2 CORINTIOS 12:2 - Chatino Tataltepec

² Sca ñati̱ nu cua ngusñi cha' ji'i̱ Cristo laca na'; nu juani cua ntsu'u tii jlyacua yija̱ tya lo'o ngua ti' na' cha' ya̱a̱ ycui' Ndyosi ya̱qui'ya Ni 'na, cha' li' ndya'a̱a̱ ca chaca chalyuu nde cua̱ la, ca su ntucua ycui' Ndyosi. Nga'aa jlo ti' na' si chañi cha' ndya'a̱ na' ca ndacua, si laja xcalá ti na' ngulu'uloo ti cha' bi' 'na; sca ti ycui' Ndyosi jlo ti'.

2 CORINTIOS 12:2 ပူးပေါင်းရင်းမြစ်များ

SAN LUCAS 24:51

Laja lo'o nclyacua̱ yu ji'i̱ ngu', hora ti ndu'u yu ndyaa yu nde cua̱ li'.

SAN JUAN 6:56

Lo'o cua ña'a̱ ca ñati̱ nu jua'a̱ cacu ngu', nu jua'a̱ co'o ngu' cha' nu ta na' ji'i̱ ngu' ―nacui̱―, lcaa tsa̱ tyi'i̱ ngu' bi' lo'o na', tyi'i̱ na' lo'o ngu' bi' li'.

LOS HECHOS 14:6

Pana ngua cuayá' ti' Pablo lo'o tya'a ndya'a̱ yu cha' bi', ngusna ngu' ndyaa ngu' ca xa' quichi̱ loyuu su cuentya Licaonia li', ndyalaa ngu' ca quichi̱ Listra. Lo'o li' ndyaa lye la ngu' ca quichi̱ Derbe lo'o lcaa quichi̱ cacua ti.

LOS HECHOS 22:17

’Nu lo'o nguxtyu̱u̱ na' nde Jerusalén, li' ndyaa na' ne' laa tlyu jua cha' chcui' na' lo'o ycui' Ndyosi. Ñi'ya̱ nti' si nchcui' sca xcalá na,

ROMANOS 16:10

jua'a̱ ji'i̱ Apeles, cha' cua jlo ti' na cha' ngusñi tso'o yu cha' ji'i̱ Cristo xqui'ya lcaa cña nu ngua ji'i̱ yu cuentya ji'i̱ Cristo; jua'a̱ ji'i̱ lcaa ngu' tya'a Aristóbulo;

ROMANOS 16:3

Chcuicha' ma̱ ji'i̱ Priscila lo'o Aquila, tya'a ndyu'ni na' cña ji'i̱ Jesucristo.

ROMANOS 16:7

Lo'o jua'a̱ chcuicha' ma̱ ji'i̱ Andrónico lo'o Junias tya'a quichi̱ tyi na', tya'a ngutu'u na' ni'i̱ chcua̱. Tyucuaa ngu' bi' laca ngu' ñati̱ nu cua nda Cristo ji'i̱ ndyaa, cha' ta ngu' cha' ji'i̱ ycui' Ndyosi lo'o ngu' nu cua tyijyu' la; nguula tsa cña nu ngua'ni ngu' cuentya ji'i̱ nu Xu'na na. Pana yala la ngusñi ngu' bi' cha' ji'i̱ Jesús, lo'o li' tiya' la ngusñi na' cha' bi'.

ROMANOS 16:9

lo'o jua'a̱ ji'i̱ Urbano, tya'a ndyu'ni na' cña ji'i̱ Jesucristo; jua'a̱ ji'i̱ Estaquis, la cui' jua'a̱ tyaca'a tsa yu 'na;

ROMANOS 8:1

Pana juani ni, ndi'ya̱ ngua'ni ycui' Ndyosi: Nga'aa ndyanu yabe' hichu̱' na, si stu'ba ntsu'u cha' ji'na lo'o Jesucristo; nga'aa taca ji'i̱ nu cuxi nu ntsu'u chalyuu cojolaqui ji'na juani, cha' Xtyi'i ycui' Ndyosi laca loo ji'na lo'o ndi'i̱ na nde chalyuu.

1 CORINTIOS 1:30

Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi.

2 CORINTIOS 11:11

Si'i xqui'ya cha' ná ntsu'u tyiquee na' ña'a̱ na' ji'i̱ ma̱, bi' cha' nchcui' na' jua'a̱; cua jlo ti' ycui' Ndyosi cha' tso'o tsa nti' na' ña'a̱ na' ji'i̱ cu'ma̱.

