2 CORINTIOS 11:20 - Chatino Tataltepec

²⁰ Na ndalo tsa tyiquee ma̱ ji'i̱ lcaa ngu' tonto bi', masi lye tsa nclyo ngu' cña ji'i̱ ma̱, masi ndyu'ni ngu' ngana ji'i̱ ma̱, masi ndatsaa tsa ngu' ji'i̱ ma̱ cha' cua'ni ma̱ cha' cuxi, masi ndu'ni tyucuaa tsa ti' ngu' lo'o ma̱, masi lu'ba ti ntyiji'i̱ ngu' saca' ma̱; cua ndalo tsa tyiquee ma̱ ji'i̱ ngu' bi'.

2 CORINTIOS 11:20 ပူးပေါင်းရင်းမြစ်များ

SAN MARCOS 12:40

Hasta nxlyaá mstru bi' ni'i̱ ji'i̱ nu cuna'a̱ ti'i, jua'a̱ ji'i̱ lcaa na nu ntsu'u ji'i̱ nu cuna'a̱ bi' nxlyaá ngu'. Tyiquee' nchcui' mstru bi' lo'o ycui' Ndyosi; pana na cuiñi ti ndu'ni ngu' jua'a̱, cha' ña'a̱ ñati̱ ji'i̱ ngu' nti' ngu'. Bi' cha' lye la xcube' Ni ji'i̱ mstru bi', nu lo'o tyalaa tsa̱ cha' cua'ni cuayá' Ni ji'i̱ lcaa ñati̱.

SAN LUCAS 6:29

Lo'o quiji'i̱ ngu' ndacu̱' hique ma̱, li' xtyacui ma̱ ta ma̱ chaca tsu' saca' ma̱ cha' quiji'i̱ ngu' ji'i̱ ma̱ chaca quiya' li'. Lo'o xlyaá sca ñati̱ late' tonu tu'ba nu nchcu' ma̱, li' ta ma̱ chacuayá' cha' lo'o camxa ji'i̱ ma̱ qui'ya ngu' tsaa ngu'.

1 CORINTIOS 4:11

Masi la cui' tyempo juani ti ntsu'u quiya' lo'o ná ndyiji na cacu ya, ná ndyiji na co'o ya, masi late' cusu̱ lacu' ya ntsu'u quiya'; ntyiji'i̱ ngu' ji'i̱ ya, ni ná ntsu'u tyi cua, xcui' na ndya'a̱ yu'u ti ya.

2 CORINTIOS 1:24

Pana tso'o la masi si'i xqui'ya cuare ti taquiya' ma̱ cha' ji'i̱ ycui' Ndyosi, cha' ne' tyiquee ycui' ca ma̱ cua ngusñi tso'o ma̱ cha' ji'i̱ Jesús. Na cua nti' ya xtyucua ya ji'i̱ ma̱ cha' ca chaa la ti' ma̱ laja lo'o ndyu'ni tlyu ycui' ca ma̱ ji'i̱ Jesús.

2 CORINTIOS 10:5

Ntsu'u cha' tyiji̱loo na ji'i̱ lcaa cha' cuiñi nu nchcui' ngu' ji'i̱ Cristo; jua'a̱ ntsu'u cha' tyiji̱loo na ji'i̱ lcaa cha' cuxi nu tiji̱' tsa ti' ngu' ji'i̱, nu ndaca'a tsa ji'i̱ ngu' cha' ná xñi ngu' cha' ji'i̱ ycui' Ndyosi. Nu lo'o cua nguxtyanu ngu' ji'i̱ lcaa cha' cuxi bi', li' taca cua'ni na cha' taquiya' ngu' ji'i̱ cha' nu ntsu'u ji'i̱ Cristo.

2 CORINTIOS 11:3

ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

2 CORINTIOS 12:16

Ná quiña'a̱ tsa cñi nguliji ma̱ lo na' li'; pana ña'a̱ ti tya ntsu'u xi ngu' tya'a ma̱ nu nchcui' cha' cua nguñilo'o na' ji'i̱ ma̱ cha' cua'ni na' ngana ji'i̱ ma̱.

GÁLATAS 2:4

Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.

GÁLATAS 4:25

Stu'ba ña'a̱ naa Agar bi' lo'o ca'ya Sinaí bi', cha' jua'a̱ ndyu'u cha' bi' cha'cña ji'i̱ ngu' Arabia; la cui' ca'ya bi' laca su nda ycui' Ndyosi cha' lo'o ngu' judío tya clyo. Hasta juani tlyu tsa cña nga'a̱ cha' cua'ni lcaa ngu' judío cuentya ji'i̱ cha' cusu' bi', tsa lo cña ñi'ya̱ nu ngua'ni jyo'o Agar cuentya ji'i̱ jyo'o Abraham nu ngua sa'ni la. Lo'o nu ngu' judío nu ndi'i̱ quichi̱ Jerusalén ni, cua nti' ngu' bi' tatsaa ngu' ji'na juani cha' taquiya' na ji'i̱ lcaa cña bi'.

