3:22

Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱.” Cua ndye cha' nu nda Jesús ndyaa slo taju ñati̱ ji'i̱ Ni scaa quichi̱.

APOCALIPSIS 3:7

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Filadelfia, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui̱' lo'o ma̱, na' nu laca̱ nu sca ti Sñi' ycui' Ndyosi: Xcui' lubii tsa cresiya 'na, xcui' cha' liñi ndu'ni na'. Juani laca na' loo ji'i̱ ñati̱ 'na ñi'ya̱ ngua jyo'o David loo ji'i̱ ngu' tya sa'ni la. Nu lo'o ta na' chacuayá' cha' cua'ni ñati̱ sca cña, ná tucui taca ji'i̱ tacu̱' cha' ji'i̱ ngu' bi' li'; nu lo'o tacu̱' na' cha' ji'i̱ ñati̱ cha' ná cua'ni ngu' sca cña, ná tucui taca ji'i̱ cua'ni cña bi' li'.