2 CORINTIOS 2:14 - Chatino Tataltepec

^14-15 Ndya tsa na' xlya'be ji'i̱ ycui' Ndyosi cha' stu'ba cha' ji'na lo'o Cristo. Laca cha' ñi'ya̱ si ndya'a̱ lo'o ycui' Ndyosi ji'na ndya'a̱ qui'i ti na calle, cha' ndyu'ni chi̱ Ni loo Jesucristo cha' cua ntiji̱loo yu ji'i̱ nu cuxi. Jua'a̱ ji'na ta Ni su tya'a̱ na laja ñati̱ bi', cha' lo'o na nsañi na cha' ji'i̱ ycui' Cristo ca slo lcaa ñati̱; ndacha' na cha' ji'i̱ ycui' Ndyosi ca slo ñati̱, masi nchcui' na lo'o ñati̱ nu nti' clyaá ji'i̱ nu cuxi, masi nchcui' na lo'o xa' ñati̱ nu ná nti' cuna cha' tso'o bi'. Pana ñi'ya̱ laca sca na tyixi xtyi'i nu nda xtyi'i ntyucua lcaa se'i̱, jua'a̱ laca cña nu ndu'ni na cuentya ji'i̱ ycui' Ndyosi. Ndiya tsa ti' ycui' Ndyosi ji'i̱, la cui' jua'a̱ ndiya ti' Ni cña nu ndyu'ni Cristo nde chalyuu xqui'ya na.

2 CORINTIOS 2:14 ပူးပေါင်းရင်းမြစ်များ

SAN JUAN 16:33

Cua nda na' lcaa cha' bi' lo'o ma̱ cha' ti̱ ti tyi'i̱ tyiquee ma̱ xqui'ya na' ―nacui̱―. Nde chalyuu ti'í ti' ñati̱ ña'a̱ ji'i̱ ma̱. Pana ná cube ti' ma̱, cua'ni tlyu tyiquee ma̱; na' laca̱ loo nde chalyuu, cha' cua ntiji̱loo na' tsiya' ti ji'i̱ nu xña'a̱.

ROMANOS 1:8

Su nguxana ti quityi re, ndyu'ni tlyu na' ji'i̱ ycui' Ndyosi xqui'ya Jesucristo. Tso'o tsa nti' na' cha' cua ngusñi lcaa tya'a ma̱ cha' ji'i̱ Jesús, ca lcaa quichi̱ ndañi cha' jlya ti' ma̱ cha' bi'.

ROMANOS 15:19

Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na.

ROMANOS 6:17

Tso'o tsa nti' na' cha' tyucui tyiquee ma̱ ndyu'ni ma̱ cña ji'i̱ ycui' Ndyosi, tsa ña'a̱ cha' nu ngulu'u ngu' ji'i̱ ma̱. Nu cha' cuxi, bi' laca nu ngua loo ji'i̱ ma̱; pana lo'o cua ngulaá ma̱ ji'i̱ nu cuxi bi', li' nguxana ma̱ ndu'ni ma̱ cña cha' caja chaca chalyuu su caca lubii cresiya ji'i̱ ma̱, cha' ycui' Ndyosi laca loo ji'i̱ ma̱ juani.

ROMANOS 8:37

Masi jua'a̱, lye tsa ntyiji̱loo na ji'i̱ nu cuxi bi'; nga'aa nchca ji'i̱ nu cuxi bi' culo cña ji'na tsiya' ti xqui'ya Jesús, cha' ntsu'u tsa tyiquee Ni ña'a̱ Ni ji'na.

1 CORINTIOS 12:8

Ndi'ya̱ laca cña nu taca cua'ni na xqui'ya Xtyi'i ycui' Ndyosi: ntsu'u ngu' nu ndacha' liñi ñi'ya̱ nu ngua ji'i̱ Jesús; lo'o jua'a̱ ntsu'u ngu' nu tso'o tsa nclyu'u tyucui̱i̱ cha' xñi na cha' ji'i̱ ycui' Ndyosi;

1 CORINTIOS 15:37

Si'i na cua laca ntyucua si'yu lo'o ndyataa na ji'i̱; si'yu ti ndyataa na, masi si'yu trigo, masi xi xa' la si'yu.

1 CORINTIOS 15:57

Pana cua xa' ña'a̱ laca juani, cua nda Ni chacuayá' cha' tyiji̱loo na ji'i̱ nu xña'a̱ xqui'ya cña nu ngua'ni Jesús nu lo'o ndyu'ú yu chaca quiya', bi' cha' quiña'a̱ tsa xlya'be ta na ji'i̱ ycui' Ndyosi lacua.

2 CORINTIOS 1:11

Lo'o jua'a̱ taca xtyucua ma̱ ji'i̱ ya nu lo'o chcui' ma̱ lo'o ycui' Ndyosi cuentya ji'i̱ cuare. Tucuá Ni cha' nu chcui' ma̱ lo'o Ni, cha' tyu̱u̱ tya'a ma̱; li' cua'ni Ni cha' caca tso'o ji'i̱ ya. Lo'o li' tyu̱u̱ tya'a ma̱ taca tya ma̱ xlya'be ji'i̱ ycui' Ndyosi cuentya ji'i̱ ya, nu lo'o cua ngulaá ya ji'i̱ nu cuxi.