2 CORINTIOS 13:5

Cua'ni cuayá' ma̱ ji'i̱ ycui' ca ma̱ lacua, cha' ca cuayá' ti' ma̱ si chañi cha' tya ndyanu tyucui cha' ji'i̱ Jesucristo ne' cresiya ji'i̱ ma̱. Nga'a̱ cha' tyi'u ti' ma̱ cha' ndyanu Xtyi'i Jesucristo ne' cresiya ji'i̱ sa scaa ma̱; sca ti si cua ngunu'u̱ cresiya ji'i̱ ma̱ lo'o ycui' Ndyosi tsiya' ti, nga'aa tyanu Ni lo'o ma̱ li'.

2 CORINTIOS 5:17

Lo'o juani nu lo'o cua ngusñi sca ñati̱ cha' ji'i̱ Cristo, li' cua nguxcutsa'a̱ Ni cha' ji'i̱ ñati̱ bi'; cua ndye cha' ji'i̱ yu lo'o cha' cuxi nu ngua'ni yu nu ngua tya tsubi' la. Chaca chalyuu cucui, bi' laca nu cua ngujui ji'i̱ yu juani.

2 CORINTIOS 5:21

Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

GÁLATAS 1:22

Pana nu xa' la taju ñati̱ tya'a ngusñi na cha' ji'i̱ Jesucristo nu ndi'i̱ quichi̱ su cuentya Judea, tya lyiji tyuloo ngu' bi' 'na nu ngua li'.

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

EFESIOS 4:10

La cui' Jesús nu ngua'ya nde loyuu ni, bi' laca nu ndyacuí̱ ndyaa ca su tlyu la, ca su ntucua ycui' Ni ca nde cua̱. Lo'o juani cua ntsu'u Xtyi'i ycui' Jesús tyucui ña'a̱ loyuu chalyuu, lo'o jua'a̱ ntsu'u Xtyi'i ycui' Jesús lcaa se'i̱ nde cua̱.

1 TESALONICENSES 4:17

li' tyacuí̱ lcaa ngu' tya'a na ña'a̱ lu'ú ti na, cha' tyalo'o ycui' Ni ji'na. Ca laja coo nde cua̱ tyacua tya'a na lo'o jyo'o tya'a na li', cha' lcaa na, stu'ba ti tyacua tya'a na lo'o ycui' nu Xu'na na ca bi'. Tsa cu' ti tyi'i̱ na lo'o ycui' Ndyosi li'.

HEBREOS 4:14

Lo'o cua ngusñi na cha' ji'i̱ Jesús, li' nga'a̱ cha' cua'ni na cha' tso'o ti tyanu cha' bi' ne' cresiya ji'na. Cua laca ntsu'u sca sti jo'ó nu laca loo la nu ndu̱ cuentya ji'na; Jesús laca bi', nu sca ti Sñi' ycui' Ndyosi laca yu. Cua ndyaa Jesús ca su ndi'i̱ ycui' Ndyosi Sti yu; juani ndu̱ Jesús slo Ni, nchcui' cha' ji'na lo'o Ni.

HEBREOS 9:24

Bi' cha' nga'aa ndyaa Cristo nde ne' laa nu ngüiñá ñati̱ nde chalyuu ti, masi ntucua bi' cuentya ji'i̱ ycui' Ndyosi; na cua ndyaa liñi Ni ca slo ycui' Ndyosi ca nde cua̱. Ca bi' ntucua Ni juani, cha' chcui' lo'o ycui' Ndyosi cuentya ji'na.

APOCALIPSIS 1:10

Tsa̱ clyo ji'i̱ semana ngua, tsa̱ ji'i̱ ycui' nu Xu'na na, li' tyucui ña'a̱ na' ngua tii na' cha' ngua'ya Xtyi'i ycui' Ndyosi lo na' tsiya' ti; nga'aa ngua cua'ni na' xa' la cha'. Li' ndyuna na' cha' nchcui' tsaca ñati̱ nde chu̱' su ndu̱ na'; cui̱i̱ ngusi'ya bi' lo'o nchcui', ñi'ya̱ ndañi nclya'á ngu' sca cui'chcua̱.

APOCALIPSIS 12:5

Ngula sca sñi' qui'yu ji'i̱ nu cuna'a̱ bi' li'. Cua lijya̱ bi' chalyuu, cha' liñi ti culo bi' cña ji'i̱ lcaa ñati̱ chalyuu; pana hora ti ngüi'ya ycui' Ndyosi ji'i̱ sñi' nu cuna'a̱ bi', ndyalo'o Ni ji'i̱ yu nde su tlyu su ntucua ycui' Ni.

APOCALIPSIS 4:2

Hora ti ngua'ya Xtyi'i ycui' Ndyosi lo na' li'. Cla'be nde cua̱ bi' na'a̱ na' cha' ntucua sca yaca xlya tlyu nu tso'o tsa ña'a̱. Nde bi' ntucua sca ñati̱.