GÁLATAS 4:3

La cui' jua'a̱ laca ji'na lo'o Jesús. Lo'o tya lyiji cuna na cha' ji'i̱ Jesús, caca ñacui̱ na cha' tya sube na, xqui'ya cha' tya ndu'ni na cña nu ndatsaa cua ña'a̱ ca jo'ó ji'na, ñi'ya̱ nu ndu'ni ti xa' ñati̱.

GÁLATAS 4:9

Lo'o juani cua nslo ma̱ ji'i̱ ycui' Ndyosi; hasta tso'o la ñacui̱ na, cua ndyuloo ycui' Ni ji'i̱ ma̱. ¿Ni cha' laca nti' ma̱ tya'a̱chu̱' ma̱ ji'i̱ cha' ji'i̱ ycui' Ndyosi lacua? Xa' cua'ni ma̱ cña nu ndatsaa cua ña'a̱ ca jo'ó nu cuxi ti bi' ji'i̱ ma̱ li', jo'ó nu ntsu'u ji'i̱ ñati̱ ti; pana ná ndyu'u tso'o cha' bi' tsiya' ti, ná caca cua'ni lyaá jo'ó bi' ji'na.

GÁLATAS 5:1

Cua ngua'ni lyaá Cristo ji'na, cha' taca tyi'i̱ tso'o ti na chalyuu. Bi' cha' ña'a̱ ti tya tyi'i̱ tso'o ti ma̱ chalyuu lacua; nga'aa ta ma̱ tyempo cha' caca loo xa' ñati̱ ji'i̱ ma̱, ñi'ya̱ si cua ngüi'ya ngu' ji'i̱ ma̱ cha' cua'ni ma̱ cña ji'i̱ ngu'.

GÁLATAS 5:10

Cuentya jna', ndyi'u tsa ti' na' ji'i̱ ma̱ xqui'ya ycui' nu Xu'na na, cha' jlya ti' na' cha' stu'ba ti ntsu'u tyiquee ma̱ lo'o cha' nu cua nchcui' ca na'. Ná ndu'ni cha' tilaca laca nu ndya'a̱ nchcui' cha' cuiñi lo'o ma̱ cha' xcutsi̱i̱ ji'i̱ ma̱, xcube' tsa ycui' Ndyosi ji'i̱ ñati̱ bi'.

GÁLATAS 6:12

Nu ñati̱ nu ndatsaa tsa ji'i̱ ma̱ cha' si'yu quiji̱ ma̱ ñi'ya̱ nu ndu'ni ngu' judío cha' culacua̱ ngu' ni, ndu'ni ngu' jua'a̱ cha' nti' ngu' cha' caca stu'ba cha' ji'i̱ ycui' ngu' lo'o tya'a ngu' judío; li' ná cua'ni lya' ti' tya'a ngu' judío ji'i̱ ngu' bi' si ngusñi ngu' cha' ji'i̱ Jesucristo nu ngujuii lo crusi, nti' ngu'.

FILIPENSES 3:19

Nga'a̱ cha' tyaa ngu' bi' ca chalyuu talya nu lo'o cajaa ngu', xqui'ya cha' sca ndyosi cuiñi ntsu'u ji'i̱ ngu' bi'; cua ña'a̱ ca na nu ndacui tsa ti' ngu' ji'i̱ cha' caja ji'i̱ ngu' nde chalyuu, bi' laca ndyosi ji'i̱ ngu' bi'. Lo'o jua'a̱ tyixi tsa ndu'ni ngu' lo'o tya'a ngu', masi nga'a̱ cha' ca tyuju'u tsa ti' ngu'; xcui' ntsu'u tyiquee ngu' ji'i̱ cua ña'a̱ ca na nu ntsu'u nde chalyuu.

1 TESALONICENSES 2:5

Si'i na tso'o tsa ndyu'ni ya lo'o ma̱ cha' cua'ni ya ngana ji'i̱ ma̱, ni si'i na tso'o tsa nchcui' ya lo'o ma̱ cha' caja cha' tso'o nu ntsu'u ji'i̱ ma̱ ji'i̱ ya. Jlo ti' ycui' Ndyosi cha' xcui' cha' liñi nchcui' ya; lo'o jua'a̱ cu'ma̱, cua ndyuna ma̱ cha' bi'.