2 CORINTIOS 8:16

Tso'o tsa nti' ya lo'o nchcui' ya lo'o ycui' Ndyosi, cha' nu Tito, tya'a ndya'a̱ ya cña bi' ni, nti' tsa yu xtyucua yu ji'i̱ ma̱. Stu'ba ti nti' yu lo'o na' cha' xtyucua ya ji'i̱ cu'ma̱.

2 CORINTIOS 9:15

Tso'o tsa laca si tya na xlya'be ji'i̱ ycui' Ndyosi lacua, cha' tlyu tsa cha' tso'o laca nu cua nda Ni ji'na, ni nga'aa nchca ca cuayá' ti' na cha' bi'.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

EFESIOS 5:20

Lo'o jua'a̱ cua ña'a̱ ca hora tso'o tya ma̱ xlya'be ji'i̱ ycui' Ndyosi Sti na chacuayá' ji'i̱ Jesucristo nu Xu'na na; tya ma̱ xlya'be ji'i̱ Ni cuentya ji'i̱ lcaa cha' nu ndyaca ji'i̱ ma̱, masi tso'o cha' bi', masi ná tso'o cha' bi'.

FILIPENSES 4:18

Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.

COLOSENSES 1:23

Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.

COLOSENSES 1:6

Cua lijya̱ ngañi la cha' tso'o ji'i̱ Jesús bi' tyucui ña'a̱ chalyuu, lo'o jua'a̱ lijya̱ ndyaca tso'o la cresiya ji'i̱ ñati̱ macala su nduna ngu' cha' bi'. La cui' jua'a̱ ndyaca tya lo'o ndyuna ma̱ cha' bi' tya clyo; tya li' cua ndyuna ma̱ cha' ndu'ni tsa ycui' Ndyosi cha' xlya'be lo'o ñati̱, li' ngua cuayá' ti' ma̱ cha' chañi tsa laca cha' bi'.

COLOSENSES 2:15

La cui' ti lo crusi bi' cua ntiji̱loo Cristo ji'i̱ lcaa nu laca xu'na na, jua'a̱ ji'i̱ lcaa cui'i̱ nu laca loo ji'na. Lo'o ngua'ni chi̱ Ni loo Cristo xqui'ya cha' cua ntiji̱loo yu ji'i̱ lcaa xu'na na bi', li' ndyalo'o Cristo ji'i̱ xu'na bi' laja ñati̱ nu lijya̱ qui'i ti, cha' ña'a̱ cui'ya lcaa ñati̱ cha' cua ntiji̱loo Cristo ji'i̱ lcaa xu'na bi'.

1 TESALONICENSES 1:8

Cua ngañi cha' ji'i̱ ycui' nu Xu'na na nde lcaa quichi̱ xqui'ya cu'ma̱. Si'i ngu' Macedonia ti, ni si'i ngu' Acaya ti, masi ca ta'a ñati̱ ji'i̱ Jesucristo, cua ndyuna ngu' cha' bi' tyucui ña'a̱ chalyuu; nga'aa ntsu'u cha' ta ya cha' lo'o ngu' bi' cuentya ji'i̱ ma̱, cha' ngusñi ma̱ cha' ji'i̱ ycui' Ndyosi, cha' cua jlo ti' ngu' cha' bi'.

1 TESALONICENSES 3:9

Ná nchca tye cha' tya ya xlya'be ji'i̱ ycui' Ndyosi Sti na xqui'ya cu'ma̱, cha' tso'o tsa ntsu'u tyiquee ya xqui'ya cu'ma̱.

1 TIMOTEO 2:8

Bi' cha' lacua, lcaa se'i̱ su ndyu'u ti'i̱ ngu' nu ntsu'u cha' ji'i̱ lo'o Jesucristo tsa tlyu ti, nti' na' cha' chcui' ngu' lo'o ycui' Ndyosi. Tso'o ti tyiquee ngu' ta ngu' cha' lo'o ycui' Ndyosi li', cha' ná tso'o chcui' ngu' lo'o Ni si ñasi̱' ngu', ni ná tso'o chcui' ngu' lo'o Ni laja lo'o nxu̱u̱ tya'a ngu'.

2 TIMOTEO 2:2

Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

APOCALIPSIS 7:12

Li' nacui̱ nu ngu' xca̱ bi': Jua'a̱ caca cha' lacua; cua'ni tlyu na ji'i̱ Ni, cua'ni chi̱ na loo Ni, tya na xlya'be ji'i̱ ycui' Ni. Chcui' na cha' lcaa cha' jlo ti' Ni, na ji'i̱ Ni laca lcaa lo na nu ntsu'u chalyuu; lcaa lo cña tsiya' ti nchca ji'i̱ Ni cua'ni Ni, sca ti ycui' Ni ntsu'u chacuayá' ji'i̱ Ni cua'ni Ni lcaa cña. Lcaa yija̱ ná nga'a̱ cha' tye cha' jua'a̱ caca ji'i̱ ycui' Ndyosi Sti na. Chañi cha' jua'a̱ caca. Jua'a̱ nacui̱ ngu' xca̱ ji'i̱ tya'a ngu'.