2 CORINTIOS 11:7 - Chatino Tataltepec

⁷ Ná ngusñi na' caya' ji'i̱ ma̱ tsiya' ti nu lo'o ndi'i̱ na' ngulu'u na' cha' tso'o ji'i̱ ycui' Ndyosi ji'i̱ ma̱. Cua ntaja'a̱ na' li' cha' caca ti'í la na' xqui'ya cu'ma̱, cha' caja ñi'ya̱ caca tso'o la tyiquee ycui' cu'ma̱. ¿Ha ná tso'o cha' ngua'ni na' jua'a̱, nti' cu'ma̱?

2 CORINTIOS 11:7 ပူးပေါင်းရင်းမြစ်များ

LOS HECHOS 20:33

Ná ngua ti' na' xñi na' cñi ji'i̱ ngu'; ni late' nu ta ngu' 'na, ná ntaja'a̱ na' xñi na' ji'i̱.

LOS HECHOS 20:34

Jlo ti' ma̱ cha' ycui' na' ngua'ni na' cña lo'o ya' ti na' cha' caja cñi cha' tyiji̱ yu'u jna' chalyuu. Lo'o jua'a̱ tya nda na' xlya'be ji'i̱ ngu' nu ndya'a̱ lo'o na'.

ROMANOS 1:1

Pablo laca na' nu nscua̱ quityi re cha' ca̱a̱ nde quichi̱ Roma ca su ndi'i̱ ma̱, cu'ma̱ nu ngusñi ma̱ cha' ji'i̱ Jesucristo. Ndyu'ni na' cña ji'i̱ ycui' Ndyosi, cha' ycui' Ni ngusubi Ni jna' cha' tsa'a na' chcui' na' cha' tso'o ji'i̱ Ni lo'o ñati̱.

1 CORINTIOS 9:12

Xa' la tya'a ndyu'ni ya cña ndyiji na laca nu lyiji ji'i̱ ngu' nu lo'o nda ma̱ xi xcaya' ngu' bi'. ¿Ha ná tso'o si la cui' ti cha' caja ji'i̱ ya, ñi'ya̱ nu ndyiji ji'i̱ ngu' bi'? Tsa bi' ti cha', ná ndijña ya cha' tso'o bi' ji'i̱ ma̱ tsiya' ti. Ndalo tsa ya ji'i̱ cua ña'a̱ ca cha' ti'í nu ndyacua ji'i̱ ya, cha' ná nti' ya tsiya' ti tacu̱' ya ji'i̱ cha' tso'o ji'i̱ Cristo nu nchcui' ya lo'o ma̱, cha' ná cuna ñati̱ ji'i̱ cha' bi'.

1 CORINTIOS 9:6

Si'i sca ti na' lo'o Bernabé nu nga'a̱ cha' cua'ni lye ya cña cha' caja na cacu ya, laja lo'o nclyu'u ya cha' ji'i̱ ycui' Ndyosi ji'i̱ ngu'.

2 CORINTIOS 10:1

Pablo laca na' nu nchcui' na' lo'o cu'ma̱ juani; tyu'u cha' clyu ti' ji'i̱ ma̱, masi chcui' liñi na' lo'o ma̱. Nacui̱ ngu' cha' ntsi̱i̱ na' lo'o nchcui' na' lo'o ma̱ nu lo'o ndi'i̱ na' slo ma̱, pana tyaala tsa ndu'ni na' lo'o ma̱ nu lo'o nga'a̱ na' tyijyu'; jua'a̱ cha' nda ngu'. Tyi'u ti' ma̱ lacua, cha' xcui' tso'o ti nti' Cristo lo'o ña'a̱ Ni ji'na.

2 CORINTIOS 10:16

Lo'o li' xqui'ya cu'ma̱ caja ñi'ya̱ chcui' ya cha' tso'o nu ntsu'u ji'i̱ Cristo lo'o ngu' xa' quichi̱ nu ndi'i̱ tyijyu' la, nde loo la ca su ndi'i̱ cu'ma̱. Bi' cha' lacua, ná ndu'ni cha' chcui' ya cha' ji'i̱ cña nu cua ngua'ni xa' ñati̱ cuentya ji'i̱ Cristo.

2 CORINTIOS 12:13

Tsa bi' ti cha', ná ngüijña na' ji'i̱ cu'ma̱ cha' xtyucua ma̱ 'na, bi' cha' nti' ma̱ cha' chi̱i̱ nti' na' ña'a̱ na' ji'i̱ cu'ma̱; tso'o la ndu'ni na' lo'o ngu' xa' quichi̱, nti' ma̱. Tyu'u xi cha' clyu ti' ji'i̱ ma̱ lo'o na' lacua, cha' ná ndijña na' cha' bi' ji'i̱ cu'ma̱.

2 CORINTIOS 2:12

Ndya'a̱ na' ca quichi̱ Troas tya tsubi' la, ndyaa cacha' na' cha' ji'i̱ Jesús ji'i̱ ngu' quichi̱ bi'. Lo'o jua'a̱ ngua li', cha' tso'o tsa ndyuna ngu' quichi̱ bi' cha' ji'i̱ ycui' Ndyosi, xqui'ya cha' cua nda ycui' nu Xu'na na chacuayá' 'na cha' cua'ni na' cña ji'i̱ Ni ca ndacua.

1 TESALONICENSES 2:9

Cu'ma̱ ngu' tya'a na, tyi'u ti' ma̱ cha' lye tsa ngua'ni ya cña cha' caja ñi'ya̱ tyiji̱ yu'u ya chalyuu; tsa̱ lo'o talya ngua'ni ya cña lo'o ya' ti ya, cha' ná culiji ma̱ cñi ji'i̱ ma̱ lo ya laja lo'o ngulu'u ya cha' tso'o bi' ji'i̱ ma̱.

2 TESALONICENSES 3:8

Ná ndyacu laja ti ya slo cu'ma̱ nu ngua li'; nda ya caya' cha' nguxacu ma̱ ji'i̱ ya, cha' ngua'ni ya cña cha' cajá ñi'ya̱ nu tyiji̱ yu'u ji'i̱ ya. Tsa̱ lo'o talya ngua'ni ya cña lo'o ya' ti ya, cha' si'i cu'ma̱ nu ngüi'ya ma̱ na nu ndyacu ya li